အလဵုအသဳတၟိ သၟဝ်ပရေၚ်အာက္ဍိုပ် သမ္မတဥူတိၚ်သိၚ် (ဦးသိန်းစိန်) ဝွံ ကၠုၚ်နူအလဵုအသဳပၞာန်တြေံတုဲ ပၟိက်ဆန္ဒမိက်ဂွံသောၚ်ကလးပြသၞာ ပရေၚ်ဍုၚ်ကွာန်၊ ပဋိပက္ခပၞာန် အပ္ဍဲဍုၚ်ၜိုဟ်ဟ်သြိုဟ်ဟ်ဂှ် ဍေံတအ်ဟၟဲပၟိက်ကွေံကွေံရ။ လညာတ်ပရေၚ်ဍုၚ်ကွာန် ကေုာံ ကောပ်ကာဲအုပ်ဓုပ်ဍုၚ်တအ်ဂှ်လေဝ် ရဲပၞာန်တြေံတံရဒှ်မံၚ်တုဲ အာဒၟံၚ်အတိုၚ်သၞောတ်တြေံတေံဖိုအ်ရ။
Tag: ဂလာန်ညးဒါန်လိက်
အလဵုအသဳဍုၚ်ဗၟာတ္ၚဲဏအ်ဝွံ ထ္ၜးအမာတ်ကောန်ဍုၚ်အရၚ်တအ်တုဲ တုပ်တဴညံၚ်ရဴ ဒက်ပတန်ပရေၚ်ညဳသၟဟ် ကောန်ဍုၚ်အရၚ်တအ်ညံၚ်ၚ် ဖန်ဗဒှ်လဝ်ရ။ ဆဂး အမာတ်ကောန်ဍုၚ်အရၚ်တအ်ဂှ် ဆၜိုတ် ဒးဒုၚ်ထ္ၜးစဒၟံၚ် ရုပ်ဟေၚ်ရ။ မုအဝဵုညိဓဝ်ဟေၚ် ဍေံတအ် ပအပ်ကဵုလဝ် ဟွံသေၚ်ကီုရ။
နူကဵုစတမ် အလဵုအသဳတအ် ပါ်လဝ်အဝဵုဂှ် ဒုၚ်သဇိုၚ်လ္တူ ပရေၚ်ညဳသာသၟဟ်သၟန် ကောန်ဍုၚ်အရၚ်တအ် ဟွံသေၚ်ရ၊ ပ္ဍဲကဵုကောန်ဍုၚ်ရၚ်တအ် ဟီုဂှ် ဂကူဗၟာတအ်ဂှ်လေဝ် ပါလုပ်ဒၟံၚ် မွဲဂကူကီုရ။ ဆဂး ဂကူဗၟာတအ်ဂှ် လၟိဟ်ဂၠိုၚ်နူကဵု ကောန်ဍုၚ်အရၚ်တအ်ဂှ် ဒှ်ဍာံရ၊ ဆဂး ယဝ်ရ ကေတ်လဝ်အခေါၚ်တၟေၚ် ဍိုက်လဝ် လ္တူစးကောန်ဍုၚ်အရၚ်တံမ္ဂး နတဲနဇိုၚ် ဒက်ပတန်တိုန် ပရေၚ်ညဳသာသၟဟ်န် အကြာကောန်ဍုၚ်အရၚ်တအ်ဂှ် ဒှ်ဟွံမာန်၊ ကောန်ဍုၚ်အရၚ် မ္ၚးနူကဵုဂကူဗၟာတအ်ဂှ် ညဳသာဒၟံၚ်အိုတ်ရ၊ ဂကူဗၟာ သ္ပလဝ် ဒြဟတ်ကဵု ဒပ်ပၞာန်တအ်ဟေၚ် ဒှ်ဒၟံၚ်ပဋိပက္ခကဵု ကောန်ဍုၚ်အရၚ်တအ်ဏံရောၚ်။
ပ္ဍဲကဵုဂိတုတုဲကၠုၚ်တေံ သ္ကိုပ်ဝန်ဇၞော် တွဵုရးဍုၚ်မန် “နာဲအုၚ်မျေတ်” ကဵု ဝန်ဇၞော်မန်တအ် စပ်ကဵုပရေၚ်ဘာသာ ဂဇံက်က္ဍိုၚ်ကျာ် စေတဳကျာ်ဇြာတုဲ လိုက်ကၠုၚ် ကွာန်ကၟာဝက်ရ။ သွက်သ္ကိုပ်ဝန်ဇၞော် ဂွံကၠိုဟ်ကေတ်မာန် ဂးတုဲ ဒးဒဂိုန်သဳ ဗတ်ဘာသာဗၟာရ။ စပ်ကဵုပရေၚ်ဏံတုဲ ညးဍုၚ်ကွာန် ဒကာဘာ ဂကူမန်တအ်လေဝ် ဟွံပေၚ်စိုတ်ကွေံကွေံဂှ် ဂွံတီကေတ်ရ။
ပ္ဍဲကဵုပေဲါရုဲမာဲ ၂၀၁၀ တေံဂှ် ဒှ်ပေဲါရုဲမာဲအလီကီုလေဝ် ဂကူမန် ပ္ဍဲကဵုအလုံဒေသမန်တအ် ထ္ၜးကၠုၚ်အစောန်စရာဲ ကဵုကၠုၚ်မာဲ ကုဗော်မန်၊ ”ဗော်ဒဳမဝ်ကရေဇြဳ အလုံရးမန်” ဂှ် ဂွံဆဵုကေတ်ရ၊ ဂွံဆဵုဂဗကၠုၚ် စိုတ်ဓါတ်ဆာန်ဂကူ ကောန်ဂကူမန်တအ်ရ။
ပ္ဍဲကဵုပေဲါရုဲမာဲ ၂၀၁၀ ဂိတုနဝ်ဝေမ်ပါဝွံ အလုံဂကူမန် ညးမၞံုကဵုအခေါၚ်အရာကဵုမာဲတအ် ထ္ၜးကၠုၚ်လညာတ် “ကျခိုၚ်ရေဝ်” (ပြည်ထောၚ်စုကြံ့ခိုၚ်ရေးနှၚ့် ဖွံ႕ဖြိုးရေပါတီ) တအ် ဟွံလီဠာန်ထောံမ္ဂး မာဲဗွဲမဂၠိုၚ်ဂှ် နွံဒၟံၚ်ပ္ဍဲကဵုဗော်ဒဳမဝ်ကရေဇြဳအလုံရးမန်တုဲ ဗော်ဒဳမဝ်ကရေဇြဳအလုံရးမန်ဂှ် သွက်ဂွံဇၞးအာအမာတ် ဗွဲမဂၠိုၚ် နွံရောၚ်။
ပ္ဍဲကဵုအခိၚ်ပေါဲရုဲမာဲ ဂိတုနဝ်ဝေမ်ပါ စၟတ်တ္ၚဲ (၇) ဝွံကီု၊ နူကဵုက္ဍိုပ်သ္ကိုပ် ဒဳမဝ်ကရေဇြဳ ဗၠးတိတ်ကၠုၚ် နူကဵုသ္ၚိထံၚ်တုဲဝွံကီု ကောန်ဍုၚ်အရၚ်ဂမၠိုၚ်တအ် ထ္ၜးပျးကၠုၚ် ပရေၚ်ညးတံ ဟွံပေၚ်စိုတ်၊ ဆက်တုဲ အာတ်မိက်ကၠုၚ် အခေါၚ်အရာညးတအ် ကၠးကၠးမးမးဂှ် ကတဵုဒှ်ကၠုၚ်ရ။ လ္တူကိစ္စဏံ ကတဵုဒှ်ကၠုၚ်ဂှ် နူကဵုအလဵုအသဳတၟိတံ သာ်လဵုဆက်တုဲ ရပ်စပ်အာပၠန်ရောၚ်ဂှ် ဒးဆက်မၚ်ရံၚ်အာဏီရောၚ်။
ပ္ဍဲစၟတ်တ္ၚဲ (၇) ဂိတုနဝ်ဝေမ်ပါဂှ် အလဵုအသဳပၞာန်ဗၟာတအ် ကၠောန်ပေဲါရုဲမာဲတုဲ ဗော်ဍေံတအ် ခၞံဗဒှ်လဝ် ဗျဳခိုၚ်ဖျဵု (ပြည်ခိုၚ်ဖြိုးပါတီ) ဝါ ဗော်ယူအေက်ဒဳပဳ သွက်ဂွံဇၞးအာမာဲ ဗၞတ် (၈၀) တၟအ်ကၠံ အတိုၚ်အလုံမွဲဍုၚ်ဂှ် ဂစာန်ကၠုၚ်ရ။ ပေဲါရုဲမာဲ တုဲဗက်ဟွံဂတာပ် ပ္ဍဲကဵုစၟတ်တ္ၚဲ (၁၃) ဂိတုနဝ်ဝေမ်ပါဂှ် အလဵုအသဳပၞာန်တအ် ဗလးထောံ က္ဍိုပ်သ္ကိုပ် ဒဳမဝ်ကရေဇြဳဗၟာ ဒဝ်အံၚ်သာန်သုကျဳ (ဒေါ်အောၚ်ဆန်းစုကြည်) ရ။
ကဵုဂိတုနဝ်ဝေန်ပါ စၟတ်တ္ၚဲ (၇) ဏအ် နူကဵုအလဵုအသဳပၞာန်တအ် ကၠောန်သ္ပကဵု ပေဲါရုဲမာဲမွဲတုဲ သွက်ဂွံရုဲစှ်ပ္တိုန် အလဵုအသဳ အုပ်ဓုပ်ဍုၚ်တၟိမွဲ၊ နူအလဵုအသဳအုပ်ဓုပ်ဍုၚ်ဂှ် သွက်ဂွံဖျေံကဵုသၞောတ်ဝ်စေဝ်ပၞောန် ပ္ဍဲကဵုသၞောတ်ဒဳမဝ်ကရေဇြဳတုဲ ဍေံတအ် ကော်ခဴစ ”ဒဳမဝ်ကရေဇြဳ မဍိုက်ပေၚ်ကဵုစေဝ်ပၞောန်” (စည်းကမ်းပြည့်ဝသည့် ဒီမိုကရေစီစနစ်) သာ်ဝွံရ။
ပ္ဍဲဂကောံအာဇြဳယာန် ဍုၚ်မပါလုပ် (၁၁) ဍုၚ်ဂှ် ဍုၚ်ဗၟာလေဝ် ပါလုပ်မွဲဍုၚ်ကီုရ။ ခြာဟွံလအ် ပ္ဍဲကဵုဂိတုနဝ်ဝေမ်ပါဏအ် ဍုၚ်ဗၟာဂှ် ဒုၚ်သဇိုၚ်ကဵု သၞောတ်ဝ်ဥပဒေ (၂၀၀၈) ဒပ်ပၞာန်ဗၟာတအ် ချူဇန်လဝ်တုဲ သွက်ဂွံကၠောန်သ္ပ ပေဲါရုဲမာဲနွံရ။ လ္တူဍုၚ်ဗၟာ ဖန်ဇန်ကၠုၚ် ပရေၚ်ပေဲါရုဲမာဲ သာ်ဏံဂှ် ဍုၚ်လ္ၚဵုတံ ထံက်ဂလာန်၊ ဍုၚ်လ္ၚဵုတအ် သ္ၚိတ်ဇြဒၟံၚ်ရ။
ရန်တၟအ်ကဵု ဂွံသ္ပစၞး အလုံဂကူမန်ကီု၊ ဂကူမန်တံ စုတ်မာဲမ္ဂး ဂွံစုတ်ကဵုဗော်မွဲမွဲကီု၊ ရန်တၟအ်သာ်ဝွံတုဲ ပိုဲ တအ် ဒက်ပတန်လဝ်ဗော်၊ သွက်ဂွံပြိုၚ်ပကာန် ပ္ဍဲရးဒေသမန်နာနာရောၚ် က္ဍိုပ်သ္ကိုပ်ဗော်ပရေၚ်ဍုၚ်ကွာန် တၟိ အပ္ဍဲဍုၚ်တေံ ဟီုဂးသောၚ်ကလး ကဵုခမဳသၚ် ညးဍုၚ်ကွာန် ဂကူမန်တအ်ရ။