နာဲသိုက်လောန်ဝွံ သွက်ဂွံယိုက်ဂၠေၚ်တာလျိုၚ် နဒဒှ်ဝန်ဇၞော် ပ္ဍဲဌာနဝန်ဇၞော်ပရေၚ်ကေၚ်ကာ ကောန်ဍုၚ်အရၚ် အဆံၚ်ကၟိန်ဍုၚ်ဂှ် မွဲကရောံကဵု ဝန်ဇၞော်ဂမၠိုၚ် ဂကောံအလဵုအသဳ အဆံၚ်ကၟိန်ဍုၚ် ဒုၚ်ယဵုကေတ်ဓဝ်သစာ ဂတနာယကကၠတ်ထဝ်ကၟိန်ဍုၚ် ပ္ဍဲစၟတ်တ္ၚဲ ဂိတုမာတ် ၃၀ ဂှ် တုဲဒှ်အာဣရ။
ပ္ဍဲဂကောံအလဵုအသဳ မဒက်ပ္တန်လဝ် နကဵုပရေၚ်အာက္ဍိုပ် ဗော် NLD ဂှ်ဝွံ ပံက်လဝ် နကဵုဌာနဝန်ဇၞော် အဆံၚ်ကၟိန်ဍုၚ် (၂၁) ဌာန သီုကဵုဝန်ဇၞော် (၁၈) တလတုဲ သွက်ဂွံယိုက်ဂၠေၚ်တာလျိုၚ် ဒဒှ်ဝန်ဇၞော် ပရေၚ်ကေၚ်ကာကောန်ဍုၚ်အရၚ်ဂှ် နူသမ္မတဥူထေန်ကျဝ် ပၠောပ်ယၟု ထ္ၜၚ်ပ္တိုန် ကုနာဲသိုက်လောန် မဒှ်ဒု ဥက္ကဌ (၁) ဗော်ကောန်ဂကူမန်ရ။
ကိစ္စဏံ နာဲသိုက်လောန်ဂှ် “ဒဝ်အံၚ်သာန်သုကျဳသၟာန် တာလျိုၚ်ဝန်ဇၞော် ပရေၚ်ကေၚ်ကာ ကောန်ဍုၚ်အရၚ်ဂှ် ကေတ်မာန်ဟာဂး ၊ ရံၚ်ကဵု ပရေၚ်လဆဵုဂဗ အဲတတ်ကၠုၚ်ဏောၚ်တှေ် ယိုက်ဂၠေၚ်မာန်မံၚ် အဲက္လေၚ်ဟီုဗီုဂှ်၊ ဆ္ဂး ဌာနဏံ ဒှ်ဒၟံၚ်ဌာနတၟိတှေ် ဗီုလဵုဂွံဒက်ရောဂှ် ပံက်အလဵုအသဳတုဲမှ ဖန်အာပၠန်ဏောၚ်၊ ပၟိက်ဇၞော်အိုတ် အဓိကဂှ် ပရေၚ်ၜိုဟ်လလံဍုၚ် ညံၚ်ဂွံဒှ်၊ တုဲတှေ် သ္ဘၚ်သဳကၠဳပေန်လုၚ် ညံၚ်ရဴ ၂၁ ဒဝ်အံၚ်သာန်သုကျဳ မဟီုပ္တိတ်လဝ်ဂှ်လေဝ် ညံၚ်ဂွံဒှ်ဂှ် ဒးဂစာန်ဏောၚ်” ရဴဝွံ ဟီုလဴကဵု ဌာန်ပရိုၚ်မန်ရ။
အသေအဟာန် နူသမ္မတတိၚ်သိၚ် ပအပ်ပြာပ်အဝဵု ကုသမ္မတဥူထေန်ကျဝ်ဂှ်လေဝ် ပ္ဍဲမာတ် ၃၀ ဂှ်ရ ကၠောန်သ္ပကၠုၚ် ပ္ဍဲသ္ၚိဇၞော်သမ္မတ နေပျဳတဝ်ဂှ် တုဲဣရ။
