Categories
ပရိုၚ်

ရးဒေသဇၞော်လ္ၚဵုဂှ် ယူအေန်အေပ်ဇြဳ (UNFC) ရန်လဝ် နဒဒှ်တွဵုရးကောန်ဂကူဂလိုၚ်နွံ

ယဝ်သဳကၠဳကိစ္စ ဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရေဝ်ဒဳမဝ်ကရေဇြဳမ္ဂး ရးတနၚ်သဳ၊ ရးဨရာဝတဳ ကဵု ရးသေတ်ကါၚ် သၟဝ်ကျာတံဂှ် ညံၚ်ဂွံသ္ပသမ္တီ နဒဒှ်တွဵုရးကောန်ဂကူဂလိုၚ်ဂှ် ပ္တိုန်ထ္ၜးအာရောၚ် ရန်လဝ်သာ်ဂှ် နာဲဟံသာ ဒုဥက္ကဌ UNFC ဂးရ။

ပ္ဍဲပေါဲသောၚ်က္လးလိက်ပရိုၚ် ဇူလာၚ် ၂၇ မဒှ်တ္ၚဲဒုတိယ ကောံဓရီုမုက်ဇဳ ဂကောံရပ်လွဟ်ကောန်ဍုၚ်အရၚ် မကၠောန်ဒၟံၚ် ပ္ဍဲမာၚ်ဂျာယာန် တိဍာ်အုပ်ဓုပ် KIO ဂှ် နာဲဟံသာ ဒုဥက္ကဌ UNFC ဟဂွံထ္ပက်စၟတ်တဲ NCA ဏီဂှ် ဟီုဂးဏာဂလာန်သာ်ဂှ်ရ။

 ကောံဓရီုမုက်ဇဳ EAO's (MNA)
ကောံဓရီုမုက်ဇဳ EAO’s (MNA)
“ပိုဲရန်လဝ်ဂှ် ဆေၚ်ကဵုတွဵုရးကောန်ဂကူတှေ် ဥပမာ ကချေၚ်၊ ကရေၚ်၊ သေံဇၞော် မပ္တံတံဏံဂှ် တွဵုရးနွံမံၚ် တုဲတုဲရ၊ ပ္ဍဲရးဒေသဇၞော်လ္ၚဵုလ္ၚဵု ညံၚ်ရဴ ရးတနၚ်သဳ ရးဨရာဝတဳ တံဂှ် ကောန်ဂကူနာနာတံ တန်တဴမံၚ်တုဲ ခုတ်လဝ် နကဵုယၟု ဂကူ မွဲဂကူဓဝ်မ္ဂး ဍေံဟွံဍိုက်ပေၚ် ဟွံဂပ်ဂဝ် ပိုဲညာတ်ဗီုဂှ်။ ရးဒေသ နွံကဵုကောန်ဂကူနာနာဗီုဏံဂှ် ပိုဲရန်လဝ် ညံၚ်ဂွံစွံကဵု နဒဒှ်တွဵုရးဂကူဂလိုၚ် (အမျိုးသားမျာမပြည်နယ်) ဂှ်ဂှ် အဆံၚ်သွက်ဂွံတုပ်ကဵု တွဵုရးကောန်ဂကူတၞဟ်ဟ်တံကီုရ။ ပိုဲရန်လဝ်ဂှ် ရးတနၚ်သဳ၊ ရးဨရာဝတဳ၊ ရးသေတ်ကါၚ် ကရေက်သၟဝ်ကျာ (လ္ပာ်လ္တူၜဳချေန်တွေန်)” နာဲဟံသာ ဂးရ။

နနဲဂှ်ကီု ရးဗဂေါ၊ ရးမာန္တလေ၊ ရးမကွေ တံဂှ် သွက်ဂွံသ္ပသမ္တီ ဒဒှ်တွဵုရးဗၟာဂှ် ပ္ဍဲကောံဓရီုမုက်ဇဳဏံ ရန်လဝ်ဗွဲအပြောံနွံ ဂွံတီကေတ်ရ။

သၟာၚ်နူဂှ် သွက်ကောန်ဍုၚ်အရၚ်ဂှ် သမ္တီကဵုလဝ် (၇) တွဵုရးတုဲ နကဵုဂကူဗၟာမွဲဓဝ် ရးဒေသဇၞော် (၇) ရးကဵု ပ္တန်လဝ်ကံၚ်ဇြဳနေပျဳဒဝ်ပၠန်ဂှ် ဒှ်အရာဟွံတုပ်သၟဟ် ဟွံဓဝ်ယာ ရဂှ်လေဝ် သဳကၠဳထံက်ထ္ၜးလဝ်ကီုရ။

