Categories
ပရိုၚ်

သွဟ်ပေါဲသဳကၠဳဂှ် ပ္တိုန်ထ္ၜးကုက္ဍိုပ်သ္ကိုပ်ၜါလ္ပာ်တံတုဲ သ္ပဒ္တန်ပ္ဍဲပေါဲသဳကၠဳဂတတေံရောၚ်

ကမ္မယှေန်ပရေၚ်ၜိုဟ်လလမ် (Peace Commission) ကေုာံ ဂကောံ DPN နူ UNFC တံ ကၠောန်သ္ပလဝ် ပေါဲသဳကၠဳတုဲ သွဟ်ပေါဲသဳကၠဳဂှ် က္လေၚ်ပ္တိုန်ထ္ၜး ကုက္ဍိုပ်သ္ကိုပ်ၜါလ္ပာ်တံပၠန်ဏောၚ်၊ အခါရ ဆဵုဂဗ မွဲဝါပၠန်မ္ဂး သ္ပဒ္တန်ဏောၚ် ဥူဇြဝ်ဌေ (ညးနွံကဵုအခေါၚ်ဟီုဂးရုၚ်သမ္မတ) နူဂကောံကမ္မယှေန် ပရေၚ်ၜိုဟ်လလမ် ဂးရ။

“DPN ပ္တိုန်ထ္ၜးလဝ်နွံ (၉) တၚ်။ နူ (၁) ဒဵုကဵု (၄) ဂှ် တၠုၚ်လအာ ဘိုအ်ဂွံတုပ်စိုတ်နွံ။ သှေ်မံၚ် ၅၊ ၆၊ ရ၊ ၈ ဂှ် ညးစၞးၜါလ္ပာ်တံ သဳကၠဳလဝ်ကီုရ၊ ဆ္ဂး ပိုဲတံ ဂွိုအ်ဖျေံသ္ဂုတ်သွာတ်ဏီ။ ဒးက္လေၚ်ပ္တိုန်ထ္ၜးကဵု က္ဍိုပ်သ္ကိုပ်ၜါလ္ပာ်တံ ဏီဏောၚ်။ ထပ်ဆဵုညးသ္ကံ မွဲဝါပၠန်မှ ပိုဲဒှ်သ္ပဒ္တန်ဏောၚ်” သာ်ဝွံ ဥူဇြဝ်ဌေ ဂးရ။

ပေါဲသောၚ်က္လးလိက်ပရိုၚ် ပ္ဍဲ NRCP (MNA)
ပေါဲသဳကၠဳအလန်ဆဋ္ဌမဂှ် ကမ္မယှေန်ပရေၚ်ၜိုဟ်လလမ် ကဵု ဂကောံ DPN တံ ကၠောန်ကၠုၚ်လဝ် ပွိုၚ် ၂ တ္ၚဲ ဂိတုအဝ်ဂါတ် ၁၀ ကဵု ၁၁ ပ္ဍဲ NRPC ဌာနဗဟဵုပရေၚ်သၟဟ်သၟန်ကောန်ဂကူ ကေုာံပရေၚ်ၜိုဟ်လလမ်တုဲဂှ် ဥူဇြဝ်ဌေ ဟီုက္လးဏာ ပ္ဍဲပေါဲသောၚ်က္လးလိက်ပရိုၚ်ရ။

“သွက်ဂွံဆဵုမွဲဝါပၠန်ဂှ် ပိုဲတံရန်လဝ် ပ္ဍဲဂိတုဂတ ပထမသတ္တဟ ဟွံသေၚ်တှေ် ဒုတိယသတ္တဟ။ သောဲသောဲဗြောဲဗြောဲဂှ် ရုၚ်ကဵုရုၚ် က္လေၚ်ဆက်ညးသ္ကံပၠန်ဏောၚ်”သာ်ဏံ နာဲအံၚ်မ္ၚဵု ဒုက္ဍိုပ်ဂကောံ DPN ဟီုရ။

ဂကောံကမ္မယှေန်ပရေၚ်ၜိုဟ်လလမ် ကေုာံ ဂကောံ DPN တံ ကၠာဟွံသ္ပပေါဲသဳကၠဳ ဂတတေံဏီဂှ် ညးစၞးၜါလ္ပာ်တံ ဆက်ပ္ညဳ ဆက်သဳကၠဳညးသ္ကံ ဗွဲပလးပၠန်ဏောၚ်တုဲ ပေါဲသဳကၠဳ မွဲဝါပၠန်ဂှ် ကၠောန်သ္ပ ပ္ဍဲဂိတုသေပ်တေမ်ဗာ ပထမသတ္တဟ ဟွံသေၚ်တှေ် ဒုတိယသတ္တဟတေံဏောၚ် ဂွံတီလဝ်ရ။

