နာဲမာန်

ကြဴနူဗမ်ဟတိုဟ်ပ္ဍဲလ္ဂုၚ် တ္ၚဲအတးကြာပ်သၞာံဂှ်တုဲ သွက်ဂွံစဵုဒၞာ ရဲဖံက်ဟတိုဟ်ဗမ်တအ် ဖေက် ဟတိုဟ်ကဵုဖုၚ်တုဲ ရဲကၠုၚ်ရာန်ကာဒ်ဖုၚ်တှေ် တၠဆေၚ်တအ် ကေတ်သီုတၞးဆာဲစၟတ်လိက် ကောန်ဍုၚ်တုဲမှ သွံကဵုကာဒ်ဖုၚ်ရောၚ် ရဲရာန်ကာဒ်ဖုၚ်တအ် ဟီုရ။

“ကၠာတေံရာန်မံၚ်ကာဒ်ဖုၚ်ဂှ် မွဲအလန်လေဝ် ဟွံဒးကေတ်တၞးဆာဲစၟတ်လိက်ကောန်ဍုၚ်ပုဟ် လၟုဟ်မှ ဂွံဆဵုမွဲအလန် တၠဆေၚ်တအ် ကဵုဆာဲတၞးဆာဲစၟတ်လိက်ကောန်ဍုၚ်တုဲ ဂၞန်ဖုၚ်ဇကုရာန်ဂှ်လေဝ် ညးတအ်ချူသမ္တီလဝ်ကီု” သာ်ဏံ ညးရာန်ကာဒ်ဖုၚ် (CDMA) ရဲလ္တူဍုၚ်မတ်မလီုမွဲတၠ ဟီုရ။

ကာဒ်ဖုၚ်တိတ်ဒၟံၚ်အလန်လက္ကရဴဏံဝွံ ဂကူဖုၚ် (CDMA) 450 MHS ဂှ် ဒးကဵုၚုဟ်သြန် (FEC -50) တုဲ ဒတုံတော်သြန်ဗၟာမ္ဂး (၅၀၀၀၀) ဒကေဝ်ပြၚ်ၚ်ရ။ ကာဒ်ဖုၚ် (GSM) ဂှ် ဒးကဵုၚုဟ်သြန် (FEC-20) တုဲ ဒ တုံၚုဟ်သြန်ဗၟာ (၂၀၀၀၀) ပြၚ်ဒကေဝ်ရ။

ဂွံသုၚ်စောဲဖုၚ်တဲမာန်ဂှ် မၞိဟ်ဓမ္မတာတအ် ရာန်သုၚ်စောဲဟွံမာန်တုဲ ဖုၚ်တဲစုတ်ကေတ် ကာဒ်တိတ်ဒၟံၚ်လၟုဟ်ဂှ် ၝောံဖုၚ်ဂှ် ရာန်ကေတ်လောဲလောဲ နကဵုၚုဟ်တန်တန်တုဲ ကာဒ်ဖုၚ်ဒးရာန်နကဵု ၚုဟ်ဍၚ်ၚ်ရ။ ဟိုတ်နူရာန်ကေတ်ဂွံလောဲလောဲဂှ်ရ ညးသုၚ်စောဲဖုၚ်တဲစုတ်ကေတ်ကာဒ်တအ် သုၚ်စောဲ ဂၠိုၚ်ကၠုၚ်ဒၟံၚ်ရ။

ကာလဗမ်ဟတိုဟ်ပ္ဍဲလ္ဂုၚ် တ္ၚဲအတးကြာပ်သၞာံဂှ်တုဲ သှေ်ဗမ်မွဲမ ဟွံဟတိုဟ်ဏီဂှ် ဗမ်ချိၚ်ဟတိုဟ် လဝ်ကဵုဖုၚ်ဏောၚ် ဂကောံအလဵုအသဳပၞာန်တအ်ဂးရ။ ဟိုတ်ဂှ်ရ ကြဴဏံ စပ်ကဵုပရေၚ်ရာန်ကာဒ်ဖုၚ် ဒးကဵုတၞးဆာဲ စၟတ်လိက်ကောန်ဍုၚ်ဂှ် မံက်တိုန်ကၠုၚ်ရ။

ပ္ဍဲကၟိန်ဍုၚ်မန်ဗၟာဂှ် ဗမ်ဟတိုဟ်ချိၚ်ကဵုဖုၚ် ဟွံပြာကတ်ကီုလေဝ် ပ္ဍဲကၟိန်ဍုၚ်သေံ သ္ကုတ်သၠုၚ်ကျာဂှ် ပြာကတ်ကွေံကွေံရ။ ဟိုတ်နူဂှ်ရ အလဵုအသဳပၞာန်ဗၟာ ဂွိၚ်ဖေက်ဗမ်ချိၚ်ကဵုဖုၚ်ဂှ် ပြာကတ်တုဲ လၟုဟ်ရဲရာန်ကာဒ်ဖုၚ်တဲတအ် ယဝ်ဂၞန်ဖုၚ်ဂှ် ဗမ်ဟတိုဟ်မ္ဂး ဂကောံအလဵုအသဳပၞာန်တအ် ဂွံထိၚ်ရပ်မာန် သာ်ဏံ ရဲကၠိုဟ်ပရေၚ်ဖုၚ်တအ် ဟီုထ္ၜးရ။

သၞာံတုဲကၠုၚ်ဂှ် ဟိုတ်နူဗမ်ချိၚ်ကဵုဖုၚ် ဟတိုဟ်ဒၟံၚ်ပ္ဍဲဍုၚ်သေံ ချိုတ်ဂျိုၚ်ဂၠိုၚ်လောန်တုဲ ရဲရာန်ကာဒ်ဖုၚ် ဒေသပယျဵုတအ် စၟတ်လိက်ကောန်ဍုၚ်သေံနွံမှ ရာန်ကာဒ်ဖုၚ်ဂွံမာန် ဒှ်ကၠုၚ်မွဲအံၚ်ကီုရ ကြဴဏံ ထိၚ်ကေတ်ဟွံမာန်တုဲ လၟုဟ်ပရေၚ်ရာန်ကာဒ်ဖုၚ် စၟတ်သမ္တီဂၞန် စၟတ်လိက်ကောန်ဍုၚ်ဂှ် ပြေဟဲအာရ။