ပ္ဍဲဂိတုသေပ်တေမ်ဗာ ၅ ဏံ ပ္ဍဲအရာပ်ကုန်ဓမၚ် (ဓမၚ်းကုန်းရပ်ကွက်) လုပ်အဝေါၚ် ဂအုံကွာန်အစေန် ပွိုၚ်ဍုၚ်ရေဝ်ဂှ် ကောန်ဂၠုၚ်မွဲစွံတံ ဒှ်ကယျာန်ဓဝါတ် စိုပ်အာအဆံၚ်ဂစိုတ်မၞိဟ်တုဲ ရပ်ဏာကောန်ဒုဟ်ဂှ်ဣရ သာ်ဝွံ သ္ကိုပ်ဗ္ဒိုပ်ဗၠာဲသၟိၚ်ၝောံဍုၚ် ဍုၚ်ရေဝ် ဒုသ္ကိုပ်ဗၠာဲသၟိၚ် သဵုမန် ဂးရ။
အ္စာစက်ဂၠုၚ် ကေုာံကောန်ဂၠုၚ်တံ အဃောကၠောန်မံၚ်ကမၠောန် ပ္ဍဲလ္တူဂၠုၚ်စက်ရပ်က ဒဝ်မဳၚေဝ် တၠကမၠောန်ၜဳဂှ် ဒၟါနူကိစ္စဗၠအ်ဇာ အရေဝ်ဂၠိုၚ်ညးသ္ကံတုဲ အယျၚ်ထောန်အေ ၜုၚ်စုတ်က္ဍိုပ် မိုၚ်သဵု နကဵုလေံဍံက်ဂြၚ်ဗ္ၜေံဂှ် မိုၚ်သဵုဒတုံစှေ်ဍာ်တုဲ က္လေၚ်ဂၠာဲဂွံဇွရ။
“ရံၚ်ကေတ်သဘာဝကမၠောန်ဍေံတံတှေ် ကြာန်ဒမာန်လေဝ်ပါမံၚ်ဏောၚ်၊ ကောန်မွဲဒေသလေဝ် ဟွံသေၚ်ပၠန်၊ ကၠုၚ်နူဇဳဇဳဒိုဟ်ဏောၚ်တှေ် ညးမွဲကဵုညးမွဲ ဂွံဆာန်ကၟိန် ဂွံနွံကဵုသံယောဇိုန်ဂှ် ဟွံဒှ်ပုဟ်၊ ဗီုပြၚ်စိုပ်ကၠုၚ်ဂှ်လေဝ် စရိုတ်ဗီုပြၚ်နာနာသာ်ဏောၚ်၊ ဒဒှ်ဍေံတံ နွံကၠုၚ်ဗီုဏံဏောၚ်တှေ် နကဵုနဲ မွဲမွဲနဲ သောၚ်က္လးပရေပရံၚ်မာန်မှ ဂပ်ဝ်ဏောၚ် ညာတ်ကေတ်ဗီုဂှ်၊ အဓိကဂှ် ညံၚ်ဂွံနွံကဵု ပရေၚ်အုပ်လ္ဒမ်သၞောဝ်ပအ်ၝာဲ” သာ်ဝွံ ဥူအံၚ်နာၚ်ဝေန် ညးအုပ်ကာ ဂကောံရေၚ်တၠုၚ်ဖဵုပရေၚ်မၞိဟ် ပွိုၚ်ဍုၚ်ရေဝ် ဟီုရ။
ပ္ဍဲအမှုတက်လဝ် နကဵုလေံဍံက်ဂြၚ်ဗ္ၜေံဏံဂှ် သၠေဟ်လဝ် မိုၚ်ထောန်အေ အယုက် ၃၆ ကၠုၚ်နူဍုၚ်မျံက်ဥူ (မြောက်ဦး) တွဵုရးရခေၚ်တေံတုဲ နူရုၚ်ဗၠာဲသၟိၚ်ၝောံဍုၚ် ဍုၚ်ရေဝ် ရပ်စပ်ကေတ်အရေဝ် နကဵု “မမစ(ရေး) (ပ) ၂၁၆/၂၀၁၇၊ ရာဇသတ်ကြီး ပုဒ်မ- ၃၀၂” ရ။
“အမှုမၞိဟ်ချိုတ် အမှုဂစိုတ်မၞိဟ် ဒှ်မံၚ်ပ္ဍဲပွိုၚ်ဍုၚ်ရေဝ်ဂှ် ဗွဲမဂၠိုၚ်တှေ် ပ္ဍဲကျာဒါန်အၜဝ် ကဵု လ္ပာ်ဂအုံကွာန် အစေန် ဒၞါဲသၟာကမၠောန်ဆုဲပြံၚ်တံ နွံဂၠိုၚ်ဂှ်ရ က္တဵုဒှ်ဂၠိုၚ်၊ ယဝ်ဒးဟီုတှေ် ၜိုတ် ၆၀% ပြၚ်ဂှ် ဒှ်လ္ပာ်ဂှ်သၟးရ” သာ်ဏံ ဥူအံၚ်နာၚ်ဝေန် ဂးရ။
သၞာံ ၂၀၁၆ တုဲကၠုၚ်ဏံ ပ္ဍဲပွိုၚ်ဍုၚ်ရေဝ် အမှုမၞိဟ်ချိုတ် အမှုဂစိုတ်မၞိဟ် နွံ ၆၉ အမှု၊ ပ္ဍဲအမှုမၞိဟ်ချိုတ် နွံ ၅၈ အမှုဂှ် က္တဵုဒှ်ပ္ဍဲၜဳ နွံ ၄၅ အမှု၊ ပ္ဍဲအမှုဂစိုတ်မၞိဟ် နွံ ၁၁ အမှုဂှ် က္တဵုဒှ်ပ္ဍဲၜဳ နွံ ၆ အမှုဂှ်ရ အခိၚ်ကသီုအိုတ် ကၠောံမုဟ်ကျာတေံမ္ဂး သွက်ဂွံကၠောန် ပေါဲဟီုတွံကဵုပညာ ကုညးတၠကမၠောန်ၜဳ ကေုာံသၟာကမၠောန်ၜဳတံနွံမံၚ်ရောၚ် ဂွံတီကေတ် နူရုၚ်သ္ကိုပ်ဒပ်ဗၠာဲသၟိၚ် ပွိုၚ်ဍုၚ်ရေဝ်ရ။