Categories
ဂလာန်ညးဒါန်လိက် ပရိုၚ်

ဗော်ပရေၚ်ဍုၚ်ကွာန်ပၠတရဴ မဟာဇန်တံ ပံၚ်ကောံ ကော်ကောံဓရီုဇၞော်ပရေၚ်ဂကူမန်ထေက်

သွက်ဂွံသောၚ်က္လးအာ ပြသၞာ အကြာကောန်ဂကူမန်ကီု အကြာဗော်ပရေၚ်ဍုၚ်ကွာန်တံကီု၊ သွက်ဂွံလးအာ မဟာဗျူဟာ သွက်ပေဲါရုဲမာဲ (၂၀၂၀) တေံတုဲ ဗီုကေၚ်ကၠောန်လဝ် ကောံဓရီုဇၞော်ပရေၚ်ဂကူမန် သၞာံ (၂၀၁၃) တေံရ ဗော်ပရေၚ်ဍုၚ်ကွာန် (အပ္ဍဲဍုၚ်)၊ သၟာပရေၚ်ဍုၚ်ကွာန် (အပ္ဍဲဍုၚ်) ဏံ သ္ပသ္ကိုပ်သ္က ပၠတရဴတုဲ ကသေအ်ကၟဝ် ဂကောံမဟာဇန်ဂကူမန်တံ ကၠောန်ဗဒှ် ကောံဓရီုဇၞော်ပရေၚ်ဂကူမန် သၞာံ (၂၀၁၈) မွဲထေက်ရောၚ် ကဵုဏာကသပ်ရ။

အတိုၚ် ဂကောံပညဳပညပ် ဗော်ပရေၚ်ဍုၚ်ကွာန်မန်တံ ညာတ်ကေတ် သွက်ဂွံကၠောန်ဗဒှ်ကောံဓရီုဇၞော်ပရေၚ်ဂကူမန် ပ္ဍဲကဵုသၞာံ (၂၀၁၈) ဏံဂှ် ဒှ်လညာတ်ရ။ ဆဂး ဂကောံပညဳပညပ် သ္ပသ္ကိုပ်သ္ကတုဲ ကၠောန်ကေတ်တ်ဂှ် ဟွံစှေ်ဗီု ဟွံစှေ်သၞောတ်ရ။ နကဵု ဂကောံပညဳပညပ်ထေက်ကဵု ဒးပညဳပညပ်ကဵု ဗော်ပရေၚ်ဍုၚ်ကွာန်တံ သွက်ဂွံပါလုပ် ဗိုၚ်က္ဍိုက်ပ် ကၠောန်ဗဒှ် ကောံဓရီုဇၞော်ပရေၚ်ဂကူမန်ရ။ ဟိုတ်နူတက်ကျာညးသကအ် ဟွံဂွံတုဲ ဟွံကော်ရဲတံဏံရ ကၠောန်ကေတ်တ်ရ လအ်စိုတ် သာ်ဏံမ္ဂး အလုံပရေၚ်ဂကူမန်ဂှ် ဍေံဟွံဒှ်ကၠုၚ်ရောၚ်။

ကောံဓရီုဇၞော် ပရေၚ်ကောန်ဂကူမန် ၂၀၁၃(Facebook)
အကာဲအရာကောန်ဂကူမန်ပိုဲတံလေဝ် အဃော ပညဳပညပ်မံၚ် ပရေၚ်ညဳသၟဟ်ပရေၚ်ဂကူဂှ် ထကးတိတ်မံၚ် မွဲဂကောံတုဲမွဲဂကောံ၊ နူကဵုဗော်ပရေၚ်ဍုၚ်ကွာန်တံပၠန်လေဝ် ကောန်ဗော်ညးတံ နုက်တိတ်အာ နကဵုပူဂဵုမွဲတုဲမွဲ၊ နကဵုဗီုပြၚ်ဂကောံတံလေဝ် နွံရောၚ်။ ပ္ဍဲကဵုအကာဲအရာ ထကးပြးမံၚ် သာ်ဏံဂှ် ဟွံက္လေၚ်သီဗ္ၜောဝ်မွဲသာ် ယဝ်ရ ကၠောန်ကောံဓရီုဇၞော်ဟီုတှေ် ဂုဏ်ဖဵုဍေံ အောန်ရောၚ် ညာတ်ကေတ်ရ။

လၟုဟ် အတိုၚ်ပရို်ၚ်တိတ်မံၚ်မ္ဂး ဂကောံပညဳပညပ် ဗော်ပရေၚ်ဍုၚ်ကွာန်ဂှ် သ္ပတိုၚ်တုဲ သွက်ဂွံကၠောန်ဗဒှ်အာ ကောံဓရီုဇၞော်ရောၚ် မိၚ်မံၚ်ရ။ ယဝ်ရ ဂကောံပညဳပညပ်ဏံဟေၚ် ကၠောန်မ္ဂး ဟွံလုပ်ဗဗွဲဓရ်ရောၚ်။ ဂကောံဝွံ ဒက်ပတန်လဝ် နူကဵု ကောံဓရီုပရေၚ်ဂကူမန် သၞာံ (၂၀၁၆) နူကဵုတိဍာ် ဗော်ဍုၚ်မန်တၟိတေံလေဝ် ဟွံသေၚ်ရ။ လၟုဟ်မ္ဂး ဗော်ဍုၚ်မန်တၟိဂှ် နုက်တိတ်အာ နူကဵုဂကောံဏံတုဲဒှ်တုဲ အသိၚ်အဝဵု သွက်ဂွံသီဂွံဗ္ၜောဝ်အာ ဗော်နာနာ ဂကောံနာနာတံဂှ် ဟွံမွဲရောၚ်။ ဟီုတဝ်ဝ်မ္ဂး ဂကောံပညဳပညပ်ဝွံ သ္ပစၞးအုပ်ဓလီု အလုံဂကူ ဟွံမာန်ဏီရ။

တ္ၚဲဏံ ရံၚ်အာကဵု ဂကောံ ဗော် ပူဂဵု ညးမကၠောန်ၜိုတ်မံၚ် ပရေၚ်ဂကူမ္ဂး ဗော်ပရေၚ်ဍုၚ်ကွာန်တံ ပါလုပ်ရ။ လတုဲ ဂကောံမဟာဇန် ဗွဲမဂၠိုၚ် လုပ်ပေဲါဗတိုက် အခေါၚ်အရာဂကူ နကဵုဗီုပြၚ် လိက်ပတ်/ယေန်သၞာၚ်၊ ပရေၚ်ပညာ၊ ပရေၚ်အခေါၚ်အရာမၞိဟ်၊ ပရေၚ်ညးဗြဴ၊ ပရေၚ်သၟတ် ကေုာံ ပရေၚ်တၞဟ်ဟ်တံ ဒှ်အဓိကတုဲ ညးတံ ဒးပါလုပ်ရောၚ်။ ဟိုတ်ဂှ်ရ ယဝ်ရ ကၠောန်ဗဒှ် ကောံဓရီုဇၞော်ပရေၚ်ဂကူမန်မ္ဂး ညးစၞးဗော်ပရေၚ်ဍုၚ်ကွာန်ကီု ညးစၞးဂကောံမဟာဇန်တံဂှ် နဒဒှ် ညးက္ဍိုက်ပ် ကောံဓရီုဇၞော် ဒးပါလုပ်တုဲ ဒးပညဳပညပ်အာ သွက်ကောံဓရီုဇၞော်ရောၚ်။ ညးစၞးဗော်ပရေၚ်ဍုၚ်ကွာန်တံကီု ညးစၞးဂကောံမဟာဇန်တံကီု ပါလုပ်တုဲ ဒးပညဳပညပ်ညးသကအ် သွက်ဂွံကၠောန်ဗဒှ်ကောံဓရီုရောၚ်။ ညးစၞးတံဏံ ဂဇံညးသကအ် မွဲစွံတုဲ ပညဳပညပ်ညးသကအ် သွက်ဂွံဂၠာဲသြန်ဂအုံ၊ သွက်ဂွံဘိက်မၞိဟ်ညးစၞး၊ သွက်ဂွံချူအစဳအဇန်ကောံဓရီုဇၞော်ဟီုဂှ်လေဝ် ပိုဲတံ ဖန်က်ကဵု ညးတံ သွက်ဂွံတက်ကျာညးသကအ် သွက်ဂွံပညဳပညပ်အာ ညးသကအ်ရောၚ်။

ဟိုတ်ဂှ်ရ ကောံဓရီုဇၞော်ပရေၚ်ဂကူမန်ဂှ် ဃရေက်ကၠောန် ဟွံထေက်ဏီ၊ ထေက်ကဵု ဒးကေတ်အခိၚ်ညိရောၚ်။ ညးမဆေၚ်စပ်မံၚ်ကဵု ပရေၚ်ဂကူတံ ဖအိုတ် သွက်ဂွံပါလုပ်ဂှ် ပၟိက်ဇၞော်ရ။ ညးမဆေၚ်စပ်တံ ညးဂမၠိုၚ် ပညဳပညပ်ညးသကအ်တုဲ ဒက်ပတန်ပတိုန် ကမ္မတဳတိုၚ်မွဲ နူကဵုကမ္မတဳတိုၚ်ဂှ် သွက်ဂွံပညဳဴပညပ်အာ ပရေၚ်ကမၠောန် ကောံဓရီုဇၞော်အိုဿီုရောၚ်။ ကမ္မတဳတိုၚ်ဂှ် ကၠုၚ်နူကဵုသွာၚ်နာနာ ဗော်နာနာကီုလေဝ် ညးတံကဵုညးတံဂှ် ရန်တၟအ်ကဵု ပရေၚ်ဂကူတုဲ ဒးပညဳပညပ်ညးသကအ် ဒးကၠောန်ကမၠောန် မွဲစွံ ဒးဂွံရောၚ်။

နကဵု ဂကောံပညဳပညပ် ဗော်ပရေၚ်ဍုၚ်ကွာန်ဂှ် စၞးဒးပညဳပညပ် ဗော်ပရေၚ်ဍုၚ်ကွာန်မန် သွက်ဂွံဒှ်မွဲဂှ် တ္ၚဲဏံ မိက်ဂွံကဵုပညဳပညပ်အာ ကမ္မတဳတိုၚ် ကၠောန်ဗဒှ်အာ ကောံဓရီုဇၞော်ပရေၚ်ဂကူမန် သၞာံ (၂၀၁၈) ဂှ်ရောၚ်။ ကမ္မတဳတိုၚ်ဏံဂှ် ဂကောံနာနာ ဗော်နာနာတံ ဒးပါလုပ်ရောၚ်။ ညးတံကဵု ညးတံ သွက်ဂွံဂဇံမွဲဝိုၚ်ဂှ်လေဝ် နူကဵု ဂကောံပညဳပညပ်ဏံ ဒးဗိုၚ်ဖန်ဇန်ကဵုရောၚ်။

ဟိုတ်ဂှ်ရ စပ်ကဵု ကၠောန်ဗဒှ်ကောံဓရီုဇၞော်ပရေၚ်ဂကူမန်ဂှ် ဒးကေတ်အခိၚ်ညိဏီတုဲ မိက်ဂွံကဵုကတဵုဒှ် ချိုတ်တ်ပၠိုတ်တ်ရောၚ် ပတိုန်ထ္ၜးဏာရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.