ကောံဓရီုလၟေၚ်ဍာံ အလန်စတုတ္ထ ကၠတ်ထဝ်တွဵုရးမန်အလန်ဒုတိယဂှ် ဒဳဇြေမ်ဗာ ရ မံက်တေံမ္ဂး ကၠောန်သ္ပ ပ္ဍဲၝောံခန်ကောံဓရီုကၠတ်ထဝ်တွဵုရးမန်ရောၚ် ဂွံတီလဝ်နူရုၚ်ကၠတ်ထဝ်တွဵုရးမန်တုဲ အခါကၠောန်ကောံဓရီုဂှ်မ္ဂး မ္ၚးနူဂလာန်သွက်ဂွံပၠောပ် (၄) သာ်၊ သွက်ဂွံသၟာန် သမာန် (၃၀) ပြၚ်တုဲ ဥပဒေအပြောံ သွက်ဂွံပလေဝ် ဥပဒေ ကမၠောန်ၜဵုလေဝ် ပ္တိုန်ထ္ၜးကီုရောၚ် ဂွံတီကေတ်ရ။
“ဂလာန်သၟာန်တံဂှ် ပ္ဍဲစၟတ်တ္ၚဲ ၂၃ ဂှ်မွဲဝါ၊ စၟတ်တ္ၚဲ ၂၅ ဂှ်မွဲဝါ ဣစဳတံ ပလံၚ်လဝ်တုဲရ၊သွက်ဂွံစိုပ် ဒဳဇြေမ်ဗာ ရ ဂှ် အခိၚ်နွံ ၜိုတ် ၂ သတ္တဟဏီ၊ လ္တူဂလာန်သမာန် ညးစၞးကၠတ်ထဝ်ဏံဂှ် ဣစဳတံ မိက်ဂွံမိၚ်သွဟ် ချိုတ်တ်ပၠိုတ်တ် နူအလဵုအသဳရ” သာ်ဝွံ ဒဝ်တေန်အိ ဥက္ကဌကၠတ်ထဝ် တွဵုရးမန် ဟီုသှ်ကဵုဌာန်ပရိုၚ်မန်ရ။
“ပ္ဍဲရုၚ်ဂဥုဲအမေရိကာန် (ရုၚ်ဂဥုဲညးဗြဴကဵုကောန်ၚာ်) မတ်မလီုဂှ် မၞိဟ်ယဲလေဝ်ဂၠိုၚ်၊ ညးဒုၚ်ကာ ကေတ်ဒၟံၚ်တာလျိုၚ်တံလေဝ် ဌာန်ဒၟံၚ်သွက်ဂွံဇူဒီုလေဝ် ဟွံမွဲတှေ် သဝ်ဝန်တံကဵု ညးမြိမြန်ယဲ (သူနာပြု) တံ နွံကဵုအခက်ခုဲရ၊ ဒှ်သာ်ဂှ်ရ သ္ၚိဌာန်သွက်ဒၟံၚ်ဇၞူညးတံ ဗီုလဵုဖန်ရော မိက်ဂွံသၟာန် တၚ်ဏံနွံ” သာ်ဝွံ အ္စာသဝ်စောန်တၟး ညးစၞးကၠတ်ထဝ် ဒေသမာဲလၟိဟ် (၁) ပွိုၚ်ဍုၚ်ရေဝ် ဟီုရ။
ပ္ဍဲရုၚ်ဂဥုဲအမေရိကာန် (သွက်ညးဗြဴကဵုကောန်ၚာ်) ဂှ် ၜိုတ်သ္ပလဝ် သွက်ခါတ် ၂၀၀ မဒှ်ကၠာလေဝ် အဃောအာဂေတ်ရံၚ် ပ္ဍဲနဝ်ဝေမ်ဗာ ၁၈ ဂှ် လၟိဟ်မၞိဟ်ယဲနွံဒဵုကဵု ၂၈၇ တၠဂှ် ဂွံဆဵုကေတ် အ္စာသဝ်စောန်တၟး ဟီုရ။
ပ္ဍဲဂကောံဓရီုကၠတ်ထဝ်လၟေၚ်စတုတ္ထဂှ် သွက်ဂွံပ္တိုန်ထ္ၜး လိက်ဒုၚ်စဳရေၚ် ကမၠောန်အလဵုအသဳ၊ လိက်ဒုၚ်စဳရေၚ် ကမ္မတဳပရေၚ်ကေၚ်ကာကၠတ်ထဝ်တံနွံဒၟံၚ်တုဲ ဒးကၠောန်ၜိုတ် ၅ တ္ၚဲရောၚ် ဥက္ကဌ ကၠတ်ထဝ်တွဵုရး ဂးရ။
ပ္ဍဲကၠတ်ထဝ်တွဵုရးမန် အလန်ဒုတိယဏံဝွံ ညးစၞးဇၞးလဝ်မာဲ ပေါဲရုဲမာဲ ၂၀၁၅ နူ NLD ဂှ် ၁၉ တၠ၊ နူဗော်ကောန်ဂကူမန်ဂှ် ၂ တၠ၊ နူဗော်ဒဳမဝ်ကရေဇြဳအလုံရးမန် ၁၊ နူဗော်ကျဖေါအ်ဂှ် ၁ တၠ၊ ညးစၞးဒပ်ပၞာန်ဂှ် ၈ တၠ ပံၚ်ဖအိုတ် ညးစၞးကၠတ်ထဝ် နွံ ၃၁ တၠရ။
အဃောကောံဓရီုလၟေၚ်ဍာံ အလန်တတိယ (ကၠတ်ထဝ်ဒုတိယ) တုဲကၠုၚ်ဏံ ကၠောန်ကၠုၚ် ပွိုၚ် ၅ တ္ၚဲ နူအံက်တဝ်ဗာ ၃ ဒဵုကဵု ၁၀ ဂှ် ပ္ဍဲတ္ၚဲမရနုက်ကဵုတတိယ သ္ကိုပ်ဝန်ဇၞော်အာတ်ပါန်အခေါၚ်ဂှ် ဗၠေတ်ဒၟံၚ်ကေုာံတၚ်ထ္ၜးဟိုတ်ရောၚ်ဂးတုဲ ညးစၞး ၂ တၠဒ္စဵုဒ္စးလဝ်ဂှ် ကောံဓရီုကၠတ်ထဝ် ပ္တိုန်လဝ်စၟတ်သမ္တီရ ဂွံတီကေတ်ရ။