ပ္ဍဲဂိတုဇာန္နဝါရဳ ၁၈၊၁၉ ဂှ် ဥက္ကဌကၠတ်ထဝ် တွဵုရးမန် လၟုဟ်ဏံကဵု ညးစၞးကၠတ်ထဝ် အပ္ဍဲတွဵုရးမန် မတိုန်ကၠုၚ်နူပေါဲရုဲမာဲ ၂၀၁၅ တံ သ္ပပေါဲဆဵုဂဗသဳကၠဳ ပ္ဍဲၝောံခန် ကၠတ်ထဝ်တွဵုရးမန်ရ။
ပ္ဍဲအရာဆဵုဂဗ ညးသ္ကံဏံဂှ်ဝွံ ကလောန် ကၠတ်ထဝ် အလန်ပထမ ကၠောန်ကၠုၚ်လဝ်တံကီု၊ ဂလာန်လညာတ် ပ္တိုန်ထ္ၜးလဝ်တံဂှ်ကီု၊ သၞောဝ်ဥပဒေ မချူလဝ်တံဂှ်ကီု က္လေၚ်ပ္တိုန်ထ္ၜး လဴက္လးညးသ္ကံတုဲ သွက်ဂွံပြံၚ်ပၟပ် တာလျိုၚ် ကၠတ်ထဝ်ဂှ်လေဝ် သဳကၠဳကၠုၚ် ညးသ္ကံရ။
ဥက္ကဌကၠတ်ထဝ် တွဵုရးမန် ဦးကျေန်ဖေ ဟီုဂှ် “ ဒးဟီုတပ်ပ်တှေ် ဘဝတွဵုရးမန် ဗွဲအနာဂတ်ဂှ် ပၟပ်စုတ် ပ္ဍဲတဲ ညးစၞးတိုန်တၟိ ၃၁ တလဏံတုဲရ။ နူကဵု ၂၀၁၆ ဏံ ဒဵုကဵု ၂၀၂၁ တေံ ပ္ဍဲပွိုၚ် ၅ သၞာံဂှ် အစောံစရာဲကလောန် မၞိဟ် ၃၁ တလဏံ မှာဇန် ညးဍုၚ်ကွာန်တံ ရံၚ်ခ္ဍိုဟ်အာ ဗီုလဵုပၠန်ရော။ အဲမိက်ဂွံဟီုဂှ် ညံၚ်ဂွံခိုဟ်ဂှ် ဂစာန်အာအိုတ်ညိ။ ခိုဟ်မာန်ဏောၚ်လေဝ် အဲပတှေ်ကေတ်ရ။ ကဵုဂွံဒှ် ခိုဟ်ဟ်ညိဂှ်လေဝ် အဲရာဒနာကဵုရ” သာ်ဝွံ ညးဟီုရ။
ပ္ဍဲကဵု ဂလာန်လညာတ် မပ္တိုန်ထ္ၜးလဝ် ပ္ဍဲကၠတ်ထဝ် အလန်ပထမတေံဂှ် ဂလာန် ညးဂလိုၚ် စှေ်စိုတ်လေဝ်နွံ၊ ဂလာန် ဗ္ဒိုအ်လဝ်ဂှ်လေဝ်နွံတုဲ ဂလာန် မဗ္ဒိုအ်စွံလဝ်တံဂှ် က္လေၚ်သ္ၚဳဂၠိပ်တုဲ စှေ်ဗီု စှေ်ပဓာနမ္ဂး ဆက်ဓမံက်အာ ရုပ်ရဴဏောၚ်- ညးစၞးမွဲတလ မတိုန်မံၚ် ပေါဲသဳကၠဳဂှ် ဟီုရ။
“ပ္ဍဲပွိုၚ် ၅ သၞာံ ညးတံ ကၠောန်ကၠုၚ်လဝ်တုဲတုဲတေံဂှ် ဗီုလဵု ညးတံ ဗၠေတ်ကၠုၚ်၊ မုဒးထပ်ဗပေၚ်ဂှ် ညးတံဟီုထ္ၜးတုဲ ပိုဲဂွံတီ။ ပ္ဍဲကဵု ဂလာန် ညးတံ ကေၚ်ပ္တိုန်ထ္ၜးကၠုၚ်ဂှ် ဂလာန်လ္ၚဵုလ္ၚဵု ပရေၚ်ဆက်စၠောံ ကၟိန်ဍုၚ်ကဵု တွဵုရး အောန်မံၚ် ကွေံကွေံရ။ ဂလာန်လ္ၚဵုလ္ၚဵုပၠန်လေဝ် အ္ခိၚ်ဟွံရုံတုဲ ဒှ်အာ အဟောသိကံလေဝ် နွံတၟာဂလိုၚ်ရ” ဂှ်လေဝ် ဥုအံၚ်ကျဝ်သူ ညးစၞးကၠတ်ထဝ် တွဵုရး နူဒေသမာဲ လၟိဟ်၂ ပွိုၚ်ဍုၚ်သဓီု ဟီုရ။
ဆဂှ်သၟးဟွံသေၚ် ပြဟ်ဟ်ဏံ ဒုၚ်သဇိုၚ်ကဵု မူဝါဒဗော်တုဲ ဆက်ကၠောန်အာဏောၚ်ဂှ်လေဝ် ညးတေံ ဆက်ဟီုထ္ၜးရ။
ကောံဓရီု ကၠတ်ထဝ်တွဵုရးမန် အလန်ဒုတိယဂှ် ကၠောန်သ္ပ ပ္ဍဲစၟတ်တ္ၚဲ ဖေဖဝ်ဝါရဳ (၁) ဟွံသေၚ်မ္ဂး (၈) တေံဏောၚ်ဂှ်လေဝ် အမာတ်ကၠတ်ထဝ်တွဵုရးမန် ဒံက်တာ အံၚ်နာၚ်ဥု မဇၞးကၠုၚ်ပေါဲရုဲမာဲ ၜါဝါဆက်က် လဴထ္ၜးရ။
ပ္ဍဲပေါဲဆဵုဂဗသဳကၠဳ ပွိုၚ် ၂ တ္ၚဲ သွက်ဂွံ ပြံၚ်ပၟပ်တာလျိုၚ် ကၠတ်ထဝ်ဏံဂှ် ညးစၞးကၠတ်ထဝ်ဖၟိုတ် မဇၞးကၠုၚ်မာဲ ၂၀၁၅ ဂှ်ကီု၊ ညးစၞးဒပ်ပၞာန် လၟုဟ်ဏံဂှ်ကီု၊ ဥုကျေန်ဖေ ဥက္ကဌ ကၠတ်ထဝ်ကီု တိုန်စိုပ်အိုတ်ကီုလေဝ် မၞိဟ်တြေံ ညးစၞး ကၠတ်ထဝ်တွဵုရး တြေံတြေံ တံဂှ် တိုန်စိုပ် ညိညဓဝ် ဂွံဆဵုကေတ်ရ။
ပ္ဍဲကၠတ်ထဝ်တွဵုရးမန် လၟုဟ်ဏံဂှ်ဝွံ ဒက်ပ္တန်လဝ် နကဵုအမာတ်ကၠတ်ထဝ်တွဵုရး နူပေါဲရုဲမာဲဂှ် ၂၀ တလ၊ ဝန်ဇၞော် ပရေၚ်ကေၚ်ကာ ကောန်ဍုၚ်အရၚ် ၃ (ကရေၚ်၊ ဗၟာ၊ပအိုအ်) တလ၊ ညးစၞးဒပ်ပၞာန် ၈ တလ သီုဖၟိုတ် ၃၁ တလ ရ။