ပ္ဍဲလက်ထက်အလဵုအသဳ တိၚ်သိၚ်တေံ ဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ်ဏံ ဟွံမွဲကၠုၚ်ကီုလေဝ် ပ္ဍဲသၞာံ ၂၀၁၃ တေံ ခၞံပ္တိတ်လဝ် ဥပဒေ သွက်ဂွံမၚ်မွဲစဵုဒၞါ အခေါၚ်အဝဵုကောန်ဍုၚ်အရၚ်တုဲ အတိုၚ်ဥပဒေဂှ်ရ စိုပ်လက်ထက် အလဵုအသဳ NLD သမ္မတဥူထေန်ကျဝ်ဏံ ဒးဓမံက်ရုပ်ရဴ ကုဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ်ရ ရဴဝွံ သ္ၚဳဂၠိပ်ဇွိတ်သ္ပောတ်တဴ သာ်ဂှ်အိုတ်ရ။
ဗညာမသာန် ကောန်နာဲသိုက်လောန် သ္ဂးဂှ် “အပါအဲဟီု က္လိဂွံအဝဵု ဝန်ဇၞော်ဟွံသေၚ်၊ လုပ်ယိုက်ဂၠေၚ် တာလျိုၚ်ဏောၚ်၊ ကၠာတေံ သွက်ကောန်ဂကူမန် ဟေၚ်ရ ကေတ်ကၠုၚ်တာလျိုၚ်၊ လၟုဟ် အဲဂွံယိုက်ဂၠေၚ် တာလျိုၚ် သီုသွက်ကောန်ဍုၚ်အရၚ်ဖအိုတ်ဣရ” သာ်ဝွံ ချူထ္ၜးလဝ် ပ္ဍဲမုက်လိက် ဝှိတ်ဗော်ရ။
နာဲသိုက်လောန် အာစိုပ် ဒဒှ်ဝန်ဇၞော်ပရေၚ်ကေၚ်ကာ ကောန်ဍုၚ်အရၚ်ဏံဂှ်ဝွံ ပ္ဍဲအခိၚ် စဒက်ပ္တန် ဗော်ဒဳမဝ်ကရေဇြဳ ကောန်ဂကူမန် သၞာံ ၁၉၈၈ တေံကီု၊ ပ္ဍဲလက်ထက် ယၟုဗော် ဗော်ဒဳမဝ်ကရေဇြဳမန် MDP သၞာံ ၂၀၁၂ တေံကီု၊နူဂှ် စိုပ်လက်ထက် ပြံၚ်လှာဲယၟုဗော် ဗော်ကောန်ဂကူမန် MNP သၞာံ၂၀၁၄ ဂှ်ကီု ညးဝွံ ယိုက်ကၠုၚ် တာလျိုၚ် ဒုဥက္ကဌ ရ။
စပ်ကဵု ခါန်ပ္တိုန် ဒဒှ်ဝန်ဇၞော်ကောန်ဍုၚ်အရၚ် ကုနာဲသိုက်လောန်ဏံတုဲ ခြာဟွံလအ် ဗော်ကောန်ဂကူမန် MNP လလောၚ်ပ္တိတ် လစွံစိုတ်ဗော်ဏောၚ် ဌာန်ပရိုၚ်ဗၠးၜးမန် ဂွံမိၚ်လဝ်ရ။
နာဲသိုက်လောန်ဝွံ က္လိဂွံလဝ် မဟိမုပညာ ဘာသာ ဒဿနိကဗေဒ ဗဳအေ တုဲ ဗွဲမဂၠိုၚ်ဂှ် တီဒၟံၚ်ညး နဒဒှ် သၟာဗၞိက်မွဲကဵု ပူဂဵုချဳဒရာၚ်ပရေၚ်ဂကူမန်မွဲကီုတုဲ အခိၚ်လၟုဟ်မ္ဂး ညးက္လိဂွံ အယုက် ရ၅ သၞာံရ။
