ဗၟာ  ၊ အၚ်္ဂလိက် ၊  Font ၊  Converter

Breaking News
Home / ပရိုၚ် / သၟတ်ကွးဘာတံ ညံၚ်ဟွံဂွံသုၚ်စောဲဂဥုဲၜူမာဲ အလဵုအသဳတွဵုရး ထေက်ကဵုဒးသ္ပဇြိုဟ်နက်ရောၚ် ပ္တိုန်လဝ်ဂလာန်သာ်ဏံဂှ် ကၠတ်ထဝ်မန်သ္ပဒ္တန်

သၟတ်ကွးဘာတံ ညံၚ်ဟွံဂွံသုၚ်စောဲဂဥုဲၜူမာဲ အလဵုအသဳတွဵုရး ထေက်ကဵုဒးသ္ပဇြိုဟ်နက်ရောၚ် ပ္တိုန်လဝ်ဂလာန်သာ်ဏံဂှ် ကၠတ်ထဝ်မန်သ္ပဒ္တန်

သၟာပရိုၚ်ချူ:

အပ္ဍဲတွဵုရးဍုၚ်မန်ဏံ သၟတ်ကွးဘာ သုၚ်စောဲဂဥုဲၜူမာဲ ဂၠိုၚ်တိုန်ဒၟံၚ်ဂှ် နကဵုအလဵုအသဳတွဵုရးဍုၚ်မန် ပ္တိတ်ကသပ်ဂၠာဲနဲတုဲ ထေက်ကဵုဒးရေၚ်တၠုၚ်အာ ဇြိုဟ်ဟ်နက်က်ရောၚ် ပ္တိုန်လဝ်ဂလာန်နွံသာ်ဏံတုဲ ပ္ဍဲကၠတ်ထဝ်တွဵုရးဍုၚ်မန် အလန်ဒုတိယ ကောံဓရီုလၟေၚ်ဆဋ္ဌမ (တ္ၚဲဆဋ္ဌမ) ဂိတုဂျောန် ၁၅ ဂှ် သ္ပဒ္တန်ကုဂလာန်ဂှ်ရ။

ဂလာန်ဏံဂှ် ဥူအံၚ်ကျဝ်တူ ညးစၞးကၠတ်ထဝ်တွဵုရး နူဒေသမာဲ စၟတ်(၂) ပွိုၚ်ဍုၚ်သဓီု ပ္တိုန်ထ္ၜးတုဲ ညးစၞးကၠတ်ထဝ်တံ ထံက်ဂလာန် သဳကၠဳကၠုၚ်ရ။

ကဵုဓဝ်သတိ ဒုဟ်ဂဥုဲၜူမာဲ (Copy)

လၟုဟ်မ္ဂး ပ္ဍဲဍုၚ်ဗၟာဏံ စကာကၠုၚ်ဂဥုဲၜူမာဲ နဗီုပြၚ်နာနာသာ် အခိုက်နာနာသာ်တုဲ စိုပ်ဒၟံၚ်အဆံၚ် သ္ဇက်ဂွံဒှ်ဓဝိၚ် ကုသၟတ်ကွးဘာ တၟံဍုၚ်တၟံကွာန်ဣရရောၚ် ညးစၞးဒပ်ပၞာန် သ္ကိုပ်ဗိုလ်တိၚ်ဇြဝ် ဂးရ။

“ဒပ်ပၞာန်ပိုဲလေဝ် ပ္ဍဲအရာဗ္တိုက်သၟး ဒၞါတာဂဥုဲၜူမာဲဂှ် နကဵုနဲကဲနာနာသာ် ပံၚ်တောဲကဵုညးဍုၚ်ကွာန် ဒေသတံဂှ်တုဲ ကၠောန်ဒၟံၚ်ပရေၚ်ဗ္တိုက်သၟးဂဥုဲၜူမာဲရ၊ အလဵုအသဳတွဵုရးဍုၚ်မန်လေဝ် ပံၚ်တောဲကဵု ဒပ်ဗၠာဲသၟိၚ် တွဵုရး ကေုာံဂကောံမဆေၚ်စပ်တံတုဲ ကေတ်တာလျိုၚ် ရေၚ်တၠုၚ်အာဏောၚ်” သာ်ဝွံ သ္ကိုပ်ဗိုလ်တိၚ်ဇြဝ် ဂးရ။

မိက်ဂွံဒၞါတာ ဗ္တိုက်သၟးဂဥုဲၜူမာဲ မဒှ်အန္တရာဲသၟတ်အနာဂတ်တံဂှ်မ္ဂး ဒပ်ပၞာန်ရေၚ်တၠုၚ်ဒၞါတာဒၟံၚ်ဂဥုဲၜူမာဲ ဂှ်ကီု၊ ဒပ်ဗၠာဲသၟိၚ်ကေုာံ ဂကောံဗ္တိုက်သၟးဂဥုဲၜူမာဲတံဂှ်ကီု၊ ဂကောံမှာဇန် (CSO) အပ္ဍဲတွဵုရးကီု၊ မိမညးဍုၚ်ကွာန်တံကီု ပံၚ်တောဲညးသ္ကံ သီုစိုတ် သီုစရိုတ်တုဲ ထေက်ကဵုဒးဂစာန်ကၠောန်အာ ပရေၚ်ကဵုပညာရောၚ် သ္ကိုပ်ဗိုလ်ဂှ် ဂးရ။

