ဗၟာ  ၊ အၚ်္ဂလိက် ၊  Font ၊  Converter

Breaking News
Home / လိက်ပရေၚ် / ကောံဓရီုဇၞော်ပရေၚ်ဂကူမန်ဂှ် ဆိုအ်ဗအာကဵု ပရေၚ်ပိဂအုံ မွဲဂအုံ

ကောံဓရီုဇၞော်ပရေၚ်ဂကူမန်ဂှ် ဆိုအ်ဗအာကဵု ပရေၚ်ပိဂအုံ မွဲဂအုံ

သၟာပရိုၚ်ချူ: >

ပ္ဍဲဂိတုမေမံက်ဏံဂှ် ကမ္မတဳဖန်ဇန်ကောံဓရီုဇၞော်ပရေၚ်ဂကူမန်တံ အဃောသဳကၠဳပါ်ပရအ်ဒၟံၚ်ညးစၞးဗွိုၚ် အပ္ဍဲဍုၚ်ဂှ် ဂိတုအေဗရဴ ၂၉ ဂှ် နူကဵုဗော်ဍုၚ်မန်တၟိ ပလံၚ်ဗစိုပ်ကၠုၚ်လိက်မွဲတၞးရ၊ ပ္ဍဲလိက်ဂှ် ပလံၚ်ဗ္စိုပ်လဝ် ပ္ဍဲကဵု ဂကောံပံၚ်ကောံပရေၚ်ဂကူမန် (MAU) ပိဗွိုၚ် (ဗွိုၚ်ပယျဵုကေုာံဍုၚ်သေံ၊ ဗွိုၚ်ဍုၚ်သ်အာၚ်၊ ဗွိုၚ်အပ္ဍဲဍုၚ်) ရ။

ကမ္မတဳ MAU ကဵု ညးစၞးဗော်ဍုၚ်မန်တၟိတံ သဳကၠဳလဝ်ကိစ္စဂွံကၠောန်ကောံဓရီုဇၞော် ပ္ဍဲရုၚ်ဆက်ဆောံဝၚ်က ပ္ဍဲအေဗရဴ ရ (GS)
ကမ္မတဳ MAU ကဵု ညးစၞးဗော်ဍုၚ်မန်တၟိတံ သဳကၠဳလဝ်ကိစ္စဂွံကၠောန်ကောံဓရီုဇၞော် ပ္ဍဲရုၚ်ဆက်ဆောံဝၚ်က ပ္ဍဲအေဗရဴ ရ (GS)

ပ္ဍဲကဵုလိက်ဂှ် ‘ဒုၚ်သ္ဇိုၚ်ကဵုလညာတ်ဗော်ပိုဲပ္တိုန်ထ်ၜးသောၚ်ကလးလဝ်ကဵုကမ္မတဳဗဟဵု MAU (စပ်ကဵုအခန်ပ ရေၚ်ဍုၚ်ကွာန်၊ ဗော်ပရေၚ်ဍုၚ်ကွာန်ဟေၚ်ဒးအာက္ဍိုပ်နကၞောတ်အထောတ်တုဲ ဂကောံနာနာပါလုပ်အ ခန်ပၠတရဴ ၁/၃ မာန်)ဒုၚ်တဲမာန် ဟွံမာန် ဗွိုၚ်မဆေၚ်စပ်တံ ဗွိုၚ်ညးကုညးပညဳလညာတ်တုဲပ္ဍဲဂိတုမေပထ မသတ္တဟစွံတ္ၚဲလက္ကရဴအိုတ် ကလေၚ်ကဵုပရိုၚ်ကုဗော်ပိုဲညိအဴ၊ လ္တူဂွံသွဟ်တံဂှ်တုဲမှ ပရေၚ်ဂွံကၠောန်အာ ကောံဓရီုဇၞော် MAU ဂှ်ချပ်ကဵုမာန်ရောၚ်’ သာ်ဝွံ ချူပလံၚ်ဗစိုပ်လဝ်ရ။

