ပ္ဍဲအခိၚ်ကာလလၟုဟ်ဝွံ ဖုၚ်တအ် အေန်တာနေတ်တအ်မံက်ကၠုၚ်တုဲ မၞိဟ်သၟတ်တအ်ဂှ် လ္တူနူဒးဗှ်လိက်အုပ်ဂှ် ဝေၚ်ဂေမ်ပ္ဍဲဖုၚ်ကီု ဝေၚ်အေန်တာနေတ်ပ္ဍဲဖုၚ်ကီု သာ်ဝွံဟေၚ် စိုတ်လုပ်စဂၠိုၚ်တိုန်အိုတ်ရောၚ်ဂှ် ဒဝ်ဝါ၀ါလွေန် ညးမဒှ် သ္ကိုပ်အုပ်ဓုပ် ပ္ဍဲဌာန လလောၚ်တြးကဵုပရေၚ်ဆက်ဆောံညးဍုၚ်ကွာန်တွဵုရးမန်ဟီုရ။
“ခေတ်လၟုဟ်ဂှ် ဖုၚ်တအ် အေန်တာနေတ်တအ် မံက်ကၠုၚ်တုဲ အဵုၝတအ်ဂှ်ရ မၞိဟ်သၟတ်တအ် ပဵုတုဲစိုတ်လုပ်စ ဂၠိုၚ်မံၚ်အိုတ်ရ၊ လ္တူနူဒးပံက်ဗှ်လိက်အုပ်ဂှ် ဍေံတအ်ပဵုတုဲ စိုတ်လုပ်စပ္ဍဲဖုၚ်ရ” သာ်ဝွံ ဒဝ်ဝါ၀ါလွေန်ဟီုရ။
လိက်တၟိတၟိဂမၠိုၚ်စိုပ်အောန်ကီု၊ ဂကောံမၚ်မွဲရံၚ်စံၚ် ဇြဟတ်ဟွံမွဲကီု၊ အခေတ်ကာလပြံၚ်သၠာဲကၠုၚ်တုဲ ညးသၟတ်တံ ဖအိုတ်မံၚ်ကဵုအခိၚ်မုက်လိက်ပရေၚ်မၞိဟ် (facebook) ကီုတုဲ သွက်ဂွံဗှ်လ္ၚတ်လိက်အုပ်ဂှ် ကဵုအခိၚ်ဟွံမာန်ရောၚ်ဂှ် ညးမၚ်မွဲရံၚ်စံၚ်တိုက်ရံၚ်လိက် ကွာန်ပ္ၚ ပွိုၚ်ဍုၚ်ဇြပ်ဗု နာဲကျဝ်တုၚ် ဟီုရ။
နာဲကျဝ်တုၚ်ဂှ် “မၞိဟ်လိၚ်လိက်ဂှ် ဆလတှေ် မွဲတ္ၚဲ ၜါတၠ မွဲတၠ ၜိုတ်ဏံ ကၠုၚ်လိၚ်မံၚ်လိက်ကီုရ၊ အခိၚ်ပံက်ဘာ တှေ် ဍေံဂၠိုၚ်ကၠုၚ်မံၚ်ကီု ပိုဲလေဝ်အာယုက်ဇၞော်တိုန်ရ။ ယဝ်ရမၞိဟ်ဍောတ်တ် ဂွံအာက္ဍိုပ်တုဲကၠောန်တှေ် အာဂတ နူဏံ ပရေၚ်ဗှ်လိက်ဂှ် တဴတက်မာန်ဟာဟွံတီ” သာ်ဝွံ ညးဟီုရ။
ပ္ဍဲတွဵုရးမန်ဝွံ နူဌာနလလောၚ်တြးကဵုပရေၚ်ဆက်ဆောံတွဵုရးတံ စှေ်ပရေၚ်စန်ဒက် စဵုကဵုစိုပ်အဆံၚ်ကွာန် မွဲဂိတုမ္ဂး ၜိုတ်ပိကွာန်တုဲ ဆေၚ်စပ်ကဵုပရောဗှ်လိက်ဂှ် ၜိုန်ရစန်ဒက်ကၠုၚ်လဝ်ကီု်လေဝ် ကွာန်လ္ၚဵုဂှ် လပါ်ညးဍုၚ်ကွာန်တံ ဘိုၚ်မၚ်မွဲ ရံၚ်စံၚ်ဇြဟတ်အောန်တဴအိုတ်ဂှ်ရ အသိၚ်ဗှ်လိက်ဍိုန်မံၚ်ရောၚ်ဂှ်လေဝ် ညးဆက်ဟီုရ။
“တိုက်ရံၚ်လိက်ပ္ဍဲကွာန်ကဵု တိုက်ရံၚ်လိက်ပ္ဍဲအရာပ်တံဂှ် နူကဵုမိမညးဍုၚ်ကွာန်တံ ညာတ်ကေတ်ဒဒှ်ရ တိုက်ရံၚ် လိက်တံဂှ် ဒှ်ဌာန်ဒတန်ဂၠာဲပရေၚ်ဘဝသွက်ဂွံတဴတက်ဏောၚ်။ အဵုဗီုဏံ ညာတ်ကေတ်မာန်တုဲ ဘိုၚ်ရေၚ်တၠုၚ်ပ ရေၚ်တိုက်ရံၚ်လိက်မွဲဂကောံမွဲကရောံတှေ် ပရေၚ်ဗှ်လိက်ဂှ် ဂွံအံၚ်ဇၞးကၠုၚ်မာန်ဏောၚ်” သာ်ဝွံ ဒဝ်ဝါ၀ါလွေန် ထပ်ဟီုလဝ်ရ။
တိုက်ရံၚ်လိက်ပ္ဍဲတွဵုရးမန်တံဝွံ ဟိုတ်နူညးဗှ်လိက်အောန်ကီု ဟိုတ်နူမိမညးဍုၚ်ကွာန်တအ် ပါလုပ်ချဳဓရာၚ်အောန် ကီုတုဲ ဒးကၟာတ်ထောံလေဝ် နွံမံၚ်ကီုရောၚ်ဂှ် ဂွံတီကေတ်ရ။
“တိုက်ရံၚ်လိက်ကွာန်ပိုဲဂှ် ကၠာတေံဂှ်နွံမံၚ်ဖိုဟ်လေဝ် ရဲဗှ်လေဝ်ဟွံမွဲတှေ် ကၟာတ်ထောံလဝ်ဂှ် တၟာလအ်ရ” သာ်ဝွံ အ္စာသဝ်ဝန်နူကွာန်အနေၚ်မွဲတၠ မၞုံယၟုနာဲသြဇာနန်ဟီုရ။
ပ္ဍဲတွဵုရးမန်ဝွံ ကွာန်နွံ ၁၁၉၈ ကွာန်တုဲ တိုက်ရံၚ်လိက်ညီသၟဟ်ကဵုပရေၚ်ဍာ်ဒကေဝ်ပေၚ်ၚ်ဂှ် ပ္ဍဲကွာန်ဂှ် နွံ ၃၁၇ တုဲ ပ္ဍဲအရာပ်လ္တူဍုၚ်တအ်ဂှ် နွံ ၁၄၊ ပံၚ်သီုဖအိုတ် နွံ ၃၃၁ တိုက်တုဲ အခိၚ်လၟုဟ်ဝွံ လ္ၚဵုဂှ် တန်တဴအာမံၚ်ကီုတုဲ လ္ၚဵုဂှ် ဇြဟတ်ဍိုန်မံၚ်တုဲ ညးဗှ်လိက်တအ်လေဝ် အောန်စှေ်ကၠုၚ်မံၚ်အိုတ်ရောၚ်ဂှ် ဂွံတီကေတ်ရ။