Category: ဂလာန်ညးဒါန်လိက်

သၟာပရေၚ်ဍုၚ်ကွာန် ကောန်ဂကူမန်တံဂှ် ဒုၚ်သ္ဇိုၚ်ကဵု ကြက်ဂလာန် ကံကုသိုလ်ဂကူမန် မန်ဂွံဖန်ဖက်ကေတ်တ်ဂှ် သ္ပမံၚ်တိုၚ်ခဳလၟိုန်ရ။ ညံၚ်ဂွံစိုပ်ကၠုၚ်မာန်ဂှ်လေဝ် စွံလဝ်တိုၚ်ပ္ကဴ ဂၠံၚ်တရဴကောန်ဂကူ နွံမံၚ်ကီုရ။ ၜိုန်ဂှ်လေဝ် တိုၚ်ပ္ကဴရန်တၟံ သဗုၚ်သပါမံၚ်ဖိုဟ်တုဲ အဝဵုပရေၚ်ဍုၚ်ကွာန်လေဝ် ဟွံပြာကတ်ဏီရ။
အဝဵုအုပ်ဓုပ်၊ အဝဵုခၞံသၞောဝ်၊ အဝဵုစဳရေၚ်သၞောဝ်ဓဝ်တံ ပ္ဍဲကဵုအဝဵုပရေၚ်ဍုၚ်ကွာန် (၃) တၚ်ဏံ ကောန်ဂကူမန်ပိုဲ ၜိုတ်လဵုကလိဂွံလဝ်ကီုရော။ ညံၚ်ဂွံကလိဂွံဂှ်လေဝ် ၜိုတ်လဵုကၠောန်ၜိုတ် ရေၚ်တၠုၚ်မံၚ်ကီုရော။ ဟီုကေတ်ကဵုပါၚ် ကြီုကေတ်ကဵုတၞးလိက်သၟးဂှ် သၟတ်ပၟဝ်ဇဝ်ပ္ကဴဍေံ ဒှ်ကၠုၚ်ဟွံသေၚ်ရ။
အခိၚ်လၟုဟ်ဂှ် ဟိုတ်နူကဵု ပရေၚ်ဍုၚ်ကွာန် ရုသံၚ်မံၚ်တုဲ ဒှ်အခိၚ်ကေတ်အခေါၚ်အရာ ပရေၚ်ဍုၚ်ကွာန် ခိုဟ်အိုတ်ရ။ ဇြဟတ်ညးတၞဟ် ထကးပြးမံၚ်ဂှ် အခေါၚ်အရာ သွက်ဂကူဇကုလေဝ် ဒှ်မာန်မံၚ်ရ။ မိက်ဂွံဒက်မိတ် ကေတ်ဇြဟတ်ကဵု ကောန်ဂကူဘဝတုပ်တံလေဝ် ဂၠာဲလောဲမံၚ်ရ။ အကြာဏံ ညံၚ်ဂွံကေတ် အခေါၚ်အရာလေပ်ဂှ် ပၟိက်ဇၞော်မံၚ်ရ။
ရံၚ်ကေတ် ခေတ်ကာလလၟုဟ်မ္ဂး အဆံၚ်ဒက်ပ္တန်အဝဵုတၞဟ်ခြာဂှ် ဍေံဟွံလောဲသွာဏီ၊ ဒးကၠောန်အာသိုက်က် လေဝ် ဒှ်မာန်ဏောၚ်။ ပစ္စုပ္ပန်ဏံ ဒုၚ်သ္ဇိုၚ်ကဵု လညာတ်ဖေဝ်ဒရေဝ်တုဲ ညံၚ်ဂွံကသေအ်ကၟဝ် ကောန်ဂကူဘဝတုပ်တံတုဲ သွက်ဂွံဒက်ပ္တန် အဝဵုပရေၚ်ဍုၚ်ကွာန် သၠဲပ္တိုန် ဗွိုၚ်သြဇာတဴတံထေက်ရောၚ် ညာတ်ကေတ်ရ။
ညးဍုၚ်ကွာန်တံလေဝ် ပရေၚ်ဍုၚ်ကွာန်ဂှ် ဟွံဆက်စပ်ကဵုပိုဲ သ္ပလဝ်မဇ္ဇျဟ် ဟွံဂွံရ။ ဇၟာပ်မၞိဟ် ဇၟာပ်အရာဂှ် ဆက်စပ်မံၚ်ကဵု ပရေၚ်ဍုၚ်ကွာန်ဖအိုတ်ရ။ ဖအိုတ်အခိၚ် ကၠောန်ပရေၚ်ဍုၚ်ကွာန် တိုက်ရိုက်ဟွံမာန်လေဝ် ကမၠောန်ဆက်စပ်မံၚ်ကဵုဇကုဂှ် မွဲနဲမွဲဗီု ဒးကဵုဇြဟတ်ထေက်ရ။
သၟာပရေၚ်ဍုၚ်ကွာန်တံလေဝ် ပ္ဍဲကဵုအခိၚ်ကာလလၟုဟ်ဂှ် ပရေၚ်ချဳဓရာၚ် အောန်မံၚ်ရ။ ဗီုလဵုဒှ်ဒှ် ပၞော်တိတ် ဒးနွံ၊ ဒးဂၠာဲ အခေါၚ်အရာလေပ်ရ။ သ္ၚိတ်ဇြ ပၞုက်လဝ်ဇကုဂှ် ဍေံဒှ်ဟွံထေက်ရ။ အခက်ခုဲဇကု နွံမံၚ်ဗီုလဵု ဒးလဴကလးကဵု ညးထံက်ဂလာန် မၞိဟ်နိဿဲမံၚ်ကဵု ဇကုတံ ထေက်ရ။ အခေါၚ်အရာနွံလေဝ် ညံၚ်ဂွံဂတာပ်အခိၚ်ဂှ် ဒးလးဖျေံကဵု ဗွိုၚ်ဇကုတုဲ ညံၚ်ဂွံၜှ်ကေတ်တိုၚ်ပ္ကဴမာန်ဂှ် ဒးစန်ဒက်အာထေက်ရ။
ဟိုတ်ဂှ်ရ ကောန်ဂကူမန်တံလေဝ် လ္တူလညာတ် သၟာပရေၚ်ဍုၚ်ကွာန်တံ လးမံၚ်ဂှ် ညံၚ်ဂွံကၠးလဝ်ကီု လ္တူဂၠံၚ်တရဴပရေၚ်ဍုၚ်ကွာန် ဂကောံရပ်လွဟ်ပၠန်ဂတးတံ ဂိုတ်ဂစာန်မံၚ်ဂှ်လေဝ် ဒးတီလဝ်ထေက်ရ။ ပ္ဍဲဗွိုၚ်ပရေၚ်ဍုၚ်ကွာန် ကောန်ဂကူမန် ညံၚ်ဂွံဂွံအခေါၚ်အရာ၊ အဝဵုပိတန်မာန်ဂှ် ညးညးအဲအဲ ဘိုၚ်ပူဗိုၚ်အာအိုတ်ညိဂှ် ဖတိုက်ဖအောဝ် ဆဝ်မ္ၚုဟ်ဏာရ။

အခိၚ်ကာလလၟုဟ် ပ္ဍဲကဵုဒေသပိုဲ အဆံၚ်ပေဲါဗတိုက်ဂှ် ဟွံဒှ်ကၠုၚ်ဏီကီုလေဝ် ပရေၚ်ဖံက်ခတိုဟ် ပရေၚ်ဂစိုတ်ဂမျိုၚ်တံ ဒှ်ကၠုၚ်မံၚ်ရ။ ကိစ္စတံဏံဂှ် ဍေံဒှ်မံၚ် အကြာပွဳဗွိုၚ် ဒၞာဲကြပ်ကဵုညးဍုၚ်ကွာန်တံဟေၚ် ဒှ်ကၠုၚ်မံၚ်တုဲ အခိၚ်ဟွံရုဲ ဒှ်ဒဒိုက်မာန်မံၚ်ရ။
ပရေၚ်အာကၠုၚ်လေဝ် ဒၞာဲစၟဳစၟတ် ဂၠိုၚ်တိုန်မံၚ်ရ။ ညးလ္ၚဵုတံ ဂွိၚ်ဖေက်ဟီုသှ်ဟွံဒး ဒးဒုၚ်ရပ်တုဲ ဟွံဂံၚ်အာကၠုၚ်လေဝ် နွံမံၚ်ရ။ ရဲအာကၠုၚ် ရဲလ္ၚောဝ်ကျာ်တံလေဝ် သ္ပဟိုတ်ကဵုကပေါတ်ဆက်စၠောံ မုက်လိက်ပရေၚ်မၞိဟ်၊ ဗီုရုပ်တံတုဲ ဒးဒုၚ်ရပ်လေဝ် နွံမံၚ်ရ။
မွဲသာ်ပၠန် ညးမဆက်စပ်ကဵု မၞိဟ်ညးတံနွံပၟိက်၊ မၞိဟ်ညးတံ မိက်ဂွံရပ်စောဲဂဗုတ်တံလေဝ် ဒးဒုၚ်ရပ်၊ ဒးဒုၚ်စၟဳစၟတ်၊ ဒးဒုၚ်သၠာဲကဵု မၞိဟ်ညးတံမိက်ဂွံဂွံလေဝ် ကေၚ်နွံကၠုၚ်ရ။ ကိစ္စဏံဂှ် ရံၚ်ကဵုအခေါၚ်အရာမၞိဟ်မ္ဂး ဍေံဟွံဒးသၞောတ်ရ။ မၞိဟ်ဟွံဆက်စပ်တံ ဒှ်အာမံၚ်ဒဒိုက်ရောၚ် ညာတ်ကေတ်ရ။
ပရေံအိုတ်ဂှ် ဂိတုတုဲကၠုၚ်တေံ ညးဍုၚ်ကွာန်ဓမ္မတာမွဲ ဒးဒုၚ်ပန်ဂစိုတ် လ္တူဒဒန်ဍုၚ်ရေဝ်ဂှ် သွက်ညးဍုၚ်ကွာန်တံ ဒှ်တၚ်ဘပဠဇၞော်ဇၞော်မွဲရ။ ဟိုတ်နူကဵု ဟွံခံၚ်အရေဝ်ဘာသာကီု မၞိဟ်စိုတ်ဇြိုၚ်သာမွဲကီုတုဲ ဟီုသှ်ဟွံဒှ်ဂှ် ဒးဒုၚ်အိုတ်အာလမျီုရ။ ဂွံဖျေံကမ္မဌာန် အာတ်ဇွဟွံဂွံ ဍေံတံစဳဇန် ဖျေံကဵုဂးတုဲ ခရိတ်ဂှ် မိမ ဒးဒုၚ်ဖအိုတ်ပၠန်ရ။
ကိစ္စအမှုအရာ ဒှ်ကၠုၚ်မွဲမွဲသာ် အရၚ်ဂွံကလေၚ်ပရေ ဂွံဂၠာဲပရေၚ်သၟဟ်တးတံ အခေါၚ်အရာ အောန်ကၠုၚ်ရ။ ညးဍုၚ်ကွာန်တံ ဂွံဗဒဗဒဲါ ဒၞာဲဌာန်ဒတန် ဇၞူဒလာဲ သုန်ဂြာံမံၚ်ရ။ ပ္ဍဲကဵုဌာနန္တရ ကံၚ်ဇြဳအဆံၚ်ၚ်ဂှ် မၞိဟ်ဒုၚ်ယၟု သ္ပစၞးကောန်ဂကူတံ ပါလုပ်မံၚ်ကီုလေဝ် ညးတံ သ္ပမံၚ်မဇ္ဇျဟ်သၟးဂှ် ဂွံဆဵုကေတ်ကီုရ။ ပြာပြာကတ်တ် ထ္ၜးလဝ် အယောၚ်အလာ ဟွံဆဵုဏီရ။
ပ္ဍဲကဵုဒေသပိုဲ ပရေၚ်ထပက်ပၞာန် အဆံၚ်ပေဲါဗတိုက် ဟွံဒှ်ကၠုၚ်ကီုလေဝ် ပရေၚ်ဖံက်ပကဝ် အခေါၚ်အရာမၞိဟ်တံဂှ် ဍေံဒှ်ကၠုၚ်မံၚ်ရ။ ညးဍုၚ်ကွာန်တံလေဝ် ဒးမံၚ်စံၚ်ကဵုဓဝိၚ် ညးနွံတာလျိုၚ်တံ ဒးစွံဂရုထေက်ရ။ ဒးဘိုၚ်မၚ်မွဲထေက်ရ။
ဟိုတ်ဂှ်ရ ညးဍုၚ်ကွာန်တံ ဂွံဂီုကၠီု၊ ဂွံၜိုဟ်လလမ်၊ ဂွံဂျိုၚ်တန်တဴအာ ဗွဲတသိုက်မာန်ဂှ် အလဵုအသဳကီု ဗော်ပရေၚ်ဍုၚ်ကွာန်ကီု ဂကောံရပ်လွဟ်နာနာတံကီု ဂကောံနာနာတံကီု မဟာဇန်တံကီု အလဵုညးဍုၚ်ကွာန်တံကီု ဘိုၚ်မၚ်မွဲရံၚ်စံၚ်အာညိဂှ် ဖတိုက်ဖအောဝ်ဏာရ။

အတိုၚ်အသိၚ်အလိုန် ပရေၚ်ဍုၚ်ကွာန်ဂှ် ဂကောံရပ်လွဟ်တံ ထ္ၜးကၠုၚ် ပရေၚ်ပကီုပရာပ် လ္တူညးဍုၚ်ကွာန်တံရ။ ပညပ်ထောံ ဂကောံဇြဟတ်တၞဟ်ဟ်တံ ပကီုပရာပ်ကၠုၚ် လ္တူညးဍုၚ်ကွာန်တံရ။ ဂကောံရပ်လွဟ်ဇြဟတ်တုပ်တံ ရေၚ်ကာန်ညးသ္ကံဂှ် ဒှ်ဓမ္မတာကီုလေဝ် ဍဵုဍိုက်သ္ပမာန် စွံကၠုၚ်ပွန် လ္တူညးဍုၚ်ကွာန်ဂှ် ဒှ်ဟွံထေက်ရ။
မွဲဟူဏံ ပ္ဍဲကဵုပွိုၚ်ဍုၚ်ရေဝ်သၠုၚ်ကျာတေံ ဒပ်ပၞာန်အလဵုအသဳတံ ရပ်ကော်ဏာမၞိဟ် ညးဍုၚ်ကွာန်ဓမ္မတာတံနွံရ။ ဒှ်မံၚ်မသ ဆက်စပ်မံၚ်ကဵု ဂကောံရပ်လွဟ် ဗက်မံၚ်သြန်ညးဍုၚ်ကွာန် ဂးတုဲ သွက်ဂွံစၟဳစၟတ် ကော်ပၠောပ်ဏာလဝ် ဒပ်ပၞာန်ရ။ ဟိုတ်နူဒှ်မံၚ်မသ အစေန်အဆက်တုဲ ဗက်္ၚာ်မံၚ် ညးဍုၚ်ကွာန်တံဂှ် အဆံၚ်ဒးဒှ်ဓဝိၚ်ရ။
မွဲသာ်ပၠန်ဂှ် ကောန်ဍုၚ်ခေါဇာမွဲတၠဂှ်လေဝ် ဍေံကော်သၟာန်ဂှ် ဟွံကလေၚ်ဟီုဂှ်ရ ဒးဒုၚ်ပန်ဂစိုတ်လဝ် လ္တူဒဒန်သၞေဟ်ကာ ဍုၚ်ရေဝ်ဂှ် နွံကၠုၚ်ပၠန်ရ။ ဟိုတ်နူကဵု ဟွံတီအခိုက် ပရေၚ်ဂီုကၠီု ဖေက်လကိုတ်တုဲ ဂတးကလေၚ်ထောံဂှ် ပန်စုတ်ကဵုလွဟ်တုဲ ဒးဒုၚ်ချိုတ်အာရ။
ပ္ဍဲကဵုပရေၚ်ပကီုပရာပ် လ္တူညးဍုၚ်ကွာန်တံဂှ် ပညပ်စုတ်လဝ် ဆက်စပ်ကဵု ဂကောံရပ်လွဟ်သၟးရ။ ပရေၚ်သောၚ်ကလးကီု ပရေၚ်အုပ်လဒမ်သၞောဝ်ဓဝ်ကီု အဆံၚ်ဒးဒှ်မံၚ်ဓဝိၚ်ရ။ တုပ်အာကဵု အခေတ်ကၠာတေံပၠန်ရ။ ဂကောံရပ်လွဟ် (ဒမၠ) တံ ဗက်ကေတ်ဏာလဝ် သြန်ညးဍုၚ်ကွာန်တံမ္ဂး ညးဍုၚ်ကွာန်တံဂှ် ဖေက်ဘဲလမျီုတုဲ ဒးကဵုဏာမံၚ်ရ။ ဟိုတ်နူကဵုဏာ ဂကောံရပ်လွဟ် (ဒမၠ) တံဂှ် ဒပ်အလဵုအသဳတံ ကလေၚ်ဓရတ် ညးဍုၚ်ကွာန်တံပၠန်ရ။
ညးဍုၚ်ကွာန်မန်ဂှ် ဂကောံရပ်လွဟ်ကီု ဂကောံဒမၠကီု ဒပ်ပၞာန်အလဵုအသဳကီု ဒးဖေက်မံၚ်ဖအိုတ်ရ။ ဒှ်ဓဝိၚ် ဂွိၚ်ဂွာဲမံၚ် ပရေၚ်ဂီုကၠီုဇကုရ။ ဒပ်ဍတ်ပါ် အကြာညးဍုၚ်ကွာန်တံလေဝ် ကလေၚ်ကဵုမံၚ်ဘဲ ပကီုပရာပ်မံၚ် လ္တူညးဍုၚ်ကွာန်တံလေဝ် နွံမံၚ်ရ။
ညးမဆေၚ်စပ်တံလေဝ် ဘိုၚ်လုပ်ပသောၚ်ကဵုပြသၞာဂှ် ဟွံမိၚ်ဏီရ။ ပ္ဍဲကဵုကံၚ်ဇြဳ ပရေၚ်အုပ်ဓုပ်တွဵုရးလေဝ် ညးစၞးဗော်မန်၊ ကောန်ဂကူမန်တံ ပါလုပ်မံၚ်နွံရ။ ပ္ဍဲကဵုအရာဏံ ဒးဘိုၚ်ကေတ်လျိုၚ်ထေက်ဏောၚ် ညာတ်ကေတ်ရ။
သွက်ပရေၚ်ဂီုကၠီု ကောန်ဂကူမန်တံဂှ် အဆံၚ်ဒှ်ဓဝိၚ် စိုပ်ကၠုၚ်မံၚ်တုဲ ညးသြဇာနွံတံဂှ် ဘိုၚ်ပါလုပ် သောၚ်ကလး ဘိုၚ်ကေတ်ကဵုလျိုၚ်အိုတ်ညိဂှ် အာတ်မိက်ဏာရ။

အခိၚ်ကာလလၟုဟ်ဂှ် ပရေၚ်ဍုၚ်ကွာန်ကောန်ဂကူမန်ဂှ် ဗက်မံၚ်လက္ကရဴညးတၞဟ် အဆံၚ်ဗက်သ္ကအ်ရ နွံမံၚ်တုဲ အဆံၚ်ပၠတရဴကောန်ဂကူဂှ် ညံၚ်ကဵုအသိၚ်ဍိုန်စှေ်မံၚ်ရ။ ၜိုန်ရလုပ်ကေတ်လဝ်ဒၞာဲ ပ္ဍဲကဵုဂကောံဗွိုၚ် သြဇာသၠုၚ်တံမာန်ကီုလေဝ် ဂွံထ္ၜးသြဇာဇကုဂှ် စဵုလၟုဟ် ဟွံပြာကတ်ဏီရ။ ဒးမံၚ်ဓယံက် ညးသၟာၚ်ရ။
ရံၚ်ကဵုဝၚ်ပေဲါရုဲမာဲ သၞာံတုဲကၠုၚ်မ္ဂး ညးလုပ်ပြိုၚ် စၞးဗော်မန်သၟးဟွံက စၞးပူဂဵု ထ္ၜုတ်ပ္တိုန်ကေတ်တ် လုပ်ၜေတ်ကေတ်ဒၞာဲ ဂံၚ်ပြိုၚ်ကၠုၚ်လဝ်နွံရ။ ဒၞာဲလုပ်ပြိုၚ်ထေက်သၟးဟွံက က္ဍဟောဝ်လုပ်ပြိုၚ်အတေၚ်လေဝ် နွံကၠုၚ်လဝ်ရ။
အခိၚ်လၟုဟ်ဂှ် ကဏ္ဍဗွိုၚ်ဗော်ပရေၚ်ဍုၚ်ကွာန်တံ မုချဳဓရာၚ်မံၚ်ဏီဂှ် မၞိဟ်တံဟွံတီရ။ ပံက်လဝ်ရုၚ်ဏီဟာလေဝ် ဟွံပြာကတ်ရ။ ဂၠံၚ်ဍာန်ပရေၚ်ဍုၚ်ကွာန် ကၠေံမံၚ်ဟာဂှ် ဟီုဟွံမာန်ရ။ သၟာပရေၚ်ဍုၚ်ကွာန်တံလေဝ် ယောန်လုပ်အာ ဗွိုၚ်ပရဟိတလေဝ်နွံ ပၞုက်ဇကုအောပ်ဗဒမံၚ်လေဝ် နွံရ။
အတိုၚ်အသိၚ်အလိုန် ပရေၚ်ဍုၚ်ကွာန်လၟုဟ်ဂှ် ဒပ်စဵုဒၞာညးဍုၚ်ကွာန် ပဳဒဳအာပ်တံလေဝ် ဇြဟတ်ဇၞော်ကၠုၚ်ရ။ ပၠန်ဂတးညးတံ အသိၚ်ခိုဟ်ကၠုၚ်မ္ဂး ဍေံဇီုကပိုက်ကၠုၚ်ကဵု ပရေၚ်တိဍာ်မာန်ပၠန်ရ။ ပ္ဍဲကဵုတိဍာ် ဗော်ဍုၚ်မန်တၟိ သြဇာတဴတံ အဆံၚ်ဒးသၠးကဵုဏာ ဒှ်မာန်ရ။ ကိစ္စဏံဂှ် ဟွံဆက်စပ်ကဵု ဗော်ဍုၚ်မန်တၟိ တိုက်ရိုက်ကီုလေဝ် အခိၚ်ဒပ်ပၞာန်အလဵုအသဳကဵု ပဳဒဳအာပ်တံ ပ္ကာန်ရေၚ်သ္ကံတုဲ ဒပ်ပၞာန်အလဵုအသဳ လုပ်ထိၚ်ဒေသတိဍာ်ဇကုလေဝ် ဒှ်မာန်ရ။ ပဳဒဳအာပ်တံ ကေတ်ဒၞာဲဖျေံသ္ဇိုၚ် ဒၞာဲတိဍာ်ဇကုလေဝ် ဒှ်မာန်ရ။
သ္ၚဳဂၠိပ်ကေတ် အကာဲအရာလၟုဟ်တုဲ ဇြဟတ်ဗွိုၚ်ပရေၚ်ဍုၚ်ကွာန်ဂကူမန် ပစ္စုပ္ပန်ဏံ ဂွံဒုၚ်ခဳအာ ပ္ဍဲကဵုလပှ်ပရေၚ်ဍုၚ်ကွာန် အဆံၚ်စေဝ်လ္တူဂှ် ဟွံညာတ်ဍာန်ရ။ အဆံၚ်ဟဳဇွောဝ် ဗက်အလိုက်ဍာ်ဇၟောဝ်ပရေၚ်ဍုၚ်ကွာန် ညံၚ်ဟွံဂွံတၞီအာဟေၚ် သ္ပမာန်တုဲ အခေါၚ်အရာ ပရေၚ်ဍုၚ်ကွာန် သြဇာပရေၚ်ဍုၚ်ကွာန် ဗွိုၚ်ဍန်စှေ်မံၚ်ရ။
ကောန်ဂကူမန် ဗွိုၚ်နာနာတံလေဝ် ပရေၚ်ဍုၚ်ကွာန်ဏံ ၜိုတ်သၟဟ်အစောံဂှ် ဒးကၠောန်ဟေၚ်ရ။ ဟွံဆက်စပ်ကဵုပိုဲ ပဲါမံၚ်က္ဍိုပ်မ္ဂး ပ္ဍဲကဵုကဏ္ဍပရေၚ်ဍုၚ်ကွာန်ဂှ် စိုပ်အာမ္ၚးစေဝ်တုဲ သြဇာပရေၚ်ဍုၚ်ကွာန်ဂှ် သွက်ဂွံက္ဍန်ဂြက်အာဟေၚ် နွံမံၚ်ရ။
ဟိုတ်ဂှ်ရ ဗော်ပရေၚ်ဍုၚ်ကွာန်မန်ကီု သၟာပရေၚ်ဍုၚ်ကွာန်မန်ကီု ညးဍုၚ်ကွာန်မန်ကီု နူကဵုဗွိုၚ်နာနာဂှ် အခေါၚ်အရာ ပရေၚ်ဍုၚ်ကွာန် ကောန်ဂကူမန် သြဇာဂွံတဴကၠုၚ်မာန်ဂှ် ဒးလွဳပရာ ဒးပ္တိတ်အာဇြဟတ် သီုညးဖအိုတ်ရောၚ်။

ခေတ်ကာလလၟုဟ်ဝွံ ပရေၚ်ဆက်စၠောံ၊ ပရေၚ်ဆက်ဆောံဗွဲမဂၠိုၚ်ဂှ် ဒုၚ်သ္ဇိုၚ်ကဵု ကွတ်နဲပညာ ဂတာပ်ခေတ်တံ ဂၠိုၚ်ကၠုၚ်ရ။ ကွတ်နဲပညာဂတာပ်ခေတ် ကွတ်အာၚ်တဳ (Information Technology) တံဂှ် ကေတ်ကၠုၚ်ဒၞာဲ ပ္ဍဲကဵု ပွဳဗွိုၚ်မၞိဟ်ပိုဲရ။
သွက်ဂွံထိၚ်ကြာပ်အာ အမှုဂဗုတ်၊ ပရေၚ်ပရော ဒုၚ်သ္ဇိုၚ်ကဵု ကွတ်နဲပညာတုဲ အလဵုအသဳဍုၚ်တံ ချူခၞံကၠုၚ်လဝ် သၞောဝ်ဥပဒေလေဝ်နွံရ။ ၜိုန်ဂှ်လေဝ် ကိစ္စဆက်စပ်ကဵု အလဵုအသဳဟေၚ် ညးတံ ရပ်စပ်စကာ ကေတ်အရေဝ်ဂၠိုၚ်ရ။ ဆက်စပ်ကဵုပရေၚ်မၞိဟ် ပရေၚ်ပူဂဵုဂှ် အလဵုပူဂဵုတံ ဒးဝေၚ်ကေတ်ဂဗုတ် ဒးဗက်စအမှုကေတ်တ်ရ။
မွဲသာ်ပၠန်ဂှ် ပ္ဍဲကဵုမုက်လိက်ပရေၚ်မၞိဟ်တံ ညံၚ်ဂွံကိတ်ညဳကဵု မူဝါဒမှာဇန် (Community Standard) ဂှ် စွံပ္တန်ခါန်ကၞက်ကၠုၚ် မၞိဟ်မၚ်ရံၚ် သ္ၚဳဂၠိပ်တၚ်နၚ်တံနွံရ။ ညးတံသ္ၚဳဂၠိပ် သ္ပအဓိကကဵု ပရောပရာ ညးဂမၠိုၚ်ဗဵုရံၚ်ထေက် ဟွံထေက်၊ ဇီုကပိုက်ကဵု ဗွိုၚ်တၞဟ်သၟာၚ်၊ ဍဵုဍိုက် ရုန်မဵုတံရ။
ပ္ဍဲကဵုမုက်လိက်ပရေၚ်မၞိဟ်ဂမၠိုၚ်ဂှ် Facebook ဂှ် ဍေံစွံပ္တန်လဝ် Facebook team သွက်ကၟိန်ဍုၚ်ဗၟာ နွံမံၚ်ရ။ အပ္ဍဲဂှ် မၞိဟ်ဒုၚ်သ္ဇိုၚ်ကဵု ကောန်ဍုၚ်အရၚ်၊ ဒုၚ်သ္ဇိုၚ်ကဵု ကောန်ဂကူမန်တံဂှ် လၟိဟ်အောန်မံၚ်တုဲ ပရေၚ်ဍဵုဍိုက် သွက်ကောန်ဂကူမန်လေဝ် ကေၚ်နွံကၠုၚ်လဝ်ရ။
ဂိတုအဝ်ဂါတ်ဖာမံက်ဂှ် ပရိုၚ်နူကဵုမုက်လိက်ဌာန်ပရိုၚ်မန်ပိုဲ မၞိဟ်ပါ်ပရအ်လဝ် ပ္ဍဲကဵုမုက်လိက်ပူဂဵုတံဂှ် ဟွံကိတ်ညဳကဵု မူဝါဒ Facebook တုဲ ဍေံတံ ပလှ်ဖျေံထောံ ကြပ်အိုတ်ရ။ ဗွဲကြဴဏံ ဍေံကလေၚ်ဒုၚ်ဂုဏ် ကလေၚ်ဓမံက်ကဵုပၠန် ဒှ်ကၠုၚ်လဝ်ရ။
ယဝ်ရ ပ္ဍဲကဵုဂကောံဍေံတံဂှ် ကောန်ဂကူမန် ညးစိစောန် တၠကွတ်နဲပညာတံ နွံမံၚ်ကီုမ္ဂး အဆံၚ်ဏံ ဍေံဟွံဝါတ်၊ ဍေံဟွံဒှ်ခက်ခုဲရ။ ညံၚ်ဟွံဂွံဍဵုဍိုက် လ္တူဗွိုၚ်ဂကူမန်ဂှ်လေဝ် ဒှ်ပရေၚ်စဵုဒၞာမွဲမာန်ရ။
ဟိုတ်ဂှ်ရ ကောန်ဂကူမန်ပိုဲတံ ပ္ဍဲကဵုကဏ္ဍကွတ်နဲပညာဂှ် လပါ်အာၚ်တဳလေဝ် ကတ်လ္ၚတ်ညံၚ်ဂွံစိစောန်တုဲ လုပ်ကေတ်ဒၞာဲ ပ္ဍဲကဵုကဏ္ဍဖျေံသ္ဂုတ်သွာတ်မာန်ညိဂှ် ဖတိုက်ဖအောဝ်ဏာရ။

ပ္ဍဲကဵုလိုက်လောကဏံ မၞိဟ်မနွံကဵုစိုတ်ခိုဟ်စိုတ်ပြဲတံ သၠးဖိုလ်ပူဂဵုတုဲ ကၠောန်မံၚ်ကမၠောန်ပရဟိတရ။ လ္တူကမၠောန်ပရဟိတံဂှ် အခေါၚ်ဒုၚ်စသိုၚ် ပဲါနူကဵုတသိုက်အဓာန်ဂတတုဲ ပစ္စုပ္ပန်ဏံ ပရဲဟွံမွဲရ။ ၜိုန်ဂှ်လေဝ် နကဵုစေတနာခိုဟ်ပြဲ ယိုက်ဂၠေၚ်မံၚ်တာလျိုၚ် ပရဟိတတံဂှ် ဂွံဆဵုကေတ်ကီုရ။
ပ္ဍဲကဵုဇွိုန်လပှ်ယဲကပ်ကိုဝ်ဝေဒ်ဏံ ကဏ္ဍပရဟိတဂှ် ပြာကတ်ကၠုၚ်တုဲ အဆံၚ်ကွာန်၊ အဆံၚ်ဒေသ၊ အဆံၚ်ကောန်ဂကူတံ ပံက်ဂကောံတုဲ ရေၚ်တၠုၚ်တိုန်အိုတ်ရ။ ညးလ္ၚဵု မၚ်မွဲဂၠံၚ်ဍာန် လုပ်တိတ်ကွာန်၊ ညးလ္ၚဵု ဘိုၚ်ကၠောန်သွက် Quarantine ကီု ညးလ္ၚဵု ဘိုၚ်ရေၚ်တၠုၚ်ကဵု သွက်မၞိဟ်ယဲကိုဝ်ဝေဒ်တံရ။ စဵုကဵုအဆံၚ်ချိုတ်ဂျိုၚ်ဂှ် ဒးပသ္ပပဓာန်ကဵု ရဲပရဟိတသၟးရ။
ဟိုတ်နူကဵုအသိၚ်လျတ်ယဲကပ်ဏံ သွက်ရဲဒှ်ကၞောဝ်ကၠောဝ်ဗျဵုတံကီု သွက်ရဲပရေၚ်ကမၠောန်ဟွံပြေပြံၚ် သက်ပဓာန်စဟွံမွဲတံဂှ် ဂကောံပရဟိတ၊ ညးလ္ၚဵုတံ ဘိုၚ်ရေၚ်တၠုၚ်ကဵုဒါန် ဇွောံမတံ နွံပၠန်ရ။
တၠဳလပိုန်သၚ်တံလေဝ် သ္ပတိုၚ်ခဳ ဒုၚ်ဒါန်တုဲ သွက်ဂွံသိုၚ်ရုၚ်စက်အံက်ဇြဳဂျေန်ကီု ပရေၚ်ပါ်ပရအ် အံက်ဇြဳဂျေန်ကီု စပ်ကဵုပရေၚ်ရီုဗၚ်ဟံၚ်ပြာ် ပရေၚ်မၞိဟ်တံ ပါလုပ်ကၠုၚ်မံၚ်ကဵုဇြဟတ်ဂှ် ဂွံဆဵုကေတ်ကီုရ။
စပ်ကဵုကမၠောန်ပရဟိတတုဲ ဇၟာပ်ပ်အရာ ကၠောန်သ္ပမံၚ်တံဂှ် ဂပ်ဝ်ထိုၚ်သးမံၚ်ဖအိုတ်ရ။ ဆဂး ညးလ္ၚဵုဂှ် ဟိုတ်နူကဵု ပရေၚ်ဇီုကပိုက်ကဵု ပူဂဵုညးတံ နွံကၠုၚ်တုဲ ဂၠာဲဂလာန်လ္တူရဲပရဟိတတံ နွံလေပ်ရ။ ဗီုလဵုဒှ်ဒှ်ရ လ္တူကမၠောန်ပရဟိတ ညံၚ်ဂွံဇၞော်မောဝ်တဴတက်တိုန်မာန်ဂှ် ညးအဲ ဒးထ္ၜလဘာ်ထေက်ရ။
တၠပိုန်ဂြပ်တံကီု ညးဍုၚ်ကွာန်ဓမ္မတာတံကီု တၠသဒ္ဓါ၊ တၠစေတနာတံ ၜိုတ်သၟဟ်အစောံဂှ် ဘိုၚ်ကဵုဒါန် ဘိုၚ်ပတုဲဖိုလ် သွက်ဂကောံပရဟိတံ နွံကီုရ။ ညံၚ်ဟွံဂွံသ္ကုတ်အာ ညံၚ်ဂွံဆက်ရေၚ်တၠုၚ်ကဵုအာမာန်ဂှ်လေဝ် ဒးသ္ပပဓာန်ကဵု တၠဒါန်တံဟေၚ်ရ။ ဘိုၚ်ကဵုဒါန် ထံက်ပၚ် ဂကောံပရဟိတတံအိုတ်ညိ။
လ္တူဂကောံပရဟိတ၊ သၟာပရဟိတံ ရေၚ်တၠုၚ်ဘိုၚ်ကၠောန်မံၚ်တံဂှ် သ္ပစၟတ်သမ္တီ ပ္တိုန်ဂုဏ်စရာဲတုဲ ညံၚ်ဂွံတတ်ကၠောံအာ ဘဲအန္တရာယ် ယဲကပ်ဏံမာန်ဂှ် လွဳပရာအာ သီုညးဖအိုတ်ညိဂှ် ဖတိုက်ဖအောဝ်ဏာရ။

ဝၚ်ဟီုဂှ် သွက်ဂကူမွဲ ဒှ်စရာဲသိက္ခာရ။ ဝၚ်ဇကု ညံၚ်ဟွံဂွံကၠေံကၠက် အစေန်အဆက် ဂွံသှ်ၜေက် ဂိုတ်ဂစာန် စၟတ်သမ္တီကၠုၚ်မံၚ်ရ။ ဝၚ်အတိက် ဂွံမံၚ်လဝ်ကဵု က္ဍိုၚ်ဗ္တာၚ်နန်ထဝ်တံဂှ်လေဝ် ဒှ်မံၚ်စရာဲဂကူ စဵုလၟုဟ်ဏီရ။ လိက်ပတ်မန် ကေၚ်ပြာကတ် ခိုၚ်ကၠိုက်ကၠုၚ်လဝ် ဗွိုၚ်သၠဲသၠဲလးလးဂှ်လေဝ် ဝၚ်ဟေၚ်ဓမံက်ထ္ၜးမံၚ်ရ။
အခိၚ်လၟုဟ်ဝွံ စပ်ကဵုဝၚ်ဂကူမန်တုဲ အ္စာဝၚ်ဂကူဗၟာညးလ္ၚဵုတံ ဍဵုဍိုက် ကေတ်ကၠုၚ်မံၚ် စေဝ်လ္တူရ။ ကပေါတ်တြေံတြဟ် ဗွဲမဂၠိုၚ်ဂှ် ဍေံတံသ္ပထောံ ကပေါတ်ပျူဗၟာဂှ် ကၠုၚ်နူကဵုပျူရောၚ် ဂးတုဲ အုပ်ဓလီုကၠုၚ် ဝၚ်ဂကူမန် နွံမံၚ်ရ။
လ္တူအ္စာဝၚ်ဗၟာတံ ဍဵုဍိုက်ကၠုၚ်မံၚ်ဂှ် တၠပညာဝၚ် ဂကူမန်တံ နကဵုသက်သဳသုတေသန သက်သဳဝၚ်တံဂှ် ကလေၚ်ပၠန်ကၠုၚ်မံၚ်လၟေၚ်ၚ်ရ။ နကဵုအဆံၚ်အလံၚ် စရာဲပညာနွံနွံ စဵုဒၞာမၚ်မွဲကၠုၚ်လဝ် ဝၚ်ဂကူမန်ရ။
အခိၚ်လၟုဟ်ဝွံ ဒးဘဲယဲကပ်တုဲ တၠပညာဝၚ်ဂကူမန်တံ မွဲတုဲမွဲပၠန် ဇဳဝအိုတ် ဒးစုတိအာရ။ ၜိုန်ဂှ်လေဝ် သက်သဳညးတံထ္ၜးလဝ်ဂှ် သှေ်မံၚ် ပ္ဍဲကဵုလိက်ဝၚ်ဏီရ။ လိက်ညးတံချူလဝ်ကီု သုတေသန ညးတံကၠောန်လဝ်ကီု သွက်ဂွံဒးဆက်ပခိုၚ်အာဂှ် စိုပ်ကၠုၚ်တာလျိုၚ်ကောန်ဂကူမန်တံ သီုဖအိုတ်ရ။
ဗွဲတၟေၚ်မ္ဂး ပရေၚ်ပညာ တဝ်ပၞးကဵု ညးတၞဟ်ဟွံမာန်မ္ဂး ဂွံဟီုဂး ပၠန်ဂတးကဵု ရဲဍဵုဍိုက်တံ မွဲစၚ်မာန်ဂှ် ဍေံဟွံလောဲရ။ ၜိုန်ရဂကူမန်တံ တီမံၚ်ဝၚ်ဂကူမန် ဇပ်ဍပ်ကီုလေဝ် ယဝ်ရ ဒးဟီုဂး ဒးပြိုၚ်ပ္ကာန်မ္ဂး စရာဲပညာဂှ် ဍေံဟီုအရေဝ် ကဵုကၠုၚ်သ္ဂုတ်သွာတ်ရောၚ်။
သွက်သၟတ်ကွးဘာမန်တံ စိုတ်ဂွံလုပ်စကဵုဝၚ် ဂွံကတ်လ္ၚတ်အာ ဗွဲမသၠဲလးမာန်ဂှ် ဂကောံမဟာဇန်၊ ဂကောံဗော်သွး ကေုာံ ပူဂဵုထံက်ပၚ်မံၚ် ပရေၚ်ပညာတံလေဝ် ဒးထံက်ပၚ်ကဵု ခရိတ်ကတ်ပညာထေက်ရောၚ်။ စပ်ကဵုဝၚ်ဂကူမန် ဂွံခိုၚ်ကၠိုက် ဂွံပတဝ်ပၞးကဵု ဂကူတၞဟ်မာန်ဂှ် ဒးစွံတိုၚ်ခဳထေက်ရောၚ်။
ဟိုတ်ဂှ်ရ သွက်ဂွံပတဝ်ပၞးကဵု ညးလောကမာန်ဂှ် အဆံၚ်ပရေၚ်ပညာလေဝ် ဒးကေတ်လဝ်တဆိပ်ကြာမဟာ၊ ပါရဂူ ဒံက်တာ စပ်ကဵုဘာသာဝၚ်၊ ဘာသာလိက်ဗၟာ၊ ဘာသာရးဗၟံက် (ပါဠိ)၊ ဘာသာသုတေသနရောၚ်။ ဘာသာအဓိက စပ်ကဵုဝၚ် ဆက်စပ်ကဵု လိက်ပတ်တံဂှ် ဒးဒုၚ်သ္ဇိုၚ်ကဵု ဂကူမန်သၟးရ။ သွက်ဂွံထိၚ်ဒဝ် မၚ်မွဲအာ ဝၚ်ဂကူမန်မာန်ဂှ် သၟတ်မန်တံ စိုတ်လုပ်စကဵု ဝၚ်ဂကူမန်တုဲ ဘာသာမဆက်စပ်ကဵုဝၚ်တံ ကတ်လ္ၚတ်တုဲ ကေတ်အာတဆိပ်ကြာ အဆံၚ်သၠုၚ်ၚ်အိုတ်ညိဂှ် ဖတိုက်ဖအောဝ်ဆဝ်မ္ၚုဟ်ဏာရ။

အသိၚ်ကၠောံထၞာန် ယဲကပ်ကိုဝ်ဝေဒ်နာၚ်တဳ လပှ်တတိယဏံဂှ် သ္ကာတ်မြဟ်ကၠုၚ်မံၚ်တုဲ မၞိဟ်ချိုတ်လေဝ် ဂၠိုၚ်တိုန်မံၚ်ရ။ ညးဍုၚ်ကွာန်တံလေဝ် ဒှ်ဗဟေက် ဖေက်လကိုတ်မံၚ်အိုတ်ရ။ ဟိုတ်ဂှ်ရ သွက်ဂွံတတ်ကၠောံအာ ယဲကပ်ဏံမာန်ဂှ် ဒးလွဳပရာ ဒးပါလုပ်ချဳဓရာၚ် ဗွိုၚ်ဇဳဒိုဟ်ရောၚ်။
ညးဍုၚ်ကွာန်တံလေဝ် ဇကုဇကု ညံၚ်ယဲဟွံဂွံကၠောံ ဒးဒစးဒုၚ် စဵုဒၞာဲလဝ်ထေက်ရောၚ်။ သွက်ညးဒှ်ယဲတံ ဂွံဒှ်အရီုအဗၚ်လေဝ် စၞစသုၚ် ကပေါတ်နာနာတံ ၜိုတ်ဇကုသ္ပမာန်ဂှ် ဘိုၚ်ထံက်ပၚ်ညိ။ သြန်ဟွံမွဲ ကပေါတ်ဟွံမွဲလေဝ် နကဵုဍာ်ဓတ်ကာယ သ္ပတၠစေတနာ ဘိုၚ်ရေၚ်တၠုၚ်ကဵု မာန်မံၚ်ရ။
ဂကောံပရဟိတ ရီုဗၚ်ဟံၚ်ပြာ်မၞိဟ်တံဂှ် ကပေါတ် ကေုာံ တမ်ရိုဟ်မၞိဟ် နွံမံၚ်ရ။ ၜိုန်ဂှ်လေဝ် မၞိဟ်ယဲဂၠိုၚ်တိုန်တုဲ ဇြဟတ်မၞိဟ် ဟွံရုမ်ဂပ်၊ ဇြဟတ်သြန် ဍိုန်လျကၠုၚ်ဂှ်လေဝ် ဂွံမိၚ်ကေတ်ကီုရ။ သွက်ဂကောံပရဟိတတံ ဂွံချဳဓရာၚ် အသိၚ်ခိုဟ်ဟ်မာန် ဒးရီုဗၚ် နကဵုဇြဟတ်မၞိဟ်၊ ဇြဟတ်သြန်တံကီုရောၚ်။
ဂကောံမဟာဇန်တံလေဝ် သွက်ဂွံဒးရီုဗၚ် ပွဳဗွိုၚ်မၞိဟ်ဂှ် ဒးကၠုၚ်တာလျိုၚ် အဓိကကီုရ။ နကဵုဇြဟတ်သြန်၊ ဇြဟတ်မၞိဟ် နွံမံၚ်ပ္ဍဲဂကောံမဟာဇန်ဂှ် ပြံၚ်သၠာဲဗျူဟာ သွက်ဂွံရီုဗၚ်ထံက်ပၚ်အာ ပ္ဍဲကဵုပရေၚ်ယဲကပ်ဏံကီုညိ။
က္ဍိုပ်သ္ကိုပ်ပရေၚ်ဘာသာတံလေဝ် ပ္ဍဲကဵုကိစ္စဂွံတတ်ကၠောံ ယဲကပ်ဏံမာန်ဂှ် ဖျေံမေတ္တာ၊ ဖ္ဍောတ်ပရိုတ်ကီုညိ။ လ္တူနူဂှ်ပၠန် သွက်ဂွံဒှ် အရီုအဗၚ် အထံက်အပၚ် ဇြဟတ်ဇၞော်ဇၞော် ဒှ်ဒတုဲဖိုလ်မြမောဝ်ဂှ် ဒးပကောံပကေဝ်ကဵု မဒါန် သွက်စဵုဒၞာယဲကပ်ဏံကီုညိ။ နကဵုအသိၚ်လျုၚ်သာသနာဂှ် ဖတိုက်ဖအောဝ်ဆဝ်မ္ၚုဟ်၊ သ္ပတိုၚ်ခဳကမၠောန် သွက်ဂွံတတ်ကၠောံယဲကပ်ဏံမာန်ရောၚ်။
အ္စာသဝ်၊ အ္စာဂဥုဲ ညးမလေပ်စိစောန် ကမၠောန်လွဳပရာတံဂှ် ယဝ်ရ ဒေံါဇူလဝ်ကမၠောန်ဒှ်ဒှ်၊ ဟွံကၠောန်ကမၠောန်အလဵုအသဳကဵုဒှ် အတိုၚ်ကွတ်ဇကုမလေပ်စိစောန်ဂှ် ရေၚ်တၠုၚ်ပတုဲဖဵု သွက်ပရေၚ်ထတ်ယုက် ညးဍုၚ်ကွာန်တံအိုတ်ညိ။
အလဵုအသဳလေဝ် သွက်ညးဍုၚ်ကွာန်တံ ဂွံစဵုဒၞာယဲကပ်ဏံမာန် ကပေါတ်အရီုဗၚ်ထံက်ပၚ်တံ ဂွံဂွံလောဲသွာကီု ၚုဟ်မးဒးဒးရးရး ဂွံရာန်မာန်ကီု ဒးထိၚ်ဒဝ် လွဳပရာအာကဵုထေက်ရောၚ်။ ဇြဟတ်အ္စာသဝ်ဝန် ဂွံရုမ်ဂပ်ကီု ဒးဃရေက်ကၠောန် ကော်ဘိက်အာပြဟ်ဟ်ရောၚ်။ ဒၞာဲဂွံလွဳလွတ်လေဝ် ဍန်ဂြက်စှေ်ကၠုၚ်မံၚ်သိုက်က်ဂှ် ဒးသၠဲကဵုဗွိုၚ်ထေက်ရောၚ် မိက်ဂွံဖတိုက်ဖအောဝ်ဏာရ။