ကိစ္စဗ္တိုက်သၟးဂဥုဲၜူမာဲဏံ ဒုၚ်သဇိုၚ်ကဵု မူဝါဒအလဵုအသဳကၟိန်ဍုၚ် ကေုာံတၚ်စၞောန်ပ္ညုၚ်နူကၟိန်ဍုၚ်တုဲ ရေၚ်တၠုၚ် ဒၟံၚ် နကဵုနဲ ၄ နဲဖိုဟ်ရောၚ် သ္ကိုပ်ဗိုလ်ဇၞော်ဝေန်နာၚ်ဥူ ဝန်ဇၞော်ပရေၚ်ဂီုကၠီု ကေုာံပရေၚ်ပယျဵုဓနက် ဂးရ။

“နဲ ၄ နဲ ပိုဲကၠောန်ဒၟံၚ်လၟုဟ်ဂှ် ပွမဂၠိုက်ဂၠာဲဓမံက်ပ္တိတ်ဂဥုဲၜူမာဲတုဲ ရပ်စပ်ကေတ်အရေဝ်။ အန္တရာဲဂဥုဲၜူမာဲ နွံတဴသာ်လဵုဂှ် သၟတ်ကွးဘာတံကီု၊ ညးဍုၚ်ကွာန်တံကီု ညံၚ်ဂွံကၠိုဟ်ခၠၚ်စဳကၠးအာဂှ် ပွမကၠောန်ကဵု ပေါဲသဳကၠဳ ပေါဲဟီုတွံ။ ကုညးစောဲလာံဒၟံၚ်ဂဥုဲၜူမာဲဂှ် အတိုၚ်အလိုက်ဆန္ဒဍေံ ဝဳပရာကဵုသၟးသၟးတုဲ က္လေၚ်ပခိုဟ်ကဵုဘဝဍေံတံ။ ရပ်ဂွံဂဥုဲၜူမာဲတုဲ ကုမၞိဟ်ဆက်စပ်ဒၟံၚ်ကေုာံဂဥုဲၜူမာဲ ဂှ်လေဝ် ရပ်စပ်ကေတ်အရေဝ် ကဵုဒုဟ်ဒဏ်ရောၚ်” သာ်ဝွံ သ္ကိုပ်ဗိုလ်ဇၞော်ဝေန်နာၚ်ဥူ ဂးရ။

ကမၠောန်ဗ္တိုက်သၟးဂဥုဲၜူမာဲဏံ ဗွိုၚ်ညံၚ်ဂွံဇၞော်သၠဲ မိက်ဂွံကဵုစိုပ်တရဴမ္ဂး ကသပ်ဂၞန် လညာတ်ညာဏ် နူကၠတ်ထဝ် ၊ အလဵုအသဳ၊ ဌာနနာနာ၊ ရဲမဳဒဳယာ၊ ဂကောံပရေၚ်ဝေါဟာမၞိဟ်၊ ညးဍုၚ်ကွာန် အဆံၚ်မၞိဟ်နာနာတံလေဝ် ဒးနွံကီုဏောၚ်တုဲ၊ သွက်ဂွံဓမံက်ရုပ်ရဴကမၠောန်ဏံဂှ်လေဝ် ဒးနွံကဵုသြန်ဗာတ်ဂျေတ်ကီုရောၚ် သ္ကိုပ်ဗိုလ်ဇၞော်ဝေန်နာၚ်ဥူ ဂးရ။

လၟုဟ်မ္ဂး အပ္ဍဲတွဵုရးမန်ဏံ သၟတ်စောဲကၠုၚ်ဂဥုဲၜူမာဲတံ ဘဝဍေံတံ ညံၚ်ဂွံခိုဟ်ဍိုပ်ဍဴတိုန်ပၠန်ဂှ် ကဏ္ဍစိုတ်စရိုတ်ကီု ကဏ္ဍပရေၚ်ထတ်ယုက်ကီု ဝဳပခိုဟ်ကဵုတုဲ သၟတ်က္လေၚ်ဍိုပ်ဍဴတိုန်အတိုၚ်တြေံဂှ် နွံကၠုၚ် ဗၞတ် (၅၀) တၠရောၚ် ဂွံတီကေတ်ရ။

About Mon News Agency

ဗှ်မာန်မံၚ်

ပ္ဍဲကွာန်နှေဟ်ခရေၚ် သၟာၚ်နူမၞိဟ်သုၚ်စောဲသွံပရးဂဥုဲၜူမာဲ ၅ တၠတုဲ ၜိုန်ရပ်ဂွံမခတိုဟ်မွဲမကီုလေဝ် စၟတ်လဝ်ကောန်ဒုဟ်အဓိကဂှ် ရပ်ဟွံဂွံဏီ

ပ္ဍဲဂိတုအဝ်ဂါတ် ၁၄ ဖါနူဂယးပြဟ်ဂှ် ဗၠာဲသၟိၚ်ကေုာံရဲဂကောံဂီုကၠီုကွာန်တံ ဂွံပရိုၚ်တုဲ လုပ်ဂၠိုက်ဂၠာဲ ဂဥုဲၜူမာဲ ပ္ဍဲကွာန်နှေဟ်ခရေၚ် ပွိုၚ်ဍုၚ်ရေဝ်ဂှ် မ္ၚးနူမၞိဟ်သုၚ်စောဲ သွံပရးမွဲတဆံၚ် ၅ တၠတံဂှ်တုဲ ၜိုန်သီဂွံ မခတိုဟ်မွဲမ …

Leave a Reply

%d bloggers like this: