Categories
သၟာန်သွဟ်

သၟာန်သှ် အစာချူဒွက် ဇာတိနာဲ

ညးသၟာန်-မာံဝရ

မာံဝရ။ ။ ကောဇာတိနာဲဂှ် ချူလဝ်ဒွက်လေဝ် ဂၠိုၚ်ကဵုပိုဒ်ရ ဒွက်ကောဇာတိနာဲ ချူလဝ်တအ်ဂှ်လေဝ် သၟာဒယှေ်ဒွက်တအ် ရုဲပတိုန်က္ဍိုပ်ကဝးလေဝ်နွံမံၚ် မုဟိုတ် ကောဇာတိနာဲ ဂွံဝါသနာ ချူဒွက်ရော လဴကဵုညိဂွံဟာ?
ဇာတိနာဲ။ ။ ကိုပ်ကၠာဂှ်တှေ် နူကဵုဘဝကတ်ပရိယတ် မံၚ်ဘာဒေါဝ်ဍုၚ် ဍုၚ်ဇြပ်ဗု စတေံဂှ်တှေ် ဝါသနာ ပြိုၚ်ချုဇန်ကဗျ နူဂှ် ဂွံၜိုတ် မွဲၜါသၞာံတုဲ ပ္ဍဲသက္ကရာဇ်ဍုၚ် ၁၃၅၃ ဂှ်တှေ် ဆဵုဂဗကဵုသကအ်ရဲ ၜိုပ်ဍုၚ်တအ် ကောန်သ္ဂံၚ်တအ်၊ ဗညာဟံၚ်တၠတအ် ညးတအ်ဂှ် ဒှ်မံၚ်ရဲချူဒွက်တှေ် ညာတ်ဍေံတအ်ချူတုဲ စိုတ်လုပ်စ ချူကီု ချူမံၚ်နူစကၠာကၠာတေံ ဍေံလေဝ် ဟွံဒးသတ်ပုဟ်၊ စိုတ်ဂွံလုပ်စ ချူဒွက်ဂၠိုၚ်ဂှ်

တှေ် ကလၚ်လဝ်ဒွက် လျးဟံသာ အ္စာဒယှ်ယှ်တအ် ချူလဝ်ဂှ် ဒှ်မံၚ်ဂုဏ်ဖိုလ် ပရေၚ်ဂကူ ဘာသာ ပရေၚ်ဆဝ်ဗ္ၚုဟ်တအ် ဍေံဒှ်အာ ပရေၚ်ဂကူမွဲကဏ္ဍကီု၊ စိုတ်မိက်ဂွံဒှ် အ္စာချူဒွက် ဂၠိုၚ်ဟီုစဂွံလေဝ်၊ ဟီုထောံသောၚ်သောၚ်ရ။

မာံဝရ။ ။ နူတေံ ဒဵုကဵုလၟုဟ်တှေ် သရောပ်တုဲ ချူဂွံဒွက် ၜိုတ်မုစိပိုဒ်ရရော ?

အစာချူဒွက် ဇာတိနာဲ(MNA)
အစာချူဒွက် ဇာတိနာဲ(MNA)
ဇာတိနာဲ။ ။ အာပး……အဲချူဂှ်ဟွံဂၠိုၚ် လ္တူဟွံဂၠိုၚ်ဂှ် အဲလေဝ်သမ္တီဟွံဒးရပုဟ်၊ အဲဟွံဂွံရိုဟ်လဝ် ချိုတ်တ်ပၠိုတ်တ်တှေ် သၠးအခေါၚ်၊ လက္ကရဴ အဲပဠေဝ်ပဠေတ်စတုဲတှေ် ညံၚ်ဂွံတီလၟိဟ်ဂှ် အဲဂစာန်အာဏောၚ်၊

မာံဝရ။ ။ ဒွက်ကောဇာတိနာဲ ချူလဝ်တအ်ဂှ် ဒွက် Copy ပါမံၚ်ကီုဟာ?
ဇာတိနာဲ။ ။ ဗွဲမဂၠိုၚ်တှေ် ချပ်ချူ ဆဵုချူ တုဲတှေ် မိက်ဂွံပတိုန်ထ္ၜးအကာဲရာဒှ် စပ်ကဵုပရေၚ်ဆာန်တအ် ပရေၚ်ဍုၚ်ကွာန်တအ် ၜိုတ်ဇကုကၠိုဟ်ဂှ်လေဝ်၊ ဒွက်ကၠာဲဂှ်တှေ် ဒွက်သေံ နွံ မွဲဒွက် ၜါဒွက်ကီုဏောၚ် ဆဂးတှေ် ကၠာဲကေတ် ဍေံဖအိုတ်ဟွံသေၚ်လေဝ် ရုဲကံက်နုက်ကေတ် မွဲပၞောန် ၜါပၞောန် နွံ မွဲဒွက် ၜါဒွက်ကီု။ တိုက်ရိုက် သီုဖအိုတ် သီုမွဲပိုဒ်ဂှ် ကၠာဲလဝ် ဟွံမွဲပုဟ်၊

မာံဝရ။ ။ ဒွက်ကောဇာတိနာဲ ချူကၠုၚ်လဝ်တှေ် ဒွက်ဂွံဒုၚ်ရုဲစှ် က္ဍိုပ်ကဝး နွံၜိုတ်မုစိဒွက်ရော?
ဇာတိနာဲ။ ။ ၜိုတ်အဲသမ္တီဒးတှေ် နွံၜိုတ် ၆ ဒွက်ဏောၚ် လ္ၚဵုဂှ်တှေ် အဲလေဝ် သမ္တီဟွံဒးနွံ၊

မာံဝရ။ ။ ကောဇာတိနာဲ စဳဇန်ကၠုၚ်လဝ်ကဝး နွံမံၚ်တၟာဂလိုၚ်ဟာ?
ဇာတိနာဲ။ ။ ကဝးစဳဇန်ဂှ်တှေ် နွံ ၜိုတ် ၈ ကဝး ၉ ကဝးနွံဏောၚ်။

မာံဝရ။ ။ ဟီုဟဂှ်တှေ် မွဲဒမြိပ်ကောဇာတိနာဲ ချူကၠုၚ်လဝ်ဒွက်ဂှ်တှေ် ဒွက်လဵု ကောဇာတိနာဲ ဒးစိုတ်ဂၠိုၚ်အိုတ်ရော?
ဇာတိနာဲ။ ။ ဒွက်မွဲဒမြိပ် ချူကၠုၚ်ဂှ်တှေ် ဒးစိုတ်ဂလိုၚ်အိုတ် ဒွက် “ဟံသာ” ရ။

မာံဝရ။ ။ ဒွက် “ဟံသာ” ဏံဂှ် ညးဂှ် ဒယှေ်လဝ် တုဲပၠန် ညးဂှ် ကၠောန်လဝ်အခိုက်ဒွက် ရော?
ဇာတိနာဲ။ ။ ဒွက်ဏံဂှ် သၟာဒယှေ်ဒွက် ဟံၚ်ဆာန် ဒယှေ်လဝ် အခိုက်ဂှ်တှေ် သၟာဒယှေ်ဒွက် ပါမောက္ခဆာန် ကၠောန်လဝ်အခိုက်ဒွက်၊ ဒွက်ဏံဂှ် ပါလုပ်ပ္ဍဲကဵု ကဝး “သွက်ဝၚ်နာဲ” ဂှ်ရ။

မာံဝရ။ ။ ဟီုဟဂှ်တှေ် ဒွက်ကေၚ်ချူကၠုၚ်လဝ်ဖအိုတ်ဂှ် ကောဇာတိနာဲ ဒးစိုတ် ဒွက် “ဟံသာ” ဂၠိုၚ် ဂွံမိၚ်လဝ်ဟဂှ်လေဝ် ဒုၚ်စသိုၚ် ဗီုလဵုတုဲတှေ် ဂွံဒှ်ချူဒွက် “ဟံသာ”ဂှ် လဴကဵုညိဂွံဟာ ?
ဇာတိနာဲ။ ။ ယွံ အခိၚ်ချူဒွက် “ဟံသာ” ဂှ် အဲစိုပ်မံၚ်ဍုၚ်မ္ၚးဏောၚ် အေအခိၚ်ဂှ်ရ နူကဵုဗော်ပရေၚ်ဍုၚ်ကွာန် ဗော်ပၠန်ဂတးရပ်လွဟ် ညးတအ် တက်ကျာကဵု အလဵုအသဳ သွက်ဂွံဒေါအ်ပန်ပှော် အခိၚ်ဂှ်ဂှ် သၟာကမၠောန်မန် လုပ်ကၠောန်မံၚ်ကမၠောန် ဍုၚ်သေံတအ် စဴလုပ်ကၠုၚ်ဍုၚ်မန် ၜိုတ်ထေက်ကြိုက်ဏောၚ် ဂၠံၚ်တရဴညးကဵု ညး အခိၚ်ဂှ်ပၠန် သကအ်ရဲ မိဿဟာဲ အဲဍုက်ကေဝ်မံၚ်တအ်ဂှ် စဴအာဂၠိုၚ်မံၚ်တှေ် ချပ်စိုပ်အာ အရၚ်ဂွံချူဒွက်မွဲပိုဒ်လေဝ် ဒှ်မံၚ်အခိၚ်အခါကာလလေဝ် ကိတ်ညဳမံၚ်တုဲ “ဟံသာ စဴအာကွာန်” ဗီုဏံ ဒးဒုၚ်စသိုၚ် ချပ်တိတ်အာတုဲ ချူကၠုၚ်လဝ် ဒွက်ဏံလေဝ်

မာံဝရ။ ။ ယွံ ဒွက် “ဟံသာ” ဏံ ကလၚ်တှေ် စိုပ်မံၚ်ပရေၚ်ဆာန်ညံၚ်ညံၚ် ပရေၚ်ဍုၚ်ကွာန်ညံၚ်ညံၚ်ဏောၚ်၊ ကောဇာတိချူလဝ်ဂှ် ကဵုလဝ်ဖျုန်ကဵု ပရေၚ်ဆာန်ဟာ ပရေၚ်ဍုၚ်ကွာန်ဟာ?
ဇာတိနာဲ။ ။ ဒွက်ဂှ်တှေ် ဒဿနဍေံဂှ် ပရေၚ်ဆာန် ကေုာံ ပရေၚ်ဍုၚ်ကွာန် ပါသီု ၂ ရ။

မာံဝရ။ ။ ယွံ ဒွက် “ဟံသာ” ဏံဂှ် ဍိုက်ပေၚ်ကဵု ရှ်သာ်ဗွဲမလောန်ရ၊ ယွံ ဆက်တုဲ သၟာချုဒွက်မန်ပိုဲတှေ် ကောဇာတိနာဲ ဒးစိုတ် သၟာချူဒွက်လဵုဂၠိုၚ်ညိရော?
ဇာတိနာဲ။ ။ အဲဒးစိုတ်မံၚ် တၟာဂလိုၚ်ဏောၚ် ရိုဟ်ပတိတ်ဖအိုတ်ဂွံဟာ ဟးဟးဟး (ဂြိုၚ်တုဲ) အခိၚ်တေံတှေ် အဲဒးစိုတ် သၟာချူဒွက် ဟံသာတ္ၚဲဏံ၊ အ္စာဇၞူမန်၊ ၜိုပ်ဍာဲ၊ တၠမန်(သၞာ်ရတ်)၊ တၠဗန်၊ ကန္တာဇၞူမာန်၊ အမ်သဝ်မန်၊ တအ်ဏံဂှ်တှေ် အခိၚ်ကၠာတေံလေဝ် ယဝ်ရ အခိၚ်တၟိဏံဂှ်တှေ် အဲဒးစိုတ် ဗၠာဲမန်လွဳရတ်၊ ဒးစိုတ်မံၚ်ရ၊

မာံဝရ။ ။ ဒွက်ကောဇာတိနာဲ ချူလဝ်ဗွဲမဂၠိုၚ် ဂကူဒွက် ဗီုလဵု ပါလုပ်ဂၠိုၚ်ရော?
ဇာတိနာဲ။ ။ ဒွက် Slow Rock တအ်ဂၠိုၚ်ညိ၊ ဍေံအာဗီုဂှ်ကီု ဂကူဒွက် Pop တအ် ပါလုပ်မံၚ်ကီု။

မာံဝရ။ ။ ဒွက်ကောဇာတိနာဲ ချူလဝ်ဂှ်ရော သွက်သၟာဒယှေ်ဒွက် ပ္ဍဲဂဳတ၊ ဒယှေ်ပ္ဍဲပေဲါ ဗီုဏံ ပါ်လဝ်နွံကီုဟာ?
ဇာတိနာဲ။ ။ ဒွက်အဲချူလေဝ် တြေံတြေံတအ်ဂှ်တှေ် ပ္ဍဲပေဲါ ဒယှေ်စဂၠိုၚ်ညိ၊ သောၚ်ကဵု ဒွက် “ဟံသာ” တအ် ဒွက် “နန်” စၠန်ဒယှေ်လဝ်ဂှ်တှေ် ပ္ဍဲပေဲါ ဒယှေ်ဂၠိုၚ်ညိ၊ ဒွက်ခေတ်တၟိဏံဂှ်တှေ် ပ္ဍဲဂဳတတှေ် ဒယှေ်စဂၠိုၚ်ညိ ပါ်လဝ်ဂှ်ဟွံမွဲပုဟ်၊ ပ္ဍဲကဵု ကဝးညးဂှ်တှေ် ညးဒယှေ်ထေက်ဂှ်တှေ် ညးဒယှေ်မံၚ်ရ။

မာံဝရ။ ။ နကဵုသၟာချူဒွက်မန်မွဲတၠ သၟာဒယှေ်ဒွက်လဵု ဒးစိုတ်ဂၠိုၚ်ညိရော?
ဇာတိနာဲ။ ။ နကဵုအဲဂှ်တှေ် ဒးစိုတ်ရမျှာၚ်ကီု တုဲတှေ် ပရေၚ်ဒတောဲကဝါ် သၟာဒယှေ်ဒွက်ကီု စိုတ်ဓာတ်ကီု ဟီုကဵုခေတ်တှေ် ခေတ်အဲလုပ်စိုပ်လဂံါဗွိုၚ်ဂဳတဏံတှေ် အဲဒးစိုတ် ပါမောက္ခဆာန် ဂၠိုၚ်ညိ။ ယဝ်ရ ခေတ်မွဲအခိၚ်တှေ် ခေတ်ဟွံစိုပ်လဂံါ ဂဳတတအ်ဏီတှေ် ဒးစိုတ်မံၚ် တၟာဂလိုၚ်မှလေဝ် အ္စာဒယှေ်ဒွက် ဒယှ်တအ် အ္စာ လျးဟံၚ်မန်တအ် အ္စာအာဲမန်တအ် ။

မာံဝရ။ ။ ရံၚ်ကေတ်တှေ် ဒွက်ကောဇာတိနာဲချူလဝ်ဂှ် သၟာဒယှေ်ဒွက်တံ ဒယှေ်ကၠုၚ်လဝ်နွံတၟာဂလိုၚ်ဏောၚ် ပရိသာတ်တအ်လေဝ် ကလၚ်သောတနွံမံၚ်ဏောၚ် ဂွံဂွံချုဒွက် မွဲပိုဒ်မာန် ဒးပဠေဝ်ပဠေတ်တၟာဂလိုၚ်ဟာ၊?
ဇာတိနာဲ။ ။ ဒွက်အဲ ချူ ဗီုပြၚ်စှေ်စှေ် နဲကဲစှေ်ကွေံကွေံလေဝ်ဟွံသေၚ်ပုဟ်၊ ညံၚ်ကဵု ကေၚ်ပဠေဝ်ပဠေတ်လဝ် ဟွံမွဲဟဂှ်ရ။ ဟိုတ်နူ ရဲသၟာဒယှေ်ဒွက် အာတ်တှေ် ချူဏာဟဂှ်ရ၊ ဒွက်အဲချူလဝ် ဗွဲမဂၠိုၚ်တှေ် မွဲစုတ်ဍောတ်ကီုရ မွဲဂ္ဇံက်ဂှ်တှေ် ချူဍေံတုဲမံၚ်၊ ဗီုလဵု ကိတ်ညဳကဵု အခိုက်ဍေံဂှ်ကေတ်ဟွံဒး ဍေံတိတ်အာမံၚ်ကီု ဟးဟးဟးဟး(ဂြိုၚ်တိုန်ညိ)

မာံဝရ။ ။ ယွံ သၟာန်ကၠုၚ်လဝ်လေဝ် တၟာဂလိုၚ်ရ၊ မိက်ဂွံသၟာန် ဆေၚ်ကဵု ပရူဒတောဲကဝါ် သၟာချူဒွက် တၟိတၟိတအ် နွံမံၚ်ကီုဟာ၊
ဇာတိနာဲ။ ။ ပရေၚ်ဒတောဲကဝါ်ဟီုဂှ်တှေ် ယဝ်ဒးဟီုတပ်တပ်တှေ် ပရေၚ်ကဵုဇြဟတ်နွံ ၜိုတ်ဇကုကၠိုဟ်ဂှ်ရ ကေၚ်လဴထ္ၜးနွံ ၊ နကဵုဗီုပြၚ်စှေ်စှေ် ဂွံကဵု ခန်လ္ၚတ် ခန်ဗ္တောန်တအ်ဂှ် နကဵုဇကုဂှ်လေဝ် လက်ျှန်ဍေံဟွံပေၚ်ပုဟ်တှေ် ချပ်လဝ်ဂှ် သာ်ဂွံဟီုဟွံမွဲလေဝ် ဆဂး ကမၠောန် နတဲဂှ် ဓမံက်ထ္ၜးဟွံမာန်၊ အယာံမာတ် ကဵုဇြဟတ် ဒတောဲကဝါ် ဗွဲယေဘုယျရ။ နကဵုစိုတ်ဂှ်တှေ်နွံပေၚ်ပေၚ်ရ မပ္တံ ကွတ်မန် အခိုက်ချူဇန် ဇၟန် ကဗျ ဒွက် သီုဖအိုတ်ဂှ် နကဵုအခန်ဗ္တောန်ဂှ် ကဵုဟွံမာန်ဏီပုဟ်ဏး၊ ချပ်လဝ်ဂှ်တှေ် နွံမံၚ်ရ။

မာံဝရ။ ။ ဗွဲမဂၠိုၚ်တှေ် သၟာချူဒွက်တအ် ချူ ချပ် ဇန်တုဲမှ သၟာဒယှေ်ဒွက်တအ် ဒယှေ်သေၚ်ဟာ၊ ပ္ဍဲအရာဂှ်တှေ် ကာလ ဂွံယၟု ယၟုမြဟ်ဂှ် သၟာဒယှေ်ဒွက်ဏောၚ် ယၟုမြဟ်အာ လတူအကာဲအရာဏံ နဒဒှ် သၟာချူဇန်ဒွက်မွဲတၠ ပရေၚ်ဒုၚ်စသိုၚ်နွံဗီုလဵုရော?
ဇာတိနာဲ။ ။ သောၚ်နကဵု လညာတ်အဲတှေ် ဒွက်ဇကုချူလဝ်ဂှ် ရဲဒယှေ်ဒွက်တအ် ဒယှေ် ဒယှ်အာတှေ် မိပ်စိုတ်ဗွဲမလောန်၊ နကဵုလညာတ်အဲတှေ် ပိုတ်တ်ဟဂှ်ရ၊ ဒွက်ဇကုချူဂှ် ဍေံပါအာပ္ဍဲကဝး ၜိုန်ရ ဟွံဒယှ်ကီုလေဝ် ပါလုပ်ပ္ဍဲကဝးဂှ် ဒှ်တၚ်မိပ်စိုတ်မွဲ၊ ဍေံဒယှ်အာ ပုရိသာတ်တအ် ဒုၚ်တဲ ကလၚ်ဂၠိုၚ်တှေ် သာတုဲမိပ်စိုတ်ဂၠိုၚ်၊ သၟာဒယှေ်ဒွက်ဂှ် ဒယှ်က္ဍၚ် ဇကုမိပ်စိုတ်က္ဍၚ်ရ။
တုဲတှေ် ပရေၚ်တၞဟ်ခြာ ဍေံမံက်တိတ်ကၠုၚ်ဂှ် ဇၟာပ်သၟာဒယှေ်ဒွက်တအ် မိက်ဂွံကဵု သၟာချူဒွက် ဂၠိုၚ်ကၠုၚ်ဏောၚ်တှေ် ပ္ဍဲကဵုဒယှေ်ဒွက် လတူစၚ်တှေ် ပရေၚ်သ္ပသမ္တီ ဒယှေ်ဒၞာဲလဵုဒှ်ဒှ် ပ္ဍဲဝိုၚ်လဵုဒှ်ဒှ် ပ္ဍဲဥတုကညၚ်ဒှ်ဒှ် ပ္ဍဲဝိုၚ်ဇွသၚ်ဒှ်ဒှ် နကဵုယၟု အ္စာချူဒွက်ဂှ် သၟာဒယှေ်ဒွက်တအ် ဟီုစအောန်၊ ဒွက်ဏံဂှ် ညးဂှ်ချူ အ္စာချူဂှ် ယၟုဗီုဏံ သၟာဒယှေ်လ္ၚဵုလ္ၚဵုဂှ်တှေ် ဂွံသတိတုဲ ညးတအ် ဟီုမံၚ်ဏောၚ် သၟာဒယှေ်လ္ၚဵုဂှ်တှေ် ဟီုဆ က္ဍိုပ်ဒွက်သၟးတုဲ ဒယှေ်အာဟဂှ် အေဗီုတအ်ဏံ ပရေၚ်ဒုၚ်စသိုၚ် သၟာချူဒွက် ဍေံနွံညိလေဝ် မုဍေံနွံဗီုလဵုရောတှေ် ဒၞာဲတံဂှ် ယဝ်ရ ဗပေၚ်ကဵုယၟု ဟီုလဴကဵုယၟု ဂတမုက်ပရိသာတ်တအ်မာန်တှေ် သၟာချူဒွက် သာတုဲတှေ် မိပ်မြဟ် ကမၠောန်တအ်ဏံဂှ်လေဝ် ဍေံခိုဟ်အာမာန်လေဝ်၊

မာံဝရ။ ။ အကြာသၟာသုခုမမန်ပိုယ် ပရေၚ်ဆဵုဂဗ တၚ်ခက်ခုဲနွံဟာ?
ဇာတိနာဲ။ ။ နကဵုလညာတ်အဲတှေ် ဒဒိုက် အခက်အခုဲဟွံသေၚ်ပုဟ် ပေဲါဗတိုက်မွဲဏောၚ်၊ မုပဟလဵုရောတှေ် ဝါသနာနွံတုဲတှေ် ကၠောန်ဏောၚ်၊ ကၠောန်အာနကဵုတၚ်ရန်တၟံနွံနွံဏောၚ်၊ လတူတၚ်ရန်တၟံဂှ်တှေ် ဓဝ်ပတှေ် ဇကုနွံတှေ် သၟာဒယှေ်လ္ၚဵုလ္ၚဵုဂှ် ဒၞာဲဇကုရန်တၟံလဝ် ၜိုတ်ဍေံဟွံစိုပ်တှေ် ပရေၚ်ဆဵုဂဗနတဲ ၜိုတ်ကဝက်နွံဏောၚ်၊ ယၟု ဇကု ပရိသာတ်တအ် ဒုၚ်တဲ၊ တုဲတှေ် ပရေၚ်ဒးတက်ထပါ်ကၠုၚ် ပရေၚ်ကၠောန်ကဝးဏံဂှ် ဇၟာပ်သၟာဒယှေ်ဒွက် ယဝ်ရ ဒးဟီု ပရေၚ်သွံရာန် ပရေၚ်ဘဏ္ဍာဏောၚ်တှေ် ဍေံဝါတ်မံၚ်ကွေံကွေံ၊ ယဝ်ရ ပရေၚ်ဘဏ္ဍာဂှ် လ္ပကျောဝ် ကျောဝ်ကဵုပရေၚ်ဝါသနာဏောၚ် ဇကုမိက်ဂွံဒယှ်တှ်ဏောၚ်တှေ် ကိတ်ညဳမံၚ်ကဵု သၟာဒယှေ်ဒွက်တအ်ရ အဲညာတ်ဗီုဂှ်။ ဣဏံဂှ် ဒဒိုက်ဟွံသေၚ်ပုဟ် ကဏ္ဍပေဲါဗတိုက်ဏောၚ်၊

မာံဝရ။ ။ ဣဏံ ကဏ္ဍ ချူဒွက်တအ် ကဏ္ဍအနုသုခုမတအ် သၟာန်လဝ်တၟာဂလိုၚ်ရဏး မိက်ဂွံ သၟာန်စ ပရူ ဘဝကောန်ဇာတိနာဲညိကီုလေဝ် ပဲါကမၠောန်ချူဒွက် ပါလုပ်ပ္ဍဲဗွိုၚ်ဂဳတတုဲ ကမၠောန်တၞဟ်ဟ်တအ် ကၠောန်နွံမံၚ်ကီုဟာ?
ဇာတိနာဲ။ ။ အာပး ခိုဟ်ကွေံ….ရ တၚ်သၟာန် ဟးဟးဟး
ယွံသၟာန်စိုပ်တှေ် လဴကဵုဏောၚ်လေဝ်၊ နူစ အဲစိုပ်ဂဳတမန်တုဲ ပဲါနူကမၠောန် ချူဒွက် ပဲါနူကမၠောန် ကၠောန်မံၚ်အကြာဂဳတမန်တုဲတှေ် နကဵုကမၠောန်ပူဂဵု ချိုတ်တ်ပၠိုတ်တ်ဂှ် မုလေဝ် ဟွံဂွံကၠောန်အာဟဂှ်ရ။

မာံဝရ။ ။ ယွံ တုဲတှေ် လၟုဟ်

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.