ထ်ၜး သွက်ပရေၚ်ပညာ ကေုာံ သၠုၚ်ဍာ်ဒကေဝ် သွက်သၟာကမၠောန် ဂကူမန် နွံတန်တဴမံၚ် ပ္ဍဲဍုၚ်သေံတံရ။
ဂကောံမန်ပံၚ်ကောံဍုၚ်သေံ ဒုၚ်သဇိုၚ်ကဵု ဂကောံမဟာဇန်မန်ဂမၠိုၚ် ဒက်ပတန်လဝ် နကဵုဒြဟတ်သၟာကမၠောန် ကၠောန်စမံၚ် ပ္ဍဲဍုၚ်သေံတုဲ ဂွံအာယုက်ဗၞတ် (၂) သၞာံတုဲ ကၠောန်ဗဒှ်ကောံဓရီုဇၞော် လၟေၚ်သၞာံ ညးတံ ပ္ဍဲစၟတ်တ္ၚဲ (၂-၃) ဂိတုဂျာန်ဂျဝါရဳ သၞာံ (၂၀၁၆) ဝွံရောၚ်။
အတိုၚ်သဘာပတိ ဂကောံမန်ပံၚ်ကောံ ဍုၚ်သေံ နာဲမန်အေ ဟီုမ္ဂး ＂ယဝ်ရ ဂကောံမန်ပိုဲ ဂကူမန်ပိုဲ နွံတန်တဴမံၚ် ပ္ဍဲဍုၚ်သေံဏအ်ဏီမ္ဂး ဂကောံမန်ပံၚ်ကောံပိုဲတအ် ဂွံတန်တဴအာ ဍာ်ဇမၠိၚ်မာန်ဂှ် ညးညးအဲအဲ ဒးဗိုၚ်ကၠောန်ညးသကအ်ရောၚ်＂ ဆဝ်ဗ္ၚုဟ်ဏာ ညးစၞးဂကောံနာနာ တိုန်စိုပ််ကၠုၚ် ဗၞတ် (၁၅၀) တၠတံရ။
တၚ်ရန်တၟအ် ကောံဓရီုဇၞော် ဂကောံမန်ပံၚ်ကောံဍုၚ်သေံ သၞာံဏံဂှ် ညးတံ ဖျေံလဝ် – သွက်ဂွံရီုဗၚ်အာဂကူမန်၊ သွက်ဂွံရေၚ်တၠုၚ်သ္ပစၞး ကုဂကူမန် နွံတန်တဴပ္ဍဲဍုၚ်သေံ၊ သွက်ဂွံဒက်ပတန်အာ ပရေၚ်ညဳသၟဟ်ဂကူ၊ သွက်ဂွံသၠုၚ်လညာတ် ကေုာံ ပရေၚ်ပညာ၊ သွက်ဂွံမၚ်မွဲအာ အရေဝ် ဘာသာ သာသၞာတံရောၚ်။
ဂကောံမန်ပံၚ်ကောံဍုၚ်သေံ ပ္ဍဲကဵုသၞာံဏံ ကော်ဘိက်လဝ် ညးစၞး ဂကောံသၚ်သၟတ်မည်ပံၚ်ကောံ နူကဵုဍုၚ်မန်တေံတုဲ စပ်ကဵုပရူပြသၞာ ပရေၚ်ညဳသၟဟ်ဂကူ ပ္ဍဲကဵုဍုၚ်မန်တေံ အကာဲအရာ နွံတဴသာ်လဵုကီု၊ စပ်ကဵုအကာဲအရာ ပေဲါရုဲမာဲ (၂၀၁၅) ဂှ်လေဝ် တၠဂုဏ်အာစာနာရဒ သောၚ်ကလးကဵုညးတိုန်စိုပ်တံရ။
