Categories
ပရိုၚ် လိက်ပရေၚ်

ဒုၚ်သ္ဇိုၚ်ကဵု ဂကောံသၟတ်ဗွိုၚ်စုၚ်တုဲ ကလေၚ်ဒက်ပတန်အာ ဌာန်ကောံသၟတ်မန်မွဲရောၚ်

ဝဏ္ဏမာန်၊ ဂိတုဒဳဇြေမ်ဗာ ၆၊ ၂၀၁၉
ဂိတုဒဳဇြေမ်ဗာ (၂၈) ဏံမ္ဂး စိုပ်ကၠုၚ် တ္ၚဲသၟတ်မန် အလန်အဋ္ဌမရ။ တ္ၚဲသၟတ်မန် အလန်အဋ္ဌမဝွံ ကၠောန်ဗဒှ်အာ ပ္ဍဲကဵုဗွိုၚ်သၠာတ်ဒဵုခရီု ပွိုၚ်ဍုၚ်ကျာ်မြဟ်တုဲ ကမ္မတဳကၠောန်ဗဒှ်တံ အဃောဖန်ဇန် ပလေဝ်ပလေတ်ဒၟံၚ်ရ။
တ္ၚဲသၟတ်မန်ဝွံ ပွိုၚ်ဍုၚ်ကေတ်လျိုၚ်တံကဵု ညးအာဍိုပ်ဌာန်ကောံသၟတ်မန်တံ ချပ်ဇန်သဳကၠဳညးသ္ကံတုဲ ကၠောန်ကၠုၚ်လဝ် ဇရေၚ်ဒေသ ပွိုၚ်ဍုၚ်နာနာရ။ သၞာံဏံမ္ဂး ဂကောံခမဳသၚ် ကေုာံ သၟတ်တံ ကေတ်လျိုၚ် သွက်ဂွံကၠောန် ပ္ဍဲပွိုၚ်ဍုၚ်ကျာ်မြဟ်တုဲ ဖျေံကၠုၚ်သ္ဂုတ်သွာတ် သွက်ဂွံကၠောန် တ္ၚဲသၟတ်မန် ပ္ဍဲကဵုသၠာတ်ဒဵုခရီု မုက်ဂၠံၚ်ဇၞော် (ဘာအၚ်-ပါၚ်လုပ် ကအ်ဗိန်) ပွိုၚ်ဍုၚ်ကျာ်မြဟ်ဂှ်ရ။
တ္ၚဲသၟတ်မန်ဝွံ သ္ပအစာံကဵု သၟတ်ခေတ်တၟိ ကၠောန်ဗဒှ်ကၠုၚ် ကောံဓရီုလၟေၚ်ကၠာအိုတ် ပ္ဍဲကျာ်သုက် ဍုၚ်မတ်မလီု သၞာံ (၁၉၄၆) ဂိတုဒဳဇြေမ်ဗာ (၂၈) နူမွဲအခိၚ်တေံတုဲ ပ္ဍဲပေဲါသၠာဲဂတးလညာတ်သၟတ်မန် အလန်တတိယ ပ္ဍဲဂိတုအေဗရေဝ် (၂၁) စဵုစိုပ် (၂၄) ဗၞတ် (၃) တ္ၚဲ ဒၞာဲကွာန်ဝါဗိုၚ် ပွိုၚ်ဍုၚ်ရေဝ်သၠုၚ်ကျာဂှ် သ္ပကၠုၚ်ဒတန် တ္ၚဲသၟတ်မန်ရ။
နူဂှ်တုဲ တ္ၚဲသၟတ်မန် အလန်ပထမဂှ် ကၠောန်ပ္ဍဲဒဵုထောၚ် ပွိုၚ်ဍုၚ်လှာဒကှ်၊ အလန်ဒုတိယဂှ် ပ္ဍဲကွာန်တၟံကၞေၚ် ပွိုၚ်ဍုၚ်ရေဝ်သၟဝ်ကျာ၊ အလန်တတိယဂှ် ပ္ဍဲကွာန်သၞေဟ်ဗဒဝ် ပွိုၚ်ဍုၚ်မုဟ်ဍုၚ်၊ အလန်စတုတ္ထဂှ် ပ္ဍဲကွာန်ကံဗိန် ပွိုၚ်ဍုၚ်ကံကြိက်၊ အလန်ပဥ္စမဂှ် ကၠောန်ပ္ဍဲကွာန်ဝါခရူ ပွိုၚ်ဍုၚ်ဇြပ်ဗု၊ အလန်ဆဌမဂှ် ကၠောန်ပ္ဍဲကွာန်ကၟာမဵု ပွိုၚ်ဍုၚ်ၜါသွာၚ်၊ အလန်သတ္တမဂှ် ကၠောန်ပ္ဍဲကွာန်သာံလှေဝ် ပွိုၚ်ဍုၚ်ဘာအၚ်တုဲ သၞာံဏံ ဒဳဇြေမ်ဗာ (၂၈) ဏံမ္ဂး သွက်ဂွံကၠောန်အာ ပ္ဍဲဇရေၚ်ဒဵုခရီု ပွိုၚ်ဍုၚ်ကျာ်မြဟ်ရ။
ဖန်ဇန်ချူဓဇက်ဒၟံၚ် ပရေၚ်မူဝါဒသၟတ်
ဒုၚ်သ္ဇိုၚ်အာကဵု ဂကောံသၟတ်ဗွိုၚ်စုၚ်တုဲ သွက်ဂွံကလေၚ်ဒက်ပတန်အာ ဂကောံသၟတ်သ္ပစၞးဂကူမန် ‘ဌာန်ကောံသၟတ်မန်’ ကော်ဗတ်အေၚ်္ဂလိက်မ္ဂး (Mom Youth Forum- MYF) ခိုၚ်ခိုၚ်ဂှ် ညးတာလျိုၚ်သၟတ်တံ ချဳဒရာၚ်ဒၟံၚ် ပရေၚ်ချူဓဇက် မူဝါဒသၟတ်ရ။
“မူဝါဒသၟတ်မန် ဂွံတိတ်ကၠုၚ်မွဲစုမ်ဂှ်တှေ် ဂကောံကေတ်လဝ်တာလျိုၚ် မူဝါဒသၟတ်ပိုဲတံ စချဳဒရာၚ်ဒၟံၚ်ရ။ လၟုဟ် ပြဟ်ဟ်ဏံတှေ် စှေ်ချဳဒရာၚ်ဒၟံၚ် ဒေသပွိုၚ်ဍုၚ်ရေဝ်နွံ၊ ခြာဟွံလံဏံတှေ် သွက်ဂွံအာဆဵုဂဗကဵု သၟတ်ဒေသရးဗ္ဂောနွံ၊ ပိုဲဒးစှေ်ဇၟာပ်ဒေသရးမန်နွံဏောၚ်၊ ပိုဲဂွံလညာတ် မူဝါဒဏံတုဲတှေ် ပိုဲဒးသဳကၠဳ ဒးလးထ္ၜးအာ ပ္ဍဲကောံဓရီုဇၞော်သၟတ် သွက်ဂွံကၠောန်ဂတတေံဏောၚ်” သာ်ဏံ ညးကေတ်လဝ်တာလျိုၚ် ချူဓဇက် မူဝါဒသၟတ် နာဲမန်ထဝ် (MYF) ဟီုထ္ၜးရ။
