ကမၠောန်ကၠောန်တၟံ ကမ္ပနဳ Long Life Aggregate Mining Co.Ltd နွံဇရေၚ်ကွာန် (ဥတ္တံတား) ပွိုၚ်ဍုၚ်ပံၚ်၊ တွဵုရးမန်ဂှ် ဒိုအ်ကဵုညိ ရုပ်ကဵုညိ သာ်ဏအ် ပ္ဍဲဂိတုဂျုန် (၅) ဂှ် ကောန်ဒေသ ၜိုတ် (၅၀၀) တအ် နူကဵုကွာန် (ဥတ္တံတား) ဇက်ထ္ၜးဆန္ဒ ကညာၚ်ဒ္စဵုဒ္စးအာ ဒဵုကဵုစိုပ် ဒၞါဲကမ္ပနဳတၟံတေံရ။
ကိစ္စပ္တိတ်ဒြဟတ်ဓါတ်လလဳ နကဵုချးတၟံဂှ် ရဲဒေသကဵု တလပညာတအ် ဒ္စဵုဒ္စး ဒၞါတာဒၟံၚ် ဂၠိုၚ်ကဵုဝါရတှေ် နကဵုကမ္ပနဳ ရုၚ်စက်တိဗိလာတ်မတ်မလီု MCL ဏအ် ဒိုအ်ကဵုထေက်ရ သာ်ဝွံ ပ္ဍဲဂိတုဂျုန် (၁)မံက် အဃောဆဵုကဵု ညးစၞးကၠတ်ထဝ် တွဵုရးမန်ဂှ် ကျာ်ဇၞော် ဘာကွာန်နှေဟ်ဍုၚ် ဒေသဒဵုသာဲ ပွိုၚ်ဍုၚ်ကျာ်မြဟ် တွဵုရးမန် ဟီုမြော်ဏာ ဂလာန်သာ်ဂှ်ရ။
ညးဒးဒုၚ်ပန်ဂစိုတ် ကောန်ကွာန်မၚ်ဂၠန် (၂) တၠဝွံ ပေၚ်အာ (၃) ဂိတုကီုလေဝ် စပ်ကဵုပရေၚ်ဂဗုတ် ဟွံပြေပြံၚ် ဏီတုဲ တၠဂုဏ်အ္စာ/ခၟဳသၚ်တံကဵု သၟတ်ဂမၠိုၚ်တံ ပံၚ်ကောံတုဲ ကၠောန်ဏာပေဲါရာဒနာမိက် အလန်တတိယ ပ္ဍဲကဵု ကျာ်သာၚ်ဍုၚ်ရေဝ်တုဲ သွက်ဂွံဆက်ကၠောန်အာ ပေဲါရာဒနာမိက် ပ္ဍဲဍုၚ်လ္ဂုၚ်နွံဏောၚ် ညးက္ဍိုက်ပ်ကၠောန်ပေဲါရာဒနာမိက်တံဂးရ။
ဒုဥက္ကဌ ကၠတ်ထဝ်တွဵုရးဍုၚ်မန်ကီု ဥက္ကဌကမ္မတဳပရေၚ်ကေၚ်ကာကၠတ်ထဝ် ၃ တၠ ကေုာံ ညးတာလျိုၚ်တအ်ဂမၠိုၚ် ပ္ဍဲဂိတုဂျုန် (၁) ဂှ် အာစိုပ်လ္ၚတ်ဗဵု ရုၚ်စက်တိဗုတ် MCL ရောၚ် ဂွံတီကေတ်ရ။
သွက်ကောန်ဂကူ ကောန်ဍုၚ်အရၚ် မတန်တဴဒၟံၚ် ပ္ဍဲတွဵုရးဍုၚ်မန် ကေုာံ ပ္ၚံက်ၜဳမုဟ်တၟံတအ် သ္ဂောံဇၞော်မောဝ် ဖေါအ်ဗြေဝ်ကီု၊ သ္ဂောံဂွံအခေါၚ်အဝဵုညးကဵုညးကီုဂှ် ပၟိက်ဇၞော်ကွေံကွေံရောၚ် ပတှေ်ကေတ်တုဲ ပ္ဋဲဂိတုမေ ၃၀ ဂှ် ဂကောံမှာဇန်မန် ဗၞတ် (၁၀) ဂကောံ မၞုံအပ္ဍဲတွဵုရးဍုၚ်မန်တအ် ပံၚ်တောဲတုဲ ဒက်ပ္တန်ဂကောံ နကဵုယၟု ‘ဂကောံပံၚ် တောဲဖောအ်ဗြေဝ် ပ္ၚံက်ၜဳမုဟ်တၟံ’ (The Gulf of Martaban Development Consortium-GMDC) မွဲရ။
