ပ္ဍဲဒေသဂတှေ်ဒဵုသာဲ ပွိုၚ်ဍုၚ်ကျာ်မြဟ် တွဵုရးမန်ဂှ်ဝွံ ကမ္ပဏဳ လုပ်ဖျေံသဇိုၚ် ကလောန်တအ် ဟိုတ်နူ ဂၠိုၚ်ကၠုၚ် ဂှ်ရ ရဲကွာန်ဗွဲပွဳပွူ မပ္တံ ကံဒုန်၊ကံပၞဟ် တအ် ရန်ကဵု သွက်သ္ဂောံသောၚ်က္လး ပြသနာပရေၚ်မၞိဟ် မလေပ်က္တဵုဒှ် မာန် ဗွဲအဓာန်ဂတတေံဂှ်တုဲ ဒက်ပ္တန်လဝ် ဂကောံပရေၚ်ဖေါအ်ဗြေဝ် ဝေါဟာမၞိဟ် (ပရေၚ်မၞိဟ်) ရ။
ဂကောံဂှ်ဝွံ ကျာ်ဇၞော်အ္စာဂမၠိုၚ် ၜိုတ် (၂၀) ဇကု နူဒေသတအ် သ္ကိုပ်သ္ကကေတ် ဒြဟတ် ကောန်ဒေသ ၜိုတ် (၁၀၀)တလတုဲ ဒက်ပ္တန်လဝ် ဂကောံ ပ္ဍဲကောံဓရီု ကွာန်ကံဒုန် မကၠောန်လဝ် ပ္ဍဲတ္ၚဲ ဇာန္နဝါရဳ ၂၂၊ သၞာံ ၂၀၁၆ ဂှ်ရ ဂွံတီကေတ်။
“ အဂုန်တအ် ပံက်ဂကောံဏံဂှ် မိက်ဂွံ ဗ္တိုက်မၞိဟ်မွဲမွဲ၊ မိ်က်ဂွံပလီု ဒတုဲဖဵု မၞိဟ်မွဲမွဲ ဂကောံမွဲမွဲတုဲ ပံက်ဂကောံ ဏံ ဟွံသေၚ်ရ။ ပ္ဍဲဒေသပိုဲဏံ လၟုဟ် ကမ္ပနဳဇၞော်ဇၞော်တအ် လုပ်မံၚ်ကွေံကွေံ၊ ပြဟ်ဟ်ဏံ ဟိုတ်ဇၞော်ဇၞော် ပြသနာဇၞော်ဇၞော်ဂှ် ဟွံမွဲဏီ။ ဆ္ဂး မွဲတ္ၚဲ အခါဍေံ ဒှ်ကၠုၚ်ဟိုတ်တှေ် ဂွံစဵုဒၞါမာန် ရန်တၟံဗီုဂှ်တုဲ ပိုဲဒးပံက်ဂကောံဏံ” သာ်ဝွံ တၠဂုဏ်ကေသာရ ဘာကွာန်ၚ္ၚာၚ် ဟီုလဴကဵု ဌာန်ပရိုၚ်ဗၠးၜးမန်ရ။
ကမ္ပဏဳ တအ်ဏံဂှ် ဗွဲမဂၠိုၚ်တှေ် ဟီုဂှ်မွဲဗီု၊ ကၠောန်ဂှ်မွဲဗီု၊ ကမ္ပဏဳ MLC မသိုၚ်မံၚ် ရုၚ်စက်တိဗိလာတ်ဂှ် ဗ္ဂေတ် ကလောန် နကဵုဓတ်ပၟတ် တၟံချးဏောၚ်ဂှ် မွဲဝါလေဝ် ဟွံဂွံဟီုလဝ် ကဵုကောန်ဒေသဏံရ။ ကၠာဍေံတအ် ဟဂွံ ခတိုဟ်မာၚ်ဂှ် ကာလဖတိုဟ်မာၚ်တှေ် ဟွံကဵုဗြု ဒုၚ်လဝ်ကအ်ပါၚ် ဗီုဂှ်တုဲ လၟုဟ် အခါဍေံတအ် ဖတိုဟ်ဒဵုတၟံဂှ် ဗြုသၟးဟွံက သီုတိမညောတ် တိဒရိုက်ဏီ တၠဂုန်ကေသာရ ဟီုရ။
ပၞောဝ်ကဵု ကမ္ပဏဳဂမၠိုၚ် မလုပ်ဓလိုက်တံရိုဟ် ပ္ဍဲဒေသဏံဂှ် ကုမ္ပဏဳတဲဇၞော် မတွံဂးကမ္ပဏဳ ရုၚ်စက်တိဗိလာတ် MCL ဏံ သွက်ရုၚ်စက်ဍေံတအ် ဂွံဂေတ်ဂှ် ဍေံတအ်စံၚ် တၟံချးတုဲ ပ္တိတ်ဓတ်ပၟတ်ဏောၚ် ရမျှာၚ် တိတ်မံၚ်ဗီု ဂှ်တုဲ ရဲဒေသတအ် ဒှ်ဒၟံၚ် ဓဝိၚ်အိုတ်ရ။
“ ကၠာတေံ မၞိဟ်စၞး နူကုမ္ပဏဳဂှ် ကၠုၚ်ကွာန်ပိုဲတုဲ လဴပရူ ပ္တိတ်တိဗိလာတ်သၟးရ။ ဒးစကာပၟတ် တၟံချးဏောၚ်ဂှ် ဍေံတအ် ဟွံဟီု။ လၟုဟ် ဍေံတအ် ပ္တိတ်ပၟတ် နကဵုဓတ် တၟံချးဏောၚ် ပိုဲဂွံတီလဝ်” နာဲဗၠာဲ နူကွာန်ကံဒုန် ဂးရ။
ယဝ်ရပ္တိတ်ပၟတ် နကဵုတၟံချးမ္ဂး ဒှ်အန္တရာဲဏောၚ် တီလဝ်ဗီုဂှ်၊ ဍေံဖန်ကဵုဒဒိုက်ဒုက္ခ ဒဵုအဆက်ကောန် အဆက်စဴဏောၚ်တုဲ ကလောန်ပ္တိတ်ပၟတ် နကဵုတၟံချးဏံဂှ် ပိုဲဒးဒ္စဵုဒ္စးဏောၚ်၊ မၞိဟ်မွဲဓဝ် ဒ္စဵုဒ္စးတှေ် ဍေံဟွံဒှ်ကလောန်၊ ဒၞါတာ ဒ္စဵုဒ္စးအာ နကဵုဂကောံတှေ် ဍေံစိုပ်တရဴဂၠိုၚ်ဏောၚ် နာဲဗၠာဲ ဂးရ။
ပ္ဍဲကဵုရုၚ်စက် တိဗိလာတ်မတ်မလီု MCL မသိုၚ်ခၞံမံၚ် ပ္ဍဲဇရေၚ်ကွာန် ကံဒုန် ကံပၞဟ် ပွိုၚ်ဍုၚ်ကျာ်မြဟ်ဂှ်ဝွံ သွက်ဂွံပဂေတ်ရုၚ်စက်ဍေံတအ်ဂှ် အပေါတ်ကြိယာ ပ္တိတ်ဒြဟတ်ပၟတ် (၄၀) မဂ္ဂါဝတ် နကဵုဓတ် ပၟတ်ချးတၟံဂှ် လၟုဟ်စိုပ်ကောံမံၚ် ပ္ဍဲရုၚ်စက်ဣရ ခြာဟွံလံ ရုၚ်စက်ဏံ ဂေတ်ဏောၚ် ပရိုၚ်တိတ်မံၚ်ရ။
ဗီုပြၚ်ပရေၚ်ကလောန် ရုၚ်စက်တိဗိလာတ်ဏံ နွံဗီုလဵုဂှ် ရဲဒေသတအ် ညံၚ်ဂွံကၠိုဟ် ကၠးဂှ် နူကုမ္ပဏဳ ဂွံလဴက္လး ချိုတ်တ်ပၠိုတ်တ် ဟွံမွဲ။ ရဲဒေသ ကဵု ဂကောံချဳဒရာၚ် ပရေၚ်ဝေါဟာမၞိဟ်တအ် မိက်ဂွံ လုပ်လ္ၚတ် ပ္ဍဲရုၚ်စက် ကဵု ပွဳူ ရုၚ်စက်ဂှ်ကီုလေဝ် တၠကုမ္ပနဳတအ် ဟွံကဵုအခေါၚ်လုပ် ဂွံတီကေတ်ရ။
ရုၚ်စက်တိဗဳလာတ်ဏံဂှ် ဓလိုက်လဝ်တံရိုဟ် သြန်သေံ (၁၂,၄၀၀) ပြကောဋိကိုဋ်ၜါတ်တုဲ နူရုၚ်စက် တိဗဳ လာတ်ဏံ မွဲတ္ၚဲမ္ဂး ဍေံပ္တိတ်တိဗိလာတ် ဗၞတ်ဂယိုၚ်တာန် (၅၀၀၀) တာန်ဏောၚ် ဂးရ။ ပ္ဍဲသၞာံ ၂၀၁၄ ဂိတုဂျာန္န ဝါရဳဂှ် ဍေံတအ်သိုၚ်ခၞံ ရုၚ်စက်တုဲ၊ သၞာံ ၂၀၁၆ ဂိတုမာတ်ချ်ဏံမ္ဂး ရုၚ်စက်ဏံ ဂေတ်မာန်ဏောၚ် နူကုမ္ပဏဳ သိုၚ်ခၞံရုၚ် စက်ဏံ ဟီုလဝ်ရ။