ပ္ဍဲကာလ ကောံဓရီုဇၞော်သၟတ်မန် သၞာံ (၂၀၁၄) ဂိတုမေ ကၠောန်ဗဒှ်ကၠုၚ် ပ္ဍဲဘာလ္ဒောဝ်သာသနာ (၂၅၀၀) ဍုၚ်မတ်မလီုဂှ် ညးစၞးနူပွို်ၚ်ဍုၚ်နာနာ ဂကောံနာနာတအ် ပါလုပ်တိုန်စိုပ်သဳကၠဳ ပရေၚ်ဗီုပြၚ်သွက် သ္ဂောံဒက်ပခိုၚ်ပတိုန် ဌာန်ကောံသၟတ်မန်ကဵု ပရေၚ်ကမၠောန်ဌာန်ကောံသၟတ်ရ။
ကောံဓရီုဇၞော်တုဲဂှ် နကဵုသၟတ်တအ် ဖျေံအာတၚ်သ္ဂုတ်သွာတ် (၅) တၚ် စပ်ကဵုပရေၚ်ကမၠောန်ရ။ သ္ဂုတ်သွာတ် (၅) တၚ်ဟီုဂှ် –
(၁) သၟတ်ကဵု ပရေၚ်ဍုၚ်ကွာန်ကောန်ဂကူ
သၟတ်မန်တအ်ဝွံ ဒတူလိုၚ်အာ နကဵုဂၠံၚ်တရဴ ပရေၚ်ဍုၚ်ကွာန်ကောန်ဂကူတုဲ ရုန်ဂ္စာန်အာ ပရေၚ်ဗၠးၜးဂကူ ကေုာံ ကဆံၚ်တုပ်သၟဟ်ကောန်ဂကူ မွဲကရောံဗော်ပရေၚ်ဍုၚ်ကွာန်မန် ဗွဲမသၠးပွးရောၚ်။
(၂) သၟတ်ကဵု ဂဥုဲၜူမာဲ
သၟတ်မန်တအ်ဝွံ ပံၚ်ပစပ်ကဵု ဗော်ပရေၚ်ဍုၚ်ကွာန်မန်၊ ဂကောံမှာဇန်နာနာ ကေုာံ အလဵုအသဳတွဵုရးတအ်တုဲ ဗတိုက်သရိုဟ်အာ ဂဥုဲၜူမာဲရောၚ်။
(၃) သၟတ်ကဵု ပွဳပွူသဘာဝ
ညးဍုၚ်ကွာန်တအ် ဟွံပါလုပ်မွဲသာ် ကမ္ပဏဳတအ်ကီု၊ အလဵုအသဳတအ်ကီု၊ ဗော်ပရေၚ်ဍုၚ်ကွာန်တအ်ကီု ပွမဓမံက်ရုပ်ရဴ ကိုန်စဳမာန်ဇၞော်ဇၞော် မဒှ်အန္တရာယ်ကဵု ညးဍုၚ်ကွာန် ကေုာံ ဇီုကပိုက်ပွဳပွူသဘာဝတအ်ဂှ် နကဵုသၟတ်တအ် ပံၚ်ဗ စပ်ကဵုညးဍုၚ်ကွာန်မန် ကေုာံ ဂကောံမှာဇန်မန်နာနာတအ်တုဲ ဗတိုက်သရိုဟ်အာရောၚ်။
(၄) သၟတ်ကဵု လိက်ပတ်ယေန်သၞာၚ်
ပွမချူဆာဲကၠာဲစၠောံဝၚ်မန် ဟွံမွဲကဵုဓဝ်ဍာံ၊ ပွမလံက်အရံၚ်ပလီုပလာ် ယေန်သၞာၚ်အခိုက်ကၞာမန်၊ ပွမကၟာတ်လဒဵု အခေါၚ်ဗ္တောန်လိက်ပတ်မန် ကေုာံ အခေါၚ်ပကတ်ပကေၚ် ဂဳတသုခုမမန်တအ်ဂှ် နကဵုသၟတ်မန်တအ် ပံၚ်ဗစပ်ကဵု ဂကောံလိက်ပတ်ယေန်သၞာၚ်မန်တုဲ ဗတိုက်သရိုဟ်အာရောၚ်။
(၅) သၟတ်ကဵု ပရေၚ်ပညာ
ပရေၚ်ပညာသၟတ်မန် မဒုၚ်သ္ဇိုၚ်ကဵု ကွတ်ပညာဂတာပ်ခေတ် သ္ဂောံသၠုၚ်တိုန်မာန်ဂှ် နကဵုဌာန်ကောံသၟတ်မန် ပံၚ်ဗ စပ်ကဵု ဂကောံနာနာတုဲ ဓမံက်အာရုပ်ရဴရောၚ် သာ်ဝွံ ဖျေံလဝ်နွံရ။
ပ္ဍဲကဵုကလေၚ်ဒက်ပ္တန် ဌာန်ကောံသၟတ်မန် ဗီုပြၚ်စှေ်ကဵုသၞောတ်မွဲဂှ် ဂကောံသၟတ်ဒုၚ်သ္ဇိုၚ်ကဵု ဗီုပြၚ်ဂကောံသၟတ် မန်လညာတ်တၟိ (MYPO)၊ ဂကောံကဵုပညာသၟတ်မန် (MYEO) ကေုာံ ဂကောံသၟတ်ချဳဒရာၚ် တန်တဴဒၟံၚ်တ္ၚဲဏံကီု၊ ဂကောံသၟတ်ဒုၚ်သ္ဇိုၚ်ကဵု ပွိုၚ်ဍုၚ် ကေုာံ ရးဒေသဂမၠိုၚ်ကီု၊ ဂကောံသၟတ်ဗွိုၚ် ပ္ဍဲဗော်ပရေၚ်ဍုၚ်ကွာန်မန်တံကီု ညးစၞးစုၚ် သွက်ဂွံပါလုပ်ဂှ် သဳကၠဳဖျေံလဝ် ပ္ဍဲကဵုပေဲါသဳကၠဳသၟတ် (၂၀၁၉) တုဲကၠုၚ်ဂိတုသေပ်တေမ်ဗာ (၂၉-၃၀) ကၠောန်လဝ်ပ္ဍဲခရိုၚ်သဓီု ဗော်ဍုၚ်မန်တၟိဂှ်ရ။
