သွက်အ္စာဘာတြုံတြံု ဗြဴဗြဴ မကေတ်မံၚ်တာတာလျိုၚ် ပ္ဍဲတွဵုရးမန်ဏံ သ္ဂောံသမၠုၚ်ကဵုတာလျိုၚ်ကီု သ္ဂောံဆုဲပြံၚ်ဘာကီု ဟွံလောဲသွာ (အခက်ခုဲနွံ) ရဴဝွံ သ္ကိုပ်ပရေၚ်ပညာ ဥူမျဵုတေအ်အံၚ် နူရုၚ်သ္ကိုပ်ပရေၚ်ပညာ တွဵုရးမန် ဟီုရ။
“ပ္ဍဲတွဵုရးအ္စာတံ သွက်ဂွံ ပ္တိုန်တာလျိုၚ်၊ သွက်ဂွံပဆုဲပြံၚ် ကုအ္စာၝောံတံဂှ် အခေါၚ်အရာနွံအောန်ကွေံကွေံ၊ မူဟိုတ်ရောဟီုတှေ် ဒၞါဲသွက်ဂွံအာ/သွက်ပ္တိုန်ဂှ် ဟိုတ်နူဟွံမွဲရ။ပ္ဍဲတွဵုရးတၞဟ်ဟ်တေံ ဒၞါဲအ္စာသၠး နွံဂၠိုၚ်မံၚ်၊ တန်မူလဒှ်ဒှ်၊ တန်ဒေါဝ်ဒှ်ဒှ် အယုက်ကမၠောန် (၂) သၞာံတှေ် ပ္တိုန်ကဵုဂွံဣယျ၊ ပ္ဍဲအ္စာတံဏံ ဗီုဂှ်ဟွံသေၚ် အောန်အိုတ် အယုက်ကလောန် ဒးနွံ (၇) သၞာံဏောၚ်၊ ဆ္ဂး ဒၞါဲလဵုစွံစွံ ဟွံရုဲဒၞါဲမှဂွံ” သာ်ဝွံ ဥူမျဵုတေအ်အံၚ် ဟီုရ။
“မိက်ဂွံစဴဗ္တောန် ပ္ဍဲဌာန်ဇာတိဇကုတုဲ အာတ်လဝ် မုဟ်ဍုၚ်၊ ပ္ဍဲပွိုၚ်ဍုၚ်မုဟ်ဍုၚ်တှေ် ဘာလဵုဒှ်ဒှ် ဂွံဖအိုတ်ရ၊ ဇၟာပ်ပ်သၞာံ ညးတၞဟ်အာတ်မိက်နွံကၠုၚ်ကီုလေဝ် ဂွံဟွံလောဲဂှ်လေဝ် ဂွံမိၚ်ကေတ်ကီုရ၊ ဆ္ဂး အလန်ဏံတှေ် ဂွံမာန်ဟာ ခယျတုဲ အာတ်စံရံၚ်” သာ်ဝွံ အ္စာၝောံ (ဒေါ်ဆုမြတ်ရည်) အာတ်မိက်လဝ် သွက်ဂွံပြံၚ်/ပ္တိုန်တာလျိုၚ် သွက်သၞာံပညာ (၂၀၁၇-၁၈) ဏံ ဟီုရ။
အ္စာၝောံ (ဒေါ်ဆုမြတ်ရည်) ဝွံ နူဘာတန်မူလ KG ကွာန်ဖါဂျဳ ပွိုၚ်ဍုၚ်ရေဝ် သွက်ဂွံပြံၚ်/ တိုန်တာလျိုၚ် အဆံၚ်တန်ဒေါဝ် ပ္ဍဲပွိုၚ်ဍုၚ်မုဟ်ဍုၚ်ဂှ် အာတ်လဝ်ရ။ ဂိတုဖေဖဝ်ဝါရဳဏံမ္ဂး အယုက်ကမၠောန် ပေၚ် (၃) သၞာံရောၚ် အ္စာၝောံ (ဒေါ်ဆုမြတ်ရည်) ဟီုရ။
သွက်သၞာံဗ္တောန်ပညာ (၂၀၁၇-၁၈) ဏံ စနူဂိတုဂျာန်နဝါရဳ (၁၀) တုဲ ညးဒုၚ်ကာ (ယိုက်ဂၠေၚ်တာလျိုၚ် သၟဝ်ရုၚ်သ္ကိုပ်ပရေၚ်ပညာတွဵုရးမန် ဌာနက္ဍိုက်ပ်ပရေၚ်ပညာသဇိုၚ်) တံ မိက်ဂွံပြံၚ်/ တိုန်တာလျိုၚ်မ္ဂး ပ္တိုန်လိက်ဂွံ သာ်ဝွံအာတ်မိက်လဝ်နွံ ဂွံတီကေတ်ရ။
အတိုၚ်စရၚ်သရောပ် ဂိတုဒဳဇြေမ်ဗာ ၂၀၁၆ နူရုၚ်သ္ကိုပ်ပရေၚ်ပညာ တွဵုရးမန်မ္ဂး အ္စာ/အ္စာၝောံ နွံ (၁၅,၅၄၅) တၠ တုဲ၊ သွက်သၞာံပညာ ၂၀၁၆ ဂှ် အ္စာ/အ္စာၝောံ အာတ်မိက်လဝ် တန်သၠုၚ် နွံ (၃၃၄) တၠတုဲ ဂွံအခေါၚ်ပြံၚ် (၁၁၀) တၠ။ နူ(အလယ်ပြ/မူအုပ်) အာတ်မိက်လဝ် (အထက်တန်းပြအတိုး) ဂှ် အ္စာ/အ္စာၝောံ (၁၃၃) တၠ၊ ဂွံအခေါၚ်ပြံၚ်/တိုန်ဂှ် (၇၆) တၠ ဂွံတီကေတ်ရ။