ထ္ပက် NCA တုဲ အပ္ဍဲပွိုၚ် ၂ သၞာံဏံ ဒဒှ်ပရေၚ်ၜိုဟ်လလမ်ဂှ် ထုဲဂၠိုၚ်တိုန်ခ္ဍၚ် သာၚ်ကျဝ်ညောအ်ဂး

ထ္ပက်စၟတ်တဲ NCA လိက်ကသုက်တုပ်စိုတ်ဒေံါပန်ပှော် အလုံမွဲဍုၚ်တုဲ အပ္ဍဲကာလပွိုၚ်ၜါသၞာံဏံ ဒဒှ်ပရေၚ်ၜိုဟ်လလမ်ဂှ် ထုဲကၞာန်ဂၠိုၚ်တိုန်ခ္ဍၚ်ဏောၚ် သာၚ်ကျဝ်ညောအ် ညးလုပ်အဝေါၚ် ဂကောံညးအုပ်ကာ UPDJC ကမ္မတဳပံၚ်တောဲသဳကၠဳပရေၚ်ၜိုဟ်လလမ်ကၟိန်ဍုၚ် ဂးရ။

“ထ္ပက်စၟတ်တဲ NCA တုဲ ၜိုတ်၂ သၞာံဏံ ယဝ်က္လေၚ်ရံၚ်အာတှေ် ကမၠောန်ပရေၚ်ၜိုဟ်လလမ်ပိုဲဂှ် ထုဲဂၠိုၚ်ကၠုၚ်ခ္ဍၚ်ဏောၚ် ဂွံညာတ်ကေတ်” သာ်ဝွံ သာၚ်ကျဝ်ညောအ် ဂးရ။

စပ်ကဵုပရေၚ်ဖေါအ်ဗြေဝ် ကဏ္ဍမဳဒဳယာ အပ္ဍဲကာလပရေၚ်ၜိုဟ်လလမ်ဏံဂှ်တုဲ ပ္ဍဲဂိတုအဝ်ဂါတ် ၂၉ ကၠောန်ကၠုၚ်လဝ်ပေါဲသဳကၠဳ ပ္ဍဲ (ချက်ထရီယံဟိုတယ်) ဍုၚ်လ္ဂုၚ်ဂှ် သာၚ်ကျဝ်ညောအ်လေဝ် တိုန်စိုပ်ကီုတုဲ အခါရအ္စာပရိုၚ်တံ သၟာန်စပ်ကဵုပရေၚ် NCA ဂှ် ညးတေံသောၚ်ဏာ အတိုၚ်ဗွဲလ္တူတေံရ။

ဂကောံရပ်လွဟ် ကောန်ဍုၚ်အရၚ် KNU , DKBA , KNU/KNLA/PC , CNF , PNLO , ABSDF , ALP , RCSS တံ ထ္ပက်ကၠုၚ်လဝ် စၟတ်တဲလိက်ကသုက် NCA ကေုာံအလဵုအသဳ သမ္မတတိၚ်သိၚ်ဂှ် ဂိတုအံက်တဝ်ဗာ ၁၅ ဏံတှေ် ပေၚ် ၂ သၞာံရဏောၚ်။

“ပ္ဍဲအခိၚ်ဂွံကၠုၚ်ပွိုၚ် ၂ သၞာံဏံ မ္ၚးနူဂကောံ ဒ္စါံ ဂကောံထ္ပက်လဝ်စၟတ်တဲ NCA ဗွဲမူလတေံဂှ်တုဲ ဂကောံထပ်ထ္ပက်တၟိတၟိလေဝ် ဟွံမွဲကၠုၚ်ပုဟ်။ ပ္ဍဲအခိၚ်ကာလ သဳကၠဳဒၟံၚ်ကဵု UNFC ဂှ် ဒှ်ညံၚ်အကာဲအရာခိုဟ် ဟီုမံၚ်ကီုလေဝ် ခိုဟ်တိုန်ဍာံဍာံဟွံသေၚ်ပုဟ်။ အေ ဂွံညာတ်မံၚ် အကာဲအရာဗီုဏံဏောၚ်တှေ် စနူအခိၚ်ပေၚ် ၂ သၞာံဏံတုဲ ဂတနူဏံ ဗီုချပ် ဗီုရပ်စပ် လ္တူဂကောံရပ်လွဟ် ကောန်ဍုၚ်အရၚ်ဂှ် ဟွံဒှ်မွဲဗီု မွဲအခိုက်တုဲ ယဝ်ဒှ်ကၠုၚ်ဗီုပြၚ် ပသောၚ်ပြသၞာဟွံမာန်ဏောၚ်မ္ဂး ကမၠောန်ပရေၚ်ၜိုဟ်လလမ်ပိုဲဂှ် ဟွံလောဲသွာရ” သာ်ဏံ သာၚ်ကျဝ်ညောအ် ဂးရ။

