Categories
ပရိုၚ်

ရဲဒေသပွိုၚ်ဍုၚ်ပံၚ်တအ် ထ္ၜးဆန္ဒဒ္စဵုဒ္စး ကုကမၠောန်ကၠောန်ပ္တိတ်တၟံ Long Life

ကမၠောန်ကၠောန်တၟံ ကမ္ပနဳ Long Life Aggregate Mining Co.Ltd နွံဇရေၚ်ကွာန် (ဥတ္တံတား) ပွိုၚ်ဍုၚ်ပံၚ်၊ တွဵုရးမန်ဂှ် ဒိုအ်ကဵုညိ ရုပ်ကဵုညိ သာ်ဏအ် ပ္ဍဲဂိတုဂျုန် (၅) ဂှ် ကောန်ဒေသ ၜိုတ် (၅၀၀) တအ် နူကဵုကွာန် (ဥတ္တံတား) ဇက်ထ္ၜးဆန္ဒ ကညာၚ်ဒ္စဵုဒ္စးအာ ဒဵုကဵုစိုပ် ဒၞါဲကမ္ပနဳတၟံတေံရ။

ဗီုဇက်ဂၠောဲထ္ၜးဆန္ဒ (MNA)
ဗီုဇက်ဂၠောဲထ္ၜးဆန္ဒ (MNA)

ဟိုတ်နူမာၚ်တၟံဂှ်တုဲ တိဗ္ၚ ကၠအ်သွဝ် ကောန်ကွာန်တအ် လီုလာ်ကၠုၚ်၊ မြံၚ်ဍာ်တအ်လေဝ်ကၠက်၊ စောဝ် ကြုၚ် လ္ဂောဝ်တအ်ဂှ်လေဝ်လီု၊ ဂၠံၚ်ဍာန်အာကၠုၚ်လေဝ်လီု၊ အပေါတ်သယံဇာတတအ်လေဝ် လီုလာ်ဆောံဗြံအိုတ် ဒၟါနူဂှ်ရ ဒးထ္ၜးဆန္ဒ ကောန်ဒေသတအ် ဟီုရ။

“အလန်ပထမဏအ် ပိုဲထ္ၜးဆန္ဒတုဲ မုဟွံတၟေၚ်ဏီမ္ဂး အလန်ဒုတိယ ပိုဲဆက်ထ္ၜးဆန္ဒ ပ္ဍဲဂတရုၚ်ပွိုၚ်ဍုၚ်ပံၚ် ပၠန်ဏောၚ်။ ထ္ၜးပ္ဍဲမုက်ရုၚ်ပွိုၚ်ဍုၚ်ပံၚ်လေဝ် ဟွံတၟေၚ်ဏီမ္ဂး အလန်တတိယ အာ ထ္ၜးဆန္ဒ ဒဵုကဵုဂတမုက်ရုၚ် တွဵုရးတေံဏောၚ် ပြေၚ်ရေၚ်လဝ်ဗီုဂှ်နွံ။ မာၚ်တၟံဏအ် သွက်ကောန်ဒေသရမ္ဂး ဖဵုခိုဟ်ဗီုလဵုလေဝ် ဟွံမွဲရ။ ကောန်ကွာန် ကောန်ဒေသတအ် စိုတ်ညံၚ်ဂွံထ္ကးဂှ်ရ ဍေံဗဇဵုမံၚ်” သာ်ဝွံ ကိုဝ်ဇြဝ်ထိုဲ ညးက္ဍိုက်ပ် ပေါဲဆန္ဒဂှ် ဂးရ။

မာၚ်တၟံ Long Life နွံဇရေၚ်ကွာန် (ဥတ္တံတား) ဏအ် ဍေံဒှ်ကၠုၚ်နူသၞာံ ၂၀၁၃ တေံရ။ ကၠာ ဟဂွံကၠောန်ဂှ် ထေက်ကဵုဒးကေတ်ဆန္ဒ ရဲကွာန်တအ်ကၠာဏောၚ်၊ ဆ္ဂး ဆန္ဒညးဍုၚ်ကွာန် လညာတ်ကောန်ဒေသ နွံဗီုလဵုရောဂှ် ဍေံတအ်ဟွံသၟာန် သာ်ဝွံ ကိုဝ်ဇြဝ်ထိုဲ ဂးရ။