တုဲပၠန် အပ္ဍဲတွဵုရးသေံဇၞော်ဂှ် ဟိုတ်နူနွံကဵုဂကူဗွဲမဂၠိုၚ် မပ္တံ ပအိုအ်၊ ပလံၚ်၊ ကချေၚ်၊ ကိုဝ်က တံကီုဂှ်ရ ထေက်ကဵုဒးသ္ပ နဒဒှ်ဖေဝ်ဒရေဝ်ရးသေံဇၞော် သဳကၠဳကၠုၚ်သာ်ဏံဂှ် ကိစ္စပြံၚ်လှာဲယၟုတွဵုရးသေံ သာ်ဏံဂှ် ဂကောံသေံဇၞော်တံ ဟွံစှေ်စိုတ် ဒ္စဵုဒ္စးကၠုၚ်နွံ ဂးရ။

သၟာၚ်နူဂှ်ပၠန် တၚ်အဓိက (၈) တၚ် မတွံဂး အဝဵုအခြာ (အချုပ်အခြာအာဏာ) ပၞးတုပ်၊ အခေါၚ်အဝဵု ဖန်ဖက်ပြုပြေၚ် ပရေၚ်ဘဝဂကူဇကု၊ ကၟိန်ဍုၚ်ပံၚ်ကောံ ဖေဝ်ဒရေဝ်ဇေတ်တ်၊ ပရေၚ်စဵုဒၞါမၚ်မွဲ အခေါၚ်အဝဵု ကောန်ဂကူဍောတ်တ်၊ အခေါၚ်အဝဵုဒဳမဝ်ကရေဇြဳ၊အခေါၚ်အရာ တြုံဗြဴ ပၞးတုပ်၊ ဒဳမဝ်ကရေဇြဳ ဗော်ဇဳ၊ ကၟိန်ဍုၚ် ဟွံဒုၚ်သဇိုၚ်ကဵုပရေၚ်ဘာသာတံဂှ် ကာလချူခၞံသၞောဝ်ဒက်ပ္တန်ကၟိန်ဍုၚ်ပံၚ်ကောံဖေဝ်ဒရေဝ်မ္ဂး ဟွံမွဲဟွံဂွံ ထေက်ကဵု သ္ဒးခၞံစိုတ် ပ္ဍဲသၞောဝ်ဏောၚ်ဂှ်လေဝ် သဳကၠဳလဝ်ကီု ဂွံတီကေတ်ရ။

ကောံဓရီုမုက်ဇဳဝွံ ရန်လဝ်သွက်ဂွံကၠောန် ဗၞတ် (၄) တ္ၚဲ နူဂျူလာၚ် ၂၆ ဒဵုကဵု ၂၉ ဂှ်ကီုလေဝ် ပရေၚ်သဳကၠဳဟွံပိုတ် ဟွံတုဲဒှ်က္ဍၚ်တုဲ သွက်ဂွံထပ်ဂလိုၚ်တိုန်မွဲတ္ၚဲပၠန် ဂးလဝ်ကီုလေဝ် ဟွံချိုတ်ပၠိုတ်ဏီရ။

ပ္ဍဲကောံဓရီုမုက်ဇဳ ဂကောံရပ်လွဟ် ကောန်ဍုၚ်အရၚ် မကၠောန်ဒၟံၚ်ပ္ဍဲမာၚ်ဂျာယာန် တွဵုရးကချေၚ်ဂှ်ဝွံ သီုဖအိုတ် ညးစၞးဂမၠိုၚ် ဗၞတ် (၂၀၀) ပြၚ် နူကဵုဂကောံဂမၠိုၚ်မတွံဂး ဂကောံရပ်လွဟ် ကောန်ဍုၚ်အရၚ် (၁၇) ဂကောံ၊ ဂကောံမဟာမိတ် ကောန်ဍုၚ်အရၚ်ဂမၠိုၚ် မညဳသာသၟဟ်သၟန် (UNA)၊ ဖေဝ်ဒရေယှေန် ဗော်ကောဒေံ ကောန်ဍုၚ်အရၚ်ဂမၠိုၚ်(NBF )၊ ဂကောံညးဗြဴ (ကၟိန်ဍုၚ်ဗၟာ) WLB တံ တိုန်စိုပ်သဳကၠဳမံၚ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.