ဂလာန် ကေုာံ တၚ်သၟာန် လ္ၚဵုလ္ၚဵု မသ္ပလဝ်ဒ္တန်ပ္ဍဲကၠတ်ထဝ်ဂှ် ၜက်အာနူဥပဒေတုဲ သွက်ဂွံဓမံက်ရုပ်ရဴဂှ် ဝါတ်မံၚ် သာ်ဝွံ ပ္ဍဲကောံဓရီုလၟေၚ်ဍာံ အလန်စတုတ္ထ ကၠတ်ထဝ်တွဵုရးဍုၚ်မန် အလန်ဒုတိယ ကၠောန်သ္ပပ္ဍဲတ္ၚဲဒဳဇြေမ်ဗာ (၇) ဂှ် သ္ကိုပ်ဝန်ဇၞော် တွဵုရးဍုၚ်မန် ဟီုဓမံက်ဏာ ပ္ဍဲဂလာန်ကောံဓရီုဂှ်ရ။
“ဂလာန်လ္ၚဵု ကၠတ်ထဝ်သ္ပလဝ်ဒ္တန်ဂှ် သွက်ဂွံဓမံက်ရုပ်ဂှ်လေဝ် ဟွံလောဲ၊ ဂလာန်လ္ၚဵုပၠန် ဟိုတ်နူၜက်အာ နူဥပဒေဂှ်ရ တတ်ဥပဒေတုဲ သ္ဂောံဓမံက်ရုပ်ရဴဂှ် ကာလလဵုမွဲ ဒှ်ဟွံမာန်ရဂှ်လေဝ် ဂွံဆဵုကေတ်” သာ်ဝွံ သ္ကိုပ်ဝန်ဇၞော်တွဵုရးဍုၚ်မန် ဥူမေန်န်ဥူ ဟီုရ။
“ဂလာန်မွဲမွဲ ကေုာံ တၚ်သမာန် သွက်ဂွံပ္တိုန်ထ္ၜး ပ္ဍဲကၠတ်ထဝ်ဂှ် ကၠာဟဂွံပ္တိုန် ပရဟ်တုဲပလံၚ်လဝ်ကဵု ရုၚ်အလဵုအသဳတွဵုရးကၠာရ။ ဟွံဒးကဵုဥပဒေ ဟွံဂပ်ဝ်ကဵုဥပဒေနွံဏောၚ်မ္ဂး ပါဲထောံဂွံမံၚ်ရဏောၚ်။ ပါဲလေဝ် ဟွံပါဲ စိုပ်ကၠတ်ထဝ် ကၠတ်ထဝ်သ္ပဒ္တန်တုဲ ကလေၚ်ဟီုအရေဝ် ဟွံဒးကဵုဥပဒေ ဟွံဂပ်ဝ်ကဵုဥပဒေရဟီုဂှ် ဒုၚ်တဲဟွံမာန်” သာ်ဝွံ ဥုအံၚ်ဂျဝ်တူ ဒေသမာဲလၟိဟ် ၂ ပွိုၚ်ဍုၚ်သဓီု ဟီုရ။
ကၠတ်ထဝ်တွဵုရးဍုၚ်မန်အလန်ဒုတိယဂှ် ကၠောန်ဂွံကောံဓရီုလၟေၚ်ဍာံ ဗၞတ် (၃) ဝါတုဲဂှ် ဂလာန်ပ္တိုန်လဝ် သ္ပဒ္တန်တုဲ နွံ ၁၉ ဂလာန်၊ ညးစၞးတံသၟာန်ဂွံ ပုစ္ဆာဂှ် ၆၆ ပုစ္ဆာရ ဂွံတီကေတ်။
ပ္ဍဲကၠတ်ထဝ်တွဵုရးဍုၚ်မန်အလန်ဒုတိယလၟုဟ်ဏံဝွံ ညးစၞးနူညးဍုၚ်ကွာန်ရုဲစှ်လဝ်ဂှ် နွံ ၂၀ တၠ၊ ညးစၞးကၠုၚ် နူဒပ်ပၞာန်ဂှ် ၈ တၠ၊ဇမၞော်ဥပဒေတွဵုရး ၁ တၠ၊ နာဲဗ္စာဇၞော်တွဵုရး ၁ တၠ ကေုာံ ဇမၞော်စၟဳစၟတ်စရၚ် ၁ တၠတံ တိုန်စိုပ်တုဲ ကၠောန်မံၚ်ကောံဓရီုလၟေၚ်ဍာံ အလန်စတုတ္ထရ။
ကောံဓရီုလၟေၚ်ဍာံ အလန်စတုတ္ထ ကၠတ်ထဝ်တွဵုရးဍုၚ်မန်အလန်ဒုတိယ ကၠောန်မံၚ်လၟုဟ်ဝွံ ကၠောန်ပွိုၚ် ၅ တ္ၚဲရောၚ်ဂွံလဝ်ပရိုၚ်တုဲ အပ္ဍဲဏံ ဂလာန်ပ္တိုန်ဂှ် ၃၊ ပုစ္ဆာဂှ် ၂၀ ပြၚ်ၚ် ကေုာံ ဥပဒေအပြောံ ဆေၚ်ကဵုကမၠောန်ၜဵုဂှ်လေဝ် ပ္တိုန်ထ္ၜးသဳကၠဳအာရောၚ် ဂွံတီလဝ်ရ။