ပ္ဍဲတွဵုရးဍုၚ်မန် ပၞောဝ်ကဵုဍာ်သုၚ် မသွံတရးဒၟံၚ်တံ ညံၚ်ဟဂွံသွံတရး ဍာ်သုၚ် ၃ ဂကူဂှ် နူဌာနဆေၚ်စပ် တာဒၞါဗဒေံါလဝ်ဗွဲယာယဳရောၚ် ဂွံတီလဝ် နူဌာနက္ဍိုက်ပ် ကောပ်ကာဲစၞစသုၚ်ကေုာံဂဥုဲဇဗ တွဵုရးဍုၚ်မန်ရ။
ကမၠောန်ကၠောန်ပ္တိတ်ဍာ်သုၚ် “မိုးမြၚ့်သာ” နူဍုၚ်ကျာ်မြဟ်၊ “ဝၚ်းလတ်” နူတ္ကံခၟိုၚ်၊ “ချယ်ရီသန်႔” နူဍုၚ်မတ်မလီုတံ ဂရၚ်ပ္တီအာတ်မိက်လဝ် သွက်ဂွံဆက်အယုက်လာၚ်ဇြေန်ကမၠောန်တုဲ နူဌာနဆေၚ်စပ်တံ ဟွံကဵုသွံရာန် ဒးဒုၚ်ဗဒေံါလဝ်ဗွဲယာယဳ ဂးရ။
ပ္ဍဲကမၠောန်ဍာ်သုၚ်(ချယ်ရီသန်႔) ကၠောန်ပ္တိတ်ဒၟံၚ် ဗူ ၃ အဇာ (1 Liter, 20 Liter ဗူဗုဗု, 20 Liter ဗူကေဝ်ဝ်) တုဲ 20 Liter ဗူကေဝ်ဝ်ဂှ် အတိုၚ်စွံလဝ်ဗ္ၜတ် အဏုဇဳဝ ဂှ် ဟိုတ်နူဟွံစိုပ်အဆံၚ် ဟွံအးၚးဂှ်ရ ပပ္တံနူ ဂိတုအဝ်ဂါတ် ၈ တုဲ ညံၚ်ဟဂွံဆက်သွံတရးပ္ဍဲဗွဝ်ဖျာဂှ် နူကမ္မတဳသ္ကိုပ်သ္က ကောပ်ကာဲ စၞစသုၚ်ကေုာံဂဥုဲဇဗ ပွိုၚ်ဍုၚ် ကၟာတ်လဝ်ရောၚ် ဂွံတီကေတ် နူတၠကမၠောန်ဍာ်သွုၚ် (ချယ်ရဳသန်႔) ရ။
စပ်ကဵုပရေၚ်ကမၠောန်ဍာ်သုၚ်ဏံတုဲ ပ္ဍဲရုၚ်စက်တံ ဗီုလဵုပြုပြေၚ်ထိၚ်ဒဝ်လဝ်ကပေါတ်စက်၊ အကာဲအရာ ကၠောန်လဝ်ဗ္ဒမ်နွံဗီုလဵု၊ စပ်ကဵုကမၠောန်ဍာ်သုၚ်တုဲ တၚ်ယုတ်ဒေက် တၚ်ဒးဗပေၚ် နွံဗီုလဵု၊ ပ္ဍဲဍာ်သုၚ်တံဂှ် ဍေံဂပ်ဝ်ဒၟံၚ်ကဵု GMP (Good Manufacturing Practice) ကီုဟာ၊ ကပေါတ်အဏုဇဳဝ ပါလုပ်ဂလိုၚ်လဵု၊ Coliform စၟစၟန် ညံၚ်ပ္ဍဲအသုဘမၞိဟ်ဂှ် နွံ ဟွံမွဲ၊ ကပေါတ်ဓာတု နွံ ဟွံမွဲတံဂှ် နူကဵုဌာနက္ဍိုက်ပ် ကောပ်ကာဲစၞစသုၚ်ကေုာံဂဥုဲဇဗတွဵုရး ဟွံရုဲအခိၚ် ကၠောန်အာအစဳဇန် လုပ်စၟဳစၟတ် လွာဲလွာဲဂှ်ဏောၚ် ဂးရ။
အပ္ဍဲတွဵုရးဍုၚ်မန် ကမၠောန်ဍာ်သုၚ် ဂွံလဝ် လာၚ်ဇြေန် FDA တုဲုတုဲကဵု ကမၠောန်ဍာ်သုၚ် အဃောအာတ်လဝ် လာၚ်ဇြေန်ဂှ် နွံ ၅၉ ရုၚ်ရောၚ် ဂွံတီကေတ် နူစရၚ် ဌာနက္ဍိုက်ပ်စၞစသုၚ် ကေုာံဂဥုဲဇဗ တွဵုရးဍုၚ်မန်ရ။
ဌာနက္ဍိုက်ပ်စၞစသုၚ်ကေုာံဂဥုဲဇဗ တွဵုရးဍုၚ်မန်ဏံဂှ် စပံက်လဝ် နူသၞာံ ၂၀၁၄ တေံရ၊ ပ္ဍဲသၞာံ ၂၀၁၅ ဂှ် သ္ပဂရုကဵုကမၠောန်ဍာ်သုၚ် စၟဳစၟတ်ကၠုၚ်ဗွဲတၟေၚ်ကီုရ၊ ပ္ဍဲသၞာံ ၂၀၁၆ ဂှ် လုပ်စၟဳစၟတ် ဖျာစၞ ကွာၚ်ၜဲယိုဟ်ၜန် ပ္ဍဲဘာဗ္တောန်လိက် သီုကဵုလုပ်စၟဳစၟတ် မြေက်ဍိုတ်တ်ဟွံထေက်ကဵုစ မသွံဒၟံၚ်ပ္ဍဲဆေၚ်ဖျာတံကီုရဂှ်လေဝ် ဂွံတီကေတ် နူ FDA တွဵုရးကီုရ။
ဍာ်သုၚ် ဟွံလုပ်ကဵုသၞောဝ် ပ္ဍဲဗွဝ်ဖျာတံကီု၊ လိက်ထံက်ဂလာန် အခေါၚ်ကၠောန်ပ္တိတ်ဟွံမွဲ မွဲသာ် ကၠောန်ပ္တိတ်ဒၟံၚ် စၞစသုၚ်တံဂှ်ကီု၊ ကမၠောန်ကၟာတ်ဗဒေံါလဝ် ဗွဲယာယဳ တံဂှ်ကီု ယဝ်ကၠောန်ပ္တိတ် သွံရာန်ဒၟံၚ်ဏီမ္ဂး အတိုၚ်လၟေၚ်ဥပဒေဟေၚ် ပ္တိုန်အမှု ကေတ်အာအရေဝ်ဏောၚ် နူ FDA လလောၚ်လဝ်ရ။