မတ်မလီု ဂွံတီကေတ်ရ။
တန်ဗ္တောန်ဝွံ နာဲတၠညး ဒိုအ်ဇူလဝ် (ကမ္မတဳရေၚ်တၠုၚ်ကေၚ်ကာဗဟဵု) နူဗော်ဍုၚ်မန်တၟိ သ္ပဒါနပညာ သ္ကိုပ်သ္ကပံက်ပ္တန်လဝ် နကဵုစေတနာတုဲ လၟုဟ်မ္ဂး ကောန်တန်ဗ္တောန် တြုံတြုံ/ဗြဴဗြဴ ဗၞတ် ၄၈ တလ နူဒေသမန်နာနာ တိုန်စိုပ်ကတ်လ္ၚတ်မံၚ်ရ။ တန်ဗ္တောန်ဂှ် ပါ်လဝ် ၂ တုဲ ညးတအ်ဗ္တောန်ကဵုမံၚ် ဂွံတီကေတ်ရ။
“ခေတ်ဂှ် ပြံၚ်လှာဲကၠုၚ်ယျ၊ ဟွံလေပ်လိက်အၚ်္ဂလိက်တှေ် စပ်ကဵု ပရေၚ်ဂကူဒှ်ဒှ်၊ ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်မၞိဟ် ဒှ်ဒှ် လ္ဇုဲလလုဲအာဏောၚ်။ အဓိကဂှ် ရန်ကဵုသၟတ်မန်တအ် ဂွံလုပ်ဝိုၚ် ဂွံထပါ်အဒေါဝ်မၞိဟ် ဂံၚ်တုဲ ပံက်လဝ်တန်ဗ္တောန်ဏအ်” သာ်ဝွံ နာဲတၠညး ဂးရ။
တန်ဗ္တောန်ဏအ်ဂှ် လိက်အၚ်္ဂလိက် မွဲဟေၚ်ရ ဗ္တောန်ကဵု စနူသဇိုၚ် Elementary Level တုဲ အ္စာဗ္တောန်တအ်ဂှ် နူအပ္ဍဲဍုၚ် ၄ တလ အ္စာဍုၚ်မ္ၚး မွဲတလ ဗ္တောန်အာ ဒဵုကဵု ဂိတုမေမံက် သၞာံ ၂၀၁၆ တေံဏောၚ် မာံဗညာအံၚ် မအုပ်ဓုပ်ကောပ်ကာဲ တန်ဗ္တောန်ဂှ်ဟီုရ။
တန်ဗ္တောန်ဏအ်ဂှ် ဣဏအ် ဒှ်အလန်ကၠာအိုတ်ရ။ မၞိဟ်မိက်ဂွံတိုန် တန်ဗ္တောန်ဏအ်ဂှ် အောန်အိုတ် (သဝ်အိုတ်) ဒးဒှ်ညးကေၚ်သှ်လဝ် စှ်တန်ဏောၚ်တုဲ ဒးကတ်လ္ၚတ်အာ ဒဵုကဵုတန်ဗ္တောန်ဏအ် က္လိုဟ်ဏောၚ် မာံဗညာအံၚ်ဂးရ။
ကောန်တန်ဗ္တောန် မွဲတလမ္ဂး အယာံမာတ် ခရိတ်စ မွဲဂိတု မွဲဠက်ဘာ်ဟေၚ်ရ ဒးပၠောပ်တုဲ ခရိတ်တၞဟ်ဟ်ဂှ် နူနာဲတၠညး မွဲရ ဒုၚ်ဖ်အိုတ်အာ နဒဒှ်ဒါန် ပရေၚ်ပညာမွဲရ ဂွံတီကေတ်။
“ ညးလ္ၚဵုဂှ် ၜိုန်တုဲအာ တက္ကသိုလ်ကီုလေဝ် လိက်အၚ်္ဂလိက် ဟွံချိုတ်ပၠိုတ်ဂှ် ဂွံဆဵုကၠုၚ်။ မ္ၚးနူဆန္ဒ မိက်ဂွံကဵု သၟတ်မန်တအ် လေပ်အၚ်္ဂလိက်တုဲ၊ ဒးကေမ် ဒးစၟဳစ လ္တူကောန်တန်ဗ္တောန် တအ်ဏအ်ဏောၚ်ဂှ် ညိလေဝ် ဟွံချပ်လဝ်” သာ်ဝွံ နာဲတၠညး ဟီုဏာ ပ္ဍဲပေါဲပံက်တန်ဗ္တောန် ဂှ်ရ။
တန်ဗ္တောန် ဗ္တောန်ကဵုသၟးသၟး ဗီုဏအ်ဂှ် အောန်အိုတ် ၜိုတ်ပိဝါ ပံက်အာဏောၚ် သ္ဂုတ်သွာတ်လဝ်။ အကာဲအရာကဵု (အကာဲအရာခိုဟ်) မ္ဂး ကသေအ်ချပ်စကဵု သ္ကအ်ရဲမိဿဟာဲ ဗွိုၚ်ဇကုတုဲ သွက်ဂွံပံက်အာ ဟွံမွဲကဵုအပိုၚ်အခြာ(လၟိုန်န်) ဂှ် ချပ်လဝ်နွံ နာဲတၠညး ဟီုရ။
“အရီုဗၚ် အထံက်ပၚ် NGO ဂှ် ပိုဲဟွံကေတ်။ တန်ဗ္တောန်ဏအ် ၜိုန်ရအဲ က္ဍိုက်ပ်ပံက်လဝ်ကီုလေဝ် ရဲမိဿဟာဲတအ် မိက်ဂွံကဵု အရီုဗၚ်ကီုမ္ဂး ပ္ညဳညးသ္ကအ်တုဲ ဆက်ကၠောန်အာဏောၚ် ချပ်လဝ်ဗီုဂှ်” ရဂှ်လေဝ် နာဲတၠညး ဂးရ။
တန်ဗ္တောန်ဏအ် ဂွံဒှ်ဂှ် ခရိတ်ထံက်ပၚ် အ္စာကီု၊ ခရိတ်လိၚ် ဗ္ဒမ်ဗ္တောန်လိက် သီုကဵုသ္ၚိကီု မွဲမွဲဂိတုမ္ဂး အိုတ်ၜိုတ် (၂၀) ကိုဋ်ဏောၚ်တုဲ သွက်မွဲတန်ဗ္တောန် ကာလ ၆ ဂိတုဏအ်မ္ဂး အိုတ်ၜိုတ် ကၠံကိုဋ်ပြၚ် ဏောၚ် တော်တၟော်လဝ်ဗီုဂှ် နာဲတၠညး ဂးရ။