Tag: ပရိုၚ်

ပ္ဍဲအခိၚ်ခေတ်ကာလလၟုဟ်ဝွံ ပရေၚ်ဍုၚ်ကွာန် ပ္ဍဲကၟိန်ဍုၚ်ပိုဲတအ်လေဝ် ဟွံညိၚ်ဝတ်ဏီတုဲ ကိစ္စပရေၚ်ဂီုကၠီုပိုဲတအ်ကီု၊ ပရေၚ်အာကၠုၚ်မံၚ်စံၚ်တအ်လေဝ် အဃောဒှ်မံၚ် တၚ်အခက်ခုဲနာနာသာ်ဏံဂှ်ရ ရဲကၠောန်စပရဲလ္တူsocial mediaတအ်လေဝ် မံက်တိတ်ကၠုၚ်မံၚ် ဗွဲမဂၠိုၚ်ရ။

မၞိဟ်ရဲကေတ်စမံၚ်ပရဲ လ္တူsocial mediaတအ် နဲကဲဍေံတအ်ကၠောန်သ္ပစလေပ်ဂှ်တှေ် မိက်ဂွံသောၚ်ကလးဏာကဵုကီုရ။

ဗီုပြၚ်ဍေံတအ် ကၠောန်သ္ပစလေပ်ဂှ်တှေ် ဍေံတအ်ဂၠိုက်ဂၠာဲကေတ်ဏာလဝ် ဂၞၚ်ဖုၚ်ဇကုမွဲမွဲတုဲ နကဵုပရောဒဒှ်ဇကုမွဲမွဲသာ် ဍေံတအ် ကၠောန်ဖန်ဇန်လဝ်တုဲ နူကဵုလ္တူဖုၚ်ဂှ်မွဲကဆံၚ် ဍေံတအ်ဘပလတုဲ အပ်မိက်ကၠုၚ်သြန်ကဵုဇကုလေဝ် ဒှ်မာန်ရ။ တုဲပၠန် လ္တူfacebookဇကုကဵုဒှ် လ္တူဇကုရပ်လဝ် social mediaမွဲမွဲကဵုဒှ် မၞိဟ်ဇကုဟွံတီ၊ ဟွံကေၚ်ဆဵုလဝ်မွဲလှေ်ဂှ် ဇကုဆက်ဆောံဒးအာတုဲ ပတှေ်ဒးအာလ္တူဍေံတအ် ဂၠိုၚ်လောန်အာတုဲ အခိၚ်ကာလ ဆဵုညးသ္ကအ်မ္ရးဏံမ္ဂး ဍေံတအ်တံၚ်ဂြဲဏာတုဲ ထိၚ်ဒဝ်လဝ်မွဲမွဲဒၞာဲတုဲ အပ်မိက်ကၠုၚ်သြန်ကဵုသ္ရိဇကုကီု၊ သီုကဵုဒှ်ကၠုၚ်ဘဲအန္တရာယ် သွက်ဇကုပိုဲလေပ်မံၚ်ဂှ်ရ ပိုဲဒးစွံသတိ ဇြိုက်က်နက်က်ထေက်ရောၚ်။

 ဟိုတ်ဒှ်သာ်ဂှ်ရ ရဲသုၚ်စောဲမံၚ်social mediaတအ်လေဝ် စပ်ကဵုကိစ္စဏံတုဲ ထေက်ကဵုဒးစွံသတိကဵု လ္တူမၞိဟ်ကေတ်မံၚ်ပရဲတအ်ရောၚ်။ အခိၚ်ကာလဇကုသုၚ်စောဲsocial mediaတှေ် မၞိဟ်ဇကုဟွံတီလဝ်ကီု ဟွံကေၚ်ဆဵုလဝ်တအ်ဂှ် ယဝ်ခါရဍေံတအ် အပ်မိက်ကၠုၚ်သြန်ပ္ဍဲဇကုကဵုဒှ်၊ ဘပလကၠောန်ကဵုဇကုကဵုဒှ် ဇကုဒးလဴထ္ၜးကဵုမၞိဟ်တာလျိုၚ်တအ်ဟေၚ်ရ။ တုဲပၠန်ကေတ်လညာတ် ပ္ဍဲမၞိဟ်စိစာန်ကဵုသၞောဝ်တအ်ကၠာညိဂှ် မိက်ဂွံဖတိုက်ဖ္ဍောဝ်ဏာကီုရ။

