ပ္ဍဲပွိုၚ်ဍုၚ်ကျာ်မြဟ် ခရိုၚ်မတ်မလီု တွဵုရးမန် ကမ္ပနဳလဳမိတိတ် June Cement Industry သွက်ဂွံသိုၚ် ရုၚ်စက်တၟိ မဗုတ်ပ္တိတ်တိဗိလာတ် မွဲတ္ၚဲတှေ် ဗၞတ်ဂယိုၚ် ၅၀၀၀ တာန်ဂှ် နူကမ္မယှေန်ပရေၚ်ဓလိုက်တံရိုဟ် ဍုၚ်ဗၟာ MIC ကဵုထောံ အခေါၚ်သိုၚ်ပၠန်ဣရ ဂွံတီကေတ်။
အပိုၚ်ခြာအယုက် အလဵုအသဳ သမ္မတဥူတိၚ်သိၚ် ကၠာဟွံအိုတ် ၜိုတ် ၅ တ္ၚဲ ပ္ဍဲဂိတုမာတ် ၂၅ ဂှ်ကမ္မယှေန်ပရေၚ်ဓလိုက် တံရိုဟ်ဍုၚ်ဗၟာ ကၠောန်သ္ပကောံဓရီု လၟေၚ်လၟိဟ် ၁၁/၂၀၁၆ တုဲ ပ္တိတ်ကဵုဏာ အခေါၚ်သိုၚ်ရဂှ် ဂွံဆဵုကေတ် ပ္ဍဲလိက်ပရိုၚ် The Daily Eleven စၟတ်တ္ၚဲ ဂိတုမာတ် ၃၀ ဂှ်ရ။
သွက်ဂွံသိုၚ် ရုၚ်စက်တိဗိလာတ်ဏံဂှ် ကမ္ပနဳ June Cement Industry ရာန်ကေတ်လဝ်တိဗ္ၚ ဗၞတ် (၇၀၀) ဨက မၞုံအကြာ ကွာန်မဂြောဝ် ကဵု ကံဒုန် ကံပၞဟ် နူကၠာ ဥူတိၚ်သိၚ်တံ ဟွံတိုန်ဒှ်အလဵုအသဳ သၞာံ ၂၀၁၀ တေံဏီရ သာ်ဝွံ ဂွံမိၚ်ကေတ် နူရဲဒေသတံရ။
နာဲထောန်ကျဳ ကောန်ကွာန်မွဲဂြဝ်ဂှ် “ စပ်ကဵုကိစ္စ သိုၚ်ရုၚ်စက် တိဗိလာတ်ဏံဂှ် ရဲဒေသပိုဲ ပ္တိုန်လဝ်လိက် တာဒၞါ ကဵုဌာနအလဵုအသဳကီု ကဵုကမ္ပနဳ June ကီု ဗၞတ် ၂ ဝါတုဲယျ၊ ဍေံတံ ဟွံပဂရု ဟွံပကာတုဲ ပံက်ကဵုအခေါၚ်ကၠောန် ဗီုဏံဂှ် ဍေံဟွံဗဗွဲပုဟ်” ရဴဝွံ လဴကဵုဌာန်ပရိုၚ်မန်ရ။
ယဝ်သိုၚ်ရုၚ်စက်တိဗိလာတ်ဏံတှေ် သွက် ပရေၚ်မၞိဟ်၊ ပရေၚ်ထတ်ယုက်၊ ပရေၚ်တိဗ္ၚကၠအ်သွဝ် ရဲဒေသတံ က္တဵုဒှ် ဘဲအန္တရာဲမာန်မံၚ်၊ ဟိုတ်နူဒှ်ကလောန် ဒးဖံက်ဖ္တိုဟ်မံၚ် လၟိုန်ဂှ်ရ ကျာ်စေတဳ တြေံတြေံဂမၠိုၚ် နွံပ္ဍဲဒဵုသာဲ ဒဵုမဂြောဝ် တံကီု သီုဘုတ်ဘာ၊ ဘာဗ္တောန်လိက် မွဲဟာန် သ္ၚိဌာန် ရဲဒေသတံ ပ္ညောတ်ပ္ညဝ် ဒတဝ်ဒရိုက် လီုလာ်မာန်မံၚ်ဏောၚ်ဂှ် ဓမံက်လဝ် ပ္ဍဲလိက်တာဒၞါ ပ္တိုန်တ္ၜးလဝ်ကဵု ဌာနက္ဍိုက်ပ် စရၚ်တိဗ္ၚ ပွိုၚ်ဍုၚ်ကျာ်မြဟ် ပ္ဍဲစၟတ်တ္ၚဲ ဒဳဇြေမ်ဗာ ၂ ၊ ၂၀၁၅ တေံရ။
လၟုဟ်မ္ဂး သွက်ဂွံရပ်ကလောန် သိုၚ်ခၞံ ရုၚ်စက်တိဗိလာတ်ဂှ် နူကမ္ပနဳ June Cement Industry ပကောံလဝ် အပေါတ်ကြိယာ စက် ပ္ဍဲဗွိုၚ်ကိုန်အစဳဇန်ဂှ်တုဲ သီုစပံက်ဒၟံၚ်ဂၠံၚ်ဍာန်ဣရဂှ် ဂွံတီကေတ် နူရဲဒေသတံရ။
ပ္ဍဲကောံဓရီု ကမ္မယှေန်ဓလိုက်တံရိုဟ်ဍုၚ်ဗၟာ MIC (၁၁/၂၀၁၆) ဂှ် ပံက်ကဵုလဝ်အခေါၚ် ကိုန်အစဳဇန် ၄၈ ဒၞါဲတုဲ အပ္ဍဲဂှ် အတိုၚ်ဥပဒေ ပရေၚ်ဓလိုက်တံရိုဟ် ကောန်ဍုၚ်ဗၟာဂှ် ၂၇ ဒၞါဲ၊ အတိုၚ်ဥပဒေ ပရေၚ်ဓလိုက်တံရိုဟ် ကောန်ဍုၚ်သၟာၚ်ဂှ် ၁၆ ဒၞါဲ ၊ ပံၚ်ဓလိုက်တံရိုဟ်ဂှ် နွံ ၅ ဒၞါဲ သာ်ဝွံ ဓမံက်ထ္ၜးလဝ် ပ္ဍဲလိက်ပရိုၚ် The Daily Eleven ရ။
“ကမ္ပနဳ MCL ဂှ် ခဍေံရ ဍေံတံသိုၚ်ရုၚ်စက် တုဲအာယျတှေ်၊ ၝဗီုကၠုၚ်လၟုဟ်ဏံဂှ် ဟွံမိက်ကဵုဒှ်ရ။ ညိလေဝ် ဟွံဒးစိုတ်ရ၊ ဒၞါဲသိုၚ်ဂှ်ပၠန်လေဝ် စုက်ကြပ်မံၚ် ကွေံကွေံဏောၚ်” ဂှ် နာဲထောန်ကျဳ ဂးရ။
ပ္ဍဲပွဳပွူကွာန်မွဲဂြဝ်၊ ကံဒုန်၊ ကံပၞဟ်၊ ကွာန်ၚာၚ် တံဂှ် နကဵုအခေါၚ် ကမ္မယှေန်ဓလိုက်တံရိုဟ်ဍုၚ်ဗၟာဏံရ လၟုဟ်ဏံ သိုၚ်တုဲလဝ် ရုၚ်စက်တိဗုတ် မတ်မလီု MCL ဣရတုဲ ပ္ဍဲဂိတုမာတ် ၂၆ ဂှ် သီုသ္ပလဝ် အသေအဟာန် စံၜတ်စက် အရၚ်ဂွံပြိုက်တုဲယျဂှ်လေဝ် ဂွံတီကေတ်ရ။