ပရေၚ်ဝွံ တုဲကၠုၚ်ဂိတုအေဗရဴ ရ ဂှ် ညးစၞးဗော်ဍုၚ်မန်တၟိ ညးအုပ်ကာနာနာ နာဲအံၚ်မေန် သောၚ်ကလး လဝ်ကဵု MAU တံပ္ဍဲရုၚ်ဆက်ဆောံဝၚ်က တုဲမံၚ်ရ၊ ပ္ဍဲကဵုကောံဓရီုသဳကၠဳကိစ္စ ၃ ဂအုံ ၁ ဂအုံဂှ် နကဵု MAU တံကဵုအခေါၚ်ဟွံဂွံ၊ ဂွံကဵုအခေါၚ်ဂွံဂှ် အဝဵုနူကောန်ဂကူတံလေဝ်ဟွံမွဲရောၚ်၊ MAU ဂှ် ဂကောံညောန် ကဵု ကြပ်လီုမွဲရောၚ်၊ MAU လီုဟာ ဆက်နွံဟာဂှ် ဒးကေတ်သ္ဂုတ်သွာတ်ပ္ဍဲကောံဓရီုဇၞော်တေံရ၊ MAU လီုတုဲ ဂကောံ တၟိမွဲ ဗော် ကဵု ဂကောံမဟာဇန်တံ စှေ်စိုတ် ဗီုပြၚ်တၟိမွဲ မံက်တိုန်မာန်ရောၚ်၊ ဟိုတ်ဂှ်ရ သဳကၠဳညးသ္ကံ ပ္ဍဲကဵု ညးစၞး တိုန်စိုပ်ကောံဓရီုဇၞော်တေံမ္ဂး ဒးရးဂၠိုၚ်ရောၚ် ဗီုပြၚ်သဳကၠဳဂှ် ညးတာလျိုၚ် MAU တံသောၚ်ကလးလဝ်နွံရ။

အဓိပ္ပဲါ ၃ ဂအုံ ၁ ဂအုံဂှ် – ပ္ဍဲကဵုကောံဓရီုဇၞော်ပရေၚ်ဂကူမန်ဂှ် ချပ်သဳကၠဳသွက်ဂွံဒက်ပ္တန် ပ္တိုန်ဂကောံပၠတရဴ အလုံဂကူမန်ရ၊ ပ္ဍဲဂှ် ဗော်ပရေၚ်ဍုၚ်ကွာန် ကေုာံ ဂကောံမဟာဇန် ဗွိုၚ်စုၚ်တံ ယဝ်ရတုပ်စိုတ် စှေ်စိုတ် သွက်ဂွံဓမံက် ပ္တိုန်ဂကောံပၠတရဴဂကူမန်ဂှ်မ္ဂး ပ္ဍဲကဵုဂကောံပၠဂရဴဂကူမန်ဂှ် ပ္ဍဲကဵုကဏ္ဍပရေၚ်ဍုၚ်ကွာန်မ္ဂး ဗော်ပရေၚ်ဍုၚ် ကွာန်တံ ၃ ဂအုံ ဂကောံမဟာဇန်တံ ၁ ဂအုံပါလုပ်မာန်ရ၊ ကဏ္ဍပရေၚ်ကောန်ဂကူမန်မ္ဂး ပါလုပ်ကဆံၚ် တုပ်ပ်ဂးရ၊ ဆဂး ကဏ္ဍလဵုပါလုပ်ပ္ဍဲကဵုပရေၚ်ဍုၚ်ကွာန်တုဲ ကဏ္ဍလဵုပါလုပ်ပရေၚ်ကောန် ဂကူဂှ် ကၠးကၠးမးမး သဳကၠဳလဝ်ဟွံမွဲရောၚ် ဂွံတီကေတ်ရ။

ဆဂး နကဵုညးတာလျိုၚ် MAU မွဲတၠသောၚ်ကလးဂှ် ဥပမာ ပ္ဍဲကဵုဂကောံပၠတရဴဂကူဂှ် ဒးသဳကၠဳဟီုဂးပ္ဍဲကဵု ကဏ္ဍပရေၚ်ဍုၚ်ကွာန်မမိက်မွဲမွဲမ္ဂး ဗော်ရပ်လွဟ် ၁ ဂအုံ၊ ဗော်အပ္ဍဲဍုၚ် ၁ ဂအုံ(ဗော်လဵု မူစိဗော်ပါဟွံဟီု လဝ်ရ)၊ ဂကောံမဟာဇန် ၁ ဂအုံ သာ်ဝွံ ညးကလးထ်ၜးလဝ်ဗွဲအပြောံနွံရ။

လ္တူလိက်ပလံၚ်ဗစိုပ်လဝ်ကဵု MAU တံဂှ် ဂိတုမေပထမသတ္တဟဏံ ညံၚ်ဂွံကလေၚ်ပရိုၚ်ကဵုဗော်ဍုၚ်မန်တၟိ ညိဂှ် ဗော်ဍုၚ်မန်တၟိ အာတ်မိက်လဝ်နွံရ။

နကဵုသၞောတ်ဝ် MAU မ္ဂး ဂကောံလဵု ဗော်လဵုလေဝ် အုပ်ဓလီုကေတ်နကဵုအဝဵုလ္တူ MAU ဟွံဂွံတုဲ ကမၠောန် ကေၚ်ကာမမိက်ကဵုမွဲမွဲ ပ္ဍဲကဵု ၄ ဗွိုၚ်ဂှ် မွဲမွဲဗွိုၚ် ဟွံတုပ်စိုတ်မ္ဂး ဓမံက်ရေၚ်တၠုၚ်ကေၚ်ကာဂှ် ဟွံဂွံရောၚ် မူ ဝါဒ MAU နွံ ဂွံတီကေတ်ရ။