ကောံဓရီုဇၞော်သၟတ်မန်ဂှ် ကိုပ်ကၠာရန်လဝ် အကြာဂိတုမာတ် (၂၀၂၀) ဂှ်တုဲ ဒၞာဲဂှ် ရန်လဝ် သွက်ဂွံကၠောန်အာ ပ္ဍဲပွိုၚ်ဍုၚ်ပံၚ်နွံရ။ ဆဂးဂှ် သွက်ဂွံကၠောန်ကောံဓရီုဇၞော် သၟတ်မန်ဝွံ ဟွံဂွံဒက်ကမ္မတဳဏီတုဲ အခိၚ်အခါလဵုကၠောန် ဒၞာဲလဵုကၠောန်ဂှ် သ္ပဒတန်ဟွံဂွံဏီရ။
ဌာန်ကောံသၟတ်မန် (Mon Youth Forum – MYF) ချဳဒရာၚ်တန်တဴဒၟံၚ်တ္ၚဲဏံဂှ် ညးစၞးဟွံပေၚ်ကီု၊ ညးချဳဒရာၚ်သှေ် အောန်အာကီုတုဲ ဗီုပြၚ်ဌာန်ကောံသၟတ်မန် ဗွဲမစှေ်ကဵုသၞောတ်မွဲဂှ် သွက်ဂွံဒက်ပတန်အာ ပ္ဍဲကဵုကောံဓရီုသၟတ် အရၚ်ဂွံကၠောန်ဂတဏံနွံရ။
ကာလကောံဓရီုဇၞော် ဂကောံသၟတ်မန် အလန်ဂတဏံမ္ဂး သွက်ဂွံကလေၚ်ဒက်ပခိုၚ်ပတိုန် ‘ဌာန်ကောံသၟတ်မန်’ (Mon Youth Forum – MYF) ဂှ်ကီု သွက်ဂွံသဳကၠဳအာ စပ်ကဵုမူဝါဒ ဂၠံၚ်တရဴသၟတ်ဂှ်ကီုရ။
ပ္ဍဲကဵုမူဝါဒသၟတ်ဂှ်မ္ဂး ရန်ဓဇက်လဝ် (၁၂) ကဏ္ဍ နွံတုဲ စတံနူ သၟတ်ကဵု ပရေၚ်ပညာ၊ သၟတ်ကဵု ပရေၚ်လိက်ပတ်၊ သၟတ်ကဵု ပရေၚ်ဂဥုဲၜူမာဲ ၊ သၟတ်ကဵု ပရေၚ်ဍုၚ်ကွာန်၊ သၟတ်ကဵု ပရေၚ်တိဍာ်၊ သၟတ်ကဵု ပွဳပွူသဘာဝ၊ သၟတ်ကဵု ပရေၚ်ပိုန်ဒြပ် စတံပါလုပ်ရ။
သၟတ်ဟီုမ္ဂး စတံနူ အဝဲအပိုၚ်အခြာ ဗၞတ်ဗ္ၜတ်အာယုက်ၜိုတ်လဵု ခုတ်တဴသၟတ်ရော၊ အခန်ပရေၚ်ဍုၚ်ကွာန်မ္ဂး သၟတ် တံအခန်ကဏ္ဍလဵု ဒးလုပ်ကေတ်တာလျိုၚ် အခန်ကဏ္ဍနာနာသာ်ဂှ် ချူဓဇက်မူဝါဒတုဲ အတိုၚ်ဂၠံၚ်တရဴမူဝါဒဂှ် သွက်ဂွံရေၚ်တၠုၚ်ဓမံက်အာရုပ်ရဴရ။
တ္ၚဲဏံမ္ဂး ဂကောံသၟတ်ဒုၚ်သ္ဇိုၚ်ကဵု ကွာန်-အရာပ်-ပွိုၚ်တိုက်-ပွိုၚ်ဍုၚ်၊ ဂကောံသၟတ်ဒုၚ်သ္ဇိုၚ်ကဵု ဗော်ပရေၚ်ဍုၚ် ကွာန် မတွံဂး သၟတ်ဗွိုၚ်ဗော်ဍုၚ်မန်တၟိ ကေုာံ သၟတ်ဗော်ညဳသၟဟ်မန်၊ ဂကောံသၟတ်ချဳဒရာၚ်ရေၚ်တၠုၚ်ဒၟံၚ် စပ်ကဵု ပရေၚ်ဖေါအ်ဗြေဝ်သၟတ် ဗီုပြၚ် ‘ဂကောံသၟတ်မန်လညာတ်တၟိ’ ၊ ‘ဂကောံကဵုပညာသၟတ်မန်’ မပ္တံသာ်ဝွံ ဗီုပြၚ်ညး ကဵုညးဂှ် ချဳဒရာၚ် နွံတန်တဴအိုတ်ရ။
ပ္ဍဲကဵုဗွိုၚ်သၟတ်မန်တံ ချဳဒရာၚ်ရေၚ်တၠုၚ်ဒၟံၚ် ကေၚ်ကာအလုံအိုတ်သီုဂှ် ကလေၚ်စန်ပကောံတုဲ ဒက်ပတန်ပ္တိုန် ‘ဌာန်ကောံသၟတ်မန်’ သ္ပစၞးသၟတ်ဂကူမန် မွဲဂကောံရောၚ်တုဲ ပ္ဍဲအရာချဳဒရာၚ်ရေၚ်တၠုၚ် ပရေၚ်ဍုၚ်ကွာန်ဂကူဂှ် နကဵု ကဏ္ဍသၟတ်လေဝ် အဓိက ပ္ဍဲကဵုကဏ္ဍပရေၚ်ဍုၚ်ကွာန်ကီု၊ ပ္ဍဲကဵုကဏ္ဍပရေၚ်ပညာ၊ ပရေၚ်လိက်ပတ်ယေန်သၞာၚ်၊ ပရေၚ်ပွဳပွူသဘာဝ၊ ပရေၚ်ပိုန်ဒြပ်၊ ပရေၚ်ဂဥုဲၜူမာဲ စတံနကဵုဇြဟတ်ဗွိုၚ်သၟတ်တံ ဒးလးဖျေံလၟေၚ်ကမၠောန် ဂၠံၚ်တရဴမူဝါဒ သွက်ဒးရေၚ်တၠုၚ်အာရောၚ်။

