Categories
ပရိုၚ်

ကွဳစက်ဂြိပ်ဒၟံၚ် ကျာ်မြဟ်ကဵုမတ်မလီုဂှ် ဒှ်အခက်ခုဲဒၞါဲဒေံါ

ပ္ဍဲဒၞါဲပလိုတ်ဖျာတၟိ ဍုၚ်မတ်မလီုဂှ် မွဲပွိုၚ်ဍုၚ်မ္ဂး ကွဳစက် (၃) မလုပ်ဒေံါဇူဂွံ ကဵုလဝ်အခေါၚ် သာ်ဂှ်ကီုလေဝ် သွက် ကွဳစက် မဂြိပ်ဒၟံၚ်ကျာ်မြဟ်ကဵုမတ်မလီုဂှ် ဒှ်ဒၟံက်အခက်ကဵုဒၞါဲရောၚ် ဒဝ်ခေန်မျဵုမျေအ် ညးစၞးကၠတ်ထဝ်တွဵုရး နူဒေသမာဲ စၟတ် (၁) ပွိုၚ်ဍုၚ်ကျာ်မြဟ် ပ္တိုန်ထ္ၜး ပ္ဍဲကၠတ်ထဝ်တွဵုရးဍုၚ်မန် အလန်ဒုတိယ ကောံဓရီုလၟေၚ်ဆဋ္ဌမ ပ္ဍဲတ္ၚဲကောံဓရီု ဂိတုဂျောန် ၁၄ ရ။

“ကၠာတေံ ပ္ဍဲဒၞါဲလုပ်ဒေံါကွဳစက်လၟုဟ်ဏံ ဒှ်ဒၟံၚ်ဖျာပုၚ်တှေ် ပြေပြံၚ်ဒၟံၚ်ဖိုဟ်ရ။ အေဒၞါဲဂှ် လၟုဟ် ဒှ်အာဆေၚ်ဖျာ ဗၞိက်ဣရတှေ် ယဝ်လုပ်ဒေံါတှေ် ဒၞါအာဂၠံၚ်မုက်ဖျာဍေံတံ ဂးတုဲ ဟွံကဵုဒေံါရ။ ဒၟါနူဂှ်ရ ညးဒဳကွဳစက်ကီု ညးဗက်ဍုတ်ကွဳစက်ကီု ခက်ကၠုၚ်ကဵုပရေၚ်စသုၚ်တၟာဂလိုၚ်” သာ်ဝွံ ဒဝ်ခေန်မျဵုမျေအ် ဂးရ။

အမာတ်ကၠတ်ထဝ်တွဵုရးမန် ဒဝ်ခေန်မျဵုမျေအ် (MNA)

ကိစ္စသ္ပစၟတ်သမ္တီ သွက်ဒၞါဲကွဳစက်လာၚ် ကဵု ကွဳစက်ဗၞိက်တံသ္ဂောံဒိုအ်ဂှ် ကမ္မတဳကောပ်ကာဲထိၚ်ဒဝ် စေဝ်ပၞောန် ယာန် တွဵုရးဍုၚ်မန် (ပြည်နယ်၊ယထက) ရောၚ် ဖျေံဒၞါဲသ္ပကဵုသမ္တီတုဲ ကွဳစက်ဂမၠိုၚ် မကၠုၚ်နူ ပွိုၚ်ဍုၚ်နာနာတံဂှ် မွဲပွိုၚ်ဍုၚ်တှေ် ကွဳစက် (၃) မ လုပ်ဒိုအ်ဇူဂွံ ကဵုလဝ်အခေါၚ် နူလက်ထက် (မထသ) ကၠာတေံရဏောၚ် ဂွံတီကေတ် နူအလဵုအသဳ တွဵုရးဍုၚ်မန်ကီုရ။

“ကွဳစက်ကၠုၚ်နူကျာ်မြဟ်ဂှ် ဆေၚ်ဖျာနွံပလိုတ်ဖျာတၟိတေံ ယဝ်ဟွံကဵုဒေံါမ္ဂး မၞိဟ်ဒဳကွဳစက်တံ တေၚ်ကဵု (ယထက) ပွိုၚ်ဍုၚ်ကျာ်မြဟ်တုဲ နူဂှ်မွဲတဆံၚ် ယဝ်ကၠုၚ်ပ္တိုန်ထ္ၜးကဵု (ယထက) တွဵုရးမ္ဂး နူ (ယထက) တွဵုရး ဗိုၚ်ပသောၚ်ကဵုဏောၚ်” သာ်ဝွံ နာဲထေန်အံၚ်ဟာန် ဝန်ဇၞော်ဓါတ်လလဳကဵုအစောံဇြဟတ် ကေုာံကွတ်စက် ဟီုဏာဂလာန်သွဟ် သာ်ဂှ်ရ။

ကွဳစက်လာၚ် ကျာ်မြဟ်-မတ်မလီုဂှ် မွဲတ္ၚဲတှေ် (၃) မ ဂြိပ်ဒၟံၚ်နကဵုအလန်ရ။ နူဂယး (၁၀)နာဍဳ လုပ်ထ္ပက်သၞေဟ်ပလိုတ်ဖျာတၟိ၊ မတ်မလီုဂှ်တုဲ ၁၁ နာဍဳကဝက် က္လေၚ်တိတ်နူ သၞေဟ်မတ်မလီုဂှ်ရ၊ တုဲမ္ဂး ကွဳစက်လုပ်ထ္ပက်မွဲမပၠန် ဂွံတီကေတ်ရ။

“ကဵုနၚ်သွဟ်ဗီုဂှ်ဂှ် ဗီုဂွံပြေစိုတ် ညိဟွံမွဲပုဟ်၊ သွဟ်ဏံဂှ် သွဟ်အတိုၚ်နဲကဲတြေံတုဲကၠုၚ်တေံ၊ ပၟိက်စိုတ်အဲတှေ် သွက်ကွဳစက် ကျာ်မြဟ်-မတ်မလီုဏံ မိက်ဂွံကဵုဖျေံ ဒၞါဲချိုတ်တ်ပၠိုတ်တ်မွဲဏောၚ်” သာ်ဏံ ဒဝ်ခေန်မျဵုမျေအ် ဂးရ။

စနူပံက်ကၠုၚ် သၞေဟ်ကွဳစက်တရဴဇမ္ၚောဲ အရာပ်လှာၚ် ပ္ဍဲသၞာံ ၂၀၀၆ တေံတုဲဂှ် ကွဳစက်ကၠုၚ်နူ ပွိုၚ်ဍုၚ်နာနာ အပ္ဍဲတွဵုရးမန်ဏံ အခေါၚ်လုပ်ဒေံါဇူ ပ္ဍဲသၞေဟ်ကွဳစက်တရဴဇမ္ၚောဲ လှာၚ်ဂွံ ဟွံမွဲရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.