ပ္ဍဲဂကောံ အလဵုအသဳ အဆံၚ်ကၟိန်ဍုၚ် လက်ထက် သမ္မတ ဥူထေန်ကျဝ်ဏံမ္ဂး ဒဝ်အံၚ်သာန်သုကျဳဂှ် ရပ်လဝ် (၄) ဌာန မတွံဂး ဌာနဝန်ဇၞော် ပရေၚ်ဍုၚ်သၟာၚ်၊ ဌာနဝန်ဇၞော် ရုၚ်သမ္မတ၊ ဌာနဝန်ဇၞော် ပရေၚ်ပညာ၊ ဌာနဝန်ဇၞော် ဓါတ်လလဳ ကဵု အစောံဒြဟတ် တုဲ ဒံက်တာအံၚ်သူဂှ် ဒှ်ဝန်ဇၞော် ဌာနဝန်ဇၞော် ပရေၚ်ဖ္ဍတ်လွဳ ကေုာံ စြာၚ်မြံၚ်၊ဥူ တဇြေန်မိုၚ်ဂှ် ဒှ်ဝန်ဇၞော် ဌာနဝန်ဇၞော် ပရေၚ်ပလံၚ်ဗ္စိုပ် ကေုာံ ပရေၚ်ဆက်စၠောံ၊ သူရဥူအံၚ်ကဝ်ဂှ် ရပ်ဌာနဝန်ဇၞော် ပရေၚ်သာသနာ ကေုာံ ပရေၚ်ယေန်သၞာၚ်၊ ဥူအုၚ်ဝေန် ရပ်ဌာန ပရေၚ်ထိၚ်ဓဝ်မၚ်မွဲ သဘာဝ ပွဳပွူ ကေုာံ ပရေၚ်သယံဇာတ၊ ဥူတိၚ်သှိုဲ ရပ်ဌာန ပရေၚ်သၟာကလောန်၊ သီုကဵု ပရေၚ်သ္ကိုပ်သ္က မၞိဟ်လုပ်တိတ် ကေုာံ ထိၚ်ဒဝ်ဒြဟတ်မၞိဟ်၊ ဥူကျဝ်ဝေန် ရပ်ဌာန ပရေၚ်ဘဏ္ဍာ ကေုာံ ကိုန်အစဳဇန်၊ ဥူ ခေန်မိုၚ်္ၚှဵု ရပ်ဌာနဝန်ဇၞော် ကွတ်စက်၊ ဥူမျေအ်ထွေ ရပ်ဌာနဝန်ဇၞော် ပရေၚ်ထတ်ယုက်၊ ဥူဝေန်ခါၚ် ရပ်ဌာနဝန်ဇၞော် ပရေၚ်သိုၚ်ပ္တန်၊ ဥူဝေန်မျေအ်အေ ရပ်ဌာနဝန်ဇၞော် ရီုဗၚ်ဟံၚ်ပြာ် ပရေၚ်မၞိဟ် ကေုာံ က္လေၚ်ဖျေံကဵုဒၞါဲဝါဲ၊ ဥူအုၚ်မိုၚ် ရပ်ဌာနဝန်ဇၞော် ကလောန်အာတရဴ ကေုာံ ဟဝ်တေဝ်၊ ဥူတာန်မျေအ် ရပ်ဌာနဝန်ဇၞော် ပရေၚ်ပိုန်ဒြပ် ကေုာံ ပရေၚ်သွံရာန် လှာဲဂတး၊ နာဲသိုက်လောန် ရပ်ဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ်၊ ဒံက်တာဖေမျေအ် ရပ်ဌာနဝန်ဇၞော် ပရေၚ်လလောၚ်ပရိုၚ်၊ ဒုသ္ကိုပ်ပၞာန်ဇၞော် သိၚ်ဝေန် ရပ်ဌာနဝန်ဇၞော် ပရေၚ်စဵုဒၞါဍုၚ်၊ ဒုသ္ကိုပ်ပၞာန်ဇၞော် ကျဝ်သှိုဲ ရပ်ဌာနဝန်ဇၞော် ပရေၚ်ကေၚ်ကာပ္ဍဲဍုၚ်၊ ဒုသ္ကိုပ်ပၞာန်ဇၞော် ယျေဝ်အံၚ် ရပ်ဌာနဝန်ဇၞော် ပရေၚ်ပယဵု ရ။