ပ္ဍဲကိုန်အစဳဇန် (၁၀၀ တ္ၚဲ) အလဵုအသဳတၟိ ဖန်ဇန်ဒၟံၚ် ကိစ္စသွက်ဂွံပ္တိတ်ကဵု စရၚ်သ္ၚိကၟိန်အိန်ထံၚ် ကုသၟာကလောန် ဆုဲပြံၚ် ကေုာံ ညးပြံၚ်လုပ်ဖျေံသဇိုၚ်ဂှ် နူဗော်ဂဥုပ် ဒဳမဝ်ကရေဇြဳ ဂကူကောန်ဍုၚ်အရၚ်သေံ SNLD ပ္တိုန်ဂလာန်တာဒၞါ ပ္ဍဲကၠတ်ထဝ်ဏောၚ် ဂွံလဝ်ပရိုၚ်ရ။
သာၚ်ညောအ်လွေန် ညးအုပ်ကာနာနာ ဗော် SNLD ဂှ် “ ယဝ်ဒှ် (မှတ်ပုံတၚ်) ယာယဳတှေ် ဟွံဟီုမွဲသာ်။ ဆ္ဂး ကၠောန်ကဵု သီုစရၚ်သ္ဂာတ္ၚဲဏီဟီုတှေ် ဍေံဟွံစှေ်ဗီုရ။ ပဗီုဂှ်တှေ် မၞိဟ်တဂှ် ဒှ်အာကောန်ဒေသဂှ် အိုတ်ဏောၚ်ရ။ ကိစ္စဏအ် နကဵုဗော်ပိုဲ ပ္တိုန်ဂလာန်ဒၞါတာ ပ္ဍဲကၠတ်ထဝ်တေံဏောၚ်” ဂးရ။
စပ်ကဵုကိစ္စဂှ်တုဲ အခါက္လေၚ်ပံက်ကၠတ်ထဝ်ပၠန်မ္ဂး ညးစၞးကၠတ်ထဝ်ဂမၠိုၚ် နူဗော်ဂဥုပ် ဂကူကောန်ဍုၚ်အရၚ်သေံ (SNLD) ပ္တိုန်ထ္ၜး ဂလာန်ဒၞါတာ ပ္ဍဲကောံဓရီုကၠတ်ထဝ်ဏောၚ် ဂွံတီကေတ်ရ။
ဗီုဂှ်ကီုရ ပ္ဍဲတွဵုရးမန်လေဝ် က္တဵုဒှ်ဗီုဂှ်ကီုတုဲ ခမဳသၚ်မန်ကဵု ဂကောံမှာဇန်မန်တအ် ပရေၚ်ကိစ္စကၠောန်ကဵု စရၚ်သ္ၚိကၟိန်အိန်ထံၚ် ကုသၟာကလောန်ဆုဲပြံၚ် ကေုာံ ညးပြံၚ်လုပ်ဖျေံသဇိုၚ်တအ်ဂှ် က္လေၚ်ဗ္စာကဵုညိ ရဴဝွံ ပ္ဍဲကာလ လောန်ကၠုၚ် မုဟွံလအ်ဏီဏအ် ပလံၚ်ဗ္စိုပ်လဝ်လိက်အာတ်မိက် ပ္ဍဲဂအုပ်ဝန်ဇၞော် တွဵုရးမန်ကီုရ။
ပ္ဍဲလိက်ဂှ်ဝွံ ရဲဌာန်ပလုၚ်တအ် လုပ်စိုပ်ကၠုၚ်တုဲဂှ် အပ္ဍဲဒေသ ပရေၚ်ၜိုဟ်သိုဟ်ဟွံမွဲတုဲ အမှုရာဇဝတ် က္တဵုဒှ် မွဲဏှေံမွဲဏှေံ၊ပ္ဍဲဂအာၚ်တိ နွံကဵုတလဂှ်လေဝ် လုပ်ဖျေံလဝ်သဇိုၚ် သီုၜက်တိတ် ပ္ဍဲတိဂၠံၚ်တုဲ ဍေံဒွအ်ဒွါဒး ပရေၚ်ကောန်ဒေသတအ်ရဂှ် ဓမံက်လဝ် ပ္ဍဲလိက်ဂှ်ရ။
ပ္ဍဲဒေသမွဲမွဲ ရဲဆုဲပြံၚ်ကၠုၚ်တအ် တန်တဴဂွံ ပွိုၚ်တြဴဂိတု (ဟွံ) ပွိုၚ်ဒ္စါံဂိတုတုဲမ္ဂး ပ္တိတ်ကဵုစရၚ်သ္ၚိကၟိန် ယာယဳဏောၚ်ဟီုဂှ်လေဝ် ဒှ်ပရေၚ်အရီုဂွံစူမွဲတုဲ မူဟိုတ်ဒးဖန်ဗီုဏအ်ဂှ် ညးဍုၚ်ကွာန်ဌာန်ဒေသတအ် ညံၚ်ဂွံတီ ဟိုတ်နူဟွံလဴက္လးလဝ်ဂှ်ရ ကောဒေံကောန်ဍုၚ်အရၚ်တအ် ဒှ်ဒၟံၚ်ဓဝိၚ်အိုတ် သာ်ဝွံလေဝ် ဂးလဝ်ပ္ဍဲလိက်ဂှ်ကီုရ။
ရဲဌာန်ပလုၚ် ပြံၚ်လုပ်ကၠုၚ်တအ်ဏအ် ယဝ်ဂွံတၞးခံက်အၚ် စရၚ်သ္ၚိကၟိန်အိန်ထံၚ်မ္ဂး ဂွံအခေါၚ်ကဵုမာဲ ပ္ဍဲဒေသတအ်ဂှ်ကီုဏောၚ်တုဲ ဣဏအ်ဂှ် ပဠေဝ်စ သွက်ပေါဲရုဲမာဲဂတတေံဟာ သာ်ဝွံ ညးအုပ်ကာနာနာ ဗော် SNLD ပ္တိတ်ဏာဂလာန်သမာန်ရ။
ကာလဂတမတ်လၟုဟ်ဏအ် ပ္ဍဲတွဵုရးသေံ ဍုၚ်ဇၞော်တိုၚ်ကျဳ၊ ဠာယှဵု၊ မူဇြာ၊ တာချဳလိက် တအ်ဂှ်မ္ဂး ရဲပလုၚ် ကၠုၚ်နူရးသၟဝ်ဝ်ကဵု ဒေသတၞဟ်ဟ်တအ် ဂၠိုၚ်နူရဲတံမူလတအ်ဣရတုဲ လၟိဟ်ဂကူပလုၚ် ဂၠိုၚ်တိုန်မံၚ်ဂှ် ဂွံဆဵုကေတ်ရ။
ဒၟါနူဂှ်ရ ပ္ဍဲပေါဲရုဲမာဲသၞာံ ၂၀၁၅ ဂှ် ပ္ဍဲတွဵုရးသေံမ္ဂး ဗော်ပျဳခိုၚ်ဖျဵု USDP ဂွံမာဲဂၠိုၚ်အိုတ်တုဲ ဗော် SNLD ဂှ် ဂွံမာဲဂၠိုၚ်အိုတ်အဆံၚ်ဒုတိယ၊ ဗော် NLD ဂှ် ဂွံမာဲဂၠိုၚ်အိုတ် အဆံၚ်တတိယ ရ။