ပ္ဍဲအရာဇက်ထ္ၜးဆန္ဒဂှ်ဝွံ သွက်ဂွံထိၚ်ဒဝ်မၚ်မွဲ သဘာဝဝုတ်ဒိုဟ် ကမ္ပနဳမာၚ်တၟံဂှ် ပလီုထောံတှေ်ခိုဟ်။ တိဗ္ၚ ကၠအ်သွဝ် ညံၚ်ဂွိုအ်လီု ကမ္ပနဳမာၚ်တၟံဂှ် ညံၚ်ဂွံပလီု၊ ဍာ်နွံသဘာဝ ညံၚ်ဂွိုအ်လီု ကမ္ပနဳမာၚ်တၟံဂှ် ညံၚ်ဂွံပလီု၊ ကမ္ပနဳ Long Life ဂှ် ပိုဲဟွံမွဲပၟိက်၊ ကမ္ပနဳ Long Life ဂှ် ဒိုအ်လၟုဟ်ဟ်၊ သွက်ဂွံထိၚ်ဒဝ် ဂြိုပ်ဆုဒုန်ဂှ် မာၚ်တၟံဏအ် ဒိုအ်ပြဟ်ဟ်၊ ဍိုပ်ဍာ် ကသိုၚ်ဍာ် ညံၚ်ဂွိုအ်ကၠက်ဂှ် ကမ္ပနဳမာၚ်တၟံဏအ် ရုပ်ဖျဴပြဟ်ဟ် နဂလာန် ကမြဴသာ်ဏအ် ကရေဲက္ညာၚ်ကၠုၚ်အိုတ်ရ။

“ ပိုဲထ္ၜးဆန္ဒလၟုဟ်ဂှ် ညံၚ်ဂွံဒိုအ်ထောံ ကလောန်ကၠောန်ပ္တိတ်တၟံဏအ်ဟေၚ်ရ။ မူဟိုတ်ရောဟီုတှေ် ဟိုတ်နူကၠောန်ပ္တိတ်တၟံဏအ်ဂှ်ရ ဍာ်တအ်ကၠိပပ် ဍာ်ဂၠုက်ကၠက်ကၠုၚ်။ ဍာ်အရၚ်ဂွံသုၚ် အရၚ်ဂွံရပ်စပ် ဝါတ်ဂါတ်ကၠုၚ်။ ဟိုတ်နူဗတဳ စှေ်ကၠုၚ်နူလ္တူတေံဂှ် တိကၠအ် တိဗ္ၚတအ် လီုကၠုၚ်။ ဒၟါနူဂှ်ရ ပိုဲဒးထ္ၜး ဆန္ဒ” ရဂှ်လေဝ် ဒဝ်ပါန်ယဳ မထ္ၜးဆန္ဒဂှ် ဂးရ။

စပ်ကဵု အာတ်မိက်ပဒိုအ် မာၚ်တၟံဏအ်ဂှ်တုဲ ပ္ဍဲစၟတ်တ္ၚဲ (၁၂-၈-၂၀၁၄) တေံဂှ် နကဵုစၟတ်တဲ ဒ္စဵုဒ္စး (၂၅၀၀) ပြၚ်၊ ပ္ဍဲစၟတ်တ္ၚဲ (၂၉-၁၂-၂၀၁၅) ဂှ် နကဵုစၟတ်တဲဒ္စဵုဒ္စး (၈၀၀) ပြၚ်၊ ပ္ဍဲစၟတ်တ္ၚဲ (၂၂-၆-၂၀၁၆) နကဵုစၟတ်တဲ (၁၀၀၀) ပြၚ်ၚ် ပလံၚ်ဗ္စိုပ်လဝ်လိက်ဒ္စဵုဒ္စး ကုဌာနအလဵုအသဳ ဒၞါဲမဆေၚ်စပ်တအ်ကီုရ ဂွံတီကေတ်။

ကမ္ပနဳ ကၠောန်ပ္တိတ်တၟံ Long Life Aggregate Mining Co.Ltd ဂှ်ဝွံ အခေါၚ်ကၠောန်ပ္တိတ် တၟံအရၚ်ဂွံသိုၚ်ခၞံ ကဵု တၟံအရၚ်ဂွံလးဂၠံၚ်ဂှ် ဂွံလဝ်အခေါၚ် နူအလဵုအသဳ သွာၚ်မဆေၚ်စပ်တအ်တုဲ ပံက်လဝ်ဌာန်ကလောန် ပ္ဍဲဗွိုၚ်တိနွံကဵု ၂၂၅ ဨက အပ္ဍဲ (ကွၚ်းအမှတ် ၄၆) ၊ ဗွိုၚ်ဒၞးဂြိုပ်ဆု ဒဵုနၚ်္ဂလာ (ကုလားမတောၚ်ကြိုးဝိုၚ်)၊ ပွိုၚ်ဍုၚ်ပံၚ် တွဵုရးမန် ဂှ်တုဲ ကၠောန်ပ္တိတ်မံၚ်တၟံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.