Categories
ပရိုၚ်

ကမ္မတဳဗဟဵု (၂) တၠကဵု ကမ္မတဳပွိုၚ်ဍုၚ်ကအ်ကြိက် (၃) တၠ နုက်တိတ်နူဗော်ကောန်ဂကူမန်

ညးတာလျိုၚ် ဗော်ကောန်ဂကူမန် နူကဵုပွိုၚ်ဍုၚ်ကအ်ကြိက် တွဵုရးဍုၚ်ကရေၚ် ကမ္မတဳဗဟဵု (၂) တၠကဵု ကမ္မတဳပွိုၚ် ဍုၚ် (၃) တၠတံဂှ် ဓဝ်ပတှေ် လ္တူက္ဍိုပ်သ္ကိုပ်ဗော်ပရေၚ်ဍုၚ်ကွာန်တံ ဟွံမွဲဂးတုဲ ပ္ဍဲကဵုဂိတုနဝ်ဝေမ်ဗာ (၂၂) ဂှ် ပ္တိုန်လဝ် လိက်နုက်တိတ် နူကဵုဗော်ကောန်ဂကူမန်ရောၚ် ဂွံတီကေတ်ရ။

နူကဵုပွိုၚ်ဍုၚ်ကအ်ကြိက် ညးတာလျိုၚ်ဗော်ကောန်ဂကူမန် ကမ္မတဳဗဟဵု နာဲအံၚ်မှိုၚ် ကေုာံ နာဲကေန် (မၚ်းရန်ကၚ်း) တံကီု ကမ္မတဳပွိုၚ်ဍုၚ် နာဲဗိုလ်ကလေန်၊ နာဲဇြဟာန် ကေုာံ မာံအံၚ်နာၚ်တံ ပါလုပ်ပ္ဍဲကဵုညးနုက်တိတ်နူကဵုဗော်ဂှ်ရ။

လိက်နုက်တိတ် MNP ပွိုၚ်ဍုၚ်ကံကြိက် (Facebook)
လိက်နုက်တိတ် MNP ပွိုၚ်ဍုၚ်ကံကြိက် (Facebook)
“မိက်ဂွံဒစဵုဒစးကဵု ဗော်ပရေၚ်ဍုၚ်ကွာန်လေဝ် ဟွံသေၚ်ပုဟ်။ ရန်တၟအ် မိက်ဂွံပြးဗော်လေဝ် ဟွံသေၚ်ပုဟ်။ ပိုဲ ကၠိုဟ်လဝ်ဂှ်တှေ် သၟာပရေၚ်ဍုၚ်ကွာန်မွဲတှေ် အတိုၚ်ဟီုဂှ် ဒးကၠောန်၊ အတိုၚ်ကၠောန်ဂှ် ညံၚ်ဂွံဒှ်ဂှ် ဒးကၠောန်၊ အ တိုၚ်ဟီု အတိုၚ်ကၠောန်ဂှ် ဟွံဒှ်ပုဟ်တှေ် ဒေံါဇူထောံ” သာ်ဝွံ နာဲကေန် ညးမနုက်တိတ်နူကဵုဗော်ဂှ် ဟီုရ။

အတိုၚ်လၟေၚ်ကမၠောန်သၞောဝ်ဗော်ဟေၚ် ကောန်ဗော်တံ မိက်ဂွံနုက်တိတ်နူကဵုဗော်မ္ဂး နူကဵုအဆံၚ်ပွိုၚ်ဍုၚ်မွဲက္ဆံၚ် ဒးပ္တိုန်လိက်အဆံၚ်ဗဟဵုတေံတုဲ စပ်ကဵုပရေၚ်နုက်တိတ်နူဗော်လၟုဟ်ဏံဝွံ ဟွံမၚ်ကဵုဂလာန်ကလေၚ် နူကဵုဗော်မွဲ သာ် နုက်တိတ်ထောံ ပိုတ်တ်ရောၚ် ညးဆက်ဟီုရ။

လ္တူဗော်ပၠတရဴဂှ်ကီု လ္တူမူဝါဒဂၠံၚ်တရဴဗော်ကီု ဟွံစှေ်စိုတ်မ္ဂး အခေါၚ်နုက်တိတ် နွံမံၚ်ကီုလေဝ် ပ္ဍဲကဵုဂိတုနဝ်ဝေမ်ဗာ (၂၇) ကၠောန်ဗဒှ် ပေဲါသောၚ်ကလးဗော် ပ္ဍဲပွိုၚ်ဍုၚ်ကအ်ကြိက်ဂှ် ဒုၚ်သ္ဇိုၚ်ညးတာလျိုၚ်ဒေသတံ ပ္တိုန်ထ္ၜးနၚ်ကဵုဂှ် လ္တူမၞိဟ်ပ္တိုန်လဝ်လိက်နုက်တိတ်တံ နူကဵုကေၚ်ကာဗော်တံ သ္ၚဳဂၠိပ်တုဲ ပတိတ်ထောံ နူဗော်ရောၚ် ညးအုပ်ကာနာ နာ နာဲလျးတၟး ဟီုရ။

“မၞိဟ်နုက်တိတ် (၅) ဂှ် ပၟိက်စိုတ်ညးတံ ညးတံနုက်တိတ်သၟး ဟွံသေၚ်ပုဟ်။ ကောန်ဗော်တၞဟ်ဟ် ညံၚ်ဂွံနုက် တိတ်ကီု ညးတံစန်ဒက်သောၚ်ကလးမံၚ် လပါ်ဗၠေတ်၊ ဗၠေတ်တ်နွံမံၚ်၊ မၞိဟ်ပ္တိုန်ထ္ၜးလဝ် (၅) တၠဏံဂှ် ဗွဲမယျေလ္ဂူ တပ်တး နုက်တိတ်ဟွံသေၚ်တုဲတှေ် စန်ဒက်ကောန်ဗော်တုဲ ညံၚ်ဂွံလုပ်ပေဲါဗတိုက်ကဵုဗော်၊ ဗော်ညံၚ်ဂွံဂရံက်ဂရာ်ဂှ် ကၠောန်မံၚ်ဏောၚ်” သာ်ဝွံ နာဲလျးတၟး ဟီုကလးရ။

ပ္ဍဲကဵုကောံဓရီုကေၚ်ကာလၟေၚ်ဍာံ ဗော်ကောန်ဂကူမန် မကၠောန်လဝ် ပ္ဍဲကဵုဂိတုနဝ်ဝေမ်ဗာ (၂၈) ဂှ် ကောန်ဗော် နုက်တိတ်တံဂှ် နုက်တိတ်နကဵုစေတနာအးအးဟွံသေၚ်ဂးတုဲ ကောန်ဗော်ပ္တိုန်လဝ်လိက်နုက်တိတ်တံဂှ် ပတိတ် ထောံနူကဵုဗော်ရောၚ်ဂှ် သ္ဂုတ်သွာတ်လဝ် နွံကီုရ။

ဗော်ဒဳမဝ်ကရေသဳမန် MDP ဒက်ပ္တန်လဝ်အတိုၚ်ဗဗွဲသၞောဝ် ပ္ဍဲသၞာံ ၂၀၁၂ တေံတုဲ ပ္ဍဲသၞာံ ၂၀၁၄ ဂှ် လှာဲကေတ်ယၟု ဗော်ကောန်ဂကူမန် MNP ရ။ နူကဵုသဘၚ်သဳကၠဳဗော် တုဲကၠုၚ်တေံဂှ် ပ္ဍဲဗော်ကောန်ဂကူမန်ဏံ ရုဲပ္တိုန်လဝ် ကမ္မတဳ ဗဟဵု ၉၃ တၠကီုလေဝ် နကဵုဟိုတ်နာနာသာ် ပ္ဍဲကာလလၟုဟ်ဝွံ လၟိဟ်ကမ္မတဳဗဟဵု သှေ် ၈၇ တၠရောၚ် ဂွံတီကေတ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.