ပ္ဍဲကဵုကၠတ်ထဝ်တွဵုရးဍုၚ်မန်ဝွံ နူကဵုညးစၞးမွဲမွဲ ပၠောပ်ဂလာန် ပ္တိုန်ဂလာန် မမိက်ကဵုမွဲမွဲမ္ဂး ညးစၞးကၠတ်ထဝ်မသၟေဟ်ဒၟံၚ်တံ ပွမသဳကၠဳထံက်ဂလာန်ကီု၊ ပရေၚ်ကဵုကသပ်ဂၞန်တံကီု ပါလုပ်အောန်တုဲ အသိၚ်ဍိုန်လျမံၚ်ရောၚ် ပ္ဍဲကောံဓရီုလၟေၚ်ဍာံ အလန်တတိယ- ကၠတ်ထဝ်တွဵုရးဍုၚ်မန် အလန်ဒုတိယ ကၠောန်သ္ပလဝ် ပ္ဍဲဂိတုအံက်တဝ်ဗါ (၁၀) ဂှ် ဥက္ကဌကၠတ်ထဝ် တွဵုရးဍုၚ်မန် ဒဝ်တေန်အိ ဟီုပ္တိတ်ရ။
“လ္တူဂလာန်မွဲမွဲဂှ် ညးစၞးစုတ်စရၚ်ယၟု သွက်ဂွံဗိုၚ်သဳကၠဳဂှ် အောန်ကွေံကွေံ ဂွံဆဵုကေတ်ရ။ က္တဵုသဳကၠဳလၟုဟ်ဟ်ရမ္ဂး တၠဂလာန်ကဵု ညးစၞးလုပ်သဳကၠဳ ထံက်ဂလာန် ကေုာံ ဝန်ဇၞော် မကေတ်လဝ်တာလျိုၚ် ပ္ဍဲဌာနအလဵုအသဳ မွဲမွဲတၠ ၜိုတ်ဏံရ ပၠောပ်စရၚ်ယၟုတုဲ သဳကၠဳကၠုၚ်ဂှ် ဂွံဆဵုကေတ်” သာ်ဝွံ ဥက္ကဌ ကၠတ်ထဝ်တွဵုရးဍုၚ်မန်ဂှ် ဟီုရ။
“မၞိဟ်ပ္တိုန်ဂလာန်ဂှ် ၁ တၠ၊ ထံက်ဂလာန်သဳကၠဳဂှ် ၂ တၠဓဝ်ရတှေ် လ္တူလညာတ်ၜိုတ်ဏံဂှ်ရ ပိုဲချပ်ဂွံ။ လုပ်သဳကၠဳ ၜိုတ် ၅ တၠ၊ ၆ တၠဏောၚ်မ္ဂး လညာတ်တၟေၚ်ၚ် ဟွံတုပ်ညးသ္ကံတံ သွဟ်ခိုဟ်ဟ်တံ က္လိဂွံမာန်ဏောၚ်” သာ်ဝွံ ဥူအံၚ်ဂျဝ်တူ နူဒေသမာဲ လၟိဟ် (၂) ပွိုၚ်ဍုၚ်သဓီု ဟီုရ။
ညးလုပ်သဳကၠဳ လ္တူဂလာန်မွဲမွဲဂှ် ယဝ်ဂၠိုၚ်မ္ဂး လညာတ်သ္ၚဳဂၠိပ် သဳကၠဳ ပ္တိုန်ထ္ၜးတံဂှ် ဍေံက္လိဂွံဂၠိုၚ်ရ ကာလဂှ်မ္ဂး နကဵုဥက္ကဌကၠတ်ထဝ်လေဝ် ညးချပ်လောဲ သ္ၚဳဂၠိပ်လောဲရ။ ညးစၞးမသၟေဟ်တံဂှ်လေဝ် လညာတ်လ္ပာ်လဵုဂှ် သ္ဂုတ်သွာတ်မ္ဂး ဒှ်ဂုန်ဖဵု ညးဍုၚ်ကွာန်ရော ဗ္စာလောဲသွာတုဲ အခါဒးပါ်မာဲမ္ဂး ပါ်ပါဲသောၚ်ၚ်ကၠးကၠးမာန်ရ ဒှ်သာ်ဂှ်ရ ပရေၚ်သဳကၠဳဂှ် ပိုဲဒးကၠောန်ဂၠိုၚ်ၚ်ရောၚ် ဥူအံၚ်ဂျဝ်တူဂှ် ဆက်ဟီုပၠန်ရ။
ကၠတ်ထဝ်တွဵုရးဍုၚ်မန် မကၠောန်လဝ်ကောံဓရီုလၟေၚ်ဍာံ အလန်တတိယ ပွိုၚ် (၅) တ္ၚဲတုဲကၠုၚ်ဏံဝွံ ဂလာန်သၟာန်နွံ ၂၆ တၚ်တုဲ ဂလာန်ပ္တိုန်ထ္ၜး နွံ (၇) တၚ်ဂှ် သ္ပဏာဒ္တန် သီု (၇) ဂလာန်တံဂှ်ရောၚ် ဂွံတီကေတ်ရ။
ပ္ဍဲကၠတ်ထဝ်တွဵုရးမန် အလန်ဒုတိယဝွံ ညးစၞးနူဗော်ဂမၠိုၚ် (မဇၞးလဝ်မာဲ သၞာံ ၂၀၁၅) မတွံဂး နူဗော် NLD ဂှ် ၁၉ တၠ၊ နူဗော်ကောန်ဂကူမန်ဂှ် ၂ တၠ၊ နူဗော်ဒဳမဝ်ကရေဇြဳအလုံရးမန်ဂှ် ၁ တၠ၊ နူဗော် ကျဖေါအ်ဂှ် ၁ တၠ ကေုာံ ညးစၞးဒပ်ပၞာန် ၈ တၠ ပံၚ်ဖအိုတ်မ္ဂး ညးစၞးကၠတ်ထဝ်မန် နွံ ၃၁ တၠတုဲ ကၠောန်ကၠုၚ်ကောံဓရီု ကၠတ်ထဝ်တွဵုရးဍုၚ်မန်ရ။