သဘာဝပွဳပွူ လီုလာ်ညံၚ်ဂွံအောန်ဂှ် ကမ္ပဏဳဓလိုက်တံရိုဟ် မၞုံအပ္ဍဲတွဵုရးဍုၚ်မန်တအ် ညံၚ်ဂွံကၠောန်ကဵု (Environmental management Program –EMP) အစဳဇန် ပြမာန်သဘာဝပွဳပွူ (သဘာဝပတ်ဝန်းကျၚ်စီမံခန်႔ခွဲမှုအစီအစဉ်) ဂှ် နူဂကောံအလဵုအသဳတွဵုရးဍုၚ်မန် ကဵုလဝ်စၞောန်ရောၚ် ဂွံတီကေတ်ရ။
ကမ္ပဏဳဓလိုက်တံရိုဟ်တအ် ဒုၚ်သဇိုၚ်ကဵု ဗၞတ်ဗ္ၜတ်ကမၠောန်ဍောတ်ဇၞော်၊ ဂကူကမၠောန်ဇကုဂမၠိုၚ်တုဲ ဒးကၠောန်လဝ် အစဳဇန် ပွမလ္ၚတ်စၟဳစၟတ်ပွဳပွူဗွဲကိုပ်ကၠာ(IEE)၊ ပွမစၟဳစၟတ်ပရေၚ်ဇီုကပိုက်ပွဳပွူ (EIA)၊ ပွမစၟဳစၟတ်ညံၚ်ဟဂွံဇီုကပိုက် ပရေၚ်မၞိဟ်(SIA) တအ်တုဲ ဂွံတၚ်သ္ပဒ္တန်တုဲဟေၚ် ဓမံက်ရုပ်ရဴကမၠောန်ဂွံရောၚ် စၞောန်လဝ်ရ။
နူအလဵုအသဳတွဵုရးဍုၚ်မန် အဃောဗက်စၟဳစၟတ် ကမ္ပဏဳတအ်ဂှ်မ္ဂး ကမ္ပဏဳ ဗွဲမဂၠိုၚ်တအ်ဂှ် ဟွံဂွံကၠောန်လဝ် အစဳဇန် EMP ရ၊ ရံၚ်လ္တူကမၠောန်ဂှ်တုဲ ဆၜိုတ်ကဵုလဝ်စၞောန် သွက်ဂွံချူ EMP/EIA သၟးတုဲ အခန်သွက်ဂွံကေတ်အရေဝ်ဂှ် ဟွံမွဲဏီရောၚ်ဂှ်လေဝ် ညးဆက်ဟီုရ။
အစဳဇန် ပွမစၟဳစၟတ်ပရေၚ်ဇီုကပိုက်ပွဳပွူ (EIA) ကီု၊ အစဳဇန်ပြမာန်ပွဳပွူ (EMP) ကီု နူကမ္ပဏဳတံ ပ္တိုန်ထ္ၜးလဝ် ကုအလဵုအသဳကၟိန်ဍုၚ်တေံတုဲကီုလေဝ် သ္ဂုတ်သွာတ်သ္ပဒ္တန်နူတေံဂှ် ကမ္ပဏီဗွဲမဂၠိုၚ်တအ် ဟွံက္လိဂွံဏီရောၚ် ဂွံတီကေတ်ရ။
“အလဵုအသဳကၟိန်ဍုၚ်တေံ စၞောန်လဝ် နွံ ၄ တၚ်၊ ၜိုတ်ညးတအ်စၞောန်နၚ်ဂှ် ဒ္ဂေတ်ဗက်ဒၟံၚ်ဖိုဟ်ရ၊ လိက်ဒုၚ်စဳရေၚ် ဆေၚ်ကဵုသဘာဝပွဳပွူဂှ် ပ္တိုန်လဝ်တုဲယျ၊ လိက်ဒုၚ်စဳရေၚ် EIA ၊ SIA ၊ EMP တံဂှ်လေဝ် ပ္တိုန်လဝ်ကဵု ရုၚ်ကမ္မယှေန် ပရေၚ်ဓလိုက်တံရိုဟ်ဍုၚ်ဗၟာ နူဂိတုဂျူလာၚ်တေံရ၊ ပြဟ်ဟ်ဏံ ဟွံစှေ်ကၠုၚ်ဏီ” သာ်ဝွံ ဥူအံၚ်တိတ်ဌေ ဒါရာ်တာကမ္ပဏဳမါၚ်တၟံ Long Life Agggregate Mining Co.,Ltd. ဟီုရ။
ပ္ဍဲတွဵုရးဍုၚ်မန်ဝွံ ကမ္ပဏဳ လေပ်ဇီုကပိုက် သဘာဝပွဳပွူဂှ် နွံ ၂၆ ကမ္ပဏဳတုဲ ကမၠောန်ဒးစၟဳစၟတ်ပွဳပွူ ဗွဲကိုပ်ကၠာ (IEE) ဂှ်လေဝ် ဒဒှ်ရ ဟဂွံကၠောန်လဝ်ဏီဂှ် ပ္ဍဲကောံဓရီုကၠတ်ထဝ်တွဵုရးဍုၚ်မန် မကၠောန်ကၠုၚ်လဝ် ပ္ဍဲစၟတ်တ္ၚဲဒဳဇြေမ်ဗာ ၁၃ ၊ သၞာံ ၂၀၁၆ တေံ ဒံက်တာဟံၚ်ဍုၚ် သွဟ်လဝ်ဂလာန်သၟာန်ု ဒဝ်ခါၚ်ၚ်ဠေအ်နွံတုဲရ။
ပ္ဍဲသၞာံ ၂၀၁၆ တုဲကၠုၚ်ဏံ နကဵုပရေၚ်ပၠတရဴ နူဌာနဝန်ဇၞော် ပရေၚ်ထိၚ်ဒဝ်မၚ်မွဲ သဘာဝပွဳပွူ ကေုာံ ပရေၚ်သယံဇာတ ဗက်စၟဳစၟတ်လဝ် ရုၚ်စက်၊ ရုၚ်ကမၠောန်တံဂှ် ဂွံ ၂၄ ဝါ၊ ဗက်စၟဳစၟတ် ဒၞါဲသွက်ဂွံကၠောန် ဒကောဝ်လှာ်ထဝ်ဂှ် ဗၞတ် ၄ ဝါ၊ ဗက်စၟဳစၟတ်ကမၠောန်ကၠောန်တၟံလးဂၠံၚ်ဂှ် ၈၂ ဝါ၊ စၟဳစၟဳကမၠောန်ဟိုဝ်တေဝ်ဂှ် ၁၉ ဝါ၊ စၟဳစၟတ်ကမၠောန်ကၠောန်ဍိုတ်ဂှ် ၁၈၈ ဝါတုဲ ကုကမ္ပဏဳလုပ်ဓလိုက်တံ ၃၃၀ ကမ္ပဏဳပြၚ်တံဂှ်လေဝ် ဗက်လ္ၚတ်စၟဳစၟတ်လဝ်ကီုရောၚ်ဂှ် ဂွံတီကေတ် နူဂကောံအလဵုအသဳ တွဵုရးဍုၚ်မန်ရ။