“လ္တူသွဟ်တိတ်ကၠုၚ်ဏံ ညးစၞးၜါလ္ပာ်တံ အဟိန်သဳကၠဳမံၚ် ဍုက်က်ကေဝ်ဝ်ဂှ် ပ္ဍဲပိုဲညးၜါလ္ပာ်ဏံ က္လေၚ်ဂွံကၠုၚ်ဓဝ်ကၠိုဟ်စိုတ် ညးသ္ကံပၠန်” သာ်ဝွံ ညးက္ဍိုက်ပ် ဂကောံ DPN ခူဥူရာ ဂးရ။

ပ္ဍဲတၚ် (၉) တၚ် နူ UNFC ပ္တိုန်ထ္ၜးလဝ်ဂှ် သွက်ဂွံသဳကၠဳသှေ်မံၚ် တၚ် ၅ ၊ ၆ ၊ ရ ၊ ၈ ဟီုဂှ် မွဲကဵုမွဲ ဍေံဆက်စပ်မံၚ်ရေၚ်သ္ကံတုဲ အပ္ဍဲဏံ ပ္ဍဲကဏ္ဍဆေၚ်ကဵုပရေၚ်ဍုၚ်ကွာန်ဂှ် သွက်ဂွံက္လေၚ်သ္ၚဳဂၠိပ် မူပၞောန်ကီု ပ္ဍဲကဏ္ဍဆေၚ်ကဵုပရေၚ်ဒပ်ဂှ် သွက်ဂွံကၟောန်ပခိုၚ် JMC ၊ တုဲတှေ် ညးစၞး နူဍုၚ်သၟာၚ်လေဝ် ညံၚ်ဂွံပါလုပ်ကီုတံဂှ် ဒးသဳကၠဳဏီဏောၚ် ဥူထောန်ဇြဝ် နူဂကောံ DPN ဟီုရ။

အလဵုအသဳ ကဵု ဒပ်ပၞာန် ညံၚ်ဂွံစလလောၚ် ပရေၚ်ဒေံါပန်ပှော် အလုံမွဲဍုၚ်၊ ဒုၚ်သဇိုၚ်ကဵုစိုတ်ဓါတ်ပေန်လုၚ်တုဲ သွက်ဂွံဒက်ပ္တန် ကၟိန်ဍုၚ်ဖေဝ်ဒရေဝ်၊ ညးစၞး အလဵုအသဳ, ကၠတ်ထဝ်, ဒပ်ပၞာန် ဂှ် သ္ပမွဲသွာၚ်၊ ညးစၞးဂကောံရပ်လွဟ် ကောန်ဍုၚ်အရၚ်တံဂှ် သ္ပမွဲသွာၚ်၊ ညးစၞးဗော်ပရေၚ်ဍုၚ်ကွာန်ဂလိုၚ်ဂှ် သ္ပမွဲသွာၚ်တုဲ ပိသွာၚ်ဏံ သွက်ဂွံသဳကၠဳတက်ကျာ၊ စေဝ်ပၞောန်စပ်ကဵုပရေၚ်ဒေံါပန်ပှော်၊ ဒ္ဂေတ်ဝတ်ဆေၚ်ကဵုပရေၚ်ဒပ်၊ ဂၠံၚ်စၞောန် သွက်ကမၠောန်မၚ်ရံၚ်ပရေၚ်ဒေံါပန်ပှော်၊ ပ္ညဳညးသ္ကံကၠာတုဲ သွက်ဂွံဖျေံဒၞါဲဝါဲဒပ်၊ ပ္ဍဲကမ္မတဳပံၚ်တောဲ မၚ်ရံၚ်ပရေၚ်ဒေံါပန်ပှော်ဂှ် ညးစၞးနူကဵုဍုၚ်မ္ၚးတေံ ညံၚ်ဂွံပါကီု နတၚ်မပ္တံသာ်ဏံ ပါလုပ် ပ္ဍဲဒ္စိတ်တၚ်ဂှ်ရ။

တၚ်ဟီုလဝ်ဗွဲလ္တူဏံ အလဵုအသဳ ကဵု UNFC တံ နကဵုမူ တုပ်စိုတ်တုဲဣရ ဟီုဂးကၠုၚ်လဝ်ကီုလေဝ် အခါကၠောန်ပေါဲသဳကၠဳ အလန်ဆဋ္ဌမဏံ ဒးက္လေၚ်သဳကၠဳကၠုၚ် စနူတမ် မွဲတၚ်တုဲ မွဲတၚ်ပၠန် ဂွံတီကေတ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.