Categories
ပရိုၚ်

ကိစ္စဂၠံၚ်ကွဳစက် ဆိုအ်ကၟာတ်ဒၟံၚ် ပ္ဍဲဖျာဇၞော်မတ်မလီုဂှ် ဌာနဆေၚ်စပ်တံပံၚ်ကောံပသောၚ်အာရောၚ်

ကိစ္စဂၠံၚ်ကွဳစက် ဆိုအ်ကၟာတ်ဒၟံၚ် ပ္ဍဲဖျာဇၞော် စၟတ် (၁) (၂) ဍုၚ်မတ်မလီု တွဵုရးမန်ဂှ် ဌာနဆေၚ်စပ် (၇) ဌာနတံ ပံၚ်တောဲပသောၚ်အာရောၚ် သာ်ဝွံ သ္ကိုပ်ဝန်ဇၞော် တွဵုရးမန် ဒံက်တာအေဇြာန် ဟီုရ။

ရန်ကဵုသ္ဂောံပသောၚ် ကိစ္စကွဳစက် ဆိုအ်ကၟာတ်ဒၟံၚ်ပ္ဍဲဖျာဇၞော်မတ်မလီုတံဂှ်တုဲ ပ္ဍဲဂိတုမာတ် စၟတ်တ္ၚဲ (၇)ဂှ် ဂကောံအလဵုအသဳတွဵုရး ဌာနနာနာမဆေၚ်စပ် ကေုာံကမ္မတဳဖျာတံ ဆဵုဂဗသဳကၠဳရၚ်သ္ကအ်တုဲ ဌာနဆေၚ်စပ် (၇) ဌာန မပ္တံဌာနဗဂဵုလဟဵု၊ ဒပ်ဗၠာဲသၟိၚ်၊ ဒပ်ဗၠာဲသၟိၚ်ထိၚ်ယာန်၊ ဌာနအုပ်ဓုပ်နာနာ၊ ကမ္မတဳထိၚ်ဒဝ် စေဝ်ပၞောန်ယာန်တံ ပံၚ်တောဲ ပသောၚ်အာရောၚ် ဖျေံလဝ်သ္ဂုတ်သွာတ် ဒံက်တာအေဇြာန် ဂးရ။

ဖျာဇၞော်ဍုၚ်မတ်မလီု (MNA)
ဖျာဇၞော်ဍုၚ်မတ်မလီု (MNA)

သွက်ကွဳယာန်တံဂွံဒိုအ်ဂှ် ဒၞါဲဟွံရုံဂပ်၊ ကွဳစက်သၟးဟွံက သီုကွဳလိုန်ဓါတ်ခဠာပိ၊ ကွဳလိုန်ဓါတ်၊ ကွဳဒရိုဟ်တံလေဝ် ဒိုအ်ဒီုဟွံမွဲကဵုသၞောတ်ဝ်၊ပ္ဍဲကရပ် ကရပ်ဖျာ ဒၞါဲကွဳတံ သ္ဂောံဒိုအ်ဂှ်လေဝ် ရဲဖျာတံလုပ်သွံဒၟံၚ် ဟွံဗက်သၞောတ်သၞောဝ်၊ ကပေါတ်ဖျာတံဂှ်လေဝ် ဖအုံဗဝဝ်လဝ် ပ္ဍဲဂၠံၚ်ကွဳယာန်တံအာကၠုၚ်ပၠန် ဒၟါနူဂှ်ရ အကာဲအရာ ဂၠံၚ်ဍာန်ကၟာတ်ဆိုအ်ဂှ် ပရေံမံၚ်ကွေံကွေံ သာ်ဝွံ သ္ကိုပ်ဗၠာဲသၟိၚ်ကျဝ်ဒူ နူ “အမှတ် (၁၂) ယာဉ်ထိန်းရဲ ဒုတပ်ဖွဲ႔မှူးရုံး” တွဵုရးမန် ဟီုရ။

