Categories
ပရိုၚ်

ပ္ဍဲကျာ်ထဝ် ဍာ်ဇတ်စှေ်အာဣရတုဲ မၞိဟ်ဒဴဘဲဍာ်တံ က္လေၚ်စဴသ္ၚိဌာန်

ဍာ်ဇၞော်ဒၟံၚ်ပ္ဍဲပွိုၚ်ဍုၚ်ကျာ်ထဝ်ဂှ် က္လေၚ်ဇတ်စှေ်အာဣရ၊ ညးဒဴဘဲဍာ်တံလေဝ် ဂိတုဂျူလာၚ် ၂၅ စနူပယျာံအဒေါဝ်တ္ၚဲဂှ် က္လေၚ်စဴသ္ၚိဌာန်အိုတ်ဣရရောၚ် ဂွံတီကေတ် နူကောန်ဒေသ ကေုာံ ညးကဵုအရီုဗၚ် ကုရဲဒးဘဲဍာ်တံရ။

ဟိုတ်နူဗြဲတရိုပ်ဆက် ဍာ်ဒဵုထ္ပက်လိုအ်စှေ်ကၠုၚ်တုဲ ပ္ဍဲဍုၚ်ကျာ်ထဝ် အရာပ်ဒှ်တၟိ စနူအရာပ် ကအ်သနာၚ်၊ အရာပ်ဇြေယျာမန် ကေုာံအရာပ်သမလတံ ဒးဒုၚ်ဘဲဍာ်ဇၞော် နူဂျူလာၚ် ၂၀ တေံတုဲ ညးအရာပ် ဗ္ဒာဲ ၄၀၀၀ တံ ပါဲဒဴဘဲဍာ် ဒးလုပ်ဗ္ဒပ္ဍဲဗ္ဒိုပ်ဟံၚ်ပြာ်ယာယဳတေံရ။

အကာဲအရာဍာ်ဇၞော် ဂျူလာၚ် ၂၁ ပ္ဍဲဍုၚ်ကျာ်ထဝ် (Facebook)
“ဍာ်ဇတ်အာယျ ပ္ဍဲဂၠံၚ်လေဝ် ဍာ်ဟွံမွဲရ၊ ညးဒဴဘဲဍာ်တံလေဝ် နူဏေံ (ဂျူလာၚ် ၂၅) စပုၚ်ဒေါဝ်တ္ၚဲတုဲ ပါ်ပရအ်ကဵုကပေါတ်ထံက်ပၚ်တုဲ စဴအာသ္ၚိညးကဵုညးအိုတ်ယျ၊ ဗ္ဒိုပ်ဟံၚ်ပြာ်လေဝ် ရုပ်ထောံအိုတ်ယျ” သာ်ဝွံ ဥူတေန်သဵု သ္ကိုပ်ပရေၚ်အုပ်ဓုပ် အရာပ်ကအ်သနာၚ် ဂးရ။

ပ္ဍဲဍုၚ်ကျာ်ထဝ် ဟိုတ်နူဗြဲတရိုပ်ဆက် ဍာ်ဒဵုထ္ပက်စှေ်ကၠုၚ်ဂှ်ရ စနူဂျူလာၚ် ၂၀ အရာပ်လ္ၚဵု ဍာ်ကလိုပ်၊ ဟိုတ်နူတိသရိုဟ်လာ်စှေ်တုဲ သ္ၚိမၞိဟ်ဒၟံၚ်လေဝ် သရိုဟ်အာ ရ မ၊ လီုအာ ၈ မတုဲ ဂၠံၚ်ဇၞော်ကွဳစက် လ္ဂုၚ်-မတ်မလီုလေဝ် ဗၠိုက်ဍာ် ကွဳစက်အာကၠုၚ်ဟွံဂွံတုဲ စိုပ်အဆံၚ် ဒးဒေံါလဝ်ဗွဲယာယဳရ။

