နာဲမာန်
မွဲဒမြိပ်ကွာန် မၞုံဇရေၚ်ဒေသပွဳပွိူဗဟဵု ဗော်ဍုၚ်မန်တၟိဂမၠိုၚ် ဟိုတ်နူဥတုပြံၚ်လှာဲတုဲ မၞိဟ်ဇၞော်ကောန်ၚာ်သၟတ်တအ်ဗွဲမဂၠိုၚ် ယဲဇွဟ်က္တဵုဒှ်ဂၠိုၚ်ဒၟံၚ်ယျရောၚ် အစာဂဥုဲ ကေတ်ဒၟံၚ်တာလျိုၚ် ပ္ဍဲရုၚ်ဂဥုဲ ကွာန်ပၞၚ်ဗိုန်မွဲတၠ ဟီုလဴထ္ၜးရ။
“ ပ္ဍဲကဵုမွဲတ္ၚဲတှေ် ညးဇၞော်ကီု ကောန်ၚာ်တအ်ကီု ၜိုတ်(၃၀) တၠ ကၠုၚ်ထ္ၜးဒၟံၚ်ယဲတှေ် ကဝက်ပြၚ်ၚ် (၁၇) တၠဂှ် ဂွံဆဵုကေတ် စၟယဲဇွဟ် မပ္တံကဵု (PF-PV)၊ ၜံက်ဆီ (၁၀) တၠတှေ် (၅) တၠ ဟွံသေၚ် (၇) တၠဂှ် ဂွံဆဵုကေတ် ဒှ်ဒၟံၚ်စၟယဲဇွဟ်ဏောဝ်၊ ကၠာတဲ ဗြဲစဂူညိညိဂှ် ဒှ်ဟွံဂၠိုၚ်ဏီ လၟုဟ်ဗြဲဂှ် စဂူတိုန်ဆက်က်ညိဂှ် ဒှ်ဂၠိုၚ်တိုန်မံၚ် အရိုဟ်တ္ၚဲ” သာ်ဏံ ဒုညးလျိုၚ် ရုၚ်ဂဥုဲကွာန်ပၞၚ်ဗိုန် မိပ္ကဴရတ် ဟီုလဴထ္ၜးကဵုရ။
ပ္ဍဲဒေသ မွဲဒမြိပ်ကွာန် မၞုံပွဳပွူဗဟဵု ဗော်ဍုၚ်မန်တၟိ မပ္တံကဵုကွာန်ပၞၚ်ဗိုန်၊ ကွာန်စောဝ်ခပြု၊ ဗဒိုပ်ညဳသာ၊ ကွာန်ချေံဍာ်၊ ဗလးဒုန်ဖါ် ကေုာံ ပယျဵု ကွာန်ခလံက်ခနဳ ဒှ်တံ လၟေၚ်အရိုဟ်ဟ်သၞာံ စိုပ်ကၠုၚ်အခိၚ်ဗြဲစစိုပ်တိမ္ဂး ဒှ်ဥတုပြံၚ်လှာဲ အကြာကညၚ်ကဵု ကသီုဂှ်တုဲ ညးဇၞော်ကောန်ၚာ်သၟတ်ဟွံရုဲ က္တဵုဒှ်ဒၟံၚ်ယဲဇွဟ်နာနာကီုရ။
“လၟုဟ်ဒှ်ဂၠိုၚ်ဂှ်တှေ် ရဲကၠောန်ကၠအ်တအ်ရ။ အခိၚ်ဏံဂှ် ဒှ်အခိၚ်ကၠောန်ကၠအ်ကီု တုဲတှေ် ဒှ်အခိၚ်ဥတုပြံၚ်လှာဲတၟိတၟိကီု တၟေၚ်တိုန် မံၚ်စပရေံယျညိယျဟီုတှေ် ညံၚ်ဂွံအာထ္ၜး ပ္ဍဲရုၚ်ဂဥုဲ ကြပ်ကဵုဇကု တုဲတှေ် ကာလတိတ်တှေ် ညံၚ်ဂွံတိက်ကဵုကၞော အဓိက