“သွက်ဂွံပသောၚ် ကိစ္စဂၠံၚ်ဍာန်ကၠက်ဏံဂှ် နကဵုဒပ်ဗၠာဲသၟိၚ်ထိၚ်ဒဝ်ယာန်သၟး ပသောၚ်ဟွံမာန်တုဲ ဒးကၠောန်အစဳဇန်ပံၚ်တောဲဏံရ၊ ကွဳစက်တံလေဝ် ညံၚ်ဂွံလုပ်ဒိုအ် အတိုၚ်စေဝ်ပၞောန်၊ ရဲသွံဖျာတံလေဝ် ညံၚ်ဂွံသွံ အတိုၚ်စေဝ်ပၞောန်ဂှ် ဖန်ဇန်အာဏောၚ်၊ သွက်ကွဳလိုန်ဓါတ် ကဵု ကွဳစက်တံဂှ် ကၠောန်ကဵုဒၞါဲတၞဟ်ခြာဏောၚ်” သ္ကိုပ်ဗၠာဲသၟိၚ် ကျဝ်ဒူ ဟီုရ။

စပ်ကဵုပရေၚ်ဂၠံၚ်ကွဳစက်ကၠက်ဏံတုဲ အပ္ဍဲပွိုၚ်မွဲဂိတု စနူဂိတုမာတ် ၁၃ ဒဵုကဵုအေဗရဴ ၁၃ တေံ ကၠောန်အာပရေၚ်ကဵုပညာ၊ သီုပါ်ပရအ်ကဵုတၞးလိက်ရောၚ်တုဲ အပိုၚ်ခြာပရေၚ်ကဵုပညာဏံအိုတ်အာတုဲမ္ဂး ဆက်ကၠောန်အာ ပရေၚ်ကေတ်အရေဝ်ရောၚ် ဂွံတီကေတ် နူရုၚ်ဒပ်ဗၠာဲသၟိၚ် ထိၚ်ယာန်ရ။

“ပ္ဍဲတ္ၚဲသ္ၚိသဝ်ကဵု တ္ၚဲစန်တံဂှ်မ္ဂး မၞိဟ်အာကၠုၚ်ဂၠိုၚ်ကွေံတုဲ ဂၠံၚ်ကွဳကၠက်မံၚ်ရ၊ ဖါနူဂယးတှေ် မၞိဟ်ၜေတ်ကွေံကွေံ၊ အခိၚ်မၞိဟ်အာကၠုၚ်ဆိုအ်ဒၟံၚ်ဂှ် ကွဳလိုန်ဓါတ်မွဲ ဂွံအာကၠုၚ်လ္ပဟီုဏီ မၞိဟ်မွဲမွဲ မိက်ဂွံၜေတ်တိုန်ဂတဂှ် ၜေတ်တိုန်ဟွံမာန်ပုဟ်” သာ်ဝွံ ဥူတေန်မိုၚ် ညးဒဳတက္ကသဳကွဳလိုန်ဓါတ် ပ္ဍဲဖျာသၟဝ် (မတ်မလီု) ဟီုရ။

ပ္ဍဲဖျာဇၞော် စၟတ် (၁) (၂) မတ်မလီု ဟိုတ်နူဍာန်ကၟာတ်ဆိုအ်ဒၟံၚ်တဝဵုဂှ်ရ နူဂကောံဗဂဵုလဟဵု ပွိုၚ်ဍုၚ်မတ်မလီု ဟွံလအ် ဟွံလအ် ဗက်ပသောၚ်မံၚ် ဆေၚ်ဖျာ မၜက်တိတ်ပ္ဍဲဍာန်တံတုဲ ယြဴဆေၚ်ဖျာမွဲ ယဝ်ဟွံဒ္ဂေတ်ဗက် စေဝ်ပၞောန်မ္ဂး ကေတ်အရေဝ် နကဵုတက်ဒဏ်သြန် မွဲဆေၚ် (၅၀၀၀၀) မသုန်ဠက်ဒကေဝ်လေဝ် နွံကၠုၚ်ကီုရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.