ဟိုတ်နူလိက်ဗော်ဍုၚ်မန်တၟိ ပလံၚ်ဗစိုပ်နၚ် ကိစ္စအာတ်မိက်လဝ်လ္တူ ၃ ဂအုံ ၁ ဂအုံဂှ် နကဵု MAU တံဒှ် အာပရေၚ်ဆိုအ်ဗကဵုပရေၚ်ဂွံကၠောန်ကောံဓရီုဇၞော်ပရေၚ်ဂကူမန်ဂှ်ရောၚ် ကမ္မတဳဖန်ဇန်ကောံဓရီုဇၞော်တံ ဟီုထ်ၜးလဝ်ရ။

ကၠာနူကောံဓရီုဇၞော်ဟွံဒှ်ဏီ မုဟိုတ်သာ်လဵုတုဲ ဗော်ပရေၚ်ဍုၚ်ကွာန်တံ ဒးအာတ်မိက်လဝ် ကိစ္စ ၃ ဂအုံ ၁ ဂအုံဏံကၠာရော တၚ်သၟာန်မံက်တိုန်ကၠုၚ်အကြာဂကောံမဟာဇန်တံ နာနာသာ်နွံရ၊ ပရေၚ်ပါ်ပဲါလေဝ် ဟီု ဂးကၠုၚ်နာနာသာ်နွံရ။

အဃောဂၠာဲဒၟံၚ််ဂၠံၚ်သွက်ဂွံဒက်ပ္တန်ပရေၚ်ညဳသၟဟ်အလုံဂကူမန်ဂှ် ဗော်ဍုၚ်မန်တၟိပ္တိုန်ထ်ၜးကၠုၚ် လ္တူ ၃ ဂအုံ ၁ ဂအုံသာ်ဏံဂှ် အကြာဂကောံမဟာဇန်ညးဍုၚ်ကွာန်တံ ကဵု ဗော်ပရေၚ်ဍုၚ်ကွာန်တံ ဓဝ်ပတှေ်-ပရေၚ် သ္ပသမ္တီ ဗော်/ဂကောံ မွဲကုမွဲ ပဵုတုဲ ယျအ်စှေ်အာက္ဍၚ်ရ၊ ပဵုတုဲ ပရေၚ်ဂွံဂၠာဲသွဟ်ဓဝ် ညဳသၟဟ်အလုံဂကူ မန်ဂှ် ရောအ်ရေၚ်ဆိုအ်ဗအာက္ဍၚ်ရ။

ယဝ်ရကောံဓရီုဇၞော်ဂှ်ဒှ်အာပရေၚ်ဆိုအ်ဗမ္ဂး ပ္ဍဲကဵုကောံဓရီုဒစးဒုၚ်ကောံဓရီုဇၞော်တုဲကၠုၚ် ဂိတုမာတ်ချ် ၂၆- ၂ရ ပ္ဍဲဘာဓါတုမာလာဂှ် လိက်စံၚ်ပရေၚ်ညဳသၟဟ်အလုံဂကူမန် ညးစၞးဗွိုၚ်အပ္ဍဲဍုၚ်တံ သ္ပလဝ်ဒတန်ဂှ် လေဝ်ဒှ်အာပရေၚ်ဆိုအ်ဗရ၊ အဓိကပ္ဍဲကဵုလိက်စံၚ်ဂှ် ကဏ္ဍဗော်ပရေၚ်ဍုၚ်ကွာန်မ္ဂး သၞာံ ၂၀၁၆ ဗော်မန် ညံၚ်ဂွံဒှ်မွဲဂှ်ဗော်မန်တံ ဒးဖန်ဇန်ဆဵုဂဗအာညးသ္ကံရောၚ်၊ ယဝ်ဟွံဖန််ဇန်မ္ဂး ဂကောံသၚ် မဟာဇန်တံကော် ကောံဓရီုဇၞော်မွဲတုဲ ကမၠောန်ဒှ်ဒတဵုဖဵုဂကူမန်ဂှ် ဆက်ရေၚ်တၠုၚ်အာရောၚ်ဟီုဂှ်လေဝ် ဒၞာဲဒးပ္တိုန်ထ်ၜးသဳကၠဳ ဟွံမွဲရ။

ဗီုဂှ်ကီု ဂကောံသ္ပစၞးဂကူမန်မွဲ ဗော်ပရေၚ်ဍုၚ်ကွာန် ဂကောံခမဳသၚ် ဂကောံမဟာဇန် ပူဂဵုတၠပညာဒးပါ ထေက်တံ ပံၚ်ကောံတုဲ ဒးပံက်ပ္တိုန်ဂကောံပၠတရဴကောန်ဂကူမန် မွဲရောၚ်ဂှ်လေဝ် သွက်ဂွံပ္တိုန်ထ်ၜးဒၞာဲဒး ရေၚ်တၠုၚ်ဟွံမွဲ ဒှ်အာရ။