Categories
ပရိုၚ်

သဘၚ်ဖျဴသွဝ် ကျာ်ဇၞော်အ္စာသဳလာစာရဂှ် ကၠောန်ဗဒှ်အာ ပ္ဍဲဘာရာမညရဋ္ဌဗုဒ္ဓတက္ကသိုလ်ဏောၚ်

သၟဟ်သၟန်၊ ဂိတုဒဳဇြေမ်ဗာ ၁၁၊ သၞာံ ၂၀၁၉
သဘၚ်ဖျဴသွဝ် ကျာ်ဇၞော်အ္စာသဳလာစာရ ဘာဗ္ဂောပရိယတ္တိ ဍုၚ်မတ်မလီုဂှ် ကၠောန်ဗဒှ်အာ ပ္ဍဲကဵုဘာရာမညရဋ္ဌ ဗုဒ္ဓတက္ကသိုလ် ဍုၚ်မတ်မလီုရောၚ် ဂွံတီကေတ်ရ။
“ကျာ်ဇၞော်ဏံဂှ် အာဇနဲဂကူမန်ဏောၚ်။ ဖျဴဇွသၚ်ညးတှေ် ဒးနွံကဵုအဆံၚ်အလံၚ်ကီုဏောၚ်။ ဘာရာမညရဋ္ဌဂှ်တှေ် သၠဲလး၊ ဂၠာဲပကောံကပေါတ်လေဝ်လောဲ၊ နွံမံၚ် ပ္ဍဲဍုၚ်မတ်မလီုတှေ် အာကၠုၚ်ကြပ်မံၚ်သီုညးဖအိုတ်လေဝ်” သာ်ဝွံ ကျာ်ဇၞောအ္စာဝရဝံသ ကွာန်ၝောံနက် ညးမဒှ်ဥက္ကဋ္ဌ ဂကောံကၠောန်ဗဒှ်ဇွသၚ်ကျာ်ဇၞော်အ္စာဂှ် ဟီုမြော်ရ။
အခိၚ်ဖျေံဘာနိဗ္ဗာန် ကျာ်ဇၞော်အ္စာဂှ် လလောၚ်တြးလဝ် သွက်ဂွံကၠောန်အာ ပ္ဍဲကဵုဘာသုဝဏ္ဏဘုမ် ပ္ဍဲကွာန်ရုၚ်စက် (စက်မှုဇုံ) ကီုလေဝ် ရံၚ်ကဵုပရေၚ်ဍန်ဂြက်နာနာကီု ကျာ်ဇၞော်အ္စာသဳလာစာရဂှ် ဒှ်မံၚ်အစံၚ်အ္စာ တၠဂုဏ်အ္စာသဳလာစာရ (ဂုဏ်မှေအ်) ကီုတုဲ ပြံၚ်သၠာဲကၠောန်ဗဒှ်အာ ပ္ဍဲကဵုဘာရာမညရဋ္ဌဂှ်ရောၚ် ကောန်ကွးကျာ်ဇၞော်အ္စာ တၠဂုဏ်အ္စာဥတ္တရ ဟီုမြော်ရ။
“ကျာ်ဇၞော်ဂှ်လေဝ် ဒှ်မံၚ်အဓိပတိ တက္ကသိုလ်ရာမညရဋ္ဌဏံရောၚ်။ ဒၞာဲလေဝ် ဍေံသၠဲလးညိဏောၚ်။ ဍေံနွံမံၚ်ဒေါဝ်ဍုၚ်တှေ် မၞိဟ်အာကၠုၚ်လေဝ် လောဲသွာဏောၚ်။ သၚ်ဍုၚ်မ္ၚးတံလေဝ် ဇူဒီုပြေပြံၚ်ဏောၚ်။ ကဵုဂုဏ်တၟေၚ်ညးတှေ် ကၠောန်ပ္ဍဲကဵုဌာန်ဏံဂှ် ပဵုတုဲဍေံစိုပ်တရဴဏောၚ်” သာ်ဝွံ တၠဂုဏ်အ္စာ ဥတ္တရ ဂးရ။
သဘၚ်ဖျဴသွဝ်ဏံဂှ် စနူကဵုဂိတုပသာ်မွဲမံက် သွက်ဂွံစကၠောန် သ္ပပူဇဴအာ ပ္ဍဲကဵုဘာဗ္ဂောပရိယတ္တိကၠာတုဲ နိမန်ကဝါ်နၚ် ဘာရာမညရဋ္ဌ သွက်ဂွံစံၚ်ဇွဂြဇုတ် နကဵုပြသာဒ် အတိုၚ်အခိုက်ကၞာမန်ရောၚ်။
ကျာ်ဇၞော်အ္စာဂှ် ပ္ဍဲကဵုသၞာံ (၂၀၁၈) ဂိတုနဝ်ဝေမ်ဗာ (၁၇)၊ အခိၚ်ကလိဂွံအာယုက် (၇၈) သၞာံ သိက္ခာ (၅၈) ဝှ်ဂှ် စဴအာသွဝ်ရ။
ကျာ်ဇၞော်အ္စာသဳလာစာရဂှ် ကလိဂွံလဝ်တဆိပ်ကြာ အဂ္ဂမဟာပဏ္ဍိတကီု ပ္ဍဲကဵုဂကောံရာမညဓမ္မာစရိယဂှ် အဆံၚ်ဒုဥက္ကဋ္ဌကီု ပ္ဍဲကဵုပရေၚ်ကောန်ဂကူမန် မပ္တံကဵုဂကောံပ္ညဳပ္ညပ်တံဂှ် ကေၚ်က္ဍိုက်ပ် ကေတ်ကၠုၚ်လဝ် တာလျိုၚ်ကီုရောၚ် ဂွံတီကေတ်ရ။

Categories
ပရိုၚ်

ပရိုၚ်ကၠတ်ကောန်ၚာ် ဒဒှ်ရဟွံဍာံပုဟ်ဂှ် သကိုပ်အုပ်ဓုပ်ကွာန်လ္ၚဵု ဒးၜုၚ်မံၚ်

ဝဏ္ဏမာန်၊ ဒဳဇြေမ်ဗာ ၁၂၊ ၂၀၁၉
အကြာကာလဏံဂှ် ပရိုၚ်ဟလုဟလံၚ် ပြာကတ်ဒၟံၚ် ပရိုၚ်ကၠတ်ကောန်ၚာ်ဝွံ ဒဒှ်ရဟွံဍာံပုဟ်ဂှ် သကိုပ်အုပ်ဓုပ်ကွာန်လ္ၚဵု ဒးၜုၚ်မံၚ် ဂေတ်ကွာန်ဒှ်ရောၚ် သကိုပ်အုပ်ဓုပ်ကွာန်လ္ၚဵု ဟီုထ္ၜးရ။
“ဒေသပိုဲဂှ် မုဟွံဒှ်ပုဟ်၊ ဆဂးတှေ် ပရိုၚ်ဂှ်ရ ဟီုမံၚ်ပြးဇးတုဲတှေ် ကောန်ကွာန်တအ် ဖေက်လကိုတ်မံၚ် သက်ပဟွံမွဲ တုဲတှေ် ၜုၚ်မံၚ်ဂေတ်ကွာန် အကြာဂှ်တှေ် သီုဂွံဆဝ်ထောံ ပရေၚ်ပၟတ်ကီု၊ ကွာန်ပိုဲ ၜုၚ်မံၚ်တုဲရ” သာ်ဏံ သကိုပ် အုပ်ဓုပ်ကွာန်ကြေဝ်ဏာ မိစၠန်ထဝ် ဟီုထ္ၜးရ။
ပရိုၚ်ကၠတ်ကောန်ၚာ်ဂှ် ပြးဇးဒၟံၚ် အလုံဒေသရးမန်သၟးဟွံက ကတဵုဒှ်ဒၟံၚ်တုဲ ကွာန်ဒေသဗွဲမဂၠိုၚ်ဂှ် ဖေက်လကိုတ်ဒၟံၚ် အိုတ်တုဲ ပရိုၚ်ဟလုဟလံၚ် (ပရိုၚ်ဟွံဍာံ) ဂှ် မွဲအဆံၚ်ကဵုမွဲအဆံၚ် ပြးတဴဒၟံၚ်ညးသ္ကအ် နကဵုအန်လာၚ်အိုတ်ရ။
“ပရိုၚ်ကၠတ်ကောန်ၚာ်ဂှ်တှေ် မှာန်စိုပ်မံၚ်ဟဂှ်ကီု ပ္ဍဲကွာန်ပိုဲဏံ ရပ်လဝ်မၞိဟ် ၜါ-ပိ ကွေံဟာ၊ ရပ်ဂွံကမၠတ်ကၠတ် ကောန်ၚာ်ကွေံဟာ ပိုဲဂှ် ကေတ်လေဝ် ကေတ်ဟွံဒး၊ ရဲကၠအ်ကီု ရဲဝါကီု မှာန် ရပ် (ခွျေတပ်) ကွေံဟာ၊ ဟီုဂှ်ဟီုမံၚ်ရ ဗီုဝန်ဇၞော်ထောန်မေန်အံၚ် ဟီုလဝ်ဂှ်ရလေဝ် မၞိဟ်ကၠုၚ်တေၚ်လဝ် ကောန်ၚာ်ကၠေံလေဝ် ဟွံမွဲဏီပုဟ်၊ ပ္ဍဲဗၠာဲသၟိၚ် လေဝ် ညးဂွံကၠုၚ်တေၚ်စိုပ်လဝ် မွဲအမှုလေဝ် ဟွံမွဲဏီပုဟ်” သာ်ဏံ သကိုပ်အုပ်ဓုပ်ကွာန် နာၚ်လှုၚ် လေံတက် နာဲ မန်သဵုနဲ ဟီုရ။
ဗွဲကြဴနူကဵု ပေဲါဗတိုက် ဗော်ဍုၚ်မန်တၟိကဵု ဒပ်ပၞာန်ဗမာ ပံၚ်တောဲကဵု ဒပ်မၚ်ပယျဵု (ကရေၚ်) ဒှ်ပ္ဍဲကွာန်ပလိုၚ်ဂျပါန် (ဒေသပယျဵုသေံ) ဂှ်တုဲ ပရိုၚ်ရပ်ပဝ်တာ (ခွျေတပ်) ကီု၊ ပရိုၚ်ကၠတ်ကောန်ၚာ်ကီု တြးဒၟံၚ်ညးသ္ကအ် နူမွဲအဆံၚ် နကဵု အန်လာၚ်အိုတ်ရ။
“အဓိကဂှ် ညးမွဲလ္ပာ်ဂှ် ဍေံတြးပရိုၚ် ရပ်ပဝ်တာ (ခွျေတပ်) ဏောၚ် ဂးဟဂှ်တုဲတှေ် မၞိဟ်ပ္ဍဲသ္ၚိဂှ် ပဲါဂြိပ်ဏောၚ်တှေ် ဍေံဂွံလုပ်ကၠတ်ဂၠံက် ပ္ဍဲသ္ၚိတံဂှ်ဏောၚ်၊ တ္ၚဲတေံလေဝ် ပိုဲသ္ပကောံဓရီု ပ္ဍဲကွာန် ဟီုကလးကိစ္စဏံရ၊ အဵုဇှ်ရ လတူပရိုၚ် ဂှ် ဟွံမိက်ကဵုယံၚ်ပုဟ်၊ မိက်ဂွံကဵု ကလေၚ်ဟဍာံ ချိုတ်ချိုတ်ပၠိုတ်ပၠိုတ် တုဲမှ မိၚ်ပရိုၚ် ဍေံရပ်ပ္ဍဲကၟာဝက်ဏောၚ်၊ သၟာန်ဏာ ကၟာဝက် ညးမွဲဟွံတီပုဟ် အဓိက ပရိုၚ်တဏံပြးတှေ် ကမၠတ်ဒမၠပဝ်ဏောၚ်လေဝ်” သာ်ဝွံ သကိုပ်အုပ်ဓုပ် ကွာန်နာၚ်လှုၚ် လေံတက်ဂှ် ဟီုရ။
ပရိုၚ်ကၠတ်ကောန်ၚာ်ကီု၊ ပရိုၚ်ရပ်ပဝ်တာ (ခွျေတပ်) ကီုဂှ် ဟွံဒှ်မွဲသာ် မုဟိုတ် ပရိုၚ်တြးပေၚ်ဒၟံၚ် အကြာညးဍုၚ် ကွာန် ညးဒေသတအ်ဂှ် လညာတ်သကိုပ်အုပ်ဓုပ်ကွာန် ကြေဝ်ဏာ (ပွိုၚ်ဍုၚ်ကျာ်မြဟ်) မိစၠန်ထဝ် ဟီုသာ်ဏံရ။
“ပိုဲညာတ်မွဲသာ်ဂှ်တှေ် မွဲလ္ပာ်ဂှ် တြးမံၚ်အာရီုပိုဲဏောၚ် ပဝ်လသဳမွဲမွဲသာ်ဏောၚ်၊ ၝဍေံပလီုမံၚ် အာရီုပိုဲဗီုဏံဂှ်တှေ် ညးဍုၚ်ကွာန်ပိုဲလကိုတ်အိုတ်ရဒှ် ၝဍေံဒှ်ဟွံမာန်ဂှ် ညးဍုၚ်ကွာန်ပိုဲလေဝ် ဒးတီကီုဏောၚ် ဒှ်ကီု၊ ဟွံဒှ်ကီုဂှ်” သာ်ဏံ ညးဟီုရ။
ပရေၚ်ပရော ကၠတ်ကောန်ၚာ်ဂှ် ပရိုၚ်ပြးတဴဒၟံၚ် ဗွဲမပြာကတ်တုဲ ကာလဒဳဇြေမ်ဗာ (၂) ဂှ် နူကဵုဝန်ဇၞော်တမ်ရိုဟ် ပရေၚ်မၞိဟ် (လူ႕စွမ်းအားအရၚ်းအမြစ်ဝန်ကြီးဌာန) ထောန်မေန်အံၚ်ဂှ် အမှုကၠတ်ကောန်ၚာ်ဂှ် ညးတၠခန္ဓတအ် မွဲ အမှုလေဝ် ဟွံတေၚ်စိုပ်လဝ်ဏီဂှ်ကီု၊ ပ္ဍဲရုၚ်ဗၠာဲသၟိၚ်တအ်လေဝ် ဒဒှ်ရ ကောန်ညးကၠေံ ကောန်ၚာ်ကၠေံဂှ် မွဲတၠလေဝ် ဟွံတေၚ်စိုပ်လဝ်ရောၚ် ချူပတိုန်လဝ် လတူမုက်လိက် (facebook) ညးနွံရ။

Categories
ပရိုၚ်

ဇက်ဂၠောဲအာ တ္ၚဲသၟတ်မန် နကဵုကွဳစက်ယာန်မ္ဂး ဒ္ဂေတ်ဗက်သၞောဝ်ညိဂှ် ကမ္မတဳကၠောန်ဗဒှ် ဆဝ်မ္ၚုဟ်

သၟဟ်သၟန်၊ ဂိတုဒဳဇြေမ်ဗာ ၁၃၊ သၞာံ ၂၀၁၉
သၟတ်မန် ညးမဆာန်ဂကူမန်တံ ဇက်ဂၠောဲတိုန်စိုပ် တ္ၚဲသၟတ်မန် အလန်အဋ္ဌမ ဗလးဒဵုခရီု ပွိုၚ်ဍုၚ်ကျာ်မြဟ်မ္ဂး ရန်ကဵုတရဴဂွံကလိတ်ကလောတ်မာန် ညံၚ်ဟွံဂွံဒှ်အန္တရာဲဂှ် ဒ္ဂေတ်ဗက် စေဝ်ပၞောန် ကွဳစက်ယာန်/ ဂၠံၚ်ဍာန် ဗိုန်န်တုဲ ဒဳအာ ညံၚ်ဂွံနွံကဵု ပရေၚ်ဂီုကၠီုညိဂှ် ကမ္မတဳကၠောန်ဗဒှ် တ္ၚဲသၟတ်မန်တံ ပတိတ်လဝ်လိက်ဆဝ်မ္ၚုဟ်ရ။
ဟိုတ်နူဟွံဒ္ဂေတ်ဗက်စေဝ်ပၞောန်တုဲ ယဝ်ကလိလောန်အာ ဒုဟ်မွဲမွဲသာ်ကဵုဒှ် ပရေၚ်ဇီုကပိုက် ကတဵုဒှ်အာမွဲမွဲသာ်ကဵုဒှ် နူကဵုဌာန်ကောံသၟတ်မန် ကမ္မတဳကၠောန်ဗဒှ် တ္ၚဲသၟတ်မန်တံ ဟွံကေတ်တာလျိုၚ်ရောၚ်ဂှ် ချူဓမံက်လဝ် ပ္ဍဲလိက်ဆဝ်မ္ၚုဟ်ဂှ်ရ။
“မွဲသၞာံကဵုမွဲသၞာံ သၟတ်တံတီဂၠိုၚ် ဇြိုဟ်နက်ဂၠိုၚ်ကၠုၚ်တှေ် ရဲဇက်ဂၠောဲတိုန်ကၠုၚ် လၟိဟ်ဂၠိုၚ်တိုန်အရိုဟ်သၞာံရ။ ဇက်ကၠုၚ်ဌာနကၠောန်ဗဒှ် တ္ၚဲသၟတ်မန်ဂှ်တှေ် အကြာဂၠံၚ် အကြာဍာန် ပရေၚ်ခက်ခုဲဍေံ နွံမံၚ်၊ ကေၚ်ဆဵုဂဗလဝ်နွံတှေ် ကွဳစက်၊ ကွဳလိုန်ဓာတ် ဇီုညးသ္ကံ၊ ဍေံဒှ်ဗက်ဟွံဂတာပ် သၟတ်တံ ဖေက်လကိုတ်အာဏောၚ်။ ပိုဲပတိတ်လိက်ဏံဂှ် ညံၚ်ဂွံဒ္ဂေတ်ဗက်သၞောဝ်ဂၠံၚ်ဍာန်၊ သၞောဝ်ကွဳစက်ယာန်တံဏံရ။ ဟွံဒ္ဂေတ်ဗက်တုဲ ကလိလောန်အာမွဲမွဲသာ်တှေ် ကမ္မတဳပိုဲဏံ ဟွံကေတ်လျိုၚ်ပုဟ်” သာ်ဝွံ ကမ္မတဳကၠောန်ဗဒှ် တ္ၚဲသၟတ်မန် ညးအုပ်ကာ ဌာန်ကောံသၟတ်မန် နာဲဇာနဲဥု ဟီုရ။
သၞာံတုဲကၠုၚ်တေံ သၟတ်ပွိုၚ်ဍုၚ်လှာဒကှ်တံ ဇက်ကၠုၚ် တ္ၚဲသၟတ်မန် နကဵုကွဳစက်ဂှ် ကွဳစက်မွဲမ ဒှ်ပရေၚ်ဇီုကပိုက် ဇီုဒးအာကွဳလိုန်ဓာတ် မၞိဟ်ဍိုက်ဗက်ဂှ် ချိုတ်အာကီု မၞိဟ်ဒဳဂှ် ဒးအာအဝပ်တုဲ ဒးဒုၚ်စောဲဂဗုတ် ပ္ဍဲကဵုရုၚ်သၞောဝ်ဓဝ် ဍုၚ်ကျာ်မြဟ်ရ။
အခိၚ်ပသောၚ်အမှုဂှ် ညးက္ဍိုက်ပ်ဌာန်ကောံသၟတ်မန်ကီု မိစန္ဒာနန်၊ မိသုမန် ကေုာံ သၟတ်ပွိုၚ်ဍုၚ်လှာဒကှ်တံ ဘိုၚ်ပူဗိုၚ်လဝ်တုဲ နူကဵုဇာနှိက်ညးရေၚ်တၠုၚ်သၞောဝ်မန်ရာမညတံ ဗက်ကဵုလဝ်ဂဗုတ် မသက္ကုၚုဟ်မးရောၚ်။ အမှုဂဗုတ်ဂှ် ဒးဗက်တိုန်ရုၚ်သောၚ်ကလး (ရုံးချိန်း) ၜိုတ် (၃၀) ဝါတုဲမှ ဂွံသောၚ်ကလးအာရောၚ် ဂွံတီကေတ်ရ။
“ပိုဲတံရန်တၟံ အာတ္ၚဲသၟတ်မန်ဟီုဂှ် မိက်ဂွံဗပေၚ်ဇြဟတ် ဘိုၚ်ထံက်အရီု သွက်ဇြဟတ်သၟတ်ဂၠိုၚ်ဂှ် ပိုဲတံဂစာန်တုဲ တှေ် ပိုဲတံအာလဝ်၊ ဆဂး ပရေၚ်ရုန်ဂစာန်ပိုဲဂှ် ဍေံဟွံဒှ်ဖဵု သွက်ဒေသပိုဲတုဲ ဍေံဒှ်အခက်ခုဲမာဟလိုၚ်၊ ဇြဟတ်ပိုဲ သၞာံဏံဂှ်တှေ် ဍေံအောန်အာ နူကဵုသၞာံတုဲတုဲ ကဝက်မာန်ဏောၚ်၊ ဗီုပြၚ် ပိုဲအာမံၚ်ကဵု ဂကောံဂှ် အစဳဇန်ပိုဲဂှ် ပိုဲယှအ်ဖျေံဏောၚ်။ ဗီုပြၚ်အာဂှ် နကဵုပူဂဵုဆာန်ဂကူ စိုတ်ဓာတ်တ္ၚဲသၟတ်မန်ဟေၚ် အာကဵုပူဂဵုရ” သာ်ဝွံ ညးအုပ်ကာ ဂကောံသၟတ်မန် ပွိုၚ်ဍုၚ်လှာဒကှ် နာဲဥပါဒါန် ဟီုရ။
ကြက်ကၠုၚ်စိုပ် ဂိတုဒဳဇြေမ်ဗာ (၂၈) ဏံဂှ် ဒှ်တ္ၚဲသၟတ်မန် အလန်အဋ္ဌမတုဲ သွက်ဂွံကၠောန်ဗဒှ်အာ ပ္ဍဲကဵုဗလးဒဵုခရီု ပွိုၚ်ဍုၚ်ကျာ်မြဟ်ရောၚ်။
တုပ်သာ်ဝွံကီု ပ္ဍဲကဵုတ္ၚဲကောန်ဂကူမန် မရနုက်ကဵု (၇၂) ဝါ ဗဟဵု ဍုၚ်ဗဂေါတံဂှ် သၟတ်ဗေန်ခရာ ကွာန်ဆုကၠတံ ဒှ်ပရေၚ်ဇီုကပိုက်ကွဳစက်တုဲ သၟတ်မွဲတၠ မနွံယၟု “မိဝါ” ဂှ် ဒးအာဘဲအဝပ် သ္ကာတ်မြဟ်ကီု ဂွံတီကေတ်ရ။

Categories
ပရိုၚ်

ဘဲဒဏ် မာၚ် (ဗမ်) ပွိုၚ်ဍုၚ်ဍာ်ဗုဂှ် ဒဵုလၟုဟ် ညးဒေသတအ် ဟွံဂံၚ်အာကၠအ်ဏီ

ဝဏ္ဏမာန်၊ ဒဳဇြေမ်ဗာ ၁၄၊ ၂၀၁၉
ဌာန်ဒေသ မာၚ် (ဗမ်) ခတိုဟ်ဒၟံၚ် ပွဳပွူကွာန်ဌာန်ဇၞူ ပွိုၚ်ဍုၚ်ဍာ်ဗုဂှ် ဒဵုတ္ၚဲဏံ ညးတၠကၠအ်တအ် ဟွံဂံၚ်အာကၠအ်ဏီ ရောၚ် ညးဒးလဝ်ဘဲဒဏ် မာၚ် (ဗမ်) တအ် ဟီုရ။
ပွဳပွူဗၟံက်ကွာန် ဒေသကွာန်ဌာန်ဇၞူ ပွိုၚ်ဍုၚ်ဍာ်ဗုဂှ် မာၚ် (ဗမ်) ခတိုဟ်ကၠုၚ်ဒၟံၚ် လၟေၚ်အဆက်က်ရ၊ ၜိုန်ဂှ်လေဝ် ဂကောံလဵုလေဝ် ကေတ်လျိုၚ်တုဲ ဘိုၚ်သောၚ်သၟးကဵု မာၚ် (ဗမ်) ဂှ် ဟွံမွဲကၠုၚ်တုဲ ညးဒေသတအ်လေဝ် ဟွံဂံၚ်အာ ကၠအ်ဒေသဂှ်ဏီဖိုဟ်ရ။
“ဂကောံရပ်လွဟ်လဵုလေဝ် ဟွံကၠုၚ်ကျောဝ်မွဲလှေ်ပုဟ်၊ ဒၞာဲပွဳဗွိုၚ်ကၠအ် ဗမ်ခတိုဟ်ဂှ်လေဝ် ဂကောံလဵုလေဝ် ဂွံ ကၠုၚ်ရံၚ်ကျောဝ်ကဵု၊ ဂွံဘိုၚ်သၟးကဵု မာၚ် (ဗမ်) ဂှ်လေဝ် ဟွံမွဲတှေ် တၠကၠအ်နွံဗွိုၚ်တံဂှ်လေဝ် ဟွံဂံၚ်အာကၠအ်ဏီ ပုဟ်” သာ်ဏံ ညးလိုန်ဒးလဝ်ဘဲ မာၚ် (ဗမ်) နာဲအဗၠာဲ (က) နာဲအပြိန် နူကွာန်ဌာန်ဇၞူ (ပွိုၚ်ဍုၚ်ဍာ်ဗု) ဂှ် ဟီုထ္ၜးရ။
နကဵုအသိၚ် ဘဲဒဏ် မာၚ် (ဗမ်) ခတိုဟ်ဒၟံၚ် လၟေၚ်အဆက်က် ပ္ဍဲဒေသဝါဂြၚ်အေက် ဗၟံက်ကွာန်ဌာန်ဇၞူ ပ္ဍဲပွိုၚ်ဍုၚ် ဍာ်ဗုဂှ်မ္ဂး ညးဒေသတအ် စိုတ်အိုတ်ဒၟံၚ်ကဵု ဘဲဒဏ် မာၚ် (ဗမ်) ဂှ်ကီုလေဝ် ဂကောံရပ်လွဟ်လဵုလေဝ် ဟွံဘိုၚ်မၚ်မွဲ ကဵုအရီုအဗၚ်ရ။
“ဇၟာပ် မာၚ် (ဗမ်) ခတိုဟ်ဂှ် တာလျိုၚ်ညးဒေသ မဆေၚ်စပ်တအ်ဂှ်တှေ် တေၚ်ပတိုန်ထ္ၜးလဝ်လၟိုန်ရ၊ တေၚ်တုဲတှေ် တုဲရ ဂကောံလဵုလေဝ် ဂွံဘိုၚ်ကေတ်ကဵုလျိုၚ်၊ ဂွံကၠုၚ်ဘိုၚ်ရီုဗၚ်ကဵု ဂကောံလဵုလေဝ်ဟွံမွဲပုဟ်၊ မာၚ် (ဗမ်) ဂှ်လေဝ် ဂကောံလဵုလေဝ် ဂွံသောၚ်သၟးကဵု ဟွံမွဲဏီပုဟ်၊ ဟိုတ်ဂှ်ရ ဒေသပွဳပွူဂှ်တှေ် တၠကၠအ်တအ် ညးမွဲလေဝ် ဟွံဂံၚ်အာ ကၠအ်ဏီပုဟ်” သာ်ဏံ သကိုပ်အုပ်ဓုပ်ကွာန် (ဂကောံကွာန် ၄ ကွာန်) ဌာန်ဇၞူ နာဲတေန်သာန် ဟီုရ။
ဒေသဝွံ ညးဒေသတံ ကော်မံၚ် ကြုၚ်ဗ္စး – ဒေသဝါဂြၚ်အေက်ရ။ ဒေသ ‘ဝါဂြၚ်အေက်’ ဝွံ ဗွဲကြဴနူကဵု ဗော်ဍုၚ်မန်တၟိ ကေတ်လဝ်ဓဝ်ၜိုဟ်လလမ်တုဲ ပံက်ဗဒှ်လဝ် ဒေသဖေါအ်ဗြေဝ် ကုညးဒေသတံတုဲ ညးဒေသတံ ကၠောန်ကတဵုဗဒှ်လဝ်ကၠအ် နွံ (၄၀၀) တၠကၠအ်ပြၚ်ၚ်နွံရ။ လၟိဟ်ဨကမ္ဂး နွံကဵုလက်ဨကဒှ်ရောၚ် ညးဒေသတံ ဟီုရ။
ပွဳဗွိုၚ်ဒေသ ကော် ကြုၚ်ဗ္စး-ဒေသဝါဂြၚ်အေက် ဗၟံက်ကွာန်ဌာန်ဇၞူ ပ္ဍဲပွိုၚ်ဍုၚ်ဍာ်ဗုဂှ် ဟွံလံဟွံလံ မာၚ် (ဗမ်) ခတိုဟ် ဒၟံၚ်တုဲ ကောန်ညးကွာန်ဒေသတံဂှ်လေဝ် မွဲတုဲမွဲ ဒးဒုၚ်ဒၟံၚ်ဘဲဒဏ် မာၚ် (ဗမ်) ရ။
“ဇကုဒးဒုၚ်ဗီုဏံဂှ် ကံကုသဵု ဇကုကဵုဇကုရ၊ ဇကုဒးအာတုဲယျတှေ် ညးလက္ကရဴ ညံၚ်ဟွံဂွံဒးဂှ်တှေ် ညးတာလျိုၚ် ရဲ ပါမ်လဝ်ဗမ်တံဂှ် ဒးပသောၚ်ကဵု ဗမ်ဂှ်ဏောၚ်၊ ဠဂှ်မှ တၠကၠအ်တံဂှ် ညးဂွံဂံၚ်အာကၠအ်ညးတံ၊ လၟုဟ်တှေ် ကၠအ်ဂလိုၚ်တံဂှ်တှေ် ကရပ်ဗမ်ခတိုဟ်မံၚ်ဂှ်တှေ် ညးမွဲလေဝ် ဟွံဂံၚ်အာဏီပုဟ်” သာ်ဏံ ညးဒးဒုၚ်ဘဲဒဏ် မာၚ် (ဗမ်) ဒးဒုၚ်ကုတ်လဝ်ဇိုၚ်မွဲဒိုဟ် နာဲဗၠာဲ ကွာန်ဟံဂါမ် ကၠောန်လဝ်ကၠအ် ပ္ဍဲဗၟံက်ကွာန်ဌာန်ဇၞူဂှ် ဟီုရ။
ဒေသ မာၚ် (ဗမ်) ခတိုဟ်ဒၟံၚ်ဂှ်ဝွံ ဂကောံရပ်လွဟ် ဗော်ဍုၚ်မန်တၟိကဵု ဗော်စန်ဒက်ကရေၚ် (ကေအေန်ယူ) တံ ဒှ် ထုဲထံၚ်ပရေၚ်တိဍာ်ကီု၊ ဒှ်ပဋိပက္ခ ပရေၚ်ကုတ်ထဗိုၚ်ဆုကီုတုဲ ကေၚ်ဒှ်လဝ်ပေဲါဗတိုက်ညးသ္ကံနွံရ။
မာၚ် (ဗမ်) ခတိုဟ် အလန်လက္ကရဴအိုတ်ဏံ တုဲကၠုၚ်ဂိတုအံက်တဝ်ဗာ (၈) ဂှ် မၞုံယၟု နာဲမန်ဆာန် အဃောအာၜံက် ခဲါခၟဲါၜုက် ပ္ဍဲကၠအ်သတ် ဗၟံက်ကွာန်ဌာန်ဇၞူ ပွိုၚ်ဍုၚ်ဍာ်ဗု ဒေသဂြိုပ်ဝါဂြၚ်အေက်ဂှ် လိုန်ဒးမာၚ် (ဗမ်) မခတိုဟ်တုဲ ဇိုၚ်လ္ပာ်ပဲါတုဲ ဒးအာဝပ်ညိညရ။
ပရေၚ်ညးဒေသတံ လိုန်ဒး မာၚ် (ဗမ်) လၟေၚ်အဆက်ဆက်ဂှ် ဟွံအောန်နူကဵု (၆) အလန်တုဲ လ္ၚဵုဒးဒုၚ်ကုတ်အာ ဇိုၚ်နွံ၊ လ္ၚဵုဒးဝပ်ၜိုတ်ဓမ္မတာတုဲ ဟွံဒးကုတ်ဇိုၚ်နွံရ။