ပ္ဍဲၜဳက္လေၚ် ကဵု သဓီုတံဂှ်လေဝ် ဍာ်ဇၞော်ကီုတုဲ မၞိဟ်ၜိုတ် ၉၀၀ ပြၚ်တံ ဒးလုပ်မံၚ် ပ္ဍဲဗ္ဒိုပ်ဟံၚ်ပြာ်ယာယဳ ရ ဒၞါဲတေံကီုရ။

ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ်၊ ၜဳက္လေၚ်၊ သဓီုတံ ဟိုတ်နူဍာ်ဇၞော်ဂၠိုၚ်တုဲ မၞိဟ်ဗ္ဒာဲ ၅၀၀၀ ညံၚ်ဂွံဗၠးဘဲဍာ်ဂှ် ဒးဖျုဲပြံၚ်ဏာ ဗွဲယာယဳ ပ္ဍဲဗ္ဒိုပ်ဟံၚ်ပြာ်တေံ- ဥူညိၚ်ဆာန်ကျဝ် ဒုသ္ကိုပ်က္ဍိုက်ပ် နူဌာနက္ဍိုက်ပ် ပရေၚ်ဟံၚ်ပြာ်ကေုာံကမၠောန်က္လေၚ်ဖျေံဒၞါဲဝါဲ တွဵုရးဍုၚ်မန် ဟီုရ။

အတိုၚ်စရၚ်ဌာနက္ဍိုက်ပ် ပရေၚ်ဟံၚ်ပြာ်ကေုာံကမၠောန်က္လေၚ်ဖျေံဒၞါဲဝါဲ တွဵုရးဂှ်မ္ဂး ဒၟါနူဍာ်ဇၞော် ပ္ဍဲပွိုၚ်ဍုၚ်ကျာ်ထဝ် ပံက်လဝ်ဗ္ဒိုပ်ဟံၚ်ပြာ် (၆) ဒၞါဲ၊ လၟိဟ်မၞိဟ် နွံ ၃၉၁၆ တၠကီု ဗ္ဒိုပ်ဟံၚ်ပြာ်တိလာ် နွံ ၁ ၊ မၞိဟ်နွံ ၉၁ တၠကီု ပ္ဍဲၜဳက္လေၚ် ဗ္ဒိုပ်ဟံၚ်ပြာ် နွံ (၅) ၊ မၞိဟ်နွံ ၆၁၉ တၠကီု ပ္ဍဲသဓီု ဗ္ဒိုပ်ဟံၚ်ပြာ် နွံ ၂ ၊ မၞိဟ်နွံ ၃၂၉ တၠကီု ဂွံတီကေတ်ရ။

ကုညးမစိုပ်အာပ္ဍဲဗ္ဒိုပ်ဟံၚ်ပြာ် ဘဲဍာ်ယာယဳ ဒၟါနူဍာ်ဇၞော်ဂှ် သ္ကိုပ်ဝန်ဇၞော်တွဵုရးဍုၚ်မန် အာစိုပ်ကဵုအရီုဗၚ်ကီုရ၊ ရဲဌာနဆေၚ်စပ်၊ ဂကောံကွဳစက်တိုန်ကျာ်ဣသိယဵု၊ ဂကောံရီုဗၚ်ဟံၚ်ပြာ် ပရေၚ်မၞိဟ် ကေုာံမှာဇန်လ္တူဍုၚ် ဟွံဒးဘဲဍာ်တံလေဝ် ကဵုအရီုဗၚ်အိုတ်ကီု ဂွံတီကေတ် နူကောန်ဒေသတံရ။

အရာပ်ပ္ဍဲဍုၚ်ကျာ်ထဝ် ဒးဘဲဍာ်ဇၞော် နွံကၠုၚ်ဇၟာပ်သၞာံကီုရလေဝ် ဒးဘဲဇၞော်ဇၞော် မၞိဟ်ကဵုလ္ၚီ ဒးဆုဲပြံၚ်ဗီုလၟုဟ်ဏံဂှ် ပ္ဍဲသၞာံ ၁၉၉၇၊ သၞာံ ၂၀၁၄ ၊ ၂၀၁၅ တေံလေဝ် ကေၚ်ဒှ်ကၠုၚ်ကီု ကောန်ဒေသတံဟီုရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.