ညံၚ်ကောန်ဂကူကရေၚ်တံ ကၠောန်ပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူကီု ကောန်ဂကူမန်တံလေဝ် ထေက်ကဵုသ္ဒးကၠောန် ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ဂကူဂှ်ကီုရောၚ် ဝန်ဇၞော်ပရေၚ်ကေၚ်ကာမန် နာဲမာံတေန်ဝေန် နူဂကောံကမ္မတဳကောပ်ကာဲ ဟီုကဵုဌာန်ပရိုၚ်မန်ရ။
“မန်ပိုဲလေဝ် ယဝ်ဂွံကၠောန် ပေါဲသဳကၠဳဗီုဏံကီုမ္ဂး ခိုဟ်သ္ဇက်ဟီုဟွံမွဲရ၊ လၟုဟ် ပိုဲလေဝ်ဟွံဂွံကၠောန်တှေ် ဒးမၚ်ဗဵုညးတၞဟ် ဗီုဏံရဟာ၊လၟုဟ်ကရေၚ်တံကၠောန်ဣရ၊ ကောန်ဂကူတၞဟ်ဟ်လေဝ် ဆက်ကၠောန်ပၠန်ဏောၚ်၊ အဃောညးတံ ဂစာန်ဒၟံၚ်သွက်ဂကူညးတံ ညံၚ်ဂွံခိုဟ်ဂှ် ဂကူပိုဲလေဝ် ကၠောန်မာန်ကီုမ္ဂး ခိုဟ်ကွေံကွေံရ” သာ်ဝွံ နာဲမာံတေန်ဝေန် ဝန်ဇၞော်ပရေၚ်ကေၚ်ကာမန် ဟီုရ။
တုဲပၠန် လ္တူလိက်ကသုက်တုပ်စိုတ်ဒေါံပန်ပှော်အလုံဍုၚ် (NCA) ဂှ်လေဝ် မိက်ဂွံကဵုဗော်ဍုၚ်မန်တၟိထ္ပက်စၟတ်တဲကီု၊ ဒေသဇကုၜိုဟ်လလံတှေ် ညံၚ်ဂွံဇၞော်မောဝ်ဂှ် ဇနော်ပၟဝ်မာန်ရောၚ် ဒှ်သာ်ဂှ်ရ စၞးဒးဗ္တိုက်ကဵုလွဟ်ဂှ် ထေက်ကဵုသ္ဒးသောၚ်က္လး နကဵုနဲၜိုဟ်ဟ်သိုဟ်ဟ်ရောၚ် နာဲမာံတေန်ဝေန် ဂးရ။
ပ္ဍဲပေါဲသဳကၠဳပရေၚ်ဍုၚ်ကွာန်အဆံၚ်ကောန်ဂကူ နအလိုက်ကောန်ဂကူ ဂကူကရေၚ်ဂှ်ဝွံ ညးစၞးကောန်ဍုၚ်အရၚ် မန် (၅) တၠ၊ ပအိုအ် (၅) တၠ၊ သေံ (၅) တၠတံလေဝ် တိုန်စိုပ်နဒဒှ်ညးလ္ၚတ်ကီု ဂွံတီကေတ်ရ။
“ဂကူကရေၚ်တံကၠောန်ဏာလၟုဟ် သွက်ဂကူညးတံတှေ် ခိုဟ်ကွေံကွေံရ၊ ရမျှာၚ်အလုံဂကူညးတံလေဝ်ပါ က္ဍိုပ်သ္ကိုပ်ဂကူညးတံလေဝ် ပံၚ်ကၠောန်မွဲစွံမာန်၊ ပ္ဍဲကောန်ဂကူမန်ပိုဲ ကၠောန်ပေါဲသဳကၠဳဗီုဏံမာန်ကီုမ္ဂး ၜိုတ်လဵုခိုဟ်ဟွံတီရ” သာ်ဝွံ နာဲကျေဝ်ထဝ် ကောန်ကွာန်ကံဗိန် (တွဵုရးကရေၚ်) တိုန်စိုပ် နဒဒှ်ညးစၞးကောန်ဍုၚ်အရၚ်မန် ဟီုရ။
