ကောန်ဒေသတံ ဒှ်ဓဝိၚ် ဒပ်ပၞာန်ဗၟာကဵု ဒပ်ပၞာန်မန်ဗော်ဍုၚ်မန်တၟိတံ ဂွိၚ်ဖေက်က္လေၚ်ပန်ညးသ္ကံပၠန်တုဲ လၟုဟ်မ္ဂး ပ္ဍဲဍုၚ်ကျာ်ပိ ပယျဵုသေံဗၟာဂှ် ရဲဆေၚ်ထဝ်တံ ကၟာတ်ထောံဆေၚ် တၟာဂလိုၚ်ရ ဂွံတီ။
“နူဏေံ (ဖေဖဝ်ဝါရဳ ၁၄) ဒပ်အလဵုအသဳကဵု ဒပ်ဗော်ဍုၚ်မန်တၟိတံ အကာဲအရာကြံၚ်မ္ၚိုဟ်ညးသ္ကံကွေံကွေံရ၊ ဂွိၚ်ဖေက်ဒှ်ပေါဲဗ္တိုက်ပၠန်၊ ဒၟါနူဂှ်ရ ဒးကၟာတ်ဆေၚ်ထဝ်” သာ်ဝွံ နာဲဝေန် တၠဆေၚ်ထဝ် ဍုၚ်ကျာ်ပိဟီုရ။
ဗ္ဒိုပ်သၞေဟ်ကၚ်မန် (ဗ္ဒိုပ်အလာံၜိုပ်) နွံပ္ဍဲသွာၚ်ဍာန် ပလိုၚ်ဂျပါန်ကဵုဂူၜဴဂှ် ဒပ်ပၞာန်ဗၟာလုပ်ကေတ်ဒၞါဲရောၚ် ပ္ဍဲတ္ၚဲဖေဖဝ်ဝါရဳ ၁၅ ဏံ နူဒပ်ဗၟာကျာ်ပိ ကော်ဟီုကဵုလဝ်သမ္တီ ကုညးတာလျိုၚ် ဗော်ဍုၚ်မန်တၟိ ဍုၚ်ကျာ်ပိရောၚ် ဂွံတီကေတ်ရ။
“ကဵုရုၚ်ဆက်ဆောံပိုဲဂှ် ဍေံတံဟီုကၠုၚ်လဝ် ဟွံမွဲဏီ၊ ဗ္ဒိုပ်သၞေဟ်ကၚ် ၂ ဗ္ဒိုပ်ဂှ် ဒပ်အလဵုအသဳတံ လုပ်ကၠုၚ်တုဲ သီကေတ်ထောံဣရ၊နူဗဟဵု (ဗော်ဍုၚ်မန်တၟိ) တေံ ကဵုနၚ်စၞောန် သွက်ဂွံပါဲတုဲ ပိုဲတံပါဲတိတ်လဝ်တုဲမံၚ်ရ၊ အဆံၚ်ပန်ပှော်ဂှ် ဟွံမွဲဏီ” နာဲသိုက်ဆာန် ညးတာလျိုၚ် ရုၚ်ဆက်ဆောံဇြပ်ဗု ဗော်ဍုၚ်မန်တၟိ ဟီုရ။
ဗီုဏံကီု တ္ၚဲဖေဖဝ်ဝါရဳ ၁၅ အခိၚ်ၜိုတ်ဒေါဝ်တ္ၚဲဂှ်လေဝ် ကွဳစက်ပၞာန်ဗၟာမွဲမ လုပ်စိုပ်ရုၚ်ဆက်ဆောံဍုၚ်ရေဝ် (ဗော်ဍုၚ်မန်တၟိ) တုဲ လုပ်ဂၠိုက်ဂၠာဲဏာလွဟ် ကီုရဂှ်လေဝ် နာဲသိုက်ဆာန် ဟီုရ။
“အဃောသၞာံ ၂၀၁၀ ဂှ် ၜိုန်ပရေၚ်ဒေါံပန်ပှော်လီုကီုလေဝ် ဂွံလုပ်ဂၠိုက်ဂၠာဲ ပ္ဍဲရုၚ်ဆက်ဆောံဗီုဏံ ဟွံမွဲကၠုၚ်ရ၊ ရံၚ်ကေတ်အကာဲအရာလၟုဟ်တှေ် ပရေံမံၚ်ညိဏောၚ်” နာဲသိုက်ဆာန် ဂးရ။
အလဵုအသဳ သမ္မတတိၚ်သိၚ် ကေုာံဗော်ဍုၚ်မန်တၟိ အဃောတုပ်စိုတ်ပရေၚ်ဒေါံပန်ပှော် နအဆံၚ်တွဵုရး/အဆံၚ်ကၟိန်ဍုၚ် ပ္ဍဲသၞာံ ၂၀၁၂ တေံဂှ် ကွာန်ပလိုၚ်ဂျပါန် စၞောန်ဗီုတိ (MS-375 882) ကေုာံ ဗ္ဒဝ်ၜါတၞံ စၞောန်ဗီုတိ (S- 825 197) ဂှ် သ္ပသမ္တီလဝ် ဒ္တန်ဒပ် ဗော်ဍုၚ်မန်တၟိရ။
ပပ္တံနူသၞာံ ၁၉၉၅ အလဵုအသဳ နဝတ ကဵု ဗော်ဍုၚ်မန်တၟိတံ တုပ်စိုတ်ပရေၚ်ဒေါံပန်ပှော်တုဲဂှ် လုကဴပွိုၚ် ၂၂ သၞာံ ပရေၚ်ပန်ပှော် ဟွံမွဲကၠုၚ်မွဲလှေ် ဆ္ဂးတ္ၚဲဏံ အကာဲအရာဍေံ ကြံၚ်မ္ၚိုဟ်မံၚ်ရောၚ် ညးတာလျိုၚ် ရုၚ်ဆက်ဆောံ ဗော်ဍုၚ်မန်တၟိဂှ် ဂးရ။