ပ္ဍဲတိဝါ ကွာန်ဒံၚ်ရာတ်ပလိုတ် ပွိုၚ်ဍုၚ်ၜါသွာၚ် (တ္ကအ်ခၟိုၚ်) တွဵုရးမန်ဂှ် ဍာ်ၜဳဇၞော် တိုန်စိုုပ်ဒၟံၚ်တုဲ အခါဍာ်ကလေၚ်စှေ်မ္ဂး တိဝါ ဒှ်ဒၟံၚ်ပရၚ်ၜဳ ဂှ်လေဝ် လာ်စှေ်ဒၟံၚ်သိုက်က် သာ်ဝွံ ဂွံတီကေတ် နူရဲဒေသဂှ်ရ။
သၟာကမၠောန်ပလုၚ် ပြံၚ်ကၠုၚ်ကၠောန်ဒၟံၚ်ကလောန်တမ္ၚာ ပ္ဍဲဒေသပွိုၚ်ဍုၚ်ရေဝ် တွဵုရးမန်ဂှ်ဝွံ အကြာဍေံတအ်ကဵုဍေံတအ် ပွဂစိုတ်ညးသ္ကအ် ဆက်ဒှ်မံၚ်ဖိုဟ်တုဲ ပ္ဍဲဂိတုမေဏအ် အမှုမၞိဟ်ချိုတ်မွဲအမှု ကဵု အမှုဂစိုတ်မၞိဟ်မွဲအမှု ထပ်ဒှ်တိုန်ပၠန် ဂွံတီကေတ်ရ။
ညးမယိုက်က္လေၚ်လဝ် တာလျိုၚ်ပရေၚ်ဂကူမန် ကေုာံ ကေၚ်ကေတ်လဝ်တာလျိုၚ် နဒးဒှ်ဥက္ကဌ ပ္ဍဲဗော်ဒဳမဝ်ကရေ သဳကောန်ဂကူမန်ကဵု နဒးဒှ် နာယက ဗော်ဒဳမဝ်ကရေသဳကဵု ဗော်ကောန်ဂကူမန် နာဲထဝ်သောန်ဝွံ စုတိကလိ လောန်စဴအာ ပေၚ်ဂွံဗ္ဒဲါ (၂) သၞာံဝွံတုဲ လၟုဟ်ဝွံ သွက်ဂွံသိုၚ်ခၞံအာ ဂိုဟ်စၟတ်သမ္တီ ပ္ဍဲကဵုဍုၚ်ပံၚ် နွံမံၚ်ရောၚ်ဂွံတီ ကေတ်ရ။
ကမ္ပဏဳ June Cement Industry Ltd. မဂွံလဝ်အခေါၚ် သိုၚ်ရုၚ်စက်တၟိ တိဗုတ် ပ္ဍဲဒေသဒဵုသာဲ ပွိုၚ်ဍုၚ်ကျာ်မြဟ် တွဵုရးမန်ဂှ်ဝွံ ၜိုန်ရပ်ဒၟံၚ်ကလောန် သိုၚ်ခၞံဣရကီုလေဝ် ညိလေဝ် ဟွံဂွံကဵုလဝ်သမ္တီ ကုအလဵုအသဳ တွဵုရးမန်ရဂှ် ဂွံတီကေတ်ရ။
ကောန်ကမၠောန် (၅) တၠ မဝဳမၚ်ဒၟံၚ်သဵု ဗော်ဍုၚ်မန်တၟိ ပ္ဍဲတ္ကအ်ကောန်လုံ ပွိုၚ်ဍုၚ်ရေဝ်ဂှ် နူဒပ်ပၞာန်ဍာ် အလဵုအသဳ ရပ်ဏာတုဲ ပ္ဍဲဂိတုမေ ၁ရ ဂှ် ကလေၚ်ဗၠးစဴကၠုၚ်ဣရ ရဴဝွံ ဂွံတီကေတ်နူဂြောဝ်ဂတာ တၠခန္ဓ တအ်ရ။