ပ္ဍဲပေါဲသဳကၠဳဂှ် ဒုၚ်သဇိုၚ်ကဵု ကဏ္ဍပရေၚ်ဍုၚ်ကွာန်၊ ကဏ္ဍပရေၚ်ပိုန်ဒြပ်၊ ကဏ္ဍပရေၚ်တိ ကေုာံပရေၚ်သယံဇာတ၊ ကဏ္ဍပရေၚ်မၞိဟ်တံတုဲ ပါ်ပန်က္ဍိုပ်သဳကၠဳကၠုၚ်လဝ်(၄) က္ဍိုပ်တံဂှ်ကီု၊ သၟာၚ်နူဂှ် နူပေါဲသဳကၠဳအဆံၚ်ကောန်ဂကူ နအလိုက်ဒေသ၊ အလိုက်ပရူပရာဂှ်လေဝ်ကီု အရာသဳကၠဳဂွံလဝ်တံဂှ် နူကောံဓရီုပ္တိုန်စၟတ်သမ္တီတုဲ ပ္တိုန်ကဵုကမ္မတဳပံၚ်တောဲဓမံက်ရုပ်ရဴ ပရေၚ်ၜိုဟ်လလံ (UPDJC) ပၠန်တုဲ နူဂှ်မွဲတဆံၚ်ဆက်ပ္တိုန်ထ္ၜးသဳကၠဳ ပ္ဍဲသ္ဘၚ်သဳကၠဳပရေၚ်ၜိုဟ်လလံဍုၚ် ပေန်လုၚ် ၂၁ ဗွဝ်ကၠံတေံပၠန်ရောၚ်။
သွက်ဂွံကၠောန်ပေါဲသဳကၠဳပရေၚ်ဍုၚ်ကွာန် အဆံၚ်ဂကူဏံ ကောန်ဂကူပအိုအ်တံလေဝ် ပ္ဍဲဂျာန်နဝါရဳ (၂၁) ပ္ဍဲတွဵုရးမန်ကီု သီုကဵုပ္ဍဲဒေသကောန်ဂကူပအိုတ်တံ တန်တဴဒၟံၚ် (၁၆) ဒၞါဲဂှ်ကီု ကၠောန်အာကီုရောၚ် ခေါန်မေန်အံၚ် ညးစၞးကောန်ဂကူပအိုအ် ဟီုရ။
ပ္ဍဲပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ သွက်ဂကူကရေၚ် ကၠောန်ကၠုၚ်ပွိုၚ် (၃) တ္ၚဲ နူဂိတုဂျာန်နဝါရဳ (၁၈) ဂှ် ညးစၞးအလဵုအသဳ ညးဇနော်ကၟိန်ဍုၚ်၊ ညးစၞးဂကောံအလဵုအသဳ တွဵုရးကရေၚ်၊ ညးစၞးဗော်ပရေၚ်ဍုၚ်ကွာန်ကရေၚ် (၅) ဗော်၊ ညးစၞးဗော်ရပ်လွဟ်ကရေၚ် (၅) ဗော်၊ ညးစၞးကရေၚ် မကၠုၚ်နူ (၉) ဒေသအပ္ဍဲဍုၚ်ဗၟာ၊ သၟတ်နူဂကောံမှာဇန်ကရေၚ်၊ တၠပညာဂမၠိုၚ်၊ ကောန်ဍုၚ်အရၚ်တၞဟ်ဟ်၊ ညးစၞးဂကောံဂမၠိုၚ် နူဍုၚ်နာနာ၊ ညးလ္ၚတ် နူ CSO F0rum တံ သီုဖအိုတ် လၟိဟ်တိုန်စိုပ် နွံ (၆၀၀) တၠပြၚ် ရဴဝွံဓမံက်လဝ်ပ္ဍဲလိက်လလောၚ်တြးရ။