သွက်ဂွံထ္ပက်စၟတ်တဲ NCA ကေုာံဂကောံရပ်လွဟ်ကောန်ဍုၚ်အရၚ်မသှေ်မံၚ်တံဂှ် ပြဟ်ဟ်ဏံ နကဵုအလဵုအသဳ ၜိုန်ပ္ညဳမံၚ် ကေုာံ ဂကောံ UNFC ကီုလေဝ် သွက်ဂွံသဳကၠဳကဵု ဂကောံသၟဝ်ကျာ ဟွံကေတ်ဂၠံၚ် NCA ဂှ်မ္ဂး အကာဲအရာခက်မံၚ်ရ။

ဥူကျံက်ကဝ်အာန် ညးအုပ်ကာ (FPNCC ကမ္မတဳသဳကၠဳပရေၚ်ဍုၚ်ကွာန်ကၟိန်ဍုၚ်) ဒက်လဝ်နကဵု မဟာမိတ်သၟဝ်ကျာ ရ ဂကောံဂှ်လေဝ် သၞောတ်ဖျေံသ္ဂုတ်သွာတ်မာဲ အတိုၚ်ပ္ဍဲ“မူပၞောန်သဳကၠဳပရေၚ်ဍုၚ်ကွာန်” NCA ဂှ်မ္ဂး ဒှ်ဒၞက် သွက်ကောန်ဍုၚ်အရၚ်တံဏောၚ် သာ်ဝွံ ဓမံက်လဝ် ပ္ဍဲပရိုၚ်ဨရာဝတဳ စၟတ်တ္ၚဲ အဝ်ဂါတ် ၂၉ နကဵုက္ဍိုပ်လိက် “FPNCC ကော်ဘိက် UNFC သွက်ဂွံပံၚ်ကောံ” ဂှ် ဂွံဆဵုကေတ်ရ။

နကဵု UNFC ညာတ်ကေတ်တၚ်ဍိုန်လျ ဂၠံၚ် NCA အလဵုအသဳမ္ဂး NCA ဏံ ဂၠံၚ်တရဴ ဓမံက်ရုပ်ရဴပရေၚ်ၜိုတ်လလမ် သွက်ကောန်ဍုၚ်အရၚ် ပိုဲဟွံသေၚ်ရောၚ်ဂှ် ဒးကၠိုဟ်စိုတ် ထေက်ရဒှ်တုဲ NCA ဏံ ဖန်ကဵုပရေၚ်ၜိုဟ်လလမ်မာန်ဏောၚ်ဂှ် စၟဳဟွံထေက်ရ သာ်ဝွံ ဥူကျံက်ကဝ်အာန် ဂးရ။

လၟုဟ်ဏံ နူအဝ်ဂါတ် ၂၈ ဒဵုကဵု ၃၀ ဂှ် လ္ပာ်အလဵုအသဳ ကၠောန်မံၚ်ဝိုၚ်သဳကၠဳ သ္ၚဳဂၠိပ် သီုကဵုပဠေဝ်ပဠေတ်စ အရာဆေၚ်ကဵု သ္ဘၚ်သဳကၠဳပရေၚ်ၜိုဟ်လလမ်ဍုၚ် ကောံဓရီုပေန်လုၚ် ၂၁ ဗွဝ်ကၠံ ဗၞတ် ၃ တ္ၚဲ ပ္ဍဲ NRPC ဌာနဗဟဵုပရေၚ်သၟဟ်သၟန်ကောန်ဂကူကေုာံပရေၚ်ၜိုဟ်လလမ်ရောၚ် ဂွံတီကေတ်ရ။