ပ္ဍဲလက်ထက် အလဵုအသဳတၟိဏံ ပံက်လဝ်ဌာန ဝန်ဇၞော်တၟိ ပရေၚ်ကေၚ်ကာကောန်ဍုၚ်အရၚ်တုဲ အပ္ဍဲသၟဝ်ဌာနဂှ်ပၠန် ပံက်စွံလဝ်ဌာနက္ဍိုက်ပ် ပရေၚ် လိက်ပတ် ယေန်သၞာၚ် ကောန်ဍုၚ်အရၚ် မွဲဟာန်ကေုာံ ဌာနက္ဍိုက်ပ် ပရေၚ်စဵုဒၞါမၚ်မွဲ အခေါၚ်အရာကောန်ဍုၚ်အရၚ် ဇၟာပ်ရးဒေသဇၞော် /ဇၟာပ်တွဵုရးတံကီုတုဲ သွက်ဂွံခါန်ကၞက်ပဗေၚ်စုတ် ညးဂၠေၚ်ဝန် ဒုၚ်ကာဂှ် စဳဇန်ရေၚ်တၠုၚ်မံၚ်ဖိုဟ်ရောၚ် ဥူချေတ်ဇြဝ်လေန် သၞာဲဒဴက္ဍိုက်ပ် နူဌာနက္ဍိုက်ပ်ပရေၚ်ကောန်ဍုၚ်အရၚ် တွဵုရးဍုၚ်မန်ဂှ် ဟီုရ။
“အတိုၚ်ဗီုပြၚ်ဒက်ပ္တန်ဌာနမ္ဂး ပ္ဍဲအလုံဌာနဝန်ဇၞော်ပိုဲဏံ တော်ကဵုလၟိဟ်ဒးစွံ ညးဂၠေၚ်ဝန်မ္ဂး ၜိုတ် ၄ ဂအုံ ၁ ဂအုံရ ဂွံခါန်ကၞက်လဝ်၊ ဒးခါန်ဗပေၚ်စုတ် တၟာဂလိုၚ်ဏီ၊သွက်ဂွံခါန်ကၞက်ဂှ် ဌာနအလဵုအသဳလေဝ် ဆက်လဝ်ကဵုဌာနတၞဟ်ဟ်ဖိုဟ်၊ သွက်ဂွံခါန်စုတ်တၟိလေဝ်နွံ၊ကိစ္စဏံ ပ္ဍဲအဆံၚ်ကၟိန်ဍုၚ်တေံ သဳကၠဳပ္ညဳဒၟံၚ်ညးသ္ကံဖိုဟ်” ဥူချေတ်ဇြဝ်လေန် ဂးရ။
“ဌာနက္ဍိုက်ပ်တံဏံ ဒှ်တိုန်တၟိဏောၚ်၊ ဣဂှ်ရ မိက်ဂွံကဵုဒှ်ဂကောံ ခိုၚ်ၚ်ကၠိုက်က် ဗိုန်န်ဗတ်တ်မွဲ၊ မိက်ဂွံဟီုမွဲဂှ် ပ္ဍဲကၠတ်ထဝ်တွဵုရးပိုဲလေဝ် ပံက်စွံလဝ်ကမ္မတဳပရေၚ်ကောန်ဍုၚ်အရၚ်မွဲကီုရ၊ ကဵုညးတံလေဝ် ကၠုၚ်စိုပ်ပ္ညဳပ္ညပ် ပံၚ်တောဲရေၚ်တၠုၚ်မွဲစွံထေက်ကီုဏောၚ်” သာ်ဝွံ ဒံက်တာအံၚ်နာၚ်ဥူ ဒု-ဥက္ကဌကၠတ်ထဝ် တွဵုရးဍုၚ်မန် ဂးရ။
ဥပဒေ မၚ်မွဲစဵုဒၞါအခေါၚ်အရာ ကောန်ဍုၚ်အရၚ်ဂှ် ချူပ္တိတ်သ္ပလဝ်ဒ္တန် ပ္ဍဲသၞာံ ၂၀၁၅ လက်ထက်အလဵုအသဳ တုဲကၠုၚ်တေံတုဲ စိုပ်လက်ထက်အလဵုအသဳတၟိ NLD ဏံ ပံက်ပ္တန်လဝ်ဌာနဝန်ဇၞော် ပရေၚ်ကေၚ်ကာ ကောန်ဍုၚ်အရၚ် အဆံၚ်ကၟိန်ဍုၚ်ရ၊ နူဂှ် ဆက်ပံက်လဝ် ဌာနက္ဍိုက်ပ် အဆံၚ်ရး/တွဵုရးတံပၠန်တုဲ ပ္ဍဲတွဵုရးဍုၚ်မန်ဂှ် စပံက်ကၠုၚ်ဂွံလဝ် နူဂိတုမာတ် (၁) သၞာံ ၂၀၁၇ တေံရောၚ် ဂွံတီကေတ်ရ။