Categories
ပရိုၚ်

ဂကောံပံၚ်ကောံပရေၚ်ဂကူမန် အာမ်အေယူ (MAU) ဂှ် ပြံၚ်သၠာဲဒက်ပ္တန်အာ ဗီုပြၚ်တၟိရောၚ်

အပ္ဍဲကဵုဂကောံပံၚ်ကောံပရေၚ်ဂကူမန် အာမ်အေယူ (MAU-Mon Affair Union) ဂှ် ရံၚ်ကဵုအကာဲအရာ ပရေၚ် ဍုၚ်ကွာန်ကၟိန်ဍုၚ် မံက်ဒှ်ကၠုၚ်ဒၟံၚအခိၚ်တ္ၚဲဏံဂှ်တုဲ အလုံကောန်ဂကူမန် သ္ဂောံပါလုပ်ကၠုၚ်မာန် ပြံၚ်သၠာဲဒက်ပ္တန် အာ နကဵုဗီု ပြၚ်တၟိရောၚ် နူကဵုကောံဓရီုဇၞော်ပရေၚ်ဂကူမန် သၞာံ ၂၀၁၆ သ္ဂုတ်သွာတ်လဝ်ရ။

သွက်ဂွံဓမံက်ရုပ်ရဴတၚ်သ္ဂုတ်သွာတ်လဝ်ဂှ်ဝွံ နူကဵုညးစၞး (၇) ဗွိုၚ် (ဗော်ဍုၚ်မန်တၟိ၊ ဗော်ကောန်ဂကူမန်၊ ဗော်ဒဳမဵု ကရေဇြဳအလုံရးမန်၊ တၠဳပိုန်သၚ်၊ ဂကောံမဟာဇန်၊ တၠပညာကေုာံ ပူဂဵုဆာန်ဂကူ) နလၟိဟ်မွဲဗွိုၚ် (၃) တၠ အပံၚ် ဖၟိုတ် (၂၁) တၠဂှ် တုပ်စိုတ်ပံက်လဝ် ဂကောံပညဳပညပ်မွဲတုဲ ဂိတုသေပ်တေမ်ဗါ ၁၀ ဂတဏံးမ္ဂး နူဗွိုၚ်မဆေၚ်စပ် တံဂှ် မ္ဒးကဵုစရၚ်ယၟုဂမၠိုၚ်ရောၚ် ဖျေံလဝ်နွံရ။

ကောံဓရီုဇၞော်ပရေၚ်ဂကူမန် ပ္ဍဲကွာန်ကံပှ်လှ် သၞာံ ၂၀၁၆ (MNA)
ကောံဓရီုဇၞော်ပရေၚ်ဂကူမန် ပ္ဍဲကွာန်ကံပှ်လှ် သၞာံ ၂၀၁၆ (MNA)

ညးက္ဍိုပ်ကၠောန်ဗဒှ်ကောံဓရီုဇၞော်ပရေၚ်ဂကူမန် ကေၚ်ကာဗဟဵု ဗော်ဍုၚ်မန်တၟိ နာဲဝေန်လှဂှ် “ခြာဟွံလအ် ပံက် ဏောၚ်လေဝ်၊ ဂိတုဂတ (သေပ်တေမ်ဗါ) ဏံ စၟတ်တ္ၚဲ ၁၀ ဂှ်တှေ် ညံၚ်ဂွံကဵုစရၚ်ညးသ္ကံ၊ စၟတ်တ္ၚဲ (၁၅) ဂှ် ညံၚ်ဂွံစ ကမၠောန်မာန် ချိၚ်လဝ်ညးသ္ကံလေဝ်” သာ်ဝွံ ဟီုရ။

ပ္ဍဲကဵုပြံၚ်သၠာဲဒက်ပ္တန်အာ ဂကောံပံၚ်ကောံပရေၚ်ဂကူမန်ဝွံ ဒုၚ်သ္ဇိုၚ်ကဵု သ္ဇိုၚ်မူဒက်ပ္တန်အာမ်အေယူ (တြေံ) ကေုာံ လိက်စံၚ် သ္ဇိုၚ်မူဒက်ပ္တန်ဓဝ်ညဳသာအလုံဂကူမန် နူကဵုဗော်ဍုၚ်မန်တၟိ မပ္တိုန်ထ္ၜးလဝ် အပ္ဍဲကောံဓရီုဇၞော်ပရေၚ်ဂကူ မန်တံဂှ်တုဲ ဂကောံပညဳပညပ် လၟိဟ် (၂၁) တၠတံဂှ် မ္ဒးပလေဝ်အာတၟိရောၚ် နူကောံဓရီုဇၞော်ပရေၚ်ဂကူမန်ဂှ် သ္ဂုတ် သွာတ်လဝ်ရ။

လဂွံကဵုသ္ဇိုၚ်မူဒက်ပ္တန်ဓဝ်ညဳသာ အလုံဂကူမန် လိက်စံၚ်ဗော်ဍုၚ်မန်တၟိ ချူလဝ်ဂှ်မ္ဂး ဂကောံပံၚ်ကောံမသ္ပစၞးကဵု အလုံဂကူမန်မွဲ မမိက်ကဵုမ္ဒးနွံဗွဲစၟတ်တုဲ ဂကောံပံၚ်ကောံဂှ်ဝွံ သွက်ဂွံရေၚ်တၠုၚ်အာ ဓဝ်ညဳသာအလုံဂကူမန်မာန် မ္ဒး ဒက်ပ္တန်အာ နကဵုညးစၞး နူကဵုဗွိုၚ်ဗော်ပရေၚ်ဍုၚ်ကွာန်ရပ်လွဟ်၊ ဗော်ပရေၚ်ဍုၚ်ကွာန် အပ္ဍဲဍုၚ်၊ ဂကောံမဟာဇန် နာနာ၊ သၚ်၊ တၠပညာ ကေုာံ ပူဂဵုဆာန်ဂကူဂမၠိုၚ်ရောၚ် ချူဓမံက်လဝ်နွံရ။

သဘာပတိ ဂကောံပံၚ်ကောံပရေၚ်ဂကူမန် အာမ်အေယူ (တြေံ) ဗွိုၚ်အပ္ဍဲဍုၚ် နာဲဗညာဂ္ဇံဂှ် “ပ္ဍဲကဵုကောံဓရီုဏံဂှ် ညးတံဒုၚ်စလဝ်ကဵု ဂကောံပံၚ်ကောံပရေၚ်ဂကူမန်ရ၊ ညးတံ ဟွံပလေဝ်ပုဟ် ယၟု၊ ဆဂး ဗီုပြၚ်အာကီု၊ ဗီုပြၚ်ဒက် ပ္တန်ကီုဂှ်တှေ် ဍေံပြံၚ်အာညိဏောၚ်” သာ်ဝွံ ညးဟီုရ။

အလုံဂကူမန်တံ သ္ဂောံဆက်စပ်ကၠောံက္ဍညးသ္ကံတုဲ ညံၚ်ဂွံကသေအ်ကၟဝ်ချပ်ဇန်အာပရေၚ်ဂကူမန်နာနာ ရန်တၟံတုဲ ဒက်ပ္တန်ကၠုၚ်လဝ်ဂကောံပံၚ်ကောံပရေၚ်ဂကူမန် အာမ်အေယူ မဒုၚ်သ္ဇိုၚ်ကဵု ဗွိုၚ် (၄) ဗွိုၚ် (ဍုၚ်သၟာၚ်၊ ဍုၚ်သေံ ကေုာံပယျဵု၊ ဗော်ဍုၚ်မန်တၟိကဵု ဗွိုၚ်အပ္ဍဲဍုၚ်) ပ္ဍဲသၞာံ ၂၀၀၇ တေံရောၚ် ဂွံတီကေတ်ရ။

ကောံဓရီုဇၞော် ပရေၚ်ဂကူမန်ဂှ် ကၠောန်ဗဒှ်လဝ် ပ္ဍဲဘာကျာ်သ္ဍဴမန် ကွာန်ကံပှ်လှ် (ဒဵုထောၚ် ပန်ကအ်) ပွိုၚ်ဍုၚ်လှာဒကှ် ခရိုၚ်မတ်မလီု ပွိုၚ် (၃) တ္ၚဲ (အဝ်ဂါတ် ၂၂-၂၃-၂၄) တုဲ ညးစၞးနူဗော် ဍုၚ်မန်တၟိ၊ ဗော်ပရေၚ်ဍုၚ်ကွာန်ဂမၠိုၚ်၊ ဂကောံမဟာဇန်မန်နာနာ ကေုာံ ခမဳသၚ် ကေုာံ ညးလ္ၚတ် နူဗွိုၚ်အပ္ဍဲဍုၚ်၊ မ္ၚးဍုၚ်တံ လၟိဟ် (၄၄၆) တၠ တိုန်စိုပ်လဝ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.