ပ္ဍဲဂိတုဂျောန် (၁၀) တုဲကၠုၚ်ဏံ DPN ဂကောံညးစၞးသဳကၠဳပ္ညဳပ္ညပ်ပရေၚ်ဍုၚ်ကွာန် လ္ပာ် UNFC ကေုာံ PC ကမ္မယှေန်ပရေၚ်ၜိုဟ်လလံကၟိန်ဍုၚ် လ္ပာ်အလဵုအသဳတံ ဆဵုဂဗသဳကၠဳကၠုၚ် ဗွဲပလး ပ္ဍဲ Furama Hotel ဍုၚ်ဇၚ်မာဲ ဍုၚ်သေံဂှ် အကာဲအရာခိုဟ်မံၚ်ဏောၚ် ညးတာလျိုၚ်သီုၜါလပါ် ဟီုလဴကဵုဌာန်ပရိုၚ်မန်ရ။
“ပိုဲပ္ညဳကၠုၚ်ညးသ္ကံဂှ် ဂွံ (၅) ဝါတုဲရ။ ပ္ဍဲဏံလေဝ် လညာတ်ဗၠေၚ်ညးသ္ကံဇၞော်ဇၞော်ဂှ် ဟွံမွဲပုဟ်။ ပရေၚ်ပြံၚ်လှာဲမအရေဝ်သၟးရနွံ။ ရံၚ်ကေတ် ပိုဲပ္ညဳလဝ်တ္ၚဲဏံဂှ်တှေ် အကာဲအရာခိုဟ်မံၚ်ဏောၚ်တှေ် ပ္ဍဲပေါဲဆဵုဂဗသဳကၠဳဗွဲသၞောဝ် အလန်ဆဋ္ဌမ ဂတတေံမ္ဂး သွဟ်ခိုဟ်မွဲတိတ်ကၠုၚ်မာန်ဏောၚ်” သာ်ဝွံ ဥူအံၚ်သဵု နူဂကောံကမ္မယှေန်ပရေၚ်ၜိုဟ်လလံကၟိန်ဍုၚ် ဟီုရ။
“တၚ်ပိုဲမိက်ဂွံတီဂှ် ပိုဲသၟာန်ကၠုၚ်။ ပိုဲဆဵုဂဗသဳကၠဳတ္ၚဲဏံဂှ် ဒှ်ပေါဲသဳကၠဳလက္ကရဴအိုတ် သွက်ပေါဲသဳကၠဳအလန်ဂတတေံဏောၚ်တုဲ သီုၜါလ္ပာ်ရ ဟီုဂးပံက်သြိုဟ် ကၠးကၠးမးမးတုဲ သွက်ဂတတေံမ္ဂး ဒှ်သွဟ်ခိုဟ်မွဲဏောၚ် ဟီုစဂွံ” သာ်ဝွံ ခူဥူရာ ညးက္ဍိုပ် DPN နူ UNFC ဟီုရ။
အကာဲအရာ သွဟ်တိတ်ကၠုၚ် နူသ္ဘၚ်သဳကၠဳပရေၚ်ၜိုဟ်လလံဍုၚ် ကောံဓရီုပေန်လုၚ် ၂၁ ဗွဝ်ကၠံ အလန်ဒုတိယဂှ် နူ PC သောၚ်ထ္ၜးကဵု DPN တုဲ ပ္ဍဲအရာသဳကၠဳ တၚ် ၉ တၚ် နူ DPN ပ္တိုန်ထ္ၜးလဝ် ဂှ်လေဝ် ဂွံသွဟ်ခိုဟ်ဟ်နွံမံၚ်ကီုရောၚ် သာ်ဝွံ ကြဴနူပေါဲသဳကၠဳတုဲအာတုဲဂှ် က္ဍိုပ်သ္ကိုပ်ၜါလ္ပာ်တံ ဟီုဂးကဵုအ္စာပရိုၚ်တံရ။
ပ္ဍဲပေါဲသဳကၠဳဗွဲပလးအလန်ဏံ နူဂကောံ PC အလဵုအသဳဂှ် ဥူအံၚ်သဵု၊ ဥူလှမိုၚ်ယှိုဲ၊ ဒံက်တာမေန်ဇြဝ်ဥူ ကေုာံ ဥူကျဝ်လေန်ဥူတံ တိုန်စိုပ်တုဲ နူဂကောံ DPN ဂှ် ခူဥူရာ၊ ဒံက်တာနာဲယှိုဲတိၚ်၊ ဒူဝါဘမ်ဝမ်လရဝ်၊ သ္ကိုပ်ဗိုလ်ဇၞော် သဝ်လမန်၊ သ္ကိုပ်ဗိုလ်ဇၞော်မေန်ထောန်၊ သ္ကိုပ်ဗိုလ်ဟာတ်ဟာန်၊ ဥူထောန်ဇြဝ်၊ နာဲဗညာမန် ကေုာံဥူသာန်အံၚ်တံ တိုန်စိုပ်လဝ်ရ။
UNFC ကံၚ်ဇြဳဖေဝ်ဒရေဝ်ကောန်ဍုၚ်အရၚ်ဝွံ သွက်ဂွံကၠောန်သ္ဘၚ်သဳကၠဳအလန်ဒုတိယ ပွိုၚ် ၅ တ္ၚဲ စနူတ္ၚဲဂိတုဂျောန် ၂၀ တေံနွံတုဲ ကောံဓရီုအလန်ဆဋ္ဌမ ဂကောံ DPN ကဵု PC ဂှ် စိုပ်ဂိတုဂျူလာဲတှေ် ကၠောန်သ္ပပ္ဍဲလ္ဂုၚ်တေံရောၚ် ဂွံတီလဝ်ကီုရ။
ပ္ဍဲကံၚ်ဇြဳဖေဝ်ဒရေဝ်ကောန်ဍုၚ်အရေၚ် UNFC ဂှ် ကံၚ်ဇြဳကောန်ဂကူရခေၚ် ANC ၊ ဗော်ပရေၚ်တောတက်ကရေၚ်ဍာဲ KNPP ၊ ဗော်ဍုၚ်မန်တၟိ NMSP ၊ ဗော်ပရေၚ်တောတက်ရးသေံ SSPP/SSA ၊ ဂကောံဒဳမဝ်ကရေတ်တေတ်ဠာဟူ LDU တံ သှေ်ဒၟံၚ်ဏီတုဲ ဂကောံပရေၚ်ဗၠးၜး ရးကချေၚ် KIO/KIA ကဵု ဂကောံကောန်ဂကူဝ WNO ဂှ် ပ္တိုန်လဝ်လိက် နုက်တိတ်ဏောၚ် ဂွံတီလဝ်ရ။