Categories
ပရိုၚ်

ပ္ဍဲကဵုပွိုၚ်ဍုၚ်ရေဝ် စၟဳစၟတ်ရပ်ဒၟံၚ် ကွဳစက်ယာန်မဗၠေတ်ကဵုစေဝ်ပၞောန်

ပ္ဍဲတွဵုရးမန် ပွိုၚ်ဍုၚ်ရေဝ် ရန်ကဵု သွက်ဂွံရပ်စပ်ကေတ်အရေဝ် ကုကွဳစက် ကွဳလိုန်ဓါတ် ဟွံဗက်စေဝ်ပၞောန်၊ ဟွံလုပ်ဗဗွဲသၞောဝ်တံမာန် နကဵုအစဳဇန် (၃) တ္ၚဲမွဲအလန် စစၟဳစၟတ်ရပ်စပ်ဒၟံၚ်ဣရ ဂွံတီကေတ်။

ပ္ဍဲဂိတုအဝ်ဂါတ် (၁) မံက်ဂှ် သီုကွဳလိုန်ဓါတ် မၞိဟ်ဍိုက်ဟွံဒလဝ်ခၟံက် (၁၉) မ ဂှ်မ္ဂး ကွဳယာန်ဟွံဗက်စေဝ်ပၞောန် သီုဖအိုတ် ရပ်ဂွံလဝ် ၂၁ မ အကြာပ်ဗၠာဲသၟိၚ် အံၚ်ဇေယျ နူဒပ်ထိၚ်ဒဝ်စေဝ်ပၞောန်ကွဳယာန် ပွိုၚ်ဍုၚ်ရေဝ် ဂးရ။

အဃောစၟဳစၟတ်ဒၟံၚ်ကွဳယာန်ဂမၠိုၚ် (Aung Naing Win FB)
အဃောစၟဳစၟတ်ဒၟံၚ်ကွဳယာန်ဂမၠိုၚ် (Aung Naing Win FB)
“သွက်ဂွံကေတ်အရေဝ် ကွဳစက်ယာန်ဟွံဗက်စေဝ်ပၞောန်တံဏံဂှ် ပံက်လဝ်အမှုတုဲ နူရုၚ်သၞောဝ်ဓဝ် ဆက်တပ်ဒဏ်ရောၚ်” အကြာပ်အံၚ်ဇေယျ ဂးရ။

ကၠာဟွံရပ်ကွဳယာန်သာ်ဏံဂှ် ကၠောန်ကၠုၚ်ပေါဲဟီုတွံ ပရေၚ်ကဵုဒၠေါံဗ္တောန် ကဵုဓဝ်သမ္တီဂှ် ကၠောန်ဂွံ ၜိုတ်၂၀၀ ဝါ၊ လိက်စၠောံတဲဂှ် ပရးဂွံ ၜိုတ် (၂) ဠက်ပြၚ်တုဲရဂှ်လေဝ် အကြာပ်ဂှ် ဂးရ။

ပ္ဍဲဥပဒေတၟိ စပ်ကဵုသွက်ဂွံကေတ်အရေဝ် ကွဳယာန်ဂမၠိုၚ်ဟွံဗက်စေဝ်ပၞောန်ဂှ် အတိုၚ်စေဝ်ပၞောန်ကွဳလိုန်ဓါတ်မ္ဂး ပ္ဍဲဍုတ်ကွဳလိုန်ဓါတ်ဂှ် ယဝ်ဒးဖ္ဍိုက်ကပေါတ်မ္ဂး ကပေါတ်ဂှ်ၜက်တိ်တ်လ္ပာ်သ္ကဲၜါလ္ပာ် ဗၞတ် ၁၅ သေန်တဳမဳတာ (၆) ၝောံတဲ ဟွံဂွံ၊ၜက်တိတ်အာ နူဍုတ်ကွဳလိုန် ဗၞတ် ၁၂ ၝောံတဲ (၃၁ သေန်တဳမဳတာ) ဟွံဂွံ၊ သမၠုၚ်ပၠန်လေဝ် သၠုၚ်တိုန်အာ နူပၞးမၞိဟ်ဍိုက်ဂှ် ဟွံဂွံ” တၚ်ဏံလေဝ် နွံမံၚ်ကီုတုဲ ဒှ်ကၠုၚ်အခက် သွက်ရဲဒေသတံရ ဂွံတီကေတ်။

“ဒေသရေဝ်ပိုဲဏံ ရဲကၠောန်ကၠအ်ဂၠိုၚ်မံၚ်၊ အခိၚ်ဏံလေဝ် ဒှ်အခိၚ်သစ္ဆုပါဒနာနာတံတိတ်ဏောၚ်၊ လ္ပာ်သ္ကဲ ၜက်တိတ် (၆) ၝောံတဲဟွံဂွံ ဟီုလဝ်ဗီုဂှ်တှေ် သွက်ရဲကၠအ် ရဲဖျာ လ္ၚဵုလ္ၚဵု မအာကၠုၚ်ဒၟံၚ် နကဵုကွဳလိုန်ဓါတ် ကွက်တ္ကဲနလ္ပာ်သ္ကဲတံဂှ်မ္ဂး ဒှ်အခက်ခုဲဇၞော်ဇၞော်” မိအိသန္တာလေန် ကောန်ဒေသရေဝ် ဂးရ။

နကဵုစေဝ်ပၞောန်ကွဳယာန်ဏံ ပ္ဍဲသၞာံ ၂၀၁၆ နူဂိတုအေဗရဴ ဒဵုကဵုစိုပ် ဂိတုဂျူလာၚ်မ္ဂး ရပ်ဂွံကွဳလိုန်ဓါတ် ဗၞတ် ၄၈ မတုဲ ဗွဲမဂၠိုၚ်ဂှ် ဟွံဒလဝ်ခၟံက်၊ ဟွံမွဲကဵု လိက်အခေါၚ်ဒဳ၊ ဟွံမွဲကဵုထးဂၞန်(နံပါတ်ပြာ) ကွဳလိုန်ဓါတ်တံ ဒးဒုၚ်ရပ်ဂၠိုၚ် ဂွံတီကေတ်ရ။

ပ္ဍဲတွဵုရးမန်ဏံ ပွိုၚ်ဍုၚ်ရေဝ်ဂှ် ဒှ်ပွိုၚ်ဍုၚ် နွံကဵုလၟိဟ်မၞိဟ်ဂၠိုၚ်အိုတ် အဆံၚ်ဒုတိယ (လၟိဟ်မၞိဟ် ၂ ကိုဋ်ပြၚ်) တုဲ ဟိုတ်နူနွံကဵု ရဲတိဗ္ၚကၠအ်သွဝ်ဂူယာ မပ္တံ ကၠအ်ထ္ၜိုတ် ဒူရေန်မၚ်ဂုတ် ကၠအ်သတ် ကေုာံ ကမၠောန်တမ္ၚာတံဂှ်ရ သွက်ဂွံအာကၠုၚ် ကၠအ် ဗ္ၚ ဂူယာဂှ် ရဲဒေသရေဝ်တံ စကာဒၟံၚ်ကွဳယာန်နာနာ မပ္တံ ကွဳလိုန်ဓါတ်ဓမ္မတာ၊ ကွဳလိုန်ဓါတ်တ္ကဲနလ္ပာ်သ္ကဲ၊ ကွဳယာန်ဆက်ဍုတ်၊ ကွဳယာန်ခဠာပိ တံရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.