Categories
ပရိုၚ်

ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ ပ္ဍဲဒေသဟဂွံထ္ပက်စၟတ်တဲ NCA တံဂှ် ဒှ်အခက်ခုဲမာန် ညးက္ဍိုပ် DPN ဟီု

ဂကောံထ္ပက်စၟတ်တဲ လိက်ကသုက် တုပ်စိုတ်ဒေါံပန်ပှော် အလုံမွဲဍုၚ် (NCA) တုဲဂှ်ဟေၚ် ဂွံက္ဍိုက်ပ်ကၠောန်ဗဒှ် ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူရောၚ်ဒှ်တုဲ ပ္ဍဲဒေသ ဂကောံဟဂွံထ္ပက်စၟတ်တဲဏီတံဂှ် ဒှ်အခက်ခုဲကဵု မၞိဟ်က္ဍိုက်ပ်ပၠတရဴမာန်ရောၚ် သာ်ဝွံ ပ္ဍဲအံက်တဝ်ဗာ ၂၀ ဏံရ ခူဥူရာ ညးက္ဍိုပ် ဂကောံ DPN (နူ UNFC) ဟီုဂးလဝ်ရ။

ပ္ဍဲရးဒေသဇၞော် ကေုာံ တွဵုရးဂမၠိုၚ်တံဂှ် ဂကောံထ္ပက်စၟတ်တဲ လိက်ကသုက် NCA တံဟေၚ်ရ ဂွံအခေါၚ် က္ဍိုက်ပ် ကၠောန်ပေါဲသဳကၠဳပရေၚ်ဍုၚ်ကွာန် အဆံၚ်ကေါန်ဂကူရောၚ်ဒှ်တုဲ လၟုဟ်မ္ဂး ပ္ဍဲဒေသတံဂှ် ၜိုန်စဳဇန်ဒၟံၚ် သွက်ဂွံကၠောန်ပေါဲသဳကၠဳ နအလိုက် ကဏ္ဍ၊ အလိုက် ဂကူ၊ အလိုက်ပရူပရာ အိုတ်ကီုရလေဝ် ဂကောံ ဟဂွံထ္ပက်စၟတ်တဲ လိက်ကသုက် NCA ဂှ် အခေါၚ်က္ဍိုက်ပ်ပၠတရဴ ပ္ဍဲဒေသဇကု ဟွံမွဲရ။

ညးဂ္ဇအ်မံၚ်တၞုၚ်လ္ပာ်ပါဲဂှ် ခူဥူရာ ညးက္ဍိုပ်ဂကောံ DPN ပ္ဍဲကောံဓရီု သ္ၚဳဂၠိပ်မူပၞောန်ပရေၚ်ဍုၚ်ကွာန် အံက်တဝ်ဗာ ၂၀ (Hla Maung Shwe)
ညးဂ္ဇအ်မံၚ်တၞုၚ်လ္ပာ်ပါဲဂှ် ခူဥူရာ ညးက္ဍိုပ်ဂကောံ DPN ပ္ဍဲကောံဓရီု သ္ၚဳဂၠိပ်မူပၞောန်ပရေၚ်ဍုၚ်ကွာန် အံက်တဝ်ဗာ ၂၀ (Hla Maung Shwe)
“ ဒးဟီုကိစ္စဏံတှေ် ရံၚ်ကေတ်အလုံအကာဲအရာဖအိုတ် ပ္ဍဲဒဒှ်လၟေၚ်ပရေၚ်ၜိုဟ်လလံဍုၚ်ဂှ်မ္ဂး ညးက္ဍိုက်ပ် ပါလုပ်ကွေံကွေံကြာန်န်ဂှ် ဂကောံရပ်လွဟ်သၟးရဂၠိုၚ်၊ ပ္ဍဲပွိုၚ်ဍုၚ်လ္ၚဵုလ္ၚဵုတံ နကဵုဗော်ပရေၚ်ဍုၚ်ကွာန် ဂွံပါလုပ် ပ္ဍဲကိစ္စပရေၚ်ၜိုဟ်လလံဂှ် အောန်ကွေံကွေံရ၊ ဒှ်သာ်ဂှ်ရ ပရေၚ်အာက္ဍိုပ်ညးတံ ဒးဆဵုအခက်ခုဲမာန်ရောၚ်” ခူဥူရာ ညးက္ဍိုပ် DPN ဟီုရ။

ဒှ်သာ်ဂှ်ရ ပ္ဍဲဒေသ ဂကောံဟဂွံထ္ပက်စၟတ်တဲ NCA တံဂှ် ဂကောံလဵုမွဲ သ္ဂောံက္ဍိုက်ပ်ပၠတရဴရောဂှ် ဒှ်အခက်ခုဲမာန်ရောၚ် ညးဟီုရ။

