အပ္ဍဲပွိုၚ်ဍုၚ်ရေဝ် ရုၚ်ဂဥုဲပွိုၚ်တိုက် ဍုၚ်လၟိုၚ်ဂှ်ဝွံ ဖျေံလဝ်ကဵုအ္စာသဝ်ဝဳယဲအဆံၚ်ဒံက်တာ နွံမံၚ်၂ တၠကီုလေဝ် ဟိုတ်နူအကာဲအရာနာနာတုဲ အ္စာဂဥုဲဒံက်တာမွဲတၠ ဒးပြံၚ်အာတာလျိုၚ် ဌာန်ဒေသတၞဟ်သအာၚ်နွံကီုဂှ်ရ သွက်ဂွံထပက်ကဵုအဇာ ဒၞာဲအ္စာသဝ်ဂှ် ဟွံမွဲဏီဖိုဟ် ဂွံတီကေတ် နူကဵုညးဒေသ ဍုၚ်လၟိုၚ် တအ်ရ။
“အခိၚ်ကၠာတေံဂှ်တှေ် အ္စာဂဥုဲဝဳမံၚ်ယဲ ပ္ဍဲရုၚ်ဂဥုဲဏံ နွံမံၚ် ၂ တၠမှ၊ အ္စာဂဥုဲမွဲတၠဂှ် ကဆံၚ်ညးသၠုၚ်တိုန်တုဲ ဒးပြံၚ်အာ ဒေသတၞဟ် ပိုဲမိၚ်လဝ်ဟဂှ်လေဝ်၊ လၟုဟ်ဂှ် အဇာညးဂှ် ဟွံမွဲကၠုၚ်မံၚ် မွဲသၞာံပြၚ်အာယျဏောၚ်” သာ်ဝွံ ညးဒေသဍုၚ်လၟိုၚ် မာံတိၚ်ထောန်ဥူ ဟီုရ။
“ပရူပရာဏံဂှ် ပတိုန်လဝ် လိက်ကုကၠတ်ထဝ်ပိုဲလေဝ် လအ်မံၚ်ယျ၊ ဆဂး အ္စာဂဥုဲဟွံစှေ်ကၠုၚ်ဏီပုဟ်၊ ပိုဲတအ် အာသၟာန်လဝ် ဂကောံအလဵုအသဳတွဵုရး ဝန်ဇၞော်ဌာနမဆက်စပ်တုဲမံၚ်ရ၊ ညးတအ်ဟီု အ္စာဂဥုဲဂှ် ဍာ်ဒကေဝ်ဟွံပေၚ်ဏီတုဲ ဟွံဒှ်ဗလးဖျေံဏာဏီ ဂးကၠုၚ်လဝ်ဟဂှ်နွံ” သာ်ဝွံ ညးစၞးကၠတ်ထဝ်ပွိုၚ်ဍုၚ်ရေဝ် ဒံက်တာမာံသဵုလေန် ဟီုကဵုဌာန်ပရိုၚ်မန်ရ။
ကၠတ်ထဝ်တွဵုရး လၟေၚ်ဒုတိယ ကောံဓရီုလၟေၚ်ဍာံ အလန်စတုတ္ထကၠောန်လဝ် ပ္ဍဲသၞာံ ၂၀၁၆ ဂိတုဒဳဇြေန်ဗာဂှ် ညးစၞးကၠတ်ထဝ် ဒံက်တာမာံသဵုလေန် သၟာန်လဝ်ဂလာန် “သွက်ဂွံဖျေံကဵု အ္စာဂဥုဲ ပွိုၚ်တိုက်ဍုၚ်လၟိုၚ် နွံ/ဟွံမွဲ” နွံကၠုၚ်ကီုလေဝ် ဟိုတ်နူဖျေံကဵုအ္စာဂဥုဲဟွံမာန်ဏီဂှ်ရ၊ တုဲကၠုၚ် မေ ၁၂ ဏံ အဃောသကိုပ်ဝန်ဇၞော် စှေ်အာဒေသရေဝ် အာဆဵုဂဗကဵု ညးဒေသကွာန်ကအ်ဍောတ်ဂှ် ညးဒေသတအ်ထပ်အာတ်မိက်ပၠန်တုဲ သကိုပ်ဝန်ဇၞော်တွဵုရးမန် ကလေၚ်ပတိုန်အာကဵု ဝန်ဇၞော်ကၟိန်ဍုၚ်ရောၚ်၊ ညံၚ်ဂွံဖျေံကဵုဂှ်လေဝ် ပတိုက်ဖအောဝ်ကဵုရောၚ် ဟီုလဝ်ကဵု ညးဒေသတအ်နွံရ။
ရုၚ်ဂဥုဲပွိုၚ်တိုက်လၟိုၚ်ဝွံ လုပ်လၟိဟ်ခါတ် (၁၆) မတုဲ ပြဟ်ဟ်ဏံ အ္စာဂဥုဲအဆံၚ်ဒံက်တာမွဲတၠကဵု အ္စာၝောံ Nurse (၇) တၠတံ ကေတ်မံၚ်တာလျိုၚ်လွဳလွတ်မံၚ်ရောၚ်။
နူကဵုဒေသဍုၚ်လၟိုၚ် မပ္တံကဵု ကွာန်တံၚ်မောံ၊ တံၚ်ပြံၚ်၊ ကအ်ဍောတ်၊ တၟံကၞေၚ်ကွာန်တၟိ၊ ကၞေၚ်တၟံ၊ နှေဟ်ကရေၚ်၊ တအ် နွံမံၚ်ဗွဲမဂၠိုၚ်တုဲ ညးဒေသသကုတ်လ္ပာ်ဏံ တိုန်မံၚ် ရုၚ်ဂဥုဲပွိုၚ်တိုက် ဍုၚ်လၟိုၚ်ဂၠိုၚ်ရောၚ် ဂွံတီကေတ်ရ။