ကမ္မယှေန်ပရေၚ်ၜိုဟ်လလမ်အလဵုအသဳ PC ကဵု ဂကောံညးစၞးသဳကၠဳပရေၚ်ဍုၚ်ကွာန် DPN နူကံၚ်ဇြဳဖေဝ် ဒရေဝ်ကောန်ဂကူကောန်ဍုၚ်ညဳသၟဟ် UNFC တံ ပ္ဍဲဂိတုအံက်တဝ်ဗာ (၂၃)၊ တ္ၚဲစန်ဏံမ္ဂး ဆဵုဂဗသဳကၠဳညးသ္ကံ နဗဗွဲဓဝ် အလန်သတ္တမ ပ္ဍဲဍုၚ်လ္ဂုၚ်ရောၚ် ဂွံတီကေတ် နူညးမၞုံအခေါၚ်ဟီုဂး ဒပ်ပံၚ်ကောံ UNFC နာဲအံၚ်မ္ၚဵု ဟီုထ္ၜးလဝ်ရ။
နာဲအံၚ်မ္ၚဵုဂှ် “ပ္ဍဲကဵုပေဲါသဳကၠဳ မရနုက်ကဵု (၆) ဝါ တုဲကၠုၚ်တေံဂှ် နူတၚ် (၁) ဒဵုကဵု တၚ် (၄) ဂှ် သီုၜါလ္ပာ် တုပ်လဝ်စိုတ်ကီုရ။ တၚ်သှေ်မံၚ် နူ (၅) ဒဵုကဵု (၈) ဂှ် ဆက်တုဲသဳကၠဳပၠန်ဏောၚ်။ က္ဍိုပ်သ္ကိုပ် DPN ပိုဲ ခူဥုယေဝ်ကဵု ကောန်ဂကောံသီုဖအိုတ် တိုန်စိုပ်ဏောၚ်” သာ်ဝွံ ညးဟီုကဵု ဌာန်ပရိုၚ်မန်ရ။
“နူကဵုတၚ် (၁) ဒဵုကဵု (၄) ဂှ်တှေ် နူကဵုလ္ပာ်ကမ္မယှေန်ပရေၚ်ၜိုဟ်လလမ်တံ သွက်ဂွံကလေၚ်သ္ၚဳဂၠိပ်ဂှ် ဟီုနၚ်ဗွဲပလးနွံကီုရ။ အေ တၚ်တုပ်စိုတ် အလန်ဆဌမတေံဂှ် ဟိုတ်နူပ္တိုန်ထ္ၜးလဝ်ကဵု က္ဍိုပ်သ္ကိုပ်ဂကောံ မဆေၚ်စပ်တံ တုဲဒှ်တုဲ ပိုဲတံ ဟွံမိက်ကလေၚ်သဳကၠဳရပုဟ်။ တၚ်မသှေ်မံၚ်တံဂှ်ဟေၚ် ညံၚ်ဂွံဂွံတၚ်တုပ်စိုတ်ပြဟ်ဟ်ဂှ် ဆက်တုဲသွက်ဂွံသဳကၠဳအာဏောၚ်” သာ်ဝွံ နာဲအံၚ်မ္ၚဵု ဟီုရ။
ပ္ဍဲကဵုလက်ထက် အလဵုအသဳအေန်အေဝ်ဒဳဏံဝွံ အကြာဂကောံကမ္မယှေန်ပရေၚ်ၜိုဟ်လလမ်ကဵု UNFC တံ သဳကၠဳကၠုၚ်လလအ်အခိၚ် (၁၆) ဂိတုဂှ်မ္ဂး တၚ်ပ္တိုန်ထ္ၜး UNFC တံဂှ် ၜိုတ်ကဝက်ဟေၚ် ဂွံလဝ်တၚ်တုပ်စိုတ်ကီုရ။ နကဵု UNFC သွက်ဂွံကွာ်အာ လ္တူဂၠံၚ်တရဴ NCA ကလိတ်တ်ကလောတ်တ်မာန်ကီု တၚ်မသှေ်မံၚ်ဂမၠိုၚ်တံ ညံၚ်ဂွံဂွံတၚ်တုပ်စိုတ်မာန်ဂှ် နူကဵုအလဵုအသဳ၊ ကၠတ်ထဝ်၊ ဒပ်ပၞာန်တံ မိက်ဂွံကဵုပံက်ဂၠံၚ်ဍာန်ကီု ညးဆက်ဟီုလဝ်ရ။