ညံၚ်ဂၟိတ် ဟွံဂွိုအ်ကိတ်၊ ဍာ်ပၠန်လေဝ် ညံၚ်ဂွံသုၚ်ဍာ်စိန်န် ဍာ်အးအး၊ ဍာ်မြံၚ် ဍာံပ္ဍဲကဝေက်ဇရဳ (ဟရဳ) ဍာ်ခၠိုၚ်တအ် သၟးဇ္ၚးကိုဟ်ဆာဲကဵု ဒးပကဵုပရေၚ်သၟးကီုဏောဝ်” သာ်ဏံ အာစာဂဥုဲဂှ် ထပ်လဴကဵု ပညာပရေၚ်ထတ်ယုက်ရ။
ညးတၠယဲဝေဒနာတအ် လ္ၚဵုမံၚ်စပရေံတိုန်မ္ဂး စှေ်စိုတ် ဟွံဒးအာထ္ၜးကဵုရုၚ်ဂဥုဲဏီဂးတုဲ ရာန်သုၚ် ဂဥုဲဆေၚ်ဖျာမ္ၚးလေဝ် နွံရ။ ရာန်သုၚ်ဂဥုဲ ဆေၚ်ဖျာမ္ၚးဂှ် ဟိုတ်နူဟွံတီဗၞတ်ဗ္ၜတ်ယဲကီု စၟယဲဂကူသာ်လဵု ဟွံတီချိုတ်တ်ပၠိုတ်တ်ကီု ယဲဂှ်သက်သာစှေ်ကီုလေဝ် စၟယဲဂှ် ဟွံကၠက်တုဲ ကာလယဲဝေဒနာ ကလေၚ်ဂိတိုန်မ္ဂး ယဲဂှ် က္ဍၚ်တိုန် ဒှ်လေပ်ရ။ မွဲသာ်ပၠန် ရာန်စလဝ်ဂဥုဲမ္ၚးတုဲ ကာလစမ်ၜတ်ယဲ ပ္ဍဲဌာန်ရုၚ်ဂဥုဲပၠန်လေဝ် ဟွံဂွံဆဵုစၟယဲတုဲ လွဳဟွံဒးတုဲ ယဲက္ဍၚ်တိုန် ဒဵုကဵုဒးဂွိၚ်ကဵုလမျီု ဒှ်လေပ်မံၚ်ကီုရောၚ် အစာဂဥုဲဗြဴဂှ် ထပ်ပညုၚ်လဝ် ကီုရ။
ပဲါနူကဵု ဗွိုၚ်ဗဟဵု ဗော်ဍုၚ်မန်တၟိဂှ် ဗွိုၚ်အပ္ဍဲဍုၚ်မန်လေဝ် ကောန်ၚာ်ဗွဲမဂၠိုၚ် က္တဵုဒှ်ယဲမနက်ဂၠိုၚ်တုဲ ဇၟာပ်ရုၚ်ဂဥုဲဇၞော် မပ္တံဍုၚ်မတ်မလီု၊ ဍုၚ်မုဟ်ဍုၚ်၊ ဍုၚ်ဇြပ်ဗု ကောန်ၚာ်တအ် ပေၚ်ဍတ်ဒၟံၚ်ကီုရ။ ပ္ဍဲကဵုညးက္တဵုဒှ်ယဲဇွဟ် ဒေသပွဳပွူဗဟဵု ဗော်ဍုၚ်မန်တၟိဂှ် ပရေၚ်ချိုတ်ဂျိုၚ် ဟွံမွဲကီုလေဝ် ပ္ဍဲကဵုဗၞတ်ပွိုၚ်မွဲသတ္တဟမ္ဂး ကောန်ၚာ်တအ် ၜိုတ် (၇) တၠ ချိုတ်နွံမံၚ်ကီုရောၚ် အပါကောန်ၚာ် အာလွဳလဝ်ယဲမနက် ပ္ဍဲရုၚ်ဂဥုဲဇၞော် ဍုၚ်မတ်မလီု ရဲကွာန်ကၟာဝက်မွဲတၠ ဟီုထ္ၜးရ။
0 Comments