Categories
ပရိုၚ်

ဂကောံပံၚ်ကောံလိက်ပတ်ယေန်သၞာၚ်မန် (ဗဟဵု) အာတ်မိက်ပ္တိုန်စရၚ် ဗဗွဲသၞောဝ်ရောၚ်

ဂကောံပံၚ်ကောံလိက်ပတ် ယေန်သၞာၚ်မန် (ဗဟဵု) သ္ပက္ဍိုပ်တုဲ နကဵုယၟု ‘ဂကောံလိက်ပတ်ယေန်သၞာၚ်မန် (တွဵုရးဍုၚ်မန်)’ ဂှ် ပ္ဍဲဂိတုမေ ပထမသတ္တဟဏအ် ပ္တိုန်စရၚ်ဗဗွဲသၞောဝ် ကုဌာနအလဵုအသဳ မဆေၚ်စပ်တေံဏောၚ် ဂွံတီလဝ်ရ။

ပံၚ်ကောံလိက်ပတ်ယေန်သၞာၚ်မန်(ဗဟဵု) အဃောသ္ပဒၟံၚ်ကောံဓရီု (MNA)
ပံၚ်ကောံလိက်ပတ်ယေန်သၞာၚ်မန်(ဗဟဵု) အဃောသ္ပဒၟံၚ်ကောံဓရီု (MNA)

အပ္ဍဲတွဵုရးဍုၚ်မန် ပွကိစ္စဇၞော်ဇၞော် (ကာမံက်တိုန်) က္တဵုဒှ်ကၠုၚ်မ္ဂး နကဵုကမ္မတဳဏအ် သ္ဂောံပံၚ်တောဲ ရၚ်တၠုၚ်မွဲကရောံကဵု အလဵုအသဳကီုရန်တုဲ ဒးပ္တိုန်စရၚ် အာတ်မိက် နဗဗွဲသၞောဝ်ရ သာ်ဝွံ ညးက္ဍိုက်ပ်မွဲတၠ နူဂကောံပံၚ်ကောံလိက်ပတ်ယေန်သၞာၚ်မန် ဗဟဵုဂှ် ဟီုရ။

“သွက်ဂွံပ္တိုန်စရၚ် ညံၚ်ဂွံဒှ်ဗဗွဲသၞောဝ်ဂှ် လၟုဟ်ပိုဲပဠေဝ်စမံၚ်ဖိုဟ်ရ။ ပ္တိုန်ပ္ဍဲအကြာတ္ၚဲတအ်ဏအ်ရဏောၚ်၊ လိက်ထံက်ဂလာန် ၝဒးကေတ်တအ်ဂှ် အဃောကၠောန်မံၚ် ပ္ဍဲပွိုၚ်ဍုၚ်ဖိုဟ်” သာ်ဝွံ ဖက်ဆောညးအုပ်ကာ ဂကောံပံၚ်ကောံလိက်ပတ်ယေန်သၞာၚ်မန်ဗဟဵု နာဲဗညာဂုဏ် ဂးရ။

ပ္ဍဲလက်ထက်အလဵုအသဳတြေံတုဲကၠုၚ်ဏအ် နကဵုကမ္မတဳ လိက်ပတ်ယေန်သၞာၚ်မန် (ဗဟဵု) ၜိုတ်ပ္တိုန်လဝ်စရၚ် ဗဗွဲသၞောဝ် ဗၞတ်ၜါဝါကီုလေဝ် ဟိုတ်နူ နွံကဵု ဗ္ၜတ်အပိုၚ်အခြာလၟိဟ်ကောန်ဂကောံကီု ဟိုတ်နူ မလိက်မ္ဂး ဗဟဵု ဂှ်ကီု ဒးကလေၚ်ပဠေဝ်ထောံ သာ်ဝွံ နာဲမန်ရာဇာ ညးအုပ်ကာနာနာ ဂကောံပံၚ်ကောံ လိက်ပတ်ယေန်သၞာၚ်မန် (ဗဟဵု) ဟီုရ။

“ မလိက် ‘ဗဟဵု’ ပါတှေ် ဂွိၚ်ဖေက်ဒှ်ဝါတ်တုဲ ဒုၚ်ကေတ်ယၟုတွဵုရးရ၊ အခေါၚ်စှေ်ကၠုၚ်မ္ဂး နကဵုအဆံၚ် ဗဟဵုဏအ်ရ ကၠောန်အာကလောန်ဏောၚ်” ဂှ်လေဝ် နာဲမန်ရာဇာ ဂးရ။

ဂကောံပံၚ်ကောံလိက်ပတ်ယေန်သၞာၚ် (ဗဟဵု) ဝွံ ပံက်ကၠုၚ်လဝ် နူကၠာ ၂၀၁၀ တေံရတုဲ သ္ပလဝ်စၞး သွက် (၁၈) ပွိုၚ်ဍုၚ် မပ္တံ ပွိုၚ်ဍုၚ် (၁၀) ပွိုၚ်ဍုၚ် ပ္ဍဲတွဵုရးမန်ကီု ၊ ရးဗဂေါ၊ ရးလ္ဂုၚ်၊ ပ္ဍဲတွဵုရးကရေၚ်မ္ဂး ပွိုၚ်ဍုၚ်ဘာအၚ်၊ ပွိုၚ်ဍုၚ်ကအ်ကြိက်၊ ပွိုၚ်ဍုၚ်လှာဒကှ် တအ်ပါလုပ်တုဲ ပွိုၚ်ဍုၚ်ဍာ်ဗု ရးတၞၚ်သြဳတအ်လေဝ် ပါလုပ်ကီု ဂွံတီကေတ်ရ။

ပ္ဍဲဂကောံလိက်ပတ်ယေန်သၞာၚ် အဆံၚ် (တွဵုရးဍုၚ်မန်) ဂှ်ဝွံ ဒံက်တာမာံကျဳဝေန် ဥက္ကဌ၊ ဒံက်တာ မာံသဵုလေန် ဒုဥက္ကဌ (၁) ၊ နာဲၚိုဲဆာန် ဒုဥက္ကဌ (၂) ၊ နာဲမန်ရာဇာ ညးအုပ်ကာနာနာ၊ နာဲဗညာဂုဏ် ဖက်ဆောညးအုပ်ကာ (၁) ၊ နာဲသာန်လှာၚ် ဖက်ဆောညးအုပ်ကာ (၂)၊ နာဲထဝ်လောန် ဖက်ဆောညးအုပ်ကာ (၃)၊ မိမဵုမဵုအေ ဖက်ဆောညးအုပ်ကာ (၄)၊ နာဲသိုက်ဆီ သ္ကိုပ်ဘဏ္ဍာ၊ နာဲသဳဟ ဒု သ္ကိုပ်ဘဏ္ဍာ၊ နာဲဝဏ္ဏမာန် သ္ကိုပ်ပရေၚ်လလောၚ်ပရိုၚ် နဂကောံကမ္မတဳ မပ္တံသာ်ဏအ် ပ္တိုန်စရၚ် အာတ်မိက် ပ္ဍဲဌာန်မဆေၚ်စပ်တေံဏောၚ် ဂွံတီကေတ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.