စပ်ကဵုတေၚ်လဝ် ကိစ္စသ္ကိုပ်ဝန်ဇၞော်တွဵုရးဍုၚ်မန်တုဲ ၜိုတ်ဗၞတ်ဂၠိုက်ဂၠာဲဂွံဂှ် အပ္ဍဲပွိုၚ်သတ္တဟဏံ လလောၚ်ကဵုအာရောၚ် သာ်ဝွံ ဥူညာဏ်ဝေန် ညးက္ဍိုပ်ဂကောံလ္ၚတ်စၟဳစၟတ် နူဗော်NLD ဟီုရ။
သ္ကိုပ်ဝန်ဇၞော် တွဵုရးဍုၚ်မန် ကေုာံ ဥက္ကဌ- ဒုဥက္ကဌ ကၠတ်ထဝ်ရးဇၞော်တၞၚ်သဳတံ ဒးဒုၚ်တေၚ်လဝ်တုဲ လ္တူတၚ်တေၚ်လဝ်ဂှ် ဂကောံလ္ၚတ်စၟဳစၟတ် နွံကဵုကောန်ဂကောံ ၃ တၠတအ် စၟဳစၟတ်လဝ်တုဲ သွဟ်ဍေံဂှ် အပ္ဍဲပွိုၚ်မွဲသတ္တဟ (ဟွံသေၚ်) အပ္ဍဲပွိုၚ် (၁၀) တ္ၚဲဏံ လလောၚ်ပ္တိတ်ကဵုရောၚ် ဟီုဂးကၠုၚ်ရ။
သွက်ဂွံလ္ၚတ်ဂၠိုက်ဂၠာဲ ကိစ္စသ္ကိုပ်ဝန်ဇၞော်တွဵုရးမန် ကဵု ဥက္ကဌ- ဒုဥက္ကဌ ကၠတ်ထဝ်ရးဇၞော်တၞၚ်သဳတံ ဒးဒုၚ်တေၚ်လဝ်ဂှ် နူဗော် NLD ရုဲစှ်မၞိဟ်ပိတၠ ကေၚ်ကာဗဟဵု ဥူညာဏ်ဝေန်ဂှ် ညးက္ဍိုပ်၊ ဒံက်တာမျဵုညောအ် ကေုာံဥူကျဝ်ဟိုဝ် နဒဒှ်ကောန်ဂကောံတုဲ ပံက်လဝ်ဂကောံလ္ၚတ်စၟဳစၟတ်မွဲရ၊ ဂကောံဝွံ စှေ်ဆဵုကဵု ညးဒးဒုၚ်တေၚ် ကေုာံ ညးတေၚ်တံတုဲ စၟဳစၟတ်သၟာန်သၟုက်လဝ်ရ။
ဂကောလ္ၚတ်စၟဳစၟတ်ဏံ သ္ၚဳဂၠိပ်လ္တူပရေၚ်ဒဒှ်သီုၜါလ္ပာ်တံတုဲ ၜိုတ်ဆဵုဂှ် ဒုၚ်စဳရေၚ်ပ္တိုန်ထ္ၜးကဵု ဂကောံကေၚ်ကာဗဟဵု NLD တုဲရ။
သ္ကိုပ်ဝန်ဇၞော်တွဵုရးဍုၚ်မန်ဝွံ ပ္ဍဲကာလညးတေံကေတ်ကၠုၚ်တာလျိုၚ် သ္ကိုပ်ဝန်ဇၞော် ဂွံပွိုၚ် ၈ ဂိတုဂှ် တိုန်ကောံဓရီုလေဝ် လီုဒေက်ကၠုၚ်နွံ၊ စပ်ကိစ္စစုတ်လဝ် တၠကမၠောန်ပရေၚ်ပိုန်ဒြပ် ပ္ဍဲဂကောံကမ္မတဳ ကိုန်အစဳဇန်တွဵုရး၊ ကိစ္စဗက်ဆဵု ကုတၠကမၠောန်ပရေၚ်ပိုန်ဒြပ်တံ မွဲဏှေံမွဲဏှေံ တံဂှ်တုဲ သီုဒးဒုၚ်ဟီုစောကဵု ညးဍုၚ်ကွာန်တံသၟးဟွံက ပရိုၚ်တိတ်မံၚ် စပ်ကဵုကိစ္စပရေၚ်မၞိဟ်ဂှ်လေဝ် ဒးဒုၚ်ပါ်ပါဲကၠုၚ်ကီုရ။
ဥူမေန်န်ဥူဝွံ ဂွံလဝ်တာလျိုၚ် သ္ကိုပ်ဝန်ဇၞော်တွဵုရးဍုၚ်မန်သၟးဟွံက သီုကေတ်လဝ်တာလျိုၚ် ဌာနသိုၚ်ခၞံ ကေုာံ ပရေၚ်ဗဂဵုလဟဵုတွဵုရး ကီုရ။
ညးတာလျိုၚ်ဗော် အဆံၚ်လ္တူတံ ယဝ်စကာကဵုနုက်တိတ် နူတာလျိုၚ်သ္ကိုပ်ဝန်ဇၞော်မ္ဂး နုက်တိတ်ကဵုလွာဲဂှ်ရောၚ် သာ်ဝွံ ကောံဓရီုလၟေၚ်ဍာံ ကမ္မတဳဗဟဵု အလန်ဆဋ္ဌမ ဗော် NLD မကၠောန်ကၠုၚ်လဝ် ပ္ဍဲဂိတုနဝ်ဝေမ် ၁၂ တေံတုဲဂှ် သ္ကိုပ်ဝန်ဇၞော် ဥူမေန်မေန်ဥူ ပံက်ဟီုကဵု ရဲမဳဒဳယာ တံရ။