မာံတဵုလွဳ
ကွးဘာလုပ်သှ်လိက် ဘာတန်သၠုၚ် မၞုံသၟဝ်အုပ်ဓုပ် ကမ္မတဳပရေၚ်ပညာမန် သၞာံဏံဂှ် အံၚ်ဂၠိုၚ် နူသၞာံအာတေံဏီရောၚ် ဂွံတီကေတ်ရ။
အတိုၚ်စရၚ်အံၚ် ကွးဘာစှ်တန် လလောၚ်ပတိတ် ပ္ဍဲဂိတုဂျုန် ၁၃ ဏံမ္ဂး ကွးဘာဘာကောန်ဂကူတံဂှ် အံၚ်ဂၠိုၚ်နူသၞာံအာတေံတုဲ ဂုဏ်တၟေၚ်လေဝ် တိတ်ဂၠိုၚ်ရောၚ် သ္ဂောံတီကေတ်ရ။
ပ္ဍ္ဍဲသၞာံဗ္တောန်ပညာ ၂၀၀၈-၂၀၀၉ သၞာံအာတေံဂှ် နူဘာကောန်ဂကူ ကွးဘာ လုပ်သှ် ရ၆ တၠတုဲ အံၚ်ကၠုၚ် ၂၇ တၠရ။ သၞာံဏံဂှ် ကွးဘာ လုပ်သှ် ရ၉ တၠ အံၚ်အာ ၃၄ တၠရ။
“ကွးဘာတံ ဂွံအံၚ်ဂၠိုၚ်ကၠုၚ်ဗီုဏံဂှ် ဟိုတ်နူပရေၚ်ဂစာန်လွဳပရာ ကွးဘာတံကီု၊ ဟိုတ်နူ စွံဇြိုဟ်နက်ကဵု ပရေၚ်ပညာကီုဏောဝ်” ဂှ် အာစာဗြဴ နူဘာကောန်ဂကူ ဗဒိုပ်ညဳသာမွဲတၠ ဟီုရ။
ပၞောဝ်ကဵုဘာတန်သၠုၚ် ကောန်ဂကူမန် မၞုံ ပိဘာ ပ္ဍဲကွးဘာတန်သၠုၚ် ဗဒိုပ်ညဳသာ လုပ်သှ် ၂၄ တၠဂှ် အံၚ် ၁၆ တၠ၊ ပ္ဍဲဘာအၚ်ဒၚ် ပွိုၚ်ဍုၚ်ရေဝ် လုပ်သှ် ၂၆ တၠဂှ် အံၚ်၁၆ တၠ၊ ပ္ဍဲဘာဝၚ်သပဝ် ပွိုၚ်ဍုၚ်လှာဒကှ် လုပ်သှ် ၂၉ တၠဂှ် အံၚ်အာ ၁၁ တၠအိုတ်ရ။
ပၞောဝ်ကဵုကွးဘာအံၚ်အာ ၃၄ တၠဂှ် ကွးဘာကလိဂွံ ဂုဏ်တၟေၚ်မွဲဘာသာ ပါ ၆ တၠရ။
“ဇၟာပ်ဇၟာပ်ကွးဘာ မိက်ဂွံအံၚ်စှ်တန် ဖအိုတ်ရ။ ပ္ဍဲကွးဘာအံၚ်ဖအိုတ်ဂှ် ကွးဘာဂွံဂုဏ်တၟေၚ်မွဲဘာသာ ပါ ၆ တၠတှေ် ပ္ဍဲညးအံၚ်ဂှ် ဂွံဂုဏ်တၟေၚ် ၁၅ တၟံကၠံရ။ နကဵုဘာဂြိုပ်ကွာန်ဂြိုပ်မွဲ ဒးကေတ်ဂုဏ်စရာဲထေက်ရ” သာ်ဝွံ မိကွးဘာ နူကွာန်အၚ်ဒၚ်မွဲတၠ ဟီုရ။
“ဗွဲတၟေၚ် ပ္ဍဲဍုၚ်ဇၞော်ဂှ် ကပေါတ်ကိရိယာ ဗ္တောန်လိက်တံ ဍိုက်ပေၚ်မံၚ်၊ အာစာတံလေဝ် ဍိုက်ပေၚ်မံၚ်၊ တုဲတှေ် ကျူရှေန်တံလေဝ် ဍိုက်ပေၚ်မံၚ်၊ ဖအိုတ်သြန်မာန်တှေ် ဂွံဂုဏ်တၟေၚ်ဂၠိုၚ်ဂၠိုၚ်ဂှ် ဒှ်မံၚ်သၞောဝ်ပရေၚ်ပညာ ဍုၚ်ဗၟာရ” ရဴသာ်ဝွံ အာစာဘာ ဒေံါဇူ နူဘာဝၚ်သပဝ်မွဲတၠ ဟီုရ။
သၟဝ်ကောပ်ကာဲ ကမ္မတဳပရေၚ်ပညာမန် ဘာကောန်ဂကူ မၞုံ ၁၅၄ ဘာတုဲ ဘာပံၚ်တောဲလဝ်ကဵု ဘာအလဵုအသဳ မၞုံ ၁၁၈ ဘာရ။