လှုဲရပ်စပ်သုင်စောဲမံင် ပ္ဍဲကၟိန်ဍုင်ဗၟာပိုဲတအ်ဏံဂှ် လှုဲအတာန်ၜါလက် ကဵုအတာန်မသုန်လက် တိတ်ကၠုၚ်ရောၚ်ဂးတုဲ ပရိုင်ကောလဟလ မံင်တိတ်ကၠုင်မံင် အကြာညးဍုင်ကွာန်တအ်ရ။ ဟိုတ်ဒှ်သာ်ဂှ်ရ ညးဍုင်ကွာန်လ္ရဵုတအ်လေဝ် ဒှ်ကၠုင်မံင်သံသယ လ္တူပရိုင်ကောလဟာလဂှ်ရ။

ပရိုင်ဏံဂှ် နူကဵုပကောံညးစၟဳစၟတ်ပရိုင် ဒး၊ ဟွံဒးပိုဲတအ် ကလေင်စၟဳစၟတ်ရံင်တုဲ ဒးဒှ်ရ ပရိုင်ကောလဟလမွဲဂှ် မိက်ဂွံပတိုန်ထ္ၜးဏာကီုရ။ ပရိုင်ဂှ် ကလေင်စၟဳစၟတ်ရံင်တုဲ လှုဲအတာန်ၜါလက်ကဵု အတာန်မသုန်လက် တိတ်ကၠုင်ဏောင်ဟီုဂှ် ဒှ်မံင်ပရိုင်ဗၠေတ်တ်မွဲဏောင်ဂှ် နူကဵုဌာနဗေန်ဗဟိုဍုင်ဗၟာတအ်ဟီုကၠုင်ရ။

စပ်ကဵုကိစ္စ ပရိုင်ဗၠေတ်တ်မံက်တိုန်ကၠုင်မံင်ဏံတုဲ  ဗီုပြင် ညးကလေင်သောင်ကလးလဝ်ဂှ်တှေ်”ယဝ်ပိုဲတအ် တက်ပတိတ်လှုဲတှေ် ပိုဲတအ် ကဵုသတိကဵုညးဍုင်ကွာန်တအ်တုဲမှ ပိုဲတအ်တက်ပတိတ်ရ။ တုဲတှေ် လှုဲသကိုပ်ပၞာန် အံင်သာန်တၟိ အတာန်၁၀၀၀ဂှ်တှေ် ကၠာပိုဲတအ် ဟွံဂွံတက်ပတိုန်ဏီ ၜိုတ်မွဲဂိတုဂှ် ပိုဲလလောင်တြး လဴကဵုလဝ် ညးဍုင်ကွာန်တအ်ကၠာရ။ လှုဲအတာန်ၜါလက်ကဵု လှုဲအတာန်မသုန်လက်တိတ်ဟီုဂှ် ပရိုၚ်ဗၠေတ်တ် ပရိုၚ်ကောလဟလမွဲဟေၚ်ရ”သာ်ဝွံ ဗေန်ဗဟိုဍုၚ် နူဌာနပြုပြၚ်ကောပ်ကာဲသြန် သကိုပ်စၞောန် ဥူဝေန်မျေအ် ကလေၚ်သောၚ်ကလးလဝ်ရ။

စပ္တေံနူကဵု ဒးလဝ်ယဲကပ်ကိုဝ်ဝေဒ်(Covid-19)ဂှ်တုဲ အကြာပရေၚ်ဍုၚ်ကွာန် ဟွံညိၚ်ဝတ်ဏံဂှ်ကီု ပ္ဍဲကၟိန်ဍုၚ်ဗမာပိုဲတအ်လေဝ် ရံၚ်အာလ္ပာ်ပရေၚ်ပိုန်ဒြပ်တှေ် ဆုတ်ဇှေ်မံၚ်ဂှ်ရ ပရေၚ်ၚုဟ်မးသြန်လေဝ် ဟွံညိၚ်ဝတ်ဏီဂှ်ရ  မွဲဓမြိပ်ဓရ် ပရိုၚ်ကောလဟလဗီုတံဏံလေဝ် မံက်တိုန်ကၠုၚ် ဗွဲမဂတပ်အခိၚ်ကီုရ။

ဟိုတ်ဒှ်သာ်ဂှ်ရ ညးမဗှ်ပရိုၚ်တအ် ညးဂမၠိုၚ်လေဝ် မိက်တမ်ရိုဟ်ပရိုၚ်မွဲမွဲမ္ဂး လ္ပစှေ်စိုတ်ပြဟ်ဏီညိ။ ပရိုၚ်ဇကုမိၚ်လဝ်ဂှ် ပရိုၚ်ဍာံဍာံရဟာ၊ ပရိုၚ်ပတောံရဟာဂှ် ဗက်ဂၠာဲရံၚ်စမ်ရံၚ် ဌာနပရိုၚ် လုပ်ကဵုသၞောဝ်တအ် ကၠာညိဂှ် မိက်ဂွံဗတိုက်ဖၟောဝ်ဏာကီုရ။

ပ္ဍဲဂိတုဒဳဇြေမ်ဗာ၊ စၟတ်တ္ရဲ၆ အခိၚ်ၜိုန်၂နာဍဳပြၚ်ၚ်ဂှ် နူကဵုpage Myanmar Celebrity Clubဂှ်မွဲကဆံၚ် ဒးဒှ်ရ လ္တူဍုၚ်လ္ဂုၚ် လ္ပာ်ဗၟံက်ဂှ် ဂကူစၟယဲတၟိ ကော်Omicrenဂှ် ကၠောံထၞာန်ဒးအာ ပ္ဍဲမၞိဟ်မွဲဂှ်ဂးတုဲ ချူပတိုန်လဝ် ပရိုၚ်ပတောံဂှ် လ္တူpage မုက်လိက်facebookညးတအ်ရ။ ပရိုၚ်ဂှ် မံက်တိုန်ကၠုၚ်မွဲဒမြိပ်ဓရ် မၞိဟ်ကဵုလဝ်likeလ္ရီပြၚ်တုဲ မၞိဟ်shareလဝ်ၜိုန်၈၅၂တၠဂှ် ဂွံဆဵုကေတ်ရ။

ပရိုၚ်ဂှ်ဒဒှ်ရပရိုၚ်ဗၠေတ်တ်မွဲဂှ် နူကဵုဌာနပရိုၚ် ညးစၟဳစၟတ်ပရိုၚ် ဒး၊ ဟွံဒးပိုဲတအ်လေဝ် ပရိုၚ်ဂှ် ဒးဒှ်ရပရိုၚ်ပတောံမွဲဂှ် မိက်ဂွံပတိုန်ထ္ၜးနကီုရ။ ပရိုၚ်ဂှ်မုဟိုတ် ဂွံစၟတ်သ္တီလဝ် ပရိုၚ်ပတောံမွဲဂှ်တှေ် ပရိုၚ်ဂှ်တိုန်ဂွံ ၜိုန်မွဲချိၚ်ခဏဓရ်ဟေၚ်ရ နူကဵုpageညးတအ် ကလေၚ်သောၚ်ကလးလဝ်နွံကီုရ။

ဗီုပြၚ် ညးတအ်ကလေၚ်ချူပတိုန်လဝ် လ္တူpageညးတအ်ဂှ်တှေ်’’ ရဲဗှ်လိက်တအ် ညးဂမၠိုၚ်တအ်ဂှ် ဒုၚ်ဏာဂုဏ်ကီုရ။ ဆဵုစၟယဲOmicronတၟိဟီုဂှ် ဒှ်မံၚ်ပရိုၚ်ဗၠေတ်တ်ဟေၚ်ရ။ ပရိုၚ်ဂှ် နူကဵုဂကောံ ညးရီုဗၚ်မၞိဟ်တအ် ထမံက်ထ္ၜးလဝ်မွဲကဆံၚ်တုဲမှ ကလေၚ်ချူပတိုန်လဝ်ရောၚ်။’’ သာ်ဝွံ နူကဵုpage Myanmar Celebrity Clubတအ် ကလေၚ် ဒုၚ်ဂုဏ်တုဲသောၚ်ကလးလဝ် သာ်ဏံရ။

ဟိုတ်ဒှ်သာ်ဏံကီုရ ညးမဗှ်ဒၟံၚ် လိက်ပရိုၚ်တအ်ညးဂမၠိုၚ်လေဝ် ဆဵုတမ်ရိုဟ်ပရိုၚ်မွဲမွဲမ္ဂး လ္ပပတှေ်စှေ်စိုတ် ပြဟ်ဏီညိ။ ကလေၚ်ကျောဝ်ရံၚ် pageညးပတိုန်ပရိုၚ်ပတောံတအ်ဂှ်ကီု၊ ဗက်အာဗဵုရံၚ် နူဌာနပရိုၚ် လုပ်ကဵုသၞောဝ်တအ် ချိုတ်တ်ပၠိုတ်တ်တုဲမှ ပတှေ်စှေ်စိုတ်ညိဂှ် မိက်ဂွံဗတိုက်ဖၟောဝ်ဏာကီုရ။

ညးမင်မွဲ အန္တရာယ် ဒဝ်အံင်သာန်သုကျဳမွဲတၠ မၞုံယၟုချေဝ်ရီထိတ် ဝွံ ဒးဒုၚ်ရပ်စုတ်ထံင် ပွိုင်(၆)သၞာံဂးတုဲ ပရိုင်ပတောံတအ် ပြးတိတ်ကၠုင်မံင် လ္တူSocial Media ရ။ ပရိုင်ဂှ်ဒဒှ်ရ ပရိုၚ်ပတောံမွဲဂှ် နူကဵုဂကောံစၟဳစၟတ်ပရိုင်ဒး၊ ဟွံဒးပိုဲတအ်လေဝ်စၟဳစၟတ်လဝ်နွံကီုရ။

ပရိုၚ်ဂှ်ကလေၚ်စၟဳစၟတ်ရံၚ်တုဲ သၟာပရိုၚ် CAN နူကၟိန်ဍုၚ်စၚ်ကာပူမွဲတၠဂှ် ပ္ဍဲဂိတုနဝ်ဝေမ်ဗာ စၟတ်တ္ရဲ(၂၀)ဂှ် လ္တူအကံက်Tweetညးဂှ် ညးချူပတိုန်လဝ်’’ချယ်ရီထက်ဝွံ ဟိုတ်နူကဵု ဖံက်ဒးသၞောဝ်ဗၠာဲသၟိၚ်တုဲ ဒးဒုၚ်ထပ်ဂဗုတ်ိိိ      လဝ်တုဲ ဒးဒုၚ်စုတ်ထံၚ်(၆)သၞာံမာန်မံၚ်ဏောၚ်’’ဂးတုဲ ကၠာဲလဝ်ဒးဘာသာသာဗၠေတ်တ်ညးသ္ကအ်တုဲ နူဂှ်မွဲကဆံၚ် ပရိုၚ်ပတောံမံက်တိတ်ကၠုၚ်ရ။ တုဲပၠန် ပရိုၚ်ဂှ် နုဌာနပရိုၚ် လုပ်ကဵုသၞောဝ်တအ်လေဝ် ဟွံဂွံထမံက်ထ္ၜးလဝ်ဏီရ။ တုဲပၠန် ဂဗုတ်ညးဂှ် စၟဳစၟတ်မံၚ်ဟွံတုဲဒှ်ဏီရ။

ရဲပတိုန်ပါဲပရအ်ဒၟံၚ် ပရိုၚ်ပတောံဏံဂှ် ဒုၚ်လဝ်ယၟုမဳဒဳယာမွဲတုဲ လ္တူpageညးတအ်ဂှ် ပတိုန်ဒၟံၚ် ပရူလဟိၚ်စိုတ်တအ်၊ ပရူညံၚ်မၞိဟ်တအ် စိုတ်ဂွံလုပ်စကဵုpageညးတအ်မာန်ကီု နှောရဴချူပတိုန်မံၚ်ဂှ် ဂွံဆဵုကေတ်ရ။ တုဲပၠန် ရံၚ်ကေတ်pageဇဂှ်တှေ် ဒှ်မံၚ်ညးဗက်ဂၠာဲသြန် လ္တူFacebookတအ်တုဲ ဒှ်မံၚ်Instant Article postတအ်ဟေၚ်ရ။

ဟိုတ်ဒှ်သာ်ဂှ်ရ ပုရိသာဒ်ညးမဗှ်မံၚ်ပရိုၚ်တအ်လေဝ် ဆဵုတမ်ရိုဟ်ပရိုၚ်မွဲမွဲမ္ဂး ကၠာဟွံဂွံပတှေ်စှေ်စိုတ်ဏီဂှ် ဗက်ဗှ်ဂၠိုက်ဂၠာဲရံၚ်ချိုတ်တ်ပၠိုက်က်ကၠာညိ။ ပရိုၚ်ဂှ်ကၠုၚ်နူကဵု pageဌာနပရိုၚ် လုပ်ကဵုသၞောဝ်ရဟာ၊ pageဂၠာဲသြန် ပတိတ်ဆီညးဍုၚ်ကွာန်တအ်ရဟာဂှ် ပါဲပါ်တုဲ ချုပ်ကဵုအးတုဲမှ ပတှေ်စှေ်စိုတ်ညိဂှ် မိက်ဂွံဗတိုက်ဖၟောဝ်ဏာရ။

နူကဵုအလဵုအသဳတုဲကၠုၚ် ယာယီသမ္မတ ဥုမျေအ်ဇြိုဲ ဂှ် သၠဲပအပ်လဝ်အဝဵု ကု သကိုပ်ပၞာန်ဇၞော် မေန်အံၚ်လှုာၚ် ဂှ် ကလေၚ်သီရုပ်ထောံရရောၚ် တုဲကၠုၚ် အံက်တဝ်ဗာ ၁၂ ဂှ် လိက်ပၟိၚ်ပတောံ တိတ်ကၠုၚ်မွဲတၞးရ။

 ဗီုပြၚ်ချူလဝ်ပ္ဍဲလိက်လလောၚ်တြးပ္တောံဂှ်တှေ် အလဵုအသဳပၞာန်တအ် စပတံနူကဵု ထိၚ်ကေတ်အဝဵုဂှ်တုဲ ပ္ဍဲပွိုၚ်(၈)ဂိတုဏံ ညးဍုၚ်ကွာန်တံဒစဵုဒစးထ္ၜးကၠုၚ်ဆန္ဒကီု၊ ပၠန်ဂတး ရပ်လွဟ်တုဲ ပေဲါဗတိုက်ကတဵုဒှ်ကၠုၚ်ကီု၊ ဘဝကဆံၚ်ဒၟံၚ် မၞိဟ် ကေုာံ ပရေၚ်ပိုန်ဒြပ်ဆုတ်ယောၚ်စှေ်အာဂှ်ကီု၊ ဟိုတ်ဒးဆဵုဂဗကဵုဍုၚ်လီုသရိုဟ်ဂှ်တုဲ နကဵုလိက် စၞောန်ပၟိၚ် စၟတ် ၁၊၂၀၂၁ ပိုဒ်(၄၁)ဂှ် နကဵုလလောၚ်တြးလဝ် အကာဲအရာဍုၚ်ကာတၟေၚ်ဂှ် ကလေၚ်ရုပ်သီထောံရရောၚ် ပ္ဍဲလိက် (ပတောံ) ဂှ် ချူဗမံက်လဝ်ရ။

ဟိုတ်သာ်ဂှ်တုဲ နူကဵု ညးက္ဍိုက်ပ်သီလဝ်အဝဵုအာဏာဍုၚ်ဂှ် ကလေၚ်သီရုပ်တုဲ သွဟ်ပေဲါရုဲမာဲ ၂၀၂၀ ဂှ်ဟေၚ် ဒှ်ဒတန် ရောၚ် လိက်ဂှ်ချူလဝ်ရ။

ၜိုန်ရလိက်လလောၚ်တြးသာ်ဂှ်ကၠာလေဝ် ဌာန်ပရိုၚ်နွံသၟဝ်တဲ ကံၚ်သဳပၞာန်တံ မပ္တံကဵု (မြဝတီ)၊ (မြန်မာ့အသံ)၊ ဒး လလောၚ်တြးကီုလေဝ် ဟွံဆဵုပရိုၚ်တံဂှ်တုဲ တၞဟ်ခြာဒၟံၚ်ကဵုလိက်စၞောန်ပၟိၚ် နူရုၚ်သမ္မတ ရောၚ်ဂှ်လေဝ် နူကဵုဌာနပရိုၚ် ဂကောံဒး၊ ဗၠေတ် ‘မဇ္ဇျိမ’ တံ ဒးဒှ်ရလိက်လလောၚ်တြးပ္တောံဂှ် စၟဳစၟတ်ဆဵုညာတ်သာ်ဝွံရ။

နကဵုလၟေၚ်ဓမ္မတာ လိက်လလောၚ်ပၟိၚ်နူရုၚ် သမ္မတမ္ဂး တဆိပ် လိက်ဒုၚ်လက္ကရဴဂှ် ကၠးကၠး (transparent) ဖန်ကၠောန်လဝ်ဟွံမွဲတုဲ လိက်လၟုဟ်ဂှ် နကဵုတဆိပ် ဂှ် ကၠောန်သ္ပလဝ် ကၠးကၠး (transparent) ရ။

တုဲပၠန် လၟေၚ်လိက်ရုၚ်သမ္မတ မ္ဂး ပ္ဍဲကဵုမုက်လိက်ပထမ မုက်လိက် (၁) စုတ်လဝ်ဟွံမွဲတုဲ ပ္ဍဲလိက်လၟုဟ်ဂှ် စုတ်လဝ် မုက်လိက် (၁) နွံရ။

ဟိုတ်နူဂှ်တုဲ လိက်တြးဒၟံၚ် လတူ သဵုယှေဝ်မဳဒဳယာ ဒဒှ်ရ ယာယဳသမ္မတ သၠဲအပ်ဏာအဝဵုဂှ် လိက်ပၟိၚ် ရုပ်သီထောံရ ရောၚ် ဖန်ဗဒှ်လဝ်ဂှ် ဒှ်လိက်ပတောံရောၚ် မိက်ဂွံဟီုဏာရ။

ပူရိသာဒ်ညးမဗှ်ပရိုၚ်တအ် ဆဵုတမ်ရိုဟ်ပရိုၚ်မွဲမွဲ၊ လိက်လလောၚ်တြးမွဲမွဲကဵုဒှ် ပ္တောံပတိုန်လဝ်  ညံၚ်ဌာနပရိုၚ်လုပ်သၞောတ်မွဲကီု ဒှ်မံၚ်သံသယလ္တူပရိုၚ်ဂှ်မ္ဂး လ္ပပေတှ်ပြဟ်ညိ။ ဗက်ဗှ်ရံၚ်ဌာန်နပရိုၚ် လုပ်မံၚ်ကဵုသၞောဝ်တအ်ညိ။ အတိုၚ်ဟီုဓမံက်လဝ်ပရိုၚ်ဏံဝွံ ဒှ်ပရိုၚ်ဍာံမံၚ်ရဟာ၊ ပရိုၚ်ပတိုန်နၚ်လဝ်နူကဵုဌာန ပရိုၚ်နွံကဵုသၞောဝ်တအ်ရဟာ၊ ပါ်ပါဲကဵုအးတုဲမှ ပေတှ်ဇှေ်စိုတ်ညိ မိက်ဂွံကဵုဏာသတိရ။ ပါ်ပါဲလေပ်စဳကၠးမ္ဂး ဒှ်ဂုဏ်ဖိုဟ် သွက်ဘဝပိုဲတအ်ရ။