တၚ်တုပ်စိုတ် မကလိဂွံလဝ် နူကဵုပေဲါသဳအလန်ဆဌမ မတုဲကၠုၚ်တေံဂှ် သွက်ဂွံလလောၚ်ပ္တိတ် ဒေံါပန်ပှော်အလုံဍုၚ်ကီု၊ သွက်ဂွံဒက်ပ္တန် ကၟိန်ဍုၚ်ပံၚ်ကောံဒဳမဝ်ကရေဇြဳဖေဝ်ဒရေဝ်ကီု၊ ပ္ဍဲကဵုပေဲါသဳကၠဳပရေၚ်ဍုၚ်ကွာန်မ္ဂး ညံၚ်ဂွံဒှ် (၃) သွာၚ်/က္ဍိုပ်ကီု ကေုာံ တၚ်သ္ဂုတ်သွာတ်မံက်တိတ်ကၠုၚ် နူကဵုပေဲါကောံဓရီုပေန်လုၚ် (၂၁) ဗွဝ်ကၠံတံဂှ် သွက်ဂွံပလေဝ်ပလေတ် စၞောန်ထ္ၜးစဳပျးအာ ပ္ဍဲသဇိုၚ်သၞောဝ်ဒက်ပ္တန်ဍုၚ်ကီု မဒှ်ရ။
ဥုအံၚ်သဵု ဂကောံကမ္မယှေန်ပရေၚ်ၜိုဟ်လလမ်ဂှ် “လ္ပာ်အလဵုအသဳတံဂှ် ဗီုလဵုဒှ်ဒှ် ညးတံပ္တိုန်ထ္ၜးလဝ် သီု (၈) တၚ်ဂှ် ဒုၚ်သဇိုၚ်သီုၜါလ္ပာ်တှေ် အတိုၚ်ဂၠံၚ်တရဴ NCA အာဏောၚ်ပအ်ဏး။ အာအတိုၚ်ဂၠံၚ်တရဴ NCA ဏောၚ်ဟီုတှေ် ဂကောံသီုဖအိုတ်တံ ဒုၚ်လဝ်တဲတုဲမံၚ်ရ။ ဆဂး ညးတံပ္တိုန်ထ္ၜးဂှ်လေဝ် ပိုဲတံ မုဟွံဒှ်ဟလဵုပုဟ်။ သီုၜါလ္ပာ်ပ္ညဳတုဲတှေ် ပိုဲတံ ဣဏံသီုဖအိုတ်ဂှ် လ္ၚဵု ဠဟွံပြေပြံၚ်လေဝ် နွံတှေ် နွံဏောၚ်။ လ္တူဟီုမံၚ်လ္ပာ်မ္ၚးဂှ် လုပ်ပ္ဍဲတုဲ ဘိုၚ်ကၠောန်ညးသ္ကံဂှ်တှေ် ပဵုစိုပ်တရဴဏောၚ်ဂှ်လေဝ် ဟိုတ်နူပိုဲပ္ညဳညးသ္ကံတုဲ ဣဏံဂှ်လေဝ် သီုၜါလ္ပာ် ဒုၚ်တဲအိုတ်ရ။ ဟိုတ်ဂှ်ရ ပိုဲတံ အံၚ်ဇၞးဏောၚ်ဂှ်လေဝ် ပတှေ်ကေတ်ရ” သာ်ဝွံ ညးဟီုရ။
ပ္ဍဲလက်ထက်အလဵုအသဳအေန်အေဝ်ဒဳဏံ သဳကၠဳမံၚ် အခိၚ်လလအ် ပွိုၚ် (၁၆) ဂိတုဂှ်ဝွံ ဒပ်ပၞာန်တံ ထ္ပက်မံၚ်ပၞာန် ဒေသသၟဝ်ကျာ ကၟိန်ဍုၚ်ဗၟာဂှ်ကီု၊ အပ္ဍဲတိဍာ်ဒေသ ဗော်ဍုၚ်မန်တၟိဂှ် ဟိုတ်နူဒပ်ပၞာန်တံ ချဳဓရာၚ်မံၚ်ဂှ်ရ ကတဵုဒှ်တိုန် ပရေၚ်ကြံၚ်မ္ၚိုဟ်တုဲ ပေဲါသဳကၠဳခက်ခိုအ်ဆိုအ်ဗကၠုၚ်နွံကီု ဂွံဆဵုကေတ်ရ။
အပ္ဍဲကဵုကာလသဳကၠဳမံၚ် ပရေၚ်ၜိုဟ်လလမ်ဂှ်ဝွံ ဂကောံဗၠးၜးကချေၚ် KIO၊ ဗော်တောတက်ရးသေံ SSPP၊ ဂအုပ်ဂကောံကောန်ဂကူပအိုဝ် WNO တံ နုက်တိတ်နူဂကောံ UNFC တုဲ အာပံၚ်ကောံကဵု ဂကောံမဟာ မိတ်သ္ကုတ်သၟဝ်ကျာ ဗော်ညဳသၟဟ်ရးဝ UWSP ဟွံဒုၚ်တဲလိက်ကသုက် NCA ဂှ်ရ။