“ ဗော်ပရေၚ်ဍုၚ်ကွာန်ဂှ် အခေါၚ်ပၠတရဴနွံဏောၚ်၊ ဂကောံပရေၚ်မၞိဟ်တံလေဝ် အလိုက် ဂကူညးကဵုညး နွံဏောၚ်၊ ဆ္ဂး ပ္ဍဲဒေသ နွံကဵုဂကောံဟွံဂွံထ္ပက်စၟတ်တဲ NCA ဏီဂှ်မ္ဂး အခေါၚ်ပၠတရဴ ဟွံမွဲရ။ အဲညာတ်ကေတ်ဂှ် ယဝ်ဟွံဂွံအခေါၚ်ပၠတရဴတှေ် သွက်ရဲဒးသဳကၠဳ နအလိုက်ကောန်ဂကူ၊ နအလိုက်ပရူပရာ အပ္ဍဲဒေသတံဏံ ဒှ်အခက်ခုဲညိဟာရောတီ” ခူဥူရာ ဂးရ။

ပ္ဍဲမူပၞောန် ပေါဲသဳကၠဳပရေၚ်ဍုၚ်ကွာန် NCA အခန် (၄) ပိုဒ် ၄ – ၄.၁.၁ ဂှ်မ္ဂး ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူဂှ် အတိုၚ်ဂၠံၚ်စၞောန် ကမ္မတဳပံၚ်တောဲ ဓမံက်ရုပ်ရဴပရေၚ်ၜိုဟ်လလံကၟိန်ဍုၚ် UPDJC နူကမ္မတဳကမၠောန်တံ ဖျေံလဝ်ဂှ်ဟေၚ် ဂကောံအလဵုအသဳ တွဵုရးကေုာံ ရးဒေသဇၞော်ဂမၠိုၚ်၊ ဂကောံရပ်လွဟ် ကောန်ဍုၚ်အရၚ်ဂမၠိုၚ် ကေုာံ ဂကောံပရေၚ်မၞိဟ် သွာၚ်အရာပ် တံဂှ် နဒဒှ် မွဲမွဲဂကောံကီု၊ ဟွံသေၚ်သာ်ဂှ် ပံၚ်ကောံညးသ္ကံတုဲကီု ကၠောန်သ္ပကေတ်မာန် သာ်ဝွံ ပ္ညပ်လဝ်ရ။

ဆ္ဂး ဂကောံ ဟဂွံထ္ပက်စၟတ်တဲ NCA ဏီတံ အခေါၚ်က္ဍိုက်ပ် နွံဟာ/ဟွံမွဲဟာဂှ် ပ္ဍဲဂိတုတုဲကၠုၚ်ဏံ ကောန်ဂကောံ UPDJC တံ ကၠောန်ကၠုၚ်လဝ်ကောံဓရီုတုဲ ကလေၚ်သ္ၚဳဂၠိပ်လဝ် မူပၞောန် ဂှ်ကီုရ၊ ဒှ်သာ်ဂှ်ရ ကိစ္စဏံ UPDJC ဟေၚ်ရ ဒးကဵုသ္ဂုတ်သွာတ်ရောၚ်တုဲ သ္ဂောံဂွံအခေါၚ်ကၠောန်ဂှ် တၠုၚ်လအာခိုဟ်မံၚ် သာ်ဝွံ ကောန်ဂကောံ UPDJC မွဲတၠ ဟီုရ။

ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူဂှ် ပ္ဍဲဒေသတိဍာ် ဂကောံရပ်လွဟ် ဟဂွံထ္ပက်စၟတ်တဲ NCA တံလေဝ် ညံၚ်သ္ဂောံကၠောန်မာန်ကီုဂှ် ပ္ဍဲဂိတုအံက်တဝ်ဗာဏံ စနူစၟတ်တ္ၚဲ ၁၈ ဒဵုကဵု ၂၀ ကၠောန်ဒၟံၚ်ကောံဓရီု သွက်ဂွံသ္ၚဳဂၠဳ မူပၞောန် ဆေၚ်ကဵုပေါဲသဳကၠဳပရေၚ်ဍုၚ်ကွာန် ဖိုဟ်တုဲ ညးစၞး DPN ဟဂွံထ္ပက်စၟတ်တဲဏီ KIO/KIA ၊ KNPP၊ NMSP ၊ SSPP/SSA ၊ ANC ၊ WNO ၊ LDU တံလေဝ် တိုန်စိုပ်သဳကၠဳဒၟံၚ် ပ္ဍဲကောံဓရီုဂှ်ကီုရ။

နူဂိတုအဝ်ဂါတ် ၃၁ ဒဵုကဵု သေပ်တေမ်ဗာ ၃ တုဲကၠုၚ်ဏံဂှ် ကၠောန်ကၠုၚ်လဝ် သ္ဘၚ်သဳကၠဳပရေၚ်ၜိုဟ်လလံဍုၚ် (ပေန်လုၚ် ၂၁ ဗွဝ်ကၠံ) အလန်ပထမတုဲ ခြာတြဴဂိတုပၠန်မ္ဂး ဆက်ကၠောန်သ္ပ အလန်ဒုတိယပၠန်ရောၚ် ဂးလဝ်သာ်ဂှ်ရ။ ဒှ်သာ်ဂှ်ရ အပ္ဍဲအကြာကာလဏံ ပ္ဍဲရးဒေသဇၞော် ကဵု တွဵုရးနာနာတံဂှ် ကၠောန်သ္ပပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ ကၠာရောၚ် ဂးလဝ် ပ္ဍဲလိက်ကသုက် NCA ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.