ကောံဓရီုဇၞော်ပရေၚ်ဂကူမန်ဂှ်ဆိုအ်ဗအာမ္ဂး သွက်ဂွံဖန်ဇန်ပရေၚ်ညဳသၟဟ်ဂကူမန်ဂှ်လေဝ် ဆိုအ်ဗအာမွဲ ဍာန်ပၠန်ရ၊ တ္ၚဲဏံဂှ် ဗော်တံ ကဵုဗော်တံ သွက်ဂွံသဳကၠဳဆာၚ်မုက် ပရေၚ်ကောန်ဂကူမန်ဂှ် ဟွံမွဲသက်က်ရ။

ရဲချဳဒရာၚ်ကၠောန်ဒၟံၚ်ကောံဓရီုဇၞော်ပရေၚ်ဂကူမန်တံဂှ် ဗော်ပရေၚ်ဍုၚ်ကွာန်တံဟွံစှေ်စိုတ်တုဲ ဟွံသ္ပသမ္တီရ၊ ပ္ဍဲကောံဓရီုဇၞော်ပရေၚ်ဂကူမန်ဂှ် ဗော်မန််အပ္ဍဲဍုၚ်တံဟွံတိုန်ရောၚ်ဂှ် လလောၚ်တြးလဝ်တုဲတုဲရ။

စပ်ကဵုပရေၚ်ဂၠာဲသွဟ် ဂၠံၚ်ဂွံဒက်ပ္တန်ပရေၚ်ညဳသၟဟ်ဂကူမန်ဂှ် တုဲကၠုၚ်ဂကောံသၚ်ပညဳပညပ်တံလေဝ် ရုပ် ဏာနိဂီု မွဲအခန်တုဲရ၊ တ္ၚဲဏံလေဝ် MAU တံ ဆိုအ်ဗအာကဵု လ္တူ ၃ ဂအုံ ၁ ဂအုံဂှ်တုဲ ကောံဓရီုဇၞော် ပရေၚ်ဂကူမန် မရနုက်ကဵု ၈ ဝါဂှ်လေဝ် သွက်ဒးဆိုအ်ဗအာနွံပၠန်ရ။

ဒှ်သာ်ဂှ်မ္ဂး တုဲကၠုၚ်ပေဲါရုဲမာဲ ၂၀၁၅ ဂှ် အလုံဂကူမန်တံဟိုတ်နူလဵုတုဲ ဒးကျအာမာဲဂိဂိဂှ်ရော၊ ဓဝ်ညဳသာအ အလုံဂကူမန်ဂွံလီုလာ်ဒၟံၚ်တ္ၚဲဏံဂှ် ဟိုတ်နူလဵုတုဲဒှ်ဒၟံၚ်သာ်ဏံဂှ်ကီု၊ ပ္ဍဲအရာဂွံကလေၚ်ဒက်ပ္တန်ဓဝ်ညဳသာ အလုံဂကူမန် အဃောဖန်ဇန်ဒၟံၚ်ပရေၚ်ကောံဓရီုဇၞော်-သဘၚ်သဳကၠဳဇၞော်ကောန်ဂကူမန် ဂွံဒှ်ဂှ် ကိစ္စ ၃ ဂအုံ ၁ ဂအုံ မံက်တိုန်တ္ၚဲဏံဂှ် မုဟိုတ်သာ်လဵုရော တာလျိုၚ်နွံပ္ဍဲညးလဵုရော ဒးဂၠာဲသွဟ်ဍာံတုဲ ရေၚ်တၠုၚ် အာမ္ဂး ပရေၚ်ဆိုအ်ဗမံၚ်တ္ၚဲဏံ တတ်ကၠောံအာမာန်ရောၚ် ပ္တိုန်ထ်ၜးရ။

ဗှ်မာန်မံၚ်

မန်ဍုၚ်သေံတံ ဗှ်ဗၞုဟ်ဂုဏ်တၠတိ

ဍုၚ်ဇၞော်အယုဒ္ဓယျ ‘ယွံ အခိၚ်တေံ မန်ပိုဲတံ ဒှ်ပၞာန်ကုဗၟာ၊ ကျ ဗၟာရောၚ် ဟီုတှေ် ဂကူမန်ပိုဲတံ ဒးဂြိပ်ဒဴ လုပ်ကၠုၚ် လ္ပာ်ဍုၚ်အယုဒ္ဓယျရောၚ် အခိၚ်တေံ ဍုၚ်ဏံဟီုတှေ် မန်ရ …

Leave a Reply

%d bloggers like this: