ဝဏ္ဏမာန် ပတိုန်ထ္ၜးလဝ်ရ။
သၟာန် ။ ။ လတူပ္ၚံက်ပရေၚ်ဍုၚ်ကွာန် ကၟိန်ဍုၚ်ဗၟာတ္ၚဲဏံတုဲ ဗော်ဍုၚ်မန်တၟိဂှ် ဒတူလိုၚ်မွဲဗီု၊ ဗော်ညဳသၟဟ်မန် ကွာ်မံၚ်မွဲဂၠံၚ်၊ ပ္ဍဲဂှ်တှေ် ဇြဟတ်မန် ဂစာန်ပါ်ထကးပြးအာ ဗီု (၂၀၁၀) တေံပၠန် ဍေံဒှ်မံၚ်ဗီုဂှ်နွံတှေ် နကဵုဒံက်တာ နာဲပညာမန် လတူဏံ ဗီုလဵုသ္ၚဳဂၠိပ်ဂွံကီုရော?
သွဟ် ။ ။ ဗော်ဍုၚ်မန်တၟိဂှ် ညးတံဟွံထံက်ဂလာန်ပုဟ် ဂွံရုဲမာဲကီု၊ မုကီု၊ တုဲပၠန် လ္ပာ် (MAU) လေဝ် ညးတံသဳကၠဳ လဝ်နွံမံၚ်ရ နကဵု MAU လေဝ် ဟွံထံက်ဂလာန်ပုဟ်၊ ဆဂး ရဲထံက်ဂလာန်တံဂှ် ညးတံပံက်ထောံဗော် အလုံဒေသဂှ်တုဲ ညးတံ လုပ်ရုဲအာမာဲ၊ ပ္ဍဲကဵုလုပ်ရုဲမာဲဂှ် ဍေံဇီုကပိုက်ကၠုၚ် ဗီုလၟုဟ်ဏံရ။ ဗော်ဍုၚ်မန်တၟိဂှ် ဟလဵုပလေဝ် ညးတံ ဟွံထံက်ဂလာန် ဟွံသ္ပစၟတ်သမ္တီပုဟ်၊ ဆဂး ဗော်ပရေၚ်ဍုၚ်ကွာန် အပ္ဍဲဍုၚ်ဂှ် အခိၚ်တေံလေဝ် ပံၚ်ကဵုပၞာန်ရ ပံၚ်ကဵုသၞောဝ် ဟီုဟဂှ်လေဝ်၊ စိုတ်အဲတှေ် လက္ကရဴဏံ မုဍေံဒှ်ကၠုၚ်ရောဟီုတှေ် ပိုဲကလေၚ်ကၠိုဟ်အာစိုတ်ညးသ္ကံတုဲ ရဲဗော်နွံအပ္ဍဲဍုၚ်ဂှ်လေဝ် ရဲကၠောန်ဂွံဂှ် ကၠောန်အာ၊ ဗော်ဍုၚ်မန်တၟိလေဝ် အခိၚ်တေံ ညးတံပံၚ်လဝ်ကဵု (UNFC) တုဲ ညးတံ လ္ပာ်ပၠန်ဂတးတေံ လ္ပာ်မ္ၚးတေံ ဗီုကၠောန်ဂွံဂှ် ကၠောန်အာ၊ မွဲတ္ၚဲ ဂၠံၚ်တရဴပရေၚ်ဍုၚ်ကွာန် ဍေံမံက်ကၠုၚ်မ္ဂး နကဵုအလုံဍုၚ်မွဲ အေအတိုၚ်ဂှ် ပိုဲကွာ်အာဏောၚ် ပိုဲဖျေံစွံလဝ်စိုတ် အေဗီုဂှ် နွံရ။
စို်တ်အဲလၟုဟ်လေဝ် ပိုဲဒးအာဗီုဂှ်ပၠန်ရ။ မုသ္ပပိုဲဒးအာဗီုဂှ်ရော? ပရေၚ်ဍုၚ်ကွာန်ဂကူပိုဲ ဍေံဒှ်ကၠုၚ်ဗီုဂှ်တှေ် ဟိုတ်နူ ပရေၚ်ဍုၚ်ကွာန် အလုံဍုၚ်ဂှ် ဍေံပြံၚ်သၠာဲတုဲတှေ် ပိုဲဂှ်လေဝ် ဍေံထ္ကးအာညးသ္ကံ၊ ဍေံထ္ကးအာညးသ္ကံ ဗီုသၞာံ (၂၀၁၀) တေံပၠန်ဂှ်ရ၊ ယဝ်ရပိုဲဟီု သၞာံဏံ ဍေံပရေံနူကဵု သၞာံ (၂၀၁၀) ဏီ ယဝ်ပိုဲဟီုလေဝ် ဟီုဂွံ၊ ဆ စိုတ်အဲတှေ် ဍေံဟွံကွာ ပုဟ်၊ နကဵုအကြာမန်ပိုဲ အခိၚ်တေံလေဝ် ပိုဲဟီုမံၚ် ဗီုဏံရ။ ဆ မုပိုဲဒးသ္ပဂွံရော အခိၚ်တ္ၚဲဏံဂှ် ဗော် MUP ဂှ် ညးတံပံၚ်ကဵု (နစက) တှေ် ပံၚ်၊ ပံၚ်ကဵု ဗျူဟာဂှ် ညံၚ်ဂွံဒှ်၊ ပံၚ်ဗ္ဂပ်ထောံ ညံၚ်ဂွံဒှ်ထောံမွဲဖျုန်ဂှ် စိုတ်အဲတှေ် ဍေံဗၠေတ် သ္ပဗီုဂှ် ဟွံထေက်ပုဟ်၊ ဥပမာဍေံ ဂကူပိုဲဖအိုတ် ညံၚ်ဂွံကၠောန်အာ ကမၠောန်မွဲစွံဂွံ၊ ညံၚ်ဂွံကျာညးသ္ကံဂွံ၊ ညံၚ်ဂွံဆာၚ်အာမုက်ညးသ္ကံဂွံ အၝေဂှ် ဒှ်အဓိကရ။ လ္ပာ်ပၞာန်ဂှ်တှေ် ပိုဲအာ ၜိုတ်ပိုဲမံၚ်ဂွံ၊ ၜိုတ်ပိုဲဂွံထိၚ်ဒဝ်အာ ပရေၚ် ဂကူပိုဲ ပရေၚ်ဗော်ညးတံ စိုတ်အဲတှေ် ပိုဲဒးစွံစိုတ်ဗီုဂှ်။
သၟာန် ။ ။ လတူအကာဲအရာ ပရေၚ်ဍုၚ်ကွာန်တ္ၚဲဏံ လ္ၚဵုထံက်ဂလာန်ဇြဟတ် လ္ပာ်အေန်ယူဂျဳ မွဲလ္ပာ်နွံဏောၚ်၊ လ္ၚဵုထံက်ဂလာန် ဇြဟတ် လ္ပာ်ကံၚ်ဇြဳ နွံမွဲလ္ပာ်ဏောၚ်ဒှ်တှေ် ဂၠံၚ်တရဴပရေၚ်ဍုၚ်ကွာန်မန် ဗီုလဵုဣအာတှေ် ဍေံဒှ် ခိုဟ်အိုတ် သွက်ပရေၚ်ဍုၚ်ကွာန်မန်ရောဂှ် ဗီုလဵုညာတ်ကေတ်ကီုရော?
သွဟ် ။ ။ ဗီုဗော်ဍုၚ်မန်တၟိလေဝ် ဗီုဂှ်ရ အခိၚ်တေံလေဝ် ညးတံ ပံၚ်လဝ် UNFC ဏောၚ်၊ အခိၚ်တေံ ယဝ်ကျာကဵု ရဲပ္ဍဲဍုၚ်ဏံတှေ် ဍေံစုတ်(ပုဒ်မ)ဍေံဟဂှ်ရ၊ လက္ကရဴဏံ ညးတံ ထ္ပက် NCA ရ။ ပိုဲဂွံတီချိုတ်ပၠိုတ် ပံၚ်ကဵုပၞာန်ဏောၚ်တှေ် ပိုဲခိုဟ်စဟေၚ်ဂှ် အၝေဂှ်လေဝ် ဍေံဟွံဒးပုဟ်၊ ရဲလ္ပာ်မ္ၚးဏံလေဝ် ဟဂှ်ရ ပိုဲပံၚ်တဲကဵု ကောန်ဍုၚ်အရၚ်တံတုဲ ပိုဲဗတိုက် ပိုဲဇၞးဟေၚ် အၝေဂှ်လေဝ် ဟွံသေၚ်ပုဟ်၊ ဇှ်ရဏောၚ်တှေ် ပိုဲဖျေံထောံစိုတ် လ္ပာ်တေံမှလ္ပာ်တေံ လ္ပာ်ဏံမှလ္ပာ်ဏံ ဍေံကော်စ စိုပ်အာမွဲလ္ပာ်ဓဝ်၊ အခိၚ်တ္ၚဲဏံ ရံၚ်အာအကာဲအရာ ပရေၚ်ဍုၚ်ကွာန်ပိုဲတုဲတှေ် စိုတ်အဲတှေ် ပိုဲအာဟွံထေက်ဗီုဂှ်၊ ပိုဲဒးအာ ဗီုနဲလဒေါဝ်၊ ပိုဲဒးကျာညးသ္ကံ၊ ပိုဲဒးဂၠာဲဂၠံၚ်ဍာန်ညးသ္ကံ၊ ပိုဲဒးကၠိုဟ်စိုတ်ညးသ္ကံ၊ ပိုဲဒးဖျေံ ဗျူဟာဂကူပိုဲ ဍေံကော်စ ဇကုပါ်တုဲတှေ် ဇကုအုပ်ဓုပ်ညးသ္ကံ စိုတ်အဲတှေ် အခိၚ်တ္ၚဲဏံ ပိုဲဒးအာဗီုဂှ်ဏောၚ်၊ မွဲတ္ၚဲ ဍေံကၠးကၠုၚ်ဏောၚ် ဂၠံၚ်တရဴပရေၚ်ဍုၚ်ကွာန် အလုံဍုၚ်မွဲ ဍေံဒုၚ်တဲမာန်၊ ပၞာန်လေဝ် ဒုၚ်တဲမာန်၊ ဗီု NCA ဂှ် လ္ၚဵုဂှ်ဟီု NCA ဂှ် လ္ပထ္ပက်၊ လ္ၚဵုဂှ်ဟီုထ္ပက်၊ လ္ၚဵုပၠန်ဂှ် (ပၚ်လုံညီလာခံ) ဂှ် လ္ပတိုန်၊ လ္ၚဵုဂှ် ဟီုတိုန်၊ ကာလဂၠံၚ်တရဴ ပရေၚ်ဍုၚ်ကွာန်ဏံ ဍေံကယျောဝ်ကၠုၚ်ကွေံကွေံ ညးပါလုပ် အဲပါလုပ် ဇကုကဵုဇကု အခိၚ်တေံ ဒစးဒုၚ်မံၚ်ညးသ္ကံဂှ် ဒးပါလုပ်မွဲဂၠံၚ်ဍာန်ဂှ်ပၠန်ရ။ ဣညအ်လေဝ် ဍေံအာဗီုဂှ်ကီုရ။ မွဲတ္ၚဲ ပရေၚ်တက်ကၠုၚ်ကျာ ဂၠံၚ်ဍာန်ဏံ ပိုဲအာညးသ္ကံ မွဲစွံပၠန်ဏောၚ်ဂှ် စိုတ်အဲတှေ် ပိုဲကလေၚ်စိုပ် ဂၠံၚ်ဍာန်ဂှ်ပၠန်ဏောၚ်။ ဟိုတ်နူအခိၚ်တ္ၚဲဏံတုဲ ပိုဲတံ လ္ပဒစေၚ်မွဲလ္ပာ်ဏီ ပိုဲဒးမံၚ် ဗီုပြၚ်လဒေါဝ်ဏောၚ် မိက်ဂွံဟီုကဵု ကောန်ဂကူပိုဲရ။
သၟာန် ။ ။ ရံၚ်ကဵုအကာဲအရာ ရဲပၠန်ဂတး ဂကူလ္ၚဵု ဗီုကဵုပၠန်ဂတးရခေၚ် အေအေတံ တ္ၚဲဏံတှေ် ဂၠံၚ်တရဴရခေၚ် ကဵုရခေၚ် ဍေံလးဓဇက် ဂၠံၚ်တရဴပရေၚ်ဍုၚ်ကွာန် ရခေၚ် ညးတံတုဲ လၟုဟ်တှေ် ပရေၚ်အုပ်ဓုပ်ညးတံ စိုပ်တရဴတၟာဂလိုၚ်၊ ဂၠံၚ်တရဴပရေၚ်ဍုၚ်ကွာန်မန်ရော ဂၠံၚ်တရဴဇကုကဵုဇကု အာဟွံမာန်ပုဟ်ဟာ ဗီုလဵုညာတ်ရော?
သွဟ် ။ ။ စိုတ်အဲတှေ် ပ္ဍဲပိုဲဏံဂှ် ဍေံဟွံလောဲပုဟ်၊ မုသ္ပရောဟီုတှေ် ရံၚ်ကဵုရခေၚ်တံဂှ် မုဟိုတ်ဍေံဂွံဒှ်ကၠုၚ် ဗီုဂှ်ရော၊ ဟိုတ်နူဇြဟတ်ပၞာန် ရခေၚ် ဂှ် ဇၞော်တိုန်မွဲတဲဓဝ်၊ ဠတေံ ဒပ်ပၞာန်ရခေၚ် နွံမံၚ်ရ၊ ဆဂး ဒှ်မွဲလီုမွဲ အခိၚ်တေံဂှ် ရခေၚ်တံ ဍေံပကောံညးသ္ကံ ဟွံဂွံမံၚ်ရ။ အခိၚ် (၂၀၁၀) ဂှ် ရဲလုပ်ရုဲမာဲဂှ် လုပ်၊ ရဲပံၚ်ကဵု UNA ဂှ်ပံၚ်၊ ဥပမာဍေံ ဗော်ၜါဍေံ ဍေံပကောံ၊ ဍေံပကောံတုဲ ကလေၚ်ထ္ကး ဍေံတံလေဝ် ဠတေံဂှ် ဇွောဝ်အာ ဇွောဝ်ကၠုၚ်မံၚ်ကီုရ။ လၟုဟ်ဏံ ဇွောဝ်ဍာ် စပ်ကဵုပရေၚ်လ္ပာ်ရခေၚ်ဂှ် ဇၞော်တိုန်မွဲစုတ်ဓဝ်၊ ဍေံဟီုစ ဇၞော်ဏံဂှ် ဇၞော်စဵုကဵု ဗော်ပရေၚ်ဍုၚ်ကွာန်လဵု ဓလီုဍေံဟွံမာန် အေဍေံဒှ်အာဟဂှ်၊ ဟိုတ်နူဇၞော်ဗီုဂှ်တုဲ ဍေံဖျေံအာ ဂၠံၚ်ဍာန်ပရေၚ်ဍုၚ်ကွာန် ရခေၚ်ဏောၚ်၊ ရခေၚ်ဏံ ဟိုတ်နူဍေံဇၞော်တိုန်မွဲတဲဓဝ် ဍေံဓလီုထောံ ဗော်ပၠန်ဂတးတၞဟ်ဟ်ကီု ဗော်ပၠန်ဂတးရခေၚ်ဂှ်ကီု ဗော်ပ္ဍဲဍုၚ်ဂှ်ကီုတုဲ ဍေံဖျေံဏာဂၠံၚ်ဍာန်ဏံ ဗော်တံဏံ ဗက်စတှေ် ဗက်စ၊ ဟွံဗက်စတှေ် ဍေံတးပဲါဏောၚ်၊ ဟိုတ်နူဇြဟတ်ပၞာန်ဍေံ ဇၞော်တိုန်တုဲတှေ် ဍေံဖျေံဏာ၊ ဍေံဖျေံဏာတုဲတှေ် ကိစ္စကမၠောန်ဏံ ဇကုဖျေံဏာဂၠံၚ်ဍာန်ဏံယျတှေ် ဇကုလေဝ် ဒးကၠောန်ဗက်အာမာန်ဏောၚ်၊ ဇကုကၠောန်ဗက်မာန်တှေ် ကောန်ညးဍုၚ်ကွာန်တံဂှ် ဍေံပါကၠုၚ်ဟဂှ်ရ၊ ကောန်ညးဍုၚ်ကွာန်တံ ဍေံဂွံထံက်ဂလာန်ကဵု ဗော်တေံ ဗော်ဏံ ဍေံဂွံဒစးဒုၚ်ဂှ် ဒှ်ဟွံမာန်ရ။ ဥပမာဍေံ အေအေမှ အေအေ အေဍေံဒှ်ဟဂှ်တှေ် စပ်ကဵုဂၠံၚ်ဍာန် အေအေ ဖျေံလဝ်ဂှ် မၞိဟ်ဗွဲမဂၠိုၚ် ပ္ဍဲကဵုတွဵုရး ကောန်ဂကူရခေၚ်ဂှ် ဒုၚ်တဲမာန်၊ ဍေံဒုၚ်တဲမာန်ဂှ်ရ အတိုၚ် အေအေ ဖျေံဏာ ဗီုပြၚ်ဗော်ဍေံဂှ်ရ ဍေံဒှ်အာ ဗီုပြၚ်ဂကူ အလုံဂကူရခေၚ်မွဲရ။ နကဵု အေအေ တံ ဂွံအာအခေါၚ်ဂှ်တုဲ ဍေံကၠောန်လောဲအာရ နကဵုလညာတ်အဲ၊ ယဝ်ရ အေအေတံ ဇြဟတ်ဍောတ်မံၚ် ဗီုအေအေန်သဳ တံဏံ ဗီု အေအာပဳတံဏံရတှေ် ဗီုလဵုဍေံတံဖျေံဖျေံ ဍေံဖျေံဟွံမာန်၊ ဍေံပကောံဟွံမာန်ပုဟ် ဂွံဒှ်ဇြဟတ်ဗီုဂှ်၊ လၟုဟ် ဟိုတ်နူဇြဟတ်ဍေံဇၞော်ကီု ဖျေံဗီုပြၚ်ဒးကီုတုဲ ဒှ်တိုန်ဇြဟတ်ဇၞော်ဇၞော်မွဲရ။ မန်ပိုဲ ဂွံဒှ်ဗီုရခေၚ် အေအေဂှ် ဍေံဟွံလောဲပုဟ် တိဍာ်ကီု၊ ပရေၚ်ဂကူကီု ဍေံဟွံတုပ်တၟာဂလိုၚ်ဏောၚ် ညာတ်သာ်ဏံတုဲ မိက်ဂွံဟီုဆၜိုတ်ဏံရ။