ပ္ဍဲပေဲါရုဲမာဲ (၂၀၁၅) ဏံ ၜိုန်ရ ဂကူမန်တံ ဂစာန်ကၠုၚ် မာဲမန် ညံၚ်ဂွံစုတ်ကဵုဗော်မန် အမာတ်မန်ကီုလေဝ် ဟိုတ်နူကဵု အမာတ်မန်တအ် ပြးဇး ပညဳပညပ် ဟွံဂွံကီု၊ အသိၚ်ဗော်အေန်အေဝ်ဒဳ ဇၞော်ကီု၊ ညးဍုၚ်ကွာန် ဂကူမန်တံ ကဵုမာဲ ဟွံလေပ်ဍၚ်ၚ်တုဲ ဒးကျအာမာဲရောၚ် သောၚ်ကလး ကုညးမတိုန်စုိုပ်တံရ။
ပ္ဍဲဍုၚ်သေံဝွံ ဂကူမန် အဝဲကဵုမာဲ အကြာအာယုက် (၁၈) ကဵု (၄၀) သၞာံတံ နွံတဴမံၚ် ဗၞတ် နူ (၃၀၀၀၀၀) တၠ စဵုကဵု (၅၀၀၀၀၀) တၠ ဒှ်တုဲ ညးတံဂှ် အခေါၚ်ကဵုမာဲ ဟွံမွဲတုဲ မာဲသွက်ဂကူမန်ဂှ် ဒးဂိအာကီုရ။ ဂကူမန် လၟိဟ်ဗွဲမဂၠိုၚ်ဂှ် နွံမံၚ် ပ္ဍဲကဵုဒေသမဟာဇျာဲရ။
စၟတ်တ္ၚဲ (၂) အခိၚ်ဗ္တံဂှ်လေဝ် ကၠောန်သ္ပပေဲါသၠာဲလညာတ်မွဲ စပ်ကဵု ပြသၞာပရေၚ်ညဳသၟဟ် ကေုာံ ဂၠာဲနဲကဲ သွက်ဂွံဒက်ပတန်ပရေၚ်ညဳသၟဟ်ဂကူမန်ဂှ် အာစာသဝ်နာဲယှိုဲတိၚ် (သဘာပတိတြေံ ဂကောံပံၚ်ကောံပရေၚ်ဂကူမန် – MAU) သောၚ်ကလးကဵု ဗီုပြၚ်ကေၚ်ဒက်ပတန်လဝ် ပရေၚ်ညဳသၟဟ်ဂကူ အကြာဗော်ဍုၚ်မန်တၟိ ကဵု ဗွိုၚ်ဂကူမန်ပိသွာၚ် (ဍုၚ်မ္ၚး၊ ဍုၚ်သေံ ကေုာံ ဍုၚ်မန်) တံတုဲ နကဵုဂကောံပံၚ်ကောံပရေၚ်ဂကူမန် သွက်ဂွံက္လေၚ်ကၠောန်အာ ကောံဓရီုဇၞော်ပရေၚ်ဂကူမန် မွဲဝါပၠန်ဂှ် သဳကၠဳဏာရ။
ပ္ဍဲအရာ ဖျေံပရေၚ်ကမၠောန်အဓာန်ဂတဂှ် အဓိကညးတိုန်စိုပ်တံ သဳကၠဳအာ ပရူပရေၚ်ညဳသၟဟ်ကောန်ဂကူမန်ကီု သွက်ဂွံသၠုၚ်ပတိုန် ဍာ်ဒကေဝ်ပရေၚ်ပညာတံကီုရ။
ပ္ဍဲကဵုကောံဓရီုဇၞော်ဂှ် ညးစၞး ဗၞတ် (၁၅၀) တၠတံ တိုန်စိုပ် နူကဵုသ္ကုတ်ဒေသသၟဝ်ကျာဍုၚ်သေံ (ခရိုၚ်ကမ္မရဳ ကဵု နဃန်ပရထုမ်)၊ နူဒေသသၠုၚ်ကျာ (ကအ်ပူကေတ်) ကေုာံ ဒေသအဒေါဝ်ဍုၚ်သေံ (ဗွဳဗွိုၚ်ၜၚ်ကံက် ကဵု ခရိုၚ်မဟာဇျာဲ) တုဲ ဂကောံသၚ်သၟတ်မန် ပ္ဍဲဍုၚ်သေံကီု ခမဳသၚ်ကေတ်မံၚ်ပညာ ပ္ဍဲဍုၚ်သေံကီုတိုုန်စိုပ်ရ။