ဗၟာ  ၊ အၚ်္ဂလိက် ၊  Font ၊  Converter

Breaking News
Home / ပရိုၚ် / ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ အလိုက်ဂကူညးကဵုညးဂှ် ပ္ဍဲတွဵုရးဍုၚ်မန် ဟွံဒှ်ကၠောန်ဏီ

ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ အလိုက်ဂကူညးကဵုညးဂှ် ပ္ဍဲတွဵုရးဍုၚ်မန် ဟွံဒှ်ကၠောန်ဏီ

သၟာပရိုၚ်ချူ:

ဗော်ဍုၚ်မန်တၟိ ဟိုတ်နူဟွံဂွံထ္ပက်လဝ်စၟတ်တဲ လိက်ကသုက်တုပ်စိုတ်ဒေါံပန်ပှော်အလုံဍုၚ်အေန်ဇြဳအေ NCA ဏီဂှ်ရ သွက်ဂွံကၠောန်ပေါဲသဳကၠဳ ပရေၚ်ဍုၚ်ကွာန်အဆံၚ်ကောန်ဂကူ နအလိုက်ဂကူညးကုညးဂှ် ပြဟ်ဟ်ဏံ ပ္ဍဲတွဵုရးဍုၚ်မန် ကၠောန်မာန်ဟွံသေၚ်ဏီရောၚ် ဂွံတီကေတ်ရ။

“ဒၞါဲကၠောန်ပေါဲသဳကၠဳဂွံမံၚ်တံဂှ် သွက်ဂွံစကၠောန်အာ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူဂှ် ကောန်ဂကောံ UPDJC ဗွဲမဂၠိုၚ်တံ ပၠောပ်လဝ်ဂလာန်ရ၊ ဒၞါဲကၠောန်ဂွံဂှ် ယဝ်ဒှ်ဒၞါဲဒေသ ထ္ပက်စၟတ်တဲ NCA တုဲဂှ်ရမ္ဂး ပြဟ်ဟ်ဏံ ကောန်ဂကူမန်ပိုဲ သွက်ဂွံကၠောန် ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ ပ္ဍဲတွဵုရးဍုၚ်မန်ပိုဲဂှ် ဒှ်ဟွံမာန်ဏီ” ရဴဝွံ မာံကျဝ်ဇြေယျဥူ (ကော်) မာံဇြေယျာဥူ (နူဗော်ကောန်ဂကူမန်) ကောန်ဂကောံ UPDJC ဟီုရ။

မာံကျဝ်ဇြေယျဥူ ကောန်ဂကောံ UPDJC  (Facebook)
မာံကျဝ်ဇြေယျဥူ ကောန်ဂကောံ UPDJC (Facebook)
ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ အလိုက်ဂကူညးကဵုညးတှေ် ဗော်ပရေၚ်ဍုၚ်ကွာန် ကေုာံ ဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲ NCA တုဲတံကီု၊ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ဒေသတှေ် အလဵုအသဳ ရးဒေသဇၞော် (ဟွံသေၚ်သာ်ဂှ်) အလဵုအသဳတွဵုရး မဆေၚ်စပ်တံကီု၊ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ ဒးသဳကၠဳနအလိုက်ပရူပရာဂှ်တှေ် ဂကောံမှာဇန်ဂမၠိုၚ်တံကီု က္ဍိုက်ပ်တုဲဒးကၠောန်ရောၚ် လၟေၚ်ကမၠောန် UPDJC နွံကၠုၚ်သာ်ဏံရ။

“နအလိုက်ကောန်ဂကူ ဟွံဒှ်သဳကၠဳဏီကၠာလေဝ် ပ္ဍဲပေါဲသဳကၠဳအလိုက်ဒေသဂှ် ကောန်ဂကူမန်ပိုဲ လုပ်သဳကၠဳ ပ္ဍဲရးဒေသဇၞော်တၞၚ်သဳတေံ ဂွံမံၚ်ဏီ၊ သွက်ဒေသတၞၚ်သဳဂှ် အလဵုအသဳ ရးတၞၚ်သဳရ သ္ပက္ဍိုပ်ကၠောန်ဗဒှ်ဏောၚ်၊ နကဵုကောန်ဂကူမန်ပိုဲ အတိုၚ်လၟေၚ်က္ဍိုပ်လိက် ညးတံဖျေံကဵုလဝ်ဂှ် လုပ်သဳကၠဳဂွံ” သာ်ဝွံလေဝ် မာံဇြေယျာဥူ ဂးရ။

ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ နအလိုက်ကောန်ဂကူဂှ် ပ္ဍဲတွဵုရးကရေၚ်ကီု၊ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ဒေသဂှ် ပ္ဍဲရးဒေသဇၞော်တၞၚ်သဳကီု၊ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ပရူပရာက္ဍိုပ်လိက်ဂှ် ပ္ဍဲနေပျဳဒဝ်ကီု သွက်ဂွံကၠောန်အာဂှ် နူဒပ်ပၞာန် ပ္တိုန်လဝ်ဂလာန်နွံတုဲရောၚ် မာံဇြေယျာဥူ လဴထ္ၜးရ။

“ပေါဲသဳကၠဳပရေၚ်ဍုၚ်ကွာန်အဆံၚ်ကေါန်ဂကူတံဏံဂှ် ဂကောံရပ်လွဟ် ဟဂွံထ္ပက်စၟတ်တဲ NCA တံလေဝ် က္ဍိုက်ပ်တုဲ သွက်ဂွံကၠောန်ဟီုဂှ် လ္ပာ်အလဵုအသဳ ဟွံဒုၚ်တဲရ။ မိက်ဂွံကဵုကသပ်မွဲတၚ်ဂှ် နကဵုအလဵုအသဳ ကုဂကောံ UNFC ကီု သီုကဵုဂကောံရပ်လွဟ် နွံမ္ၚး NCA တံကီု ညံၚ်သ္ဂောံဂွံတၚ်တုပ်စိုတ်ဂှ် မိက်ဂွံကဵုသဳကၠဳပြဟ်ဟ်ရ။ ကာလဂှ်တှေ် ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူဂှ် ဒၞါဲတေံကၠောန်ဟွံဂွံ၊ ဒၞါဲဏံကၠောန်ဟွံဂွံဂှ် ဟွံဒးဟီုရ” သာ်ဝွံ သာၚ်ကျဝ်ညောအ် ဂကောံညးအုပ်ကာ ကမ္မတီပံၚ်တောဲဓမံက်ရုပ်ရဴ ပေါဲသဳကၠဳပရေၚ်ၜိုဟ်လလံကၟိန်ုဍုၚ် UPDJC ဟီုကဵုဌာန်ပရိုၚ်မန်ရ။

ဗော်ဍုၚ်မန်တၟိ NMSP လုပ်လဝ်ဒပ်ပံၚ်ကောံ UNFC ဝွံ တၚ်တုပ်စိုတ် ဒေါံပန်ပှော် အဆံၚ်တွဵုရး၊ အဆံၚ်ကၟိန်ဍုၚ်ဂှ် ပ္ဍဲသၞာံ ၂၀၁၂ တေံ ၜိုန်ထ္ပက်စၟတ်တဲကေုာံအလဵုအသဳတုဲကၠုၚ်ကီုရလေဝ် ဟွံဂွံထ္ပက်စၟတ်တဲ လိက်ကသုက်အေန်ဇြဳအေ NCA ဏီတုဲ ပြဟ်ဟ်ဏံ ပ္ဍဲဒေသ ကရေက်သမၠုၚ်ကျာဍုၚ်ဗၟာဏံ ဂကောံရပ်လွဟ် ဟွံဂွံထ္ပက်စၟတ်တဲအေန်ဇြဳအေ NCA ဏီဂှ် နွံဆဗော်ဍုၚ်မန်တၟိမွဲဗော်ဟေၚ်ရ။

About Mon News Agency

ဗှ်မာန်မံၚ်

မန်ဍုၚ်သေံတံ ဗှ်ဗၞုဟ်ဂုဏ်တၠတိ

ဍုၚ်ဇၞော်အယုဒ္ဓယျ ‘ယွံ အခိၚ်တေံ မန်ပိုဲတံ ဒှ်ပၞာန်ကုဗၟာ၊ ကျ ဗၟာရောၚ် ဟီုတှေ် ဂကူမန်ပိုဲတံ ဒးဂြိပ်ဒဴ လုပ်ကၠုၚ် လ္ပာ်ဍုၚ်အယုဒ္ဓယျရောၚ် အခိၚ်တေံ ဍုၚ်ဏံဟီုတှေ် မန်ရ …

Leave a Reply

%d bloggers like this: