တာလျိုၚ်သ္ကိုပ်ဝန်ဇၞော်လၟုဟ်ဏံ ညးတာလျိုၚ်အပ္ဍဲဗော်တံ မိက်ဂွံကဵုနုက်တိတ်မ္ဂး လွာဲလွာဲဂှ်နုက်တိတ်ကဵုရောၚ်ဂှ် အဃောကာလ ဗော် NLD ကၠောန်ကၠုၚ်ကောံဓရီု ပထမကမ္မတဳဗဟဵု လၟေၚ်ဆဋ္ဌမ ပ္ဍဲနဝ်ဝေမ်ဗာ ၁၂ တုဲဂှ် သ္ကိုပ်ဝန်ဇၞော်တွဵုရးမန် ဥူမေန်န်ဥူ ဟီုဂးလဝ်ကဵု ရဲမဳဒဳယာတံဂှ် ညးဗှ်ပရိုၚ်လ္ၚဵုတံ သတီဒးဏီရောၚ်ထေၚ်။
ဟိုတ်နူဟိုတ်သာ်လဵုတုဲ ဟီုဂလာန်နုက်တိတ်နူသ္ကိုပ်ဝန်ဇၞော်ရောဂှ် ဟွံဟီုပ္တိတ်ကဵုမဳဒဳယာတံရ။
သွက်ဂွံလ္ၚတ်စၟဳစၟတ် ပရေၚ်တေၚ်ဗ္စိုပ်လဝ် စပ်ကဵုညးစၞးကၠတ်ထဝ်၊ ဂကောံအလဵုအသဳ တွဵုရးမန် ကဵု ရးတၞၚ်သဳဂှ် ပ္တိုန်လဝ်ညးက္ဍိုပ် ကုဥူညာဏ်ဝေန် ကမ္မတဳရေၚ်တၠုၚ်ကေၚ်ကာဗဟဵုတုဲ ပံက်လဝ်ဂကောံ လ္ၚတ်စၟဳစၟတ်မွဲရ။
အတိုၚ်ဌာန်ပရိုၚ်မဳဒဳယာနာနာတံ ဓမံက်ထ္ၜးကၠုၚ်လဝ်ဂှ်မ္ဂး ဒးစှေ်လ္ၚတ် ပရေၚ်ညးတၞဟ်တေၚ်လဝ် ကိစ္စသ္ကိုပ်ဝန်ဇၞော် တွဵုရးမန် ကေုာံ ညးစၞးကၠတ်ထဝ် ရးဒေသဇၞော် တၞၚ်သဳဂှ်တုဲ ဒးပ္တိုန်ထ္ၜးကဵု ဂကောံကမ္မတဳ ရေၚ်တၠုၚ်ကေၚ်ကာဗဟဵု NLD ရောၚ် ဂွံတီကေတ်ရ။
အဃောတိုန်ဒှ် သ္ကိုပ်ဝန်ဇၞော်က္တဴက္တဴလဴလဴတေံဂှ် မွဲဂိတုမွဲဝါ ဆဵုကဵုရဲမဳဒဳယာတံရောၚ်ဂှ်လေဝ် သ္ကိုပ်ဝန်ဇၞော်ဏံရ၊ ဟွံသေၚ်ကဵုအခိၚ်အခါ တောဲအာကၠုၚ်ဒၟံၚ် ကေုာံရဲခရဵုနဳ (ခရိုနီ) ဒယှ်ဒယှ်တံဂှ်လေဝ် သ္ကိုပ်ဝန်ဇၞော်ဏံရ၊ သ္ပမုသာတုဲ ပါန်အခေါၚ်ကဵု ကောံဓရီုကၠတ်ထဝ်ဂှ်လေဝ် သ္ကိုပ်ဝန်ဇၞော်ဏံရ၊ ဂၠိန်ဒိဒၟံၚ် ကၠတ်ထဝ်ဂှ်လေဝ် သ္ကိုပ်ဝန်ဇၞော်ဏံရ နမပ္တံ ဝိသေသနသာ်ဏံ အမြာဲပ္ဍးဒၟံၚ် ပ္ဍဲမုက်ပရိုၚ်မှာဇန် ကၠုၚ်နူဂၠးအာကသ အေန်တာနေတ် Online တေံရ။
သရောပ်မ္ဂး ပ္ဍဲကဵုကၠတ်ထဝ်မွဲ ညးစၞး NLD တံ ၜိုန်ရအုပ်ဓလီုဂွံလဝ်ဂၠိုၚ်အိုတ်ဒှ်ကီုလေဝ် နကဵုသ္ကိုပ်ဝန်ဇၞော် အလဵုအသဳမွဲ စန်ဒက်ထိၚ်ခွါ ပၠတရဴဟွံမာန်ဂှ် ဒှ်တၚ်ဍိုန်လျညးတေံရောၚ် မိက်ဂွံထံက်ထ္ၜးရ။
ဒှ်သာ်ဂှ်ရ သ္ကိုပ်ဝန်ဇၞော်ဏံ ဆက်ဂွံတာလျိုၚ်ဏီဟာ ဟွံဂွံရဟာဂှ် ဒှ်အရာသ္ဂုတ်သွာတ် ဗော် NLD ဟေၚ်ရတုဲ ကုသ္ကိုပ်ဝန်ဇၞော် အယုက် ၈ ဂိတုဏံ ဆက်စွံလဝ်အတိုၚ်ဏံရဟာ၊ ဟွံသေၚ်တှေ် ကလေၚ်ခါန်ပ္တိုန်တၟိ မွဲပၠန်ဟာဂှ် ကောန်ညးရမန်တံ ဇမၠိၚ်ကအ်တုဲ မၚ်စၟဳရံၚ်ဒၟံၚ်ရအဴ။