မာံအဲဲ
ပ္ဍဲတွဵုရးကရေၚ် ကွာန်မန်မၞုံအပ္ဍဲပွိုၚ်ဍုၚ်ဘာအၚ်ဗွဲမဂၠိုၚ်တံ ဒပ်ပၞာန်ဗၟာ လၟိဟ် (၁၁) မဖျေံလဝ်သဇိုၚ် ပ္ဍဲအိန္ဒု၊ ဂကောံ စရဖ ကေုာံ ဗၠာဲသၟိၚ်တအ် ဗက်ကေတ်မံၚ်အကံက် ပ္ဍဲသ္ၚိ မတောဲလဝ်ဖုၚ်သေံရ။
စနူဂိတုဂျောန်ဏံတုဲ ကွာန်မၞံုပွိုၚ်ဍုၚ်ဘာအၚ် ပပ္တံ ကွာန်ထဝ်ပၠၚ်၊ ကြုၚ်ဘာ၊ ခယျး၊ ကအ်ယက္ခ၊ သာံလှေဝ်၊ ကျာကလေဝ်တံဂှ် မွဲဂကောံတုဲ မွဲဂကောံကၠုၚ်ဗက်ကေတ်မံၚ်အကံက်ပ္ဍဲတၠဖုၚ်တံရ။
“ဇၟာပ်ဂိတု ဒပ်ပၞာန် ဗၠာဲသၟိၚ်၊ စရဖတံ စှေ်ကၠုၚ်ကွာန်တုဲ ကေတ်အကံက်ဖုၚ်၊ မွဲဂကောံတှေ် ဒးကဵုမံၚ် ၅၀၀၀၀ ဒကေဝ်၊ ပိဂကောံတှေ် ၁၅၀၀၀၀ ရ၊ ယဝ်ရဟွံကဵုအကံက်ဖုန်ပုဟ်တှေ် ဍေံတအ်ဟီု ဖုန်တံဂှ်တှေ် ဟွံလုပ်ကဵုသၞောဝ်ပုဟ် ဒှ်ဖုၚ်ပလတ်ဏောၚ်တှေ် အခိၚ်ဟွံရုဲ ဍေံတံသီထောံဖုၚ်မာန်မံၚ်” သာ်ဝွံ တၠဖုန်သေံ မွဲတၠဟီုရ။
ကွာန်မၞုံဒေသဂှ်ဗွဲမဂၠိုၚ်တံ ပရေၚ်ဆက်စၠောံ မွဲဍုၚ်ကဵု မွဲဍုၚ်ဂွံလောဲသွာကီု ဂွံဒှ်အာကမၠောန်ပရေၚ်ပိုၚ်ဂြပ်မွဲကဵုတုဲ ညးတံ ကၠောန်မံၚ် ကမၠောန်ဖုၚ်ဂှ်ရောၚ် ရဲကၠောန်ဖုၚ်လ္တူဍုၚ်ဘာအၚ်မွဲတၠ ဟီုရ။
“သ္ကုတ်လ္ပာ်ပိုဲတှေ် သုၚ်စောဲမံၚ်ဖုၚ်သေံသၟးဂၠိုၚ်၊ ရဲစိုပ်ဍုၚ်သအာၚ်တံလေဝ် ပလံၚ်မံၚ်လှုဲကီု၊ ဗၠာဲသၟိၚ်တံ တီမံၚ်ဒဒှ် ညးတံဂွံမံၚ်လှုဲ ညိညိဇြိုၚ်သာဂှ်ရ ဍေံတံ ကၠုၚ်ကေတ်မံၚ်အကံက်ရဟဂှ်ရ ဇၟာပ်ဍေံတံ ကၠုၚ်ကေတ် ဟွံဂံၚ်ဟီု ဟအှေ်ရ” သာ်ဝွံ ညးဆက်ဟီုရ။
မိၚ်ဒးပရူဗီုဗက်ဟွံဂတာပ် ဂကောံအလဵုအသဳဗွဲမဂၠိုၚ် သွက်သြန်ဂအုံဂးတုဲ ဗက်ကေတ်မံၚ်အကံက်ရ။ ကွာန်မၞုံပ္ဍဲပွိုၚ်ဍုၚ်ဘာအၚ်တံလေဝ် ဟိုတ်နူ သုၚ်စောဲမံၚ်ဖုၚ်သေံ လၟိဟ်ဟွံအောန်ကဵုမတုဲ အကံက်ဖုန်တအ်ဂှ် ပ္ဍဲပွိုၚ်မွဲသၞာံ ဍေံတံဂွံမံၚ်လှုဲဟွံသာပုဟ်ဂှ် ရမျာၚ်တၠဖုန်တအ် ဟီုမံၚ်အိုတ်ရ။
တုပ်တဴသာ်ဂှ်ကီု အပ္ဍဲတွဵုရးဍုၚ်မန် တၠသ္ၚိဖုၚ်ပ္ဍဲပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်ရေဝ်တအ်လေဝ် တၠဖုၚ်တံ ဒးကဵုမံၚ်အကံက် ဇၟာပ်ပ်ဂိတုရ။
အတိုၚ်ရဲတၠဖုန်သေံပ္ဍဲဍုၚ်ဇြပ်ဗုမွဲတၠဟီုဂှ် “နူကဵုဒပ်ပၞာန်ဗၟာ ပ္ဍဲကွာန်ဝါကလဳဂှ် မွဲဂိတုတှေ် ဒးကဵုမံၚ် ဖုၚ်မွဲမတှေ် ၃၀၀၀၀ ဒကေဝ်၊ နူဂကောံဗၠာဲသၟိၚ်တအ်ဂှ် လဆောဝ်တှေ် ရ၀၀၀ ဒကေဝ် စရိတ်သၞာံလေဝ် ဒးကဵုမံၚ်မွဲသၞာံ ပိကိုဋ် ဒကေဝ်၊ အရိုဟ်သၞာံကၠုၚ်ဗက်ကေတ်မံၚ်ရ၊ ဒးကဵုမံၚ်ဂှ် မွဲဂကောံဓဝ်ဟွံသေၚ်ပုဟ်၊ မွဲဂကောံဏံ ဂွံဏာတှေ် ဂကောံတၞဟ်ဂှ် ကၠုၚ်ကေတ်ကီု” သာ်ဝွံ တၠဖုၚ်သေံ လ္တူဍုၚ်ဇြပ်ဗုမွဲတၠ ဟီုရ။
ဆဂှ်သၟးဟွံက ဂကောံမန် ညံၚ်ရဲဂကောံနာဲအံၚ်နာၚ်တံလေဝ် ကေတ်အခေါၚ်နူကဵုအလဵုအသဳတံတုဲ ဗက်မံၚ်အကံက်အကြာတၠဖုၚ်တံလေဝ်နွံမံၚ်ရ။
သွက်ညးတၠဖုၚ်တံ မွဲမွဲသၞာံ ဒးကဵုမံၚ်အကံက် ဂၠိုၚ်ကဵုလက်ကိုဋ်ရ။ ဂကောံအလဵုအသဳတံလေဝ် မွဲသၞာံကဵုမွဲသၞာံ ဂၠိုၚ်တိုန